Alamete Goofimarchi Gambisinoni?

1. Albillitte ikkannore afa dandiineemmohu hiikkiinniiti?

TELEVIZHIINETE woy raadoonete odoo macciishshite, ‘Alame isi hiikkitanni no?’ yite hedde egennootto? Alamete aana qarrunna macca gibbanno coyi batiꞌrino daafira, mitu manni alamete goofimarchi gambisino yee hedanno. Ikkina alamete goofimarchi gambisinoni? Albillitte ikkannore afa dandiinanni gari no? Ee, no. Mannu ooso albillitte ikkannore afa dandiitannokkiha ikkirono, Maganu Yihowa kayinni afa dandaanno. Isi mannu ooso konni kaꞌa hiittoo heeshsho heedhannoronna uulla ma ikkitannoro Qullaawu Maxaafi giddo kulinonke.—Isayaasi 46:10; Yaiqoobi 4:14.

2, 3. Yesuusi rosaano maa afa hasidhino? Yesuusi insara mayyee qolino?

² Qullaawu Maxaafi alamete goofimarcho yaannohu, Uulla baꞌannota kulate ikkikkinni bunshe baala baꞌanno yanna kulateeti. Yesuusi mannaho Maganu Mangiste uulla gashshitannota rosiisino. (Luqaasi 4:43) Rosaanosi Maganu Mangiste dagganno yanna afa hasidhino daafira, iso togo yite xaꞌmitino: “Tini coyibba ikkitannohu mamarooti? Bayicho amadakkiranna alamete gumulora malaatu maati?” (Maatewoosi 24:3, NW) Yesuusi kuni ikkanno barra bade kula agure, alamete goofimarchi daara albaanni ikkannore kulinonsa. Yesuusi ikkanno yiinori xa ikkanni no.

³ Tenne fooliishshora, alamete goofimarchi daara kae noo yannara heeꞌnoommota leellishshanno taje laꞌneemmo. Umo kayinni, uullate aana qarru batiꞌrinohu mayiraatiro huwata dandiineemmo gede, hanni iima kaino olire laꞌno.

IIMA KAINO OLA

4, 5. (a) Yesuusi Moote ikkanni heeꞌreennanni iima mayi ikkino? (b) Yohaannisi Ajuuja 12:12 yitanno garinni, Sheexaanu iiminni uullara tugami gedensaanni mayi ikkanno?

⁴ Fooliishsho 8te, Yesuusi 1914nni Moote ikkinota ronsoommo. (Daanieeli 7:13, 14) Ajuujate maxaafi hakkawote ikkinore kulanni togo yaanno: “Gordoho iima olu kai; Mikaaeelinna [Yesuusi suꞌmaati] sokkaasinesi dhudhuufunna [Sheexaanunna] sokkaasinesi ledo olantu.”a Sheexaanunna agaanintesi konni olira qeelante uullara tugantino. Hatte yannara sokkaano mageeshshi geeshsha hagiidhitinoro hanni hedi! Uullate aana noo mannina? Qullaawu Maxaafi hatti yanna mannu oosora qarrunnita ikkitannota kulanno. Mayira? Korkaatuno, Daawuloosi “shiima yanna calla gattinosita” afino daafira lowo geeshsha hanqino.—Yohaannisi Ajuuja 12:7, 9, 12.

⁵ Daawuloosi uullate aana lowo qarra naqanni no. Isi, Maganu hunannosi yanna gambisse dagginota afino daafira baasa aaraawino. Hanni Yesuusi goofimarchu barruwa giddo ikkanno yiinore laꞌno.—Jeefote Hedo 24 lai.

GOOFIMARCHU BARRUWA

6, 7. Yesuusi olunna sagalete anje daafira coyiꞌrino masaalo xa woꞌmitanni noohu hiittoonniiti?

⁶ Ola. Yesuusi, “Gosa gosate aana, gashshootu gashshootu aana ola kayisanno” yiino. (Maatewoosi 24:7) Yannankera olunni goofino manni kiiro wole yannara olunni reyino manni kiiro baala roortanno. Alamete aana ikkannore xiinxallitannoti mitte dirijjite qixxeessitino rippoorte, 1914 kawa olunni goofino manni 100 miliyoone saꞌꞌannota buuxissino. Olunni 1900nni kayise 2000 geeshsha noohu 100 diri giddo reyino manni kiiro, hakkuyira albaanni noohu 1,900 diri giddo olunni goofino manni kiironni sase ero roortanno. Konni daafira olu lowo miliyoone ikkanno mannira shetto naqinonna gawajjino gara heda dandaatto!

⁷ Hude. Yesuusi, “Addi addi darga hude . . . ikkanno” yiino. (Maatewoosi 24:7) Yannankera albinni roore lowo sagale nooha ikkirono, batinyu manni xaano gari sagale diafiꞌrino. Mayira? Korkaatuno sagale hidhanno woxe diafiꞌrino woy loosiꞌranno baatto dinonsa. Mitte biliyoone saꞌꞌanno manni barraho ikkitanno sagale hidhanno woxe diafiꞌrino. Alamenniti Fayyimmate Uurrinsha, diru dirunku onte miliyoone saꞌꞌanno qaaqquulli gari sagale afiꞌrannokki daafira reyanno yitino.

8, 9. Yesuusi baattote huxanonna xiwanu daafira coyiꞌrino masaalo woꞌmitanni noota leellishannori maati?

⁸ Baattote huxano. Yesuusi, “Addi addi darga baatto huxidhanno” yee masaalino. (Luqaasi 21:11) Yannankera diru dirunku baatto lowo geeshsha huxiꞌrase rosantinota ikkitino. Baatto huxidheenna, 1900 kawa lame miliyoone saꞌꞌanno manni reyino. Tekinooloje baatto huxidhara albaanni anfanni gede kaaꞌlitanni nooha ikkirono, xaano baattote huxanonni mannu reyansa digattino.

⁹ Xiwana. Yesuusi “dhibbu” daanno yee masaalino. Buutote xiwani bayichonko taraawe lowo manna gudanno. (Luqaasi 21:11) Dokiterootu lowo xiwana xagisa dandiitanno gara rossinoha ikkirono, xaano xagicho anfoonnikki xiwani no. Isinni mitte rippoorte xawissino garinni, diru dirunku shombu dhibbi, shekkeerenna kolleeru dhibbi lowo miliyoone ikkanno manna shaanno. Qoleno, dokiterootu 30 haaru xiwani dayinota huwattino; kuri giddo mitoho xagicho dianfoonni.

GOOFIMARCHU BARRUWA GIDDO HEEꞌRANNO MANNI AKATA

10. Yannankera 2 Ximootewoosi 3:1-5 aana noo masaalo woꞌmitanni noohu hiittoonniiti?

¹⁰ Qullaawu Maxaafi 2 Ximootewoosi 3:1-5 aana togo yaanno: “Goofimarchu barra qarrissanno yanna dagganno.” Soqqamaasinchu Phaawuloosi goofimarchu barruwa giddo heeꞌranno manni akati hiittoohoro xawisino. Isi yiino garinni mannu

• umosi baxanno

• woxe baxanno

• annahonna amate dihajajamanno

• ammanamannokkiho

• mininsa manna baxannokkiho

• insaneeto qeeꞌlannokkiho

• kaajjadohonna giwansho hasiꞌrannoho

• Maganunni roorse qawaaxxo baxannoho

• Magano baxannoha lawanno, kayinni isira hajajama dihasiꞌranno

11. Faarso 92:6, 7 yitanno garinni, bushuullu ma ikkitanno?

¹¹ Kiꞌne qooxeessira batinyu manni hatto ikkanno? Alame woꞌmate aana lowo manni akati hattooho. Ikkollana Maganu muli yanna giddo tenne biddi assanno. Isi togo yee qaale eino: “Bushuullu hayissote gede mudhurono, haxawarrootu latturono horonta baꞌanno.”—Faarso 92:6, 7.

GOOFIMARCHU BARRUWA GIDDO IKKANNOHA DANCHA COYE

12, 13. Yihowa goofimarchu barruwa giddo maa rosiisinonke?

¹² Qullaawu Maxaafi goofimarchu barruwa giddo qarrunna shetto batidhannota masaalino. Ikkollana danchu coyi ikkannotano kulanno.

¹³ Qullaawa Maxaafa huwata. Masaalaanchu Daanieeli goofimarchu barruwara halaale ‘egennaammu calla wodanchitannota’ coyiꞌrino. (Daanieeli 12:9, 10) Maganu mannisi Qullaawu Maxaafi yaannore wolu wotinni roore huwatanno gede assanno. Hakko iso Yihowa 1914nni kayise konne assanni no. Lawishshaho, suꞌmisi mageeshshi geeshsha hasiisannoha ikkinoro, uullate daafira hedinori maatiro, wodote daafira, reyineemmo wote hiikkineemmoro, hattono kaote daafira rosiisinonke. Qarranke baalanka tirtannoti Maganu Mangiste calla ikkitinota ronsoommo. Qoleno hagiirraamma ikka dandiinanni garanna Magano hagiirsiisanno garinni heeꞌra dandiinanni gara ronsoommo. Ikkina Maganu soqqamaasine rossino roso ma garinni horoonsidhanno? Qullaawu Maxaafiti wole masaalo tenne xaꞌmora dawaro qoltanno.—Jeefote Hedo 21 nna 25 lai.

14. Maganu Mangisteha dancha duduwo meꞌꞌe gobbara sabbankanni heeꞌnoonni? Sabbakkanni noori ayeooti?

¹⁴ Alame woꞌmate loonsanni heeꞌnoonniha sabbakate looso. Yesuusi goofimarchu barrire coyiꞌranni togo yiino: “Kuni Maganu Gashshootihu Danchu Duduwi gobba baalate kulamanno.” (Maatewoosi 24:3, 14) Maganu Mangisteha dancha duduwo 230 saꞌanno gobbara 700 saꞌꞌanno afiinni dudumbanni heeꞌnoonni. Ee, ‘gosa baalatenninna gaꞌre baalatenni gamba yitinori’ Yihowa Farciꞌraasine, uulla woꞌmate aana mannu Maganu Mangiste maatironna mannu oosora maa assitannoro huwatanno gede kaaꞌlitanni no. (Yohaannisi Ajuuja 7:9) Qoleno konne assitannohu woxe baantinsakki mullaati. Lowo manni giwannonsahanna qarrisannonsaha ikkirono, Yesuusi masaalinonte gede sabbakate looso hoola dandaannohu mittuno dino.—Luqaasi 21:17.

MAA ASSATE HEDOOTTO?

15. (a) Heeꞌnoommoti goofimarchu yanna ikkitinota ammanatto? Mayira? (b) Yihowara hajajamanno manni hiikkanno? Hajajamannokkihuna?

¹⁵ Heeꞌnoommoti goofimarchu yanna ikkitinota ammanatto? Qullaawu Maxaafi goofimarchu barruwa giddo ikkanno yee masaalinohu batinyu coyi xa ikkanni no. Yihowa muli yanna giddo dancha duduwo sabbakate looso uurrinsanni gede kuleenna “goofimarchu” daanno. (Maatewoosi 24:14) Goofimarchu maati? Armagedooni olaati; hakkawote Maganu bunshe baalanta hunanno. Yihowa isiranna Beettisira hajajama giwanno manna baalanka Yesuusanna wolqaataamma sokkaasinesi horoonsiꞌre gudanno. (2 Teselonqe 1:6-9) Hakkunni gedensaanni, Sheexaanunna agaanintesi manna disoꞌrisiissanno. Maganoho hajajama hasiꞌrannohunna Mangistesira maahoyye yee galanno manni woꞌmunku Maganu uyino hexxo baalanti woꞌmitanna laꞌꞌanno.—Yohaannisi Ajuuja 20:1-3; 21:3-5.

16. Goofimarchu lowo geeshsha gambisino daafira maa assa hasiissannohe?

¹⁶ Sheexaanu gashshinoti tini alame muli yannara baꞌanno. Hakko daafira, ‘Ma assa hasiissannoe?’ yine ninkeneeto xaꞌma hasiissannonke. Yihowa dandaaminke deerrinni Qullaawa Maxaafa seekkine xiinxallinammora hasiꞌranno. Xiinxallokki mulluri gede assite laꞌooti. (Yohaannisi 17:3) Yihowa Farciꞌraasine mannu Qullaawu Maxaafi yaannore huwatanno gede kaaꞌlate lamalate kiiro gambooshshe assidhanno. Konne gambooshshe ganyite haꞌrate woꞌnaali. (Ibiraawoota 10:24, 25 nabbawi.) Heeshshokki giddo biddi assiꞌra hasiissannohe coyi noota huwatittoro, biddi assiꞌrate lashshi yitooti. Konne assittoro, Yihowa ledo noohe jaaloomi lexxanno.—Yaiqoobi 4:8.

17. Goofimarchu daanno wote rooru mannira hedeweelcho coye ikkannohu mayiraati?

¹⁷ Soqqamaasinchu Phaawuloosi, bushuulleho bao rooru manni hedinokki yannara “hashshi mooraanchi gede” hedeweelcho daggannota coyiꞌrino. (1 Teselonqe 5:2) Yesuusi lowo manni goofimarchu barruwa giddo heeꞌnoommota leellishshanno taje lashshi asse agurannota masaalino. Togo yiino: “Nohi yannara ikkinte gede, manchi Beetti daanno yannano [woy, goofimarchu barruwa] hattoota ikkitanno. Hakka waro baote wayi daara albaanni Nohi markaawe ei barri geeshsha, mannu itanninna aganni, adhanninna adhamanni no. Baote wayi daye baalanka fee haaꞌre haꞌra geeshsha diaffino. Manchi Beetti daanno yannano hattoota ikkitanno.”—Maatewoosi 24:37-39.

18. Yesuusi mayyee qorowisiisinonke?

¹⁸ Yesuusi ‘itunna agu batinyinni, dimbatenninna heeshshote daafira yaandanna’ hedonke billaallitannokki gede qorowisiisinonke. Isi goofimarchu hedeweelcho “woshshaade amadanno” yiino. Qoleno hakku barri ‘baattote aana noo manni baalaho’ daannota coyiꞌrino. Yesuusi hakkiinni aanche togo yiino: “Kunnira, daannohu bushu coyi baaluwiinni gatate wolqa afidhinanni gedenna Manchi Beetti albaanni uurra dandiitinanni gede woꞌmanka woyite jaattine [woy, eeggifattine] huuccidhe.” (Luqaasi 21:34-36) Yesuusi uyino qorowishsha harunsa hasiissannohu mayiraati? Korkaatuno muli yannara busha Sheexaanu alame baꞌannohuraati. Goofimarchu barra gatte saꞌannorinna haaro alamera hegerera heedhannori Yihowanna Yesuusa hagiirsiissinore callaati.—Yohaannisi 3:16; 2 Pheexiroosi 3:13.