Xaꞌmote Saaxine
◼ Ooso ayyaanaamittetenni gikki yitanno gede maa rosiisa hasiissanno?
Kiristaana ikkino anninna ama oosonsa ‘Yihowa seejjonninna biddishshinni’ lossiꞌrate lowore assitanno. (Efe. 6:4) Lawishshaho, annuwanna amuwu soodote kiiro oosonsa ledo barru xiqise nabbawe hasaawansa lowo geeshsha kaaꞌlitinonsa. Maate, maatete magansiꞌransa yannara woy wole wote mitteenni viidiyo laꞌe kaꞌe hasaawa, Wedellu Xaꞌmanno Xaꞌmo yaanno birxichi giddonni mito gafa doorte hasaawa, Qullaawu Maxaafi xagge diraamu garinni rosiisiꞌra, woy soqqanshote rosiisiꞌra dandiitanno. Ikkollana ooso ‘ayyaanaamittetenni gikki yitanno’ gede, Qullaawu Maxaafiha hawa gede huwantannikki halaale rosiisa hasiissanno.—Ibi. 6:1.
Hanni qooxeessinke mannira rosiinseemmore hendo. Manna umo coyishiinsheemmo barra woy galagalle marre hasaawinseemmo wote, Qullaawu Maxaafi Addinta Mayyee Rosiisanno? yaanno maxaafa horoonsiꞌne Qullaawu Maxaafi xiinxallo jammarsiisate woꞌnaalleemmo. Konne maxaafa xiinxallinse gundummohu gedensaanni, “Maganu Baxillinni Fultinikki Heedhe” yaanno maxaafa jammarsiinseemmo. Mayira? Qullaawu Maxaafi Roso yinanni maxaafi rosaanote Qullaawa Borrota xinta ikkitino egenno afidhanno gede kaaꞌlanno. ‘Maganu Baxille’ yaanno maxaafi kayinni Qullaawu Maxaafihu xintu seeri garinni heeꞌra dandiitanno gara xawisanno. Lamenka maxaafa xiinxallansa “Kiristoosi aana rumuxxitanno” gedenna “ammanatenni kaajjite” heedhanno gede kaaꞌlannonsa. (Qol. 2:6, 7) Tini maxaaffa oosonkerano dikaaꞌlitanno? Oosonkeno wodote kakkalore, Maganu mangisterenna reyino manni noo gara afa hasiissannonsa. Qoleno oosonke, Maganu qarru heeꞌrara fajjinohu mayiraatironna tenne busha alamehu goofimarchu barri malaatta badde afa hasiissannonsa. Halaalu noohu Yihowa Farciꞌraasinewa ikkinota ammantanno gede rosiisa hasiissannonsa. Qoleno ooso Qullaawu Maxaafiha xintu seera huwatanna “wodanchate dandoonsa” hiittoonni qajeelsidhannoro afa hasiissannonsa. (Ibi. 5:14) Annuwunna amuwu oosonsa dironna rosate dandoonsa mageeshshitero assaawa hasiissannonsati egennantinote. Ikkollana, batinye ooso shiinqaaddu heedhe nafa Qullaawu Maxaafiha hawa gede huwantannikki halaale rosate dandoo noonsa.—Luq. 2:42, 46, 47.
Annuwanna amuwa kaaꞌlate, Qullaawu Maxaafi Roso yaanno maxaafi aana xintantino birxichuwa jw.org aana fula jammartanno. Maate konne roso webisayitenke aana QULLAAWU MAXAAFI ROSO yaannohu hunda NAGGI YITINO OOSO yaannoha fante afiꞌra dandiitanno. Albillitte ‘Maganu Baxille’ yaanno maxaafi aana xintaminoha wole xiinxallote kaaꞌlanno roso worranni. Ikkirono kuri maxaaffa attammoonnitano horoonsiꞌra dandiinanni. Annuwunna amuwu konne roso Maatete Magansiꞌransa yannara horoonsidhannoro, woy mittu qaaqqinsa ledo addinni xiinxallitanno wote horoonsidhannoro woy qaaqqinsara gillete xiinxallo rosiissanno yannara horoonsidhannoro wossana dandiitanno.