Yihowa Giddonsanni Hasidhannosire Baꞌraasanno

1, 2. (a) Baxillunna ammana xaado afidhinohu hiittoonniiti? (b) Aanchine hiikkuri xaꞌmuware hasaambeemmo?

YIHOWA ninke “balaxe baxinonke” daafira ninke iso banxeemmo. (1 Yoh. 4:19) Yihowa konne baxille leellishate, ammanantino soqqamaanosi maassiꞌranno. Yihowara noonke baxilli lexxanni haꞌri kiiro, isira noonke ammana kaajjado ikkitanno; tini, isi nootanna baxannonsare maassiꞌrannota ammanneemmo gede assitannonke.—Ibiraawoota 11:6 nabbawi.

² Yihowa ayimmanna isi assannore leellishshanno akatta giddo mitte soqqamaanosi maassiꞌrate. Maganu giddonsanni hasidhannosire kiisannota woꞌmunni woꞌma ammanneemmokkiha ikkiro, ammananke guuta diꞌꞌikkitanno; korkaatuno ammanate yaa “hexxotenni agadhinoonni coye hawaqiꞌrate” woy huluullammikkinni agadhate. (Ibi. 11:1) Ee, ammana noonketa leellinsheemmo doogga giddo mitte Maganu abbeemmo yiino atoote huluullammummokki agadhate. Ikkina, Maganu maassiꞌrankera eino qaali jawaante afiꞌrate kaaꞌlannonkehu hiittoonniiti? Yihowa biꞌreno yannankerano soqqamaanosi baꞌraasinohu hiittoonniiti? Kawiinni aanchine tenne hajore hasaambeemmo.

YIHOWA SOQQAMAANOSI MAASSIꞌRATE QAALE EINO

3. Milkiyaasi 3:10 giddo Yihowa mayyee qaale eino?

³ Yihowa ammanantino soqqamaanosi baꞌraasate giddeetu noosihu gede asse coyiꞌrino; isi ninke konne atoote afiꞌrate sharrammeemmo gede koyisinonke. Togo yiino: “Ani . . . waalcho fane dancha atoote batise aa hoogummoꞌnero tennenni affeꞌꞌe. Konne coye coyiꞌroommohu ani olantote Mootichi Kaaliiqaati.” (Mil. 3:10) Hatto assineemmoha ikkiro, Yihowa koyisinonke koyishsha naandeemmotanna iso galanteemmota leellinsheemmo.

4. Yesuusi Maatewoosi 6:33 giddo coyiꞌrino qaale ammanneemmohu mayiraati?

⁴ Yesuusi rosaanosi Maganu Mangiste balaxisiissuro Maganu hasiisannore aannonsata coyiꞌrino. (Maatewoosi 6:33 nabbawi.) Yesuusi konne qaale coyiꞌrinohu Yihowa yiinore wonshannoha ikkino daafiraati. Yesuusi Maganu eino qaali horo woꞌmikkinni gatannokkita afino. (Isa. 55:11) Ninkeno Yihowa giddonkenni ammanneemmoha ikkiro, isi eino qaale wonshannota dihuluullammeemmo; isi togo yiino: “Horo diagureemmohe; dicallachisheemmohe.” (Ibi. 13:5) Kuni qummeeshshi, Yesuusi Maganu Mangistesinna keeraanchimmasi balaxisiinsummoro hasiissannonkere aannonketa coyiꞌrino qaale ammanneemmo gede assannonke.

5. Yesuusi Pheexiroosira qolino dawaro ammananke jawaachishshannohu hiittoonniiti?

⁵ Soqqamaasinchu Pheexiroosi mitte hige Yesuusa togo yee xaꞌmino: “Ninke baalankare agurre ate hoode haꞌnanni heeꞌnoommo; afiꞌneemmori maatiyya?” (Mat. 19:27) Yesuusi tennera Pheexiroosi hanqa agure, rosaanosi uminsa horo agurte iso harunsitinotera afidhanno baꞌraaꞌra kulinonsa. Ammanantino soqqamaasinenna wolootu isi ledo iima gashshitanno. Xa nafa insa atoote afidhanno. Yesuusi togo yiino: “Ane daafira yee mine woy labbaa roduuwa woy meyaa roduuwa woy ama woy anna woy ooso woy gate agurannohu baalu xibbe ero adhanno; hegere heeshshono afiꞌranno.” (Mat. 19:29) Yesuusi rosaano afidhanno atooti, insa agurtannote uminsa horonni lowo geeshsha roorannoho. Ayyaanaamittete annuwanke, amuuwinke, roduuwinkenna oosonke, Maganu Mangiste balaxisiisate yine agurroommo coye lowo geeshsha diroortanno?

HEESHSHOTE ‘MOKKOLLICHO’

6. Yihowa magansidhannosire baꞌraasate qaale einohu mayiraati?

⁶ Yihowa magansidhannosire maassiꞌrate eino qaali, insa qarru yannara ammanante heedhanno gede kaaꞌlannonsa. Maganoho ammanante soqqantannori, xa lowoha ayyaanaamittete atoote afidhannotano agurranna albillittete afidhannoha falahino atooteno quqquxante agadhitanno. (1 Xim. 4:8) Ee, Yihowa “iso hasiꞌranno mannira baraara aannota” woꞌmunni woꞌma ammananke, ammanatenni kaajjine heeꞌneemmo gede kaaꞌlitannonke.—Ibi. 11:6.

7. Hexxo howolo wayi giddo milli yitannokki gede assanno mokkollichi gede ikkite kaaꞌlitannonkehu hiittoonniiti?

⁷ Yesuusi ilaalu iima heeꞌre rosiisi yannara togo yiino: “Gordu gashshootira lowo waaga afidhinanni daafira tashshi yooꞌne; hagiidhe. Kiꞌnera albiidi himanaanono hatto xiiwamanna qarra iillishshinonsa.” (Mat. 5:12) Iimira haꞌrate baꞌraaꞌra afidhannoreno agurranna, gannate ikkitanno uulla aana hegerera heeꞌrate hexxo afiꞌra, ‘tashshi yaannonkenna hagiidhineemmo’ gede assitannote. (Far. 37:11; Luq. 18:30) Hexxonke iimira haꞌrano uulla heeꞌrano ikkituro, “tini hexxo heeshshonkera milli miqqi yaannokkihu addaxxinanni mokkollichi gede” ikkitannonke. (Ibi. 6:17-20) Waajjishshanno dambali giddo howolo basetenni milli yitannokki gede assannorichi woy mokkollichi gede, Maganu baꞌraaseemmoꞌne yee uyinonke hexxo kaajjine heeꞌneemmo gede assitannonke. Tini hexxo iillannonke qarra cincate kaaꞌlitannonke jawaante afiꞌneemmo gede assitannonke.

8. Hexxo yaaddo ajishate kaaꞌlitannonkehu hiittoonniiti?

⁸ Qullaawu Maxaafi giddo kulloonninke hexxo, xaa yannara yaachishannonke coye ajishate kaaꞌlitannonke. Maganu eino qaali yaaddo amaddino wodaninke gaꞌlabbi yaanno gede assannoha ayyaanaamittete xagicho ikkannonke. Yihowa ‘irkisannonkehura’ ‘yaaddonke isi aana tuqqa’ dandiineemmota afanke lowo geeshsha hagiirsiissannote! (Far. 55:22) Maganu “huucciꞌneemmohunninna hendeemmohunni aleenni quwa sayise assara” dandaannota woꞌmunni woꞌma ammana dandiineemmo. (Efe. 3:20) Hanni tenne hedi: Maganu hasiisannonkere assannonkeha woy quwa sayise assannonkeha calla ikkikkinni “hendeemmohunni aleenni quwa sayise” assannonke!

9. Yihowa maassiꞌrannonketa afa dandiineemmohu hiittoonniiti?

⁹ Yihowa aannonke baꞌraaꞌra adhate, iso woꞌmunni woꞌma ammananna aannonke biddishshira hajajama hasiissannonke. Muse Isiraeelete togo yiino: “Maganiꞌne Kaaliiqi ragidhinara aannoꞌne baatto aana maassiꞌrannoꞌne. . . . Kuni ikkannohu Maganiꞌne Kaaliiqira hajajantinoronna, techo hajajoommoꞌnere baala seekkitine agadhitinirooti. Maganiꞌne Kaaliiqi uyinoꞌne hexxo garinni maassiꞌrannoꞌne.” (Mar. 15:4-6) Yihowa isira ammanante soqqama agura hoogittoro maassiꞌrannoheta woꞌmunni woꞌma ammanatto? Ammanatto gede assinohehu ikkadu korkaati no.

YIHOWA KIISINONSA

10, 11. Yihowa Yooseefi kiisinohu hiittoonniiti?

¹⁰ Qullaawa Maxaafa borreessinoonnihu ninke horo afiꞌneemmo gedeeti. Qullaawu Maxaafi giddo Maganu ammanantino soqqamaanosi addinta kiisannota kultannoti batinye xagge no. (Rom. 15:4) Yooseefi xagge tennera dancha lawishsha ikkitanno. Isi, roduuwisi gano gantinosihuranna yannate gedensaanni mootichisi galte beebba wortinosihura Gibitsete gobbara usuramino. Ikkina, tini iso Maganuwiinni baxxanno gede assitinosini? Diassitinosi! “Kaaliiqi mulesi heeꞌre, bagamannokki baxillisinni” towaatinosi. Qoleno, “Kaaliiqi ledosi noo daafira, assannori baalu” qiniinosi. (Kal. 39:21-23) Yooseefi hattee qarru iillinosi yannara cincatenni Magano agadhino.

¹¹ Gedensaanni Feriooni Yooseefi usurunni tidhamanno gede assinosi; qoleno konne borojjicho ikke heeꞌranno beetto Gibitsete layinki gashshaancho assinosi. (Kal. 41:1, 37-43) Yooseefi minaamasi lame ooso iltusita, “‘Maganu qarraꞌya baalankanna fiixaꞌya qaageemmokki gede assinoe’ yee bayiru beettisira suꞌma Minaase yee fushshi. Qoleno ‘Qarramoommo gobbara Maganu ila uyinoe’ yee layinki beettira suꞌma Efireemi yii.” (Kal. 41:51, 52) Yooseefi Maganoho ammaname heeꞌrino daafira, Maganu maassiꞌrinosi; isi afiꞌrino atooti Israeeletenna Gibitsete manna hude guddannokki gede assino. Yooseefi kiisinosihunna atoote afiꞌranno gede assinosihu Yihowa ikkinota afino.—Kal. 45:5-9.

12. Yesuusi qarru iillisi yannara ammaname heeꞌrinohu hiittoonniiti?

¹² Yesuusino babbaxxinohu ammanasi fonqolanno coyi iillisirono Maganoho hajajame heeꞌrino; tini Maganu kiisannosi gede assitino. Isi qarra dandee saꞌꞌanno gede kaaꞌlinosiri maati? Maganu Qaali, “Isi albasiinni noo hagiirri daafira yee, shollinye waajjikkinni masiqalu [‘qarru haqqichi’, NW] aana” reyino yaanno. (Ibi. 12:2) Yesuusi Maganu suꞌmi qullaawa ikkanno gede assinohura hagiidhinoti dihuluullissannote. Isi afiꞌrinohu wolu baraarshi, iimi Annasi hagiirsiisatenna batinye atoote afiꞌrasiiti. Qullaawu Maxaafi Yesuusi “ayirradu qullaawu barcimira qiniiteenni ofollino” yaanno. Qoleno wole basera togo yaanno: “Maganu woꞌmunkura aliidi darga worisi. Suꞌma baalaho rooriidi suꞌmano uyisi.”—Fil. 2:9.

YIHOWA ASSINEEMMORE DIHAWANNO

13, 14. Yihowa isira assineemmore ma garinni laꞌꞌanno?

¹³ Yihowa isira soqqamate assineemmore baala naadanno. Mittore assate dandoo dinoe yine wolqa baꞌnammora dandiineemmota afino. Isi angate anje qarrissannonke wote, hattono fayyimmankenna yaachishanno coyi qullaawa soqqanshonke ajjanno gede assanno wote mararannonke. Konni daafira Yihowa soqqamaanosi isira ammanante heeꞌrate assitannore naadannota woꞌmunni woꞌma ammana dandiineemmo.—Ibiraawoota 6:10, 11 nabbawi.

¹⁴ Qoleno, Yihowa ‘huuccattonke macciishshannoha’ ikkinota qaagi. Isi yaachishinonke coye kulle huucciꞌneemmo wote, huuccattonke macciishshe dawaro qolannota dihuluullammeemmo. (Far. 65:2, 3) ‘Maarote Anninna jawaante baalate Magani’ yaachishannonkeri iillannonke wote irkisannonke; qoleno ayyaanaamittete kaaꞌlo batise aannonke; isi tenne assannohu ammanate roduuwinke widoonni ikkara dandaanno. (2 Qor. 1:3) Mannaho shaqqille leellinsheemmo wote Yihowa hagiidhanno. “Buxanete aannohu Kaaliiqira liqiissanno; Kaaliiqino assino danchummara daware aannosi.” (Law. 19:17; Mat. 6:3, 4) Konni daafira, qarrantinore uminkera qooffantummokkinni kaaꞌlineemmoha ikkiro, Yihowa assinoommoha dancha coye isira liqiissinoommohu gede asse laꞌꞌanno. Isi konni garinni danchumma assitannore kiisate qaale eino.

XAANO ALBILLITTETENO AFIꞌNEEMMO BAꞌRAARSHA

15. Ati quqquxante agadhatto atooti hiikkonneeti? (Hanafote noo misile lai.)

¹⁵ Qullaawu ayyaaninni buuramino Kiristaani “keeraanchimmate baꞌlatto” adhanno; “tenne baꞌlatto halaalaanchu yoo yaanno Mootichi hakko barra” baraarsha asse aannonsa. (2 Xim. 4:7, 8) Ati afiꞌratto baꞌraarshi wolu gariha ikkiro, Maganu ate ajishe laꞌꞌannohe yaa diꞌꞌikkino. Lowo miliyoone ikkannohu Yesuusihu “wolu geꞌreewi”, albillitte adhanno baꞌraarsha afiꞌrate, yaano gannate ikkitanno uulla aana hegerera heeꞌrate quqquxame agadhanno. Insa hakko ‘atootenna keere afiꞌre hagiidhanno.’—Yoh. 10:16; Far. 37:11.

16. Umi Yohaannisi 3:19, 20 jawaachishshannonkehu hiittoonniiti?

¹⁶ Mito wote assinanni heeꞌnoommori difattinoreeti yine hendeemmoha, woy assineemmori Yihowa hagiirsiisanno geeshsha ikkinokkihu gede assine hendeemmoha ikkara dandaanno. Wole agurina, Maganu baꞌraarsha aannonkere ikkinoommokkihu gede assine hendeemmoha ikkara dandaanno. Ikkirono, ‘Maganu wodaninkera aliidihanna woꞌmankare egenninoha’ ikkinota horo dea dihasiissannonke. (1 Yohaannisi 3:19, 20 nabbawi.) Maganu, ammananna baxillu xixxiiweennanke giddonkenni kaꞌne isira soqqamate assineemmori ninkera shiima lawinkero nafa, isi assineemmo coyi baalaho baꞌraarsha aannonke.—Maq. 12:41-44.

17. Xa afiꞌnoommo baꞌraarshi maati?

¹⁷ Sheexaanu moohinote tenne tunsichu amadino yannara nafa, Yihowa mannasi maassiꞌranni no. Isi halaalunni magansidhannosiri, alamete doyichora noohu roduuwu maamari miilla ikkite hagiirrenna falakkinota ayyaanaamittete sagale afidhanno gede assanni no. (Isa. 54:13) Yesuusi qaale einonte gede, alamete qooxeessiꞌra noota lubbora baxxannonke maate oye Yihowa xa kiisinonke. (Maq. 10:29, 30) Hakkiinni saeno, Maganu iso giddonsanni hasidhannori surrete salaame, harshammonna hagiirre afidhanno gede asse lowo geeshsha maassiꞌrinonsa.—Fil. 4:4-7.

18, 19. Yihowa soqqamaano isiwiinni afidhanno baꞌraarshire heddanno wote mayi macciishshamannonsa?

¹⁸ Alamete qooxeessiꞌra nooti Yihowa soqqamaano isi mannasi kiisannota coyiꞌra dandiitanno. Lawishshaho, Jarmanete heedhannoti Biyaanka yinanni rodoo togo yitino: “Yihowa yaachishannoeri tuncu yaannoe yannara kaaꞌlinoehuranna barru barrunkunni muliꞌyanni fafinokki daafira lowo geeshsha galaxxeemmasi. Alame umo lekkicho baꞌinotenna hexxinanniri nookkite. Ikkollana, Yihowa ledo looseemma wote, isi kikkiꞌlasira amadinoehu gede asse hedeemma daafira beꞌe diyeemma. Umiꞌya horo agure isira mitore assumma kiiro, isi atootesi xibbe ero asse qolannoe.”

¹⁹ Kanaadaho heedhannota Poola yinannita 70 diri rodoonke lawishshano heda dandaatto; ise ispayinali bifida yinannihu dugugguru miqicho amadanno xibbi waadannose. Ise, “Milli yaa hoogate yaa ayyaanaamittete looso loosa hoogate yaa diꞌꞌikkino. Addi addita sabbakate hayyo horoonsiꞌre, lawishshaho silketenni farciꞌreemma” yitino. Qoleno, ise sabbakate fulloonnikki wote farciꞌnanni garinni farcidhanno. Poola ledde togo yitino: “Qummeeshshuwanna borruwanke giddonni haaroomma hedo daftaraho borreessiꞌre amaxxeemma; tenne borreessiꞌroomma hedo nabbawumma kiiro jawaante afiꞌreemma. Konne daftaraꞌya, “Jawaantete buicho” yeemma. Yihowa noonke hexxo aana illachinshummoro, hexxo mudhineemmo gede assinonke hegerera heeꞌrannoha ikkinokkita huwanteemmo. Heeshshonke gari baxiha ikkirono, Yihowa ayewoteno mulenke no.” Ate heeshsho gari Biyaankanna Poola heeshsho garinni baxxinoha ikkara dandaanno. Ikkirono, Yihowa ateranna jaallakkira baꞌraaꞌra uyino doogga qaagattoha ikkara dandaanno. Yihowa xaa yannara baꞌraaꞌra uyinohehunna albillittete kiisannohehu hiittoonniitiro hiinca hagiirsiissannoheti dihuluullissannote!

20. Yihowara woꞌma lubbonkenni soqqama agura hoongummoro maa afiꞌneemmo?

²⁰ Giddokkita Yihowara kulte huucciꞌratto huuccatto, “lowo baꞌraaꞌra” afiꞌratto gede assitannoheta huluullantooti. Maganu fajjo assittoro, isi ‘hexxo uyino coye afiꞌrattota’ buuxa dandaatto. (Ibi. 10:35, 36) Konni daafira, ammananke kaajjishiꞌratenna Yihowara assinoommohu gede woꞌma lubbonkenni loosa agurroonke. Baꞌraarsha aannonkehu Yihowa ikkinota hendeeemmoha ikkiro tenne assa dandiineemmo.—Qolasiyaasi Sokka 3:23, 24 nabbawi.