ROSO 2
Yihowa Farciꞌraasine Yaamammeemmohu Mayiraati?
Nohi
Abirahaaminna Saara
Muse
Yesuusi Kiristoosi
Batinyu mannira Yihowa Farciꞌraasine haarote daggino ammaꞌno harunsitannore labbannonsa. Ikkollana, 2,700 saꞌꞌanno diri albaanni heedhinori mittichu halaalaanchu Magani soqqamaano isi “farciꞌraasine” yaamantinota xawinsoonni. (Isayyaasi 43:10-12) Ninke 1931 geeshsha Qullaawu Maxaafi Rosaano yaamammanni keeshshinoommo. Yihowa Farciꞌraasine yaamama hananfoommohu mayiraati?
Kuni suꞌmi Maganinke ayetiro egensiisanno. Angatenni borreessinoonniti biꞌree borro kultannonte gede, Yihowa yinannihu Maganu suꞌmi Qullaawu Maxaafi giddo lowo kume ikkitanno basera borreessamino. Batinye Qullaawu Maxaafi tiro giddo, konni suꞌmi bayicho Mooticha woy Magano yinannire maaragete suꞌmuwa eessinoonni. Ikkollana, halaalaanchu Magani isonooto Musera egensiisinohu Yihowa yinannihu umisi suꞌminniiti; Isi togo yiino: “Hegere geeshsha suꞌmiꞌya konneeti.” (Wolapho 3:15) Konni garinni isi kaphu maganna baalantenni baxxinoha ikkinota buuxisino. Qullaawu Maganu suꞌminni woshshamanke lowo geeshsha tashshi assitannonke.
Kuni suꞌmi loosinke maatiro kulanno. Keeraanchu manchi Abeelinni hanafe hundihu lowo manni Yihowa ammanannota farciꞌranni keeshshino. Hundinni kayise Nohi, Abirahaami, Saara, Muse, Daawiti, hattono wolu manni ‘lowo gomichi gede ikkitino farciꞌraasine’ aana lexxanni dayino. (Ibiraawuyaani 11:4–12:1) Mittu manchi yoote mine mare beebbate cubbinshoonni manchira halaale farciꞌrannonte gede, ninkeno mannu Maganinkere halaale afanno gede assate murciꞌne kaꞌnoommo.
Konni suꞌminni woshshamankenni Yesuusi lawishsha harunsinoommo. Qullaawu Maxaafi Yesuusi ‘ammanaminohanna halaalaancho naqaashe’ woy farciꞌraasincho ikkinota kulanno. (Ajuuja 3:14) Yesuusi umisi mannu ‘Maganu suꞌma afanno gede’ assinotanna Maganu ‘halaale farciꞌrinota’ coyiꞌrino. (Yohaannisi 17:26; 18:37) Konni daafira, halaalunni Kiristoosi harunsitannori Yihowa suꞌminni woshshamanna konne suꞌma mannaho kula hasiissannonsa. Yihowa Farciꞌraasine tenne assate lowonta sharrantanni no.
Qullaawu Maxaafi Rosaano Yihowa Farciꞌraasine yaamama hanaffinohu mayiraati?
Yihowa farciꞌraasine uullate aana heeꞌra hanaffunku mageeshshi yanna ikkanno?
Qaru Yihowa Farciꞌraasinchi ayeti?