Maganu Eltonni Keere Fultinoonni

1, 2. Roomu Sokka 5:12 maa huwanteemmo gede kaaꞌlitannonke?

HANNI Yihowa Farciꞌraasine seekkite affinotanna duucha higge horoonsidhanno qummeeshshuwa borreessate kaoottohu gede assite hedi. Umo borreessatto qummeeshshuwa giddo Roomu Sokka 5:12 heedhannoha ikkara dandaanno. Hanni konne qummeeshsha meꞌꞌe higge qummi assoottoro hedi: “Mittu manchinni kainohunni cubbu tenne alame eino; reyo cubbu widoonni higge daggino. Mannu baalu cubbo loosino daafira, reyo manna baala amaddino.”

² Konne qummeeshsha Qullaawu Maxaafi Addinta Mayyee Rosiisanno? yaanno maxaafi giddo haammate basera qummi assinoonni. Konni maxaafita 3^ki, 5^ki nna 6^ki fooliishsho horoonsidhe oosokkiranna wolu mannira Maganu uullate hedinore, wodonnirenna reyino manni noo gara xiinxallisatto yannara, Roomu Sokka 5:12 nabbawittokki digatatto. Ikkollana, Roomu Sokka 5:12 Yihowa ledo noohe fiixoomi, assattorinna albillittete hexxokki ledo xaadisse hedde egennootto?

3. Cubbaataamma ikkinoommohura maa assineemmo?

³ Ninke baalunku cubbaataammaho. Barru baala soꞌro loonseemmo. Ikkollana, Maganu bushshunni kalaqinonketa hedannohura maarannonke. (Far. 103:13, 14) Yesuusi lawishshu huuccattora, Magano ‘saonke agurinke’ yine huucciꞌneemmo gede rosiisino. (Luq. 11:2-4) Konni daafira, Maganu maarinonketa alba loonsoommo soꞌro hendanni yaada dihasiissannonke. Ikkollana, cubbinkera maaro afiꞌnoommohu ma garinniitironna Maganu maarinonkehu hiittoonniitiro hedanke kaaꞌlitannonke.

ELTOSINNI MAARO AFIꞌNOOMMO

4, 5. (a) Roomu Sokka 5:12 giddo noo hedo huwatate kaaꞌlannonkeri maati? (b) Roomu Sokka 3:24 giddo qummi assinoonniti “Maganu elto” maati?

⁴ Soqqamaasinchu Phaawuloosi Roomu Sokka 5:12 qooxeessira, roorenkanni fooliishsho leete giddo kaaꞌlitanno hedo borreessino. Tini, Yihowa cubbonke maarate assinore huwanteemmo gede kaaꞌlitannonke. Fooliishsho sasete giddo togo yitanno hedo no: “Mannu baalu cubbo loosino; Maganu uyino ayirrinyeno hoogino. Kunnira, mannu Kiristoosi Yesuusi loosino gatonni mulla Maganu elto callatenni keeraaꞌmanno.” (Rom. 3:23, 24) Phaawuloosi konni qummeeshshi giddo “elto” yiinori maati? Mitte borro yitino garinni isi horoonsiꞌrinohu Girikete qaali, “anga qolannoe yine hendikkinni mulla aa” yitanno tiro afiꞌrinoho. Tini elto afiꞌra hasiissannoete woy daafure afiꞌroommote yinanniri nookkite.

⁵ Fullahaanchu Jooni Paarkiherti togo yiino: “[Kuni Girikete qaali] Maganunna Kiristoosi assitinore xawisate horoonsiꞌnanni wote, insa mannu ooso wodate woy gatisate mulla uyitino baꞌraarsha woy elto leellishannoho.” Konni daafira, Haaro Alame Tiro giddo horoonsiꞌnoonnihu “elto” yaanno qaali tennera malinoho. Ikkina, Maganu eltosi leellishinohu hiittoonniiti? Tini elto albillittete hexxonkenna isi ledo noonke fiixoomi ledo mayi xaado afidhino? Hanni tenne hajore laꞌno.

6. Maganu eltonni horo afidhannori ayeooti?

⁶ “Mittu manchi” yaano Addaami widoonni cubbunna reyo alame daggino. Konni daafira, “mittu manchi cubbinni reyo mannu aana wolqissino.” Phaawuloosi aanche “Maganunnita lowo elto” afiꞌnoommohu “mittu Yesuusi Kiristoosi widoonni” ikkinota coyiꞌrino. (Rom. 5:12, 15, 17) Tini Maganu elto manna baalaho lowo kaaꞌlo uyitino. “Kiristoosi hajajamanni lowo manni keeraaꞌmanno.” Ee, Maganu elto ‘Yesuusi Kiristoosi loosinni hegere heeshsho afiꞌnanni’ gede assitanno.—Rom. 5:19, 21.

7. Wodote kakkalo Maganu shaqqillisinni mulla uyinonke eltooti yineemmohu mayiraati?

⁷ Yihowa Beettosi uullara soye wodote kakkalo ikkanno gede assara giddeessinosihu dino. Hakkiinni saeno, guuntete xeꞌne noonsari cubbaataammu mannu oosora, Maganunna Yesuusi cubbu maaro afidhanno gede qixxeessitinota wodote qixxaawo afiꞌra hasiissannonke yitanno gede assannori dinonsa. Konni daafira, cubbinkera maaro afiꞌranna hegere heeshsho hexxo afiꞌra mulla afiꞌnoommo eltooti. Maganu mulla uyinonke eltora galatanna galanteemmota barru barrunkunni leellisha hasiissannonke.

MAGANO ELTOSIRA GALATTESI

8. Mayine hendeemmokki gede qoropha hasiissannonke?

⁸ Guuntete xeꞌne noonkere Addaami sircho ikkinoommo daafira, soꞌro loosa woy gara ikkinokkire assa rakkannonke. Ikkirono, Maganu uyinonke elto garimale horoonsiꞌra lowo soꞌrooti; lawishshaho, ‘Gara ikkinokkire woy Maganu cubboho yiinore assummoro nafa hakkeeshshi geeshsha yaada dihasiissannoe; isi maarannoe’ yine heda digaraho. Yesuusi soqqamaasine heeshshote noo yannara nafa mitu Kiristaani hatto yee hedino; tini dadillissannote. (Yihuda 4 nabbawi.) Ninke hatto yine coyiꞌra hoongammora dandiineemmo; ikkollana, tini gara ikkitinokki lao giddonke heedhara woy giddonke kalaqantaranna lophitara dandiitanno.

9, 10. Phaawuloosinna wolu Kiristaani cubbunna reyotenni keere fulinohu hiittoonniiti?

⁹ Phaawuloosi, “Maganu baalanta afino; Isi soꞌroꞌya maarannoella” yine horo hendeemmokki gede coyiꞌrino. Mayira? Korkaatuno, Phaawuloosi borreessino garinni, Kiristaanu “cubbuwiinni reyinohu gede” ikke baxxino. (Roomu Sokka 6:1, 2 nabbawi.) Insa uullate aana heeshshote heeꞌrenni “cubbuwiinni reyinohu gede” ikke baxxino yaa dandiinannihu hiittoonniiti?

¹⁰ Maganu wodote kakkalo widoonni Phaawuloosinna hatte yannara nooha wole Kiristaana maarinonsa. Konni daafira, Yihowa cubbonsa gatona yiinonsa, qullaawu ayyaaninni buurinonsa, hattono ayyaanaamittete oososi assinonsa. Konni garinni insa iimira haꞌrate hexxo afidhino. Insa ammanante heedhannoha ikkiro, Kiristoosi ledo iima heedhanno hattono gashshitanno. Ikkirono, Phaawuloosi insa heeshshote noohanna uullate aana Maganoho soqqantanni nooha ikkirono, ‘cubbuwiinni reyitinohu gede’ asse coyiꞌrino. Phaawuloosi, mancho ikke heeꞌre reyinohunna layinkimeeshsho reyannokkiha ayyaanu kalaqo ikke kainohu Yesuusi lawishsha horoonsiꞌrino. Reyo Yesuusi aana dimookkino. Hatteente gede, buuramino Kiristaanino “cubbuwiinni reyinohu gede” ikke, “Kiristoosi Yesuusinni Maganoho” heeꞌrannohu gede asse heda dandaanno. (Rom. 6:9, 11) Heeshshonsa woꞌmunni woꞌma soorrantino. Insa cubbu widira qolte xixxiibbannonsata busha hasatto woy yorto wonshiꞌra agurtino. Insa albi heeshshonsara reyitinohu gedeeti.

11. Gannatete hegerera heeꞌrate hexxineemmori baalu “cubbuwiinni reyinohu” gede ikkine baxxinoommohu hiittoonniiti?

¹¹ Ninkena? Kiristaana ikkinammora albaanni loonseemmo loosi Maganu illera mageeshshi geeshsha bushahoro bande anfoommokki daafira, cubbo loonsanni keeshshinoommo. Ninke hakkawaro “saaliweelletenna bunshete borojje” ikkine heeꞌnoommo. Qoleno, ninke biꞌreera “cubbu borojjimma giddo” heeꞌnoommoreeti. (Rom. 6:19, 20) Qullaawu Maxaafi halaale anfummoti kayinni, heeshshonke giddo mito coye biddi assiꞌne ninkeneeto Maganoho sayinse uyine cuuammummo. Hatte yannanni kayinse, Maganu rosiranna hajajosira ‘woꞌmu wodaninni hajajama’ hananfummo. Konni garinni, ‘cubbu borojjimmanni wolaphine keeraanchimmate borojje ikkinoommo.’ (Rom. 6:17, 18) Konni daafira, ninkeno “cubbuwiinni reyinohu gede” ikkine baxxinoommo yaa dandiineemmo.

12. Ninke baalunku hiittoo doorsha doodha dandiineemmo?

¹² Hanni Phaawuloosi aanche borreessinore ate heeshsho ledo xaadisse hedi; isi togo yiino: “Cubbu reyitanno mannimmaꞌne aana wolqa afiꞌraranna maalu yorto angara qolaꞌnera wortine laꞌinoonte.” (Rom. 6:12) Cubbaataamu maalinke assinammora hasiꞌrannore baala assineemmoha ikkiro, ‘cubbu reyitanno mannimmanke aana wolqa afiꞌrara . . . wodhine’ heeꞌnoommo yaate. Cubbu qeelankera ‘wodhano’ wodha hoogano dandiineemmo daafira, addinta assa hasiꞌneemmori maatiro heda hasiissannonke. Ateneeto togo yite xaꞌmi: ‘Mito wote guuntete xeꞌne afiꞌrino bisiꞌya woy surreꞌya assi yitannoeha gara ikkinokki coye assate kaeemmonso, cubbuwiinni reyinohu gede ikke baxxoommota leellisheemmo? Yesuusi Kiristoosi widoonni Maganoho heeꞌranni noommo?’ Magano eltosira galanteemmosiha ikkiro, Iso hagiirsiisanno garinni heeꞌra dandiineemmo.

CUBBO QEELA DANDIITINANNI

13. Cubbuwiinni xeertiꞌra dandiineemmota leellishannori maati?

¹³ Yihowa manni alba iso afinokki yannara, hattono iso baxanna isira soqqama hanafinokki yannara assanno coyiꞌra badhe wodhino. Insa alba assanno coyi giddo mito ‘xa saalfachishannonsaho’; woleteemmero togoo coyi insa reyanno gede assannoho. (Rom. 6:21) Kayinni insa heeshshonsa biddi assiꞌrino. Phaawuloosi sokka borreessihu Qorontoosi Kiristaani giddo lowo manni alba hattoo heeshsho heeꞌrannoho. Insa giddo mitu biꞌre kaphu maganna magansiꞌrannoho, foorannoho, meyati meyate ledo woy labbaahu labbaahu ledo fooranno mannaati, mooraasinete, dimbaasinetenna wole hattoo coye assannoho. Ikkollana, insa ‘hayishshiꞌre’ “qullaawoota” ikkino. (1 Qor. 6:9-11) Roomu songora noo roduuwino heeshshonsa biddi assiꞌra hasiissinonsa. Phaawuloosi qullaawu ayyaaninni togo yee borreessinonsa: “Mannimmaꞌne biso bunshete uduunnicho assitine cubbu angara qoltinoonte; hatteentenni reyotenni kaꞌine lubbotenni heedhinoonnihu gede ikkitine umoꞌne Maganoho shiqishshe. Mannimmaꞌne baala keeraanchimmate uduunnicho assitine Maganoho uuyye.” (Rom. 6:13) Phaawuloosi insa ayyaanaamittete xuri noonsakkire ikkanna Maganu eltonni horo afiꞌra dandiitannota afino.

14, 15. “Woꞌmu wodaninni” hajajamate daafira umonke mayine xaꞌma hasiissannonke?

¹⁴ Yannankerano mitu roduuwinke biꞌre Qorontoosi heeꞌranno manni gedee heeshsho heeꞌrinoha ikkara dandaanno. Hakko manninte gede insano heeshshonsa biddi assiꞌrino. Albi gede cubbo loosanni heeꞌra agure ‘hayishshiꞌre’ keeraaꞌmino. Albi heeshshokki gari aleenni kulli manni gedeeha ikkirono ikka hoogirono, xa Maganu ledo noohe aante hiittoote? Xa Maganu eltonni cubboho maaro afiꞌra dandaatto daafira, ‘bisokki bunshete uduunnicho assite’ horoonsiꞌrattokki gede murcidhe nootto? Reyotenni kaꞌe lubbotenni noottohu gede assite ateneeto Maganoho shiqishatto?

¹⁵ Tenne assate, biꞌre Qorontoosi heeꞌrinohu mitu manni assannoha shota ikkinokki cubbo assa roso assiꞌra hasiissannonkekkita anfoommo. Hatto assa hasiissannonke; korkaatuno cubbo loonsanni heeꞌne Maganu elto afiꞌneemmo yine heda dihasiissannonke. Ikkollana, “woꞌmu wodaninni” hajajamme baalunku cubbiwiinni xeertiꞌrate dandiinummore baala assinanni heeꞌnoommo?—Rom. 6:14, 17.

16. Kiristaanu shota ikkinokki cubbo loosa hoogatenni sainore assa hasiissannonsa yineemmohu mayiraati?

¹⁶ Hanni soqqamaasinchu Phaawuloosi daafira hedi. Isi 1 Qorontoosi 6:9-11 geeshsha kulliha shotinse laꞌnannikki cubbo assanni nooha ikkinokkita anfoommo. Ikkollana, isi cubbaataamo ikkinota coyiꞌrino. Togo yee borreessino: “Ani maala uddiꞌroommo[ho]; qoleno cubbu borojjimmara hiramoommoho. Ani asseemmore diegennoommo; baxeemmore agure, giweemmore asseemmo.” (Rom. 7:14, 15) Kuni qummeeshshi Phaawuloosi cubbu gede asse lainori woluri nootanna konni gara ikkinokki coyiwiinni xeertiꞌrate sharraminota leellishanno. (Roomu Sokka 7:21-23 nabbawi.) Ninkeno isi lawishsha harunsine Maganoho ‘woꞌmu wodaninkenni hajajamate’ sharrama hasiissannonke.

17. Ammanama hasiꞌrattohu mayiraati?

¹⁷ Hanni ammanamate daafira hasaambo. Ammanama Kiristaanaho lowo geeshsha hasiisanno akataati. (Lawishsha 14:5; Efesooni Sokka 4:25 nabbawi.) Sheexaanu ‘kaphu annaati.’ Hanaaniyanna Sephiira reyinohu kaphinohuraati. Ninke insa faale haꞌra hasiꞌneemmokki daafira kapho coyiꞌra dihasiissannonke. (Yoh. 8:44; Soq. 5:1-11) Ammanamate yaa kapho coyiꞌra hooga calla diꞌꞌikkitino. Ee, Maganu uyinonke eltora addinta galanteemmosiha ikkiro, ammanammeemmota wole doogonnino leellisha hasiissannonke.

18, 19. Ammanama kapho coyiꞌratewiinni xeertiꞌra calla diꞌꞌikkitino yineemmohu mayiraati?

¹⁸ Kapha halaale ikkinokkire coyiꞌrate. Ikkollana, Yihowa mannisi kapho coyiꞌrannokki gede calla ikkikkinni hakkiinni sainore assara hasiꞌranno. Isi hundi Israeele togo yee hajajino: “Ani Kaaliiqi Maganiꞌne Qullaawahona, kiꞌneno Qullaawoota ikke.” Hakkiinni aanche qullaawa ikkinanni doogga kulino. Maganu insara kulino coyibba giddo mite, “Moortinoonte; kaphitinoonte; mimmitoꞌne dogginoonte” yitannote. (Lew. 19:2, 11) Mittu manchi kapho coyiꞌra hoogirono, wolu mannira nookkire kule ammansiisannoha ikkiro kuni manchi diammanamino yaate.

¹⁹ Lawishshaho mittu manchi, loosiisaanchisira woy ledosi loossannorira ‘gaꞌa akimete mine dinye nooe daafira loosunniwa daye diafeemmo woy loosu basenni balaxe haꞌra hasiissannoe’ yaara dandaanno. Ikkollana isi hatto yiinohu, xagicho hirranni minira marate woy akimichunniwa mare hirbu aana heeꞌre woxe baatate ikkara dandaanno. Isi looso haꞌrikkinni hosa hasiꞌrinohu qaru coyi fooliishshote haꞌrate qixxaawara woy maatesi boohaartannowa haare haꞌrate ikkara dandaanno. Isi akimete minira haꞌreemmo yaanno gede assannosihu shiimu korkaati heeꞌrara dandaannoha ikkirono, kuni manchi woꞌmunni woꞌma ammanaminoha lawannohe? Tini wolu mannira nookkire coyiꞌra diꞌꞌikkitino? Ati mitu manni afanni heeꞌrenni nookkire coyiꞌranna afoottoha ikkara dandaanno. Mannu togoore assannohu qorichinshanninsata hooꞌlate woy wole miice horo afiꞌrate ikkara dandaanno. Coyiꞌnoommori gudisiꞌre kapho ikka hoogiro nafa, Maganu “kaphitinoonte” yiinohu maa hedeeti? Qoleno Roomu Sokka 6:19, “Mannimmaꞌne qullaawa assate keeraanchimmate borojjimmara sayissine uuyye” yitannota hedi.

20, 21. Maganu elto maa assineemmo gede kakkayissannonke?

²⁰ Magano eltosira addinta galanteemmoha ikkiro, foora, dimba, woy wole togooha Qorontoosi manni assino gedee cubbo calla ikkikkinni baalunku cubbiwiinni xeertiꞌra hasiissannonke. Maganu elto ammane adhate yaa amanyootu maaeellewiinni xeertiꞌra calla ikkitukkinni hattoore leellishanno boohaarshiwiinni xeertiꞌrate. Mannimmanke keeraanchimmate borojje assineemmoha ikkiro, dimba calla ikkikkinni batisiꞌne agatewiinni qoropha hasiissannonke. Togoohu bushu assootiwiinni xeertiꞌrate lowo geeshsha sharrama hasiissannonkeha ikkirono qeela dandiineemmo.

²¹ Mixonke baalanka cubbo assatewiinni xeertiꞌrate. Addaho guuta ikkinoommokki daafira cubbiwiinni woꞌmunni woꞌma xeertiꞌne dianfeemmo. Ikkirono, ninkeno Phaawuloosi assinte gede cubbuwiinni xeertiꞌrate sharrama hasiissannonke. Isi roduuwasi togo yee amaalino: “Cubbu reyitanno mannimmaꞌne aana wolqa afiꞌraranna maalu yorto angara qolaꞌnera wortine laꞌinoonte.” (Rom. 6:12; 7:18-20) Cubbo baaluwiinni xeertiꞌrate sharrammeemmoha ikkiro, Maganu Kiristoosi widoonni qixxeessinonke eltora galatu noonketa leellinsheemmo.

22. Maganu eltora galatu noonsari albillittete afidhanno baraarshi maati?

²² Maganu eltonni cubbinkera maaro afiꞌnoommo; isi xaano soꞌronke maarannonke. Konni daafira, mitu manni ajishe laꞌꞌanno cubbo assate hasatto qeeltannonkekki gede sharrammo. Phaawuloosi tenne assinummoro afiꞌneemmo baraarsha kulino; togo yiino: “Xa kayinni cubbuwiinni wolaphitine Maganu borojje ikkitinoonnihura qullaawootaho; qullaawa heeshsho gawalono hegere heeshshooti.”—Rom. 6:22.