ROSO 46
Heeshshokki Maganoho Sayisse Aanna Cuuama Hasiissannohehu Mayiraati?
Heeshshokki Yihowara sayisse aattohu, xaate iso calla magansiꞌrattotanna heeshshokki giddo fajjosi balaxisiisattota huuccattotenni isira kulteeti. (Faarso 40:8) Hakkunni gedensaanni, cuuamatto. Cuuamakki, heeshshokki Maganoho sayisse oottota mannu afanno gede assitanno. Heeshshokki Yihowara sayisse aa wolu baalunkunni rooranno doorshaati. Konne jawa coye doodhatto gede kakkayisannoheri maati?
1. Mittu manchi heeshshosi Maganoho sayise aanno gede kakkayisannosiri maati?
Heeshshonke Yihowara sayinse uyineemmohu banxeemmosi daafiraati. (1 Yohaannisi 4:10, 19) Qullaawu Maxaafi togo yee amaalannonke: “Maganokki Kaaliiqa woꞌmu wodanikkinni, woꞌma lubbokkinni, woꞌma hedokkinninna woꞌma wolqakkinni baxi!” (Maarqoosi 12:30) Coyiꞌneemmorinni calla ikkikkinni assineemmorinnino Yihowa banxeemmota leellinsheemmo. Mimmito godowinta baxanno beettinna beetto adhamannonte gede, Yihowara noonke baxillino heeshshonke isira sayinse uyine cuuammeemmo gede kakkayisannonke.
2. Yihowa cuuante Farciꞌraasinesi ikkitinorira aanno atooti maati?
Cuuamatto woyite, hagiirru woꞌminote Yihowa maate wido ikkatto. Hakkiinni Yihowa addi addi doogonni baxillesi leellishannohe; hattono xaanni roore isiwa shiqqi yaatto. (Milkiyaasi 3:16-18 nabbawi.) Yihowa Annakki ikkannotano agurranna, alamete doyichora isono ateno baxxannori ammanate roduuwi heedhannohe. (Maarqoosi 10:29, 30 nabbawi.) Kayinni cuuamattora albaanni assa hasiissannoheri no. Yihowa daafira rosa, iso baxanna Beettosi ammana hasiissannohe. Jeefoteno, heeshshokki Yihowara sayisse aa hasiissannohe. Kuri coyibba assite cuuamittoro, hegerera hagiidhitanni heeꞌratto doogo faꞌnantannohe. Maganu Qaali ‘cuuama gatissannota’ kulanno.—1 Pheexiroosi 3:21.
LEDDE XIINXALLI
Heeshshokki Yihowara sayisse aanna cuuama hasiissannohehu mayiraatiro xiinxalli.
3. Ninke baalunku ayera soqqammeemmoro doodha hasiissannonke
Hundi Israeele waro, mitu manni Yihowano kaphu magano Baꞌꞌaalino magansiꞌra dandiineemmo yee hedino. Ikkollana Yihowa hatto yee hedansa soꞌro ikkitinota kulansara masaalaanchosi Eeliyaasi soyino. Umi Mootoolla 18:21 nabbabbe; hakkiinni tenne xaꞌmo hasaabbe:
Israeele maa doodha hasiissinonsa?
Israeelete gede, ninkeno ayera soqqammeemmoro doodha hasiissannonke. Luqaasi 16:13 nabbabbe; hakkiinni aante noo xaꞌmuwa hasaabbe:
Yihowano wolereno magansiꞌra dandiineemmokkihu mayiraati?
Yihowa magansiꞌra doodhinoommota leellisha dandiineemmohu hiittoonniiti?
4. Yihowa baxannohe gara hiinci
Yihowa batinye muxxe elto uyinonke. Ninke isira aa dandiineemmori maatiyya? VIIDIYO laꞌe.
Yihowa baxannoheta leellishino doogga giddo mite hiikkuriiti? Faarso 104:14, 15 nna 1 Yohaannisi 4:9, 10 nabbabbe; hakkiinni tenne xaꞌmuwa hasaabbe:
Yihowa uyinohe elto giddo roore dhagge ikkannoheri maati?
Tini elto isi daafira maa hedatto gede assitannohe?
Mittu manchi danchare uyinkero, hakkunni manchira noonke galata leellinsheemmo faro hasiꞌneemmo. Marro 16:17 nabbabbe; hakkiinni tenne xaꞌmo hasaabbe:
Yihowa assinohere baala hedakki, isira maa aatto gede kakkayissannohe?
5. Heeshshokki Yihowara sayisse uyittoro lowo atoote afiꞌratto
Batinyu manni maccaha ikka, dancha looso afiꞌra, woy woxu hagiirraamma assannonke yee hedanno. Kayi hatti garaho? VIIDIYO laꞌe; hakkiinni aante noo xaꞌmuwa hasaabbe.
Viidiyote giddo laꞌnummo rodii alba lekkate kaase godoꞌla baxannoha ikkirono, hakkonne looso agurinohu mayiraati?
Isi heeshshosi lekkate kaasera ikkikkinni Yihowara sayise aa doodhino. Isi doodhinori gara lawannohe? Mayira?
Soqqamaasinchu Phaawuloosi Kiristaana ikkara albaanni, lowo manni halchanno loosi noosiho. Mittu egennamino rosiisaanchi isira Ayihudete seera rosiisinosi. Ikkollana isi Kiristaana ikkate yee baalankare facci asse agurino. Phaawuloosi agurino coyira gaabbino? Filiphisiyusi Sokka 3:8 nabbabbe; hakkiinni tenne xaꞌmuwa hasaabbe:
Phaawuloosi Kiristaana ikkara albaanni assannore “ishinu” gede asse kiirinohu mayiraati?
Isi agurino coyi bayicho maa afiꞌrino?
Yihowara soqqamatenna wolere assate giddo heeshshokki seekkitannoti hiittee labbannohe?
Phaawuloosi Kiristaana ikki woyite, agurino coyinni lowo geeshsha roorannore afiꞌrino
MITU MANNI TOGO YAANNO: “Kuni halaale ikkinota afoommo; kayi cuuamate xaara diqixxaawoommo.”
Heeshshokki Yihowara sayisse aa hasiissannoheha lawannohe? Mayira?
XAPHISHSHA
Baxillu heeshshonke Yihowara sayinse uyineemmo gedenna cuuammeemmo gede kakkayisannonke.
Kageeshsha Rosoottore
Yihowa woꞌmu wodaninkenni baxanna magansiꞌra hasiissannonkehu mayiraati?
Yihowa cuuante Farciꞌraasinesi ikkitinore maassiꞌrannohu hiittoonniiti?
Heeshshokki Yihowara sayisse aa hasiꞌratto?
EGENNO LEXXI
Mitte sirbaanchonna mittu ispoortanyi heeshshonsa Yihowara sayisse uyitinohu mayiraatiro wodanchi.
Wedellu Xaꞌmanno Xaꞌmo—Heeshshoꞌyanni Ma Assummoro Woyyanno?—Albita Qaaga (6:54)
Heeshshonke Maganoho sayinse uyineemmo gede kakkayissannonketa wole coyibba huwati.
“Heeshshokki Yihowara Sayisse Aa Hasiissannohehu Mayiraati?” (Agarooshshu Shae, Arfaasa 15, 2010)
Tenne muuziiqu viidiyo giddo, heeshshonsa Yihowara sayisse uyitannori afidhanno hagiirre wodanchi.
“Lowo Diro, ‘Heeꞌneemmohu Isi Mayiraati?’ Yaanni Keeshshoomma” yitanno xagge giddo, mitte mancho heeshshose giddo maa balaxisiissannoro heddanno gede kakkayisinoseri maatiro nabbawi.
“Qullaawu Maxaafi Heeshsho Biddi Assanno” (Agarooshshu Shae, Bocaasa 1, 2012)