ROSO 7
Gambooshshinke Yannara Maa Maa Assinanni?
Niwuzilaande
Jaappaane
Ugaanda
Lituweeniya
Umi xibbi diro Kiristaanu mitteenni gamba yaanno woyite faarso faarsiꞌranno, huuccatto assiꞌranno, hattono Qullaawa Borro nabbawe hasaawanno; kayinni wole wonshanno woga dino. (1 Qorontoosi 14:26) Ninke gambooshshino hattooha ikkinota huwatatto.
Rosiinsanni rosi Qullaawu Maxaafi giddo nooho, hattono kaaꞌlannoho. Mitte mittenti songo Qidaame woy Sambata 30 daqiiqita Qullaawu Maxaafi lallawo macciishshate gamba yitanno; tini lallawo Qullaawa Borro heeshshonkera kaaꞌlitannohu hiittoonniitironna yannanke ledo mayi xaadooshshe afidhinoro xawissanno. Hakkawoyite baalunku uminkeha Qullaawa Maxaafa faꞌnine harunsineemmo. Lallawote gedensaanni, songote giddo noo roduuwi baalunku hedonsa coyidhanno faro afidhannoti “Agarooshshu Shae” Xiinxallo heedhanno; tenne xiinxallo yannara Agarooshshu Shae yinanni borro horoonsiꞌne mitte saate hasaambeemmo. Kuni hasaawi Qullaawu Maxaafi amaale garinni heeꞌneemmo gede kaaꞌlannonke. Alamete doyichora noote 110,000 saꞌanno songuwa baalante giddo mittu gari borro xiinxallineemmo.
Rosiisate dandoonke lossiꞌrate kaaꞌlannonke qajeelsha afiˈneemmo. Qoleno lamalate mereero mitto barra, sase gafa afiꞌrinohu Kiristaanu Heeshshonna Soqqansho yinanni gambooshshi noonke; kuni gambooshshi xintaminohu aganu kiiro qixxaabbannote Kiristaanu Heeshshonna Soqqansho—Xiinxallote Maxaaficho yinanni borro aanaati. Maganu Qaali Giddo Noo Jiro yinanniti gambooshshunniti umi kifile, songo balaxxe nabbabbinoha Qullaawu Maxaafi gafa seekkite huwattanno gede kaaꞌlitannote. Hakkiinni Qanchu Soqqanshora Diinaggaabbe yitanno kifilera, Qullaawa Maxaafa mannu ledo hasaawa dandiinanni gara leellishshannoti addi addi ikkito shiqqanno. Amaalanno rodii nabbawatenna coyiꞌrate dandoonke woyyeessiꞌrate kaaꞌlitanno hedo kulannonke. (1 Ximootewoosi 4:13) Kiristaanu Heeshshora yinannite jeefote kifilera, heeshshonke giddo Qullaawu Maxaafiha xintu seera harunsa dandiineemmo gara ronseemmo. Tenne kifile giddo mittu, xaꞌmotenninna dawarotenni shiqanno hasaawaati; kuni hasaawi Qullaawu Maxaafi egennonke lexxitanno gede kaaꞌlannoho.
Gambooshshenke dayittoro, hakko rosiinsanniha isilancho Qullaawu Maxaafi roso lowonta dhaggeeffatattota dihuluullammeemmo.—Isayyaasi 54:13.
Yihowa Farciꞌraasine gambooshshiwa maa maa macciishshatto?
Lamalate gambooshshinke giddo hiikkonne laꞌꞌa hasiꞌratto?