Aliidi Bisi Soyino Sokka

Yihowa Baxatto Rodoo:

Yesuusi, “Halaale affinanni, halaaluno borojjimmatenni fushshannoꞌne” yiino. (Yohaannisi 8:32) Tenne xiqisera noo qaalla lowonta sheshifachchishshannote! Ee, kuni qarrisannohu ‘gedensiidi barri’ kaphphu batiꞌrinoha ikkirono, halaale afa dandiinanni. (2 Ximootewosi 3:1) Maganu Qaali giddo noo halaale umo huwatitto yanna qulli yitannohe? Hatte yannara lowonta tashshi yiinoheti mittoreno dihuluullissanno!

Ikkollana, halaalunnita gara ikkitino egenno afiꞌranna halaale wolu mannira kula lowonta hasiissannonte gede, amanynyootinke halaalu ledo sumuu yaanno gede assiꞌrano hattonni hasiissannote. Hatto assiꞌrate, Maganu baxillinni fullummokki heeꞌra hasiissannonke. Maganu baxillinni fullummokki heeꞌrate ma assa hasiissannonke? Yesuusi reyara albaanni noo hashsha coyiꞌrino qaali tenne xaꞌmora dawaro ikkanno. Isi ammanantino hawaariyaatesi togo yiino: ‘Ani Anniꞌya hajajo wonshe isi baxillinni heeꞌreemmonte gede, kiꞌneno ane hajajo wonshitiniro, baxilliꞌyanni heedhinanni.’—Yohaannisi 15:10.

Yesuusi Maganu baxillinni fulikki heeꞌra dandiinohu Annisi hajajo wonshinohura ikkinota wodanchi. Ninkeno assa hasiissannonkehu hattooti. Maganu baxillinni fullummokki heeꞌrate, macciishshinoommo halaali ledo sumuu yaanno garinni heeꞌra hasiissannonke. Yesuusi aleenni yini hashsha togono yiino: “Konne coye affinironna loosu aana hosiissiniro maassantinoonnireeti.”—Yohaannisi 13:17.

Kuni maxaafi, heeshshokki giddo halaale loosu aana hosiisatto gede, hattono ‘hegere heeshsho agadhitanni Maganu baxillinni fulittokki heeꞌratto’ gede kaaꞌlannohe gede lowonta halchineemmo.—Yihuda 21, NW.