XIINXALLO 11

Iibbado Giddonni Coyiꞌra

Roomu Sokka 12:11

ASSA HASIISSANNOHERE: Macciishshaano loosoho kakkayisa dandaatto gede iibbado giddonni coyiꞌri.

Rosu ate umikki wodana kakkayisanno gede assiꞌri. Kifile shiqishate qixxaawatto woyite, hatti sokka mageeshshi geeshsha hasiissannota ikkitinoro hiinci. Woꞌma giddonni coyiꞌra dandaatto gede shiqishatto roso seekkite xiinxalli.
Macciishshaanote daafira hedi. Nabbawatto mashalaqqe woy rosiisatto rosi woloota kaaꞌlannohu hiittoonniitiro hiinci. Macciishshaanote hakko rosira noonsa diniqo lexxitanno gede assanno garinni shiqisha dandaatto doogga hedi.
Roso iibbado giddonni shiqishi. Woꞌma giddonni coyiꞌri. Hedokki xawisate bisu millimillonna albu xawishsha garunni horoonsiꞌri.

Mittu garita bisu millimillo calla horoonsidhanni macciishshaanote hedo billaallitanno gede assitooti. Coyidhanni nootto sokka ledo sumuu yitanno millimillo horoonsiꞌri. Roorenkanni, qara hedo coyiꞌrattonna macciishshaano loosoho kakkayisate hedatto woyite iibbado giddonni coyiꞌri. Ikkollana lallawo hanaffe gudatto geeshsha baalankare iibbado giddonni coyiꞌratto yaa diꞌꞌikkino; hatto assakki macciishshaano ceeꞌmitanno gede assitara dandiitanno.