AANIIDI QOOLIHA COYI UMO | LOOSATTO LOOSINNI HAGIIDHA DANDAATTO GARA
Loonseemmo Loosinni Hagiidha Dandiineemmo Gara
“Mittu mittunku manchi itanna aga, hattono daafure loosanno loosi baalunkunni hagiidha hasiissannosi. Tini Maganu eltooti.” (Mekibibi 3:13) Maganu loonseemmo loosinni hagiidhinammora hasiꞌrannoha ikkiro, hagiidhineemmo garano kulannonkeha dilawannohe? (Isayyaasi 48:17) Ee, Maganu loonseemmo loosinni hagiidhineemmo gara Qaalisi Qullaawu Maxaafi giddo kulinonke. Hanni aante noota Qullaawu Maxaafi amaale laꞌno.
LOOSOHO GARA IKKITINO LAO HEEDHOHE
Loosatto loosi surrete looso, woy wolqate looso woy lamenka ikkara dandaanno; ikkirono, ‘daafurre loonsoonniri horo aannota’ deꞌooti. (Lawishsha 14:23) Hiittoo horo? Umihunni, diinaggaawe loosa maalaamittete hasiisannonkere afiꞌrate kaaꞌlitannonke. Hige Maganu iso halaalunni magansidhannore towaatannota coyiꞌrino. (Maatewoosi 6:31, 32) Ikkollana, ninkeno ammanamme diinaggaambe loonsammora hasiꞌranno.—2 Teselonqe 3:10.
Konni daafira, loosu mixonke wonshiꞌrate kaaꞌlannonke coyeeti. Qoleno, halaafinatenke garunni wonshate kaaꞌlannonke. Lemiina ontu dirihu Jooshuwa togo yiino: “Hasiisannohe coye afiꞌra dandaa loworeeti. Hasiisannohe coye hidhate ikkannohe woxe afiꞌra dandiittoro, loosatto loosi hendoonni alaama wonshino yaate.”
Qoleno, diinaggaawe loosa uminkera noonke ayirrinyi lexxanno gede kaaꞌlitannonke. Diinaggaawe loosa shota diꞌꞌikkitino. Loonseemmo loosi ceeꞌmishannoha woy kabbaade ikkiro nafa, umonke qeeꞌline diinaggaambe loonseemmoha ikkiro, Maganu assinammora hasiꞌrannore assinanni heeꞌnoommota anfoommo daafira hagiidhineemmo. Ceeꞌma qeeꞌla dandiinoommota afanke tashshi assitannonke. (Lawishsha 26:14) Tenne hendanni wote, looso loosa harshammi assitanno. Sai birxichira qummi assinihu Aarooni togo yiino: “Barra woꞌma loosanni hosoommo barra dancha simmeete macciishshantannoe. Lowo geeshsha daafursannoeha woy assoommore wolootu laꞌinokkiha ikkara dandaanno; ikkirono, lowore assoommota afoommo.”
LOOSOKKI OGIMMATENNI LOOSATE WOꞌNAALI
Qullaawu Maxaafi ‘loosisira fullahino manchonna’ ‘angasenni loosa baxxanno’ mancho naade coyiꞌranno. (Lawishsha 22:29; 31:13) Mittu manchi iimi uullanni kae fullahinoha ikkannokkiti egennantinote. Lowo manni gari geeshsha dandaannokki looso loosa hakkeyi geeshsha dibaxanno. Duuchu manni looso baxannokkihu loosonsa dancha gede loosa rosate gari geeshsha sharraminokki daafira ikkara dandaanno.
Noore coyiꞌniro, mittu manchi ceeꞌma agure looso dancha gede loosa dandaanno gara hedannoha ikkiro, aye loosono hagiirrunni loosa rosa dandaanno. Wiiliyaami yinannihu 24 diri beetti togo yiino: “Mitto looso wolqakki assitu geeshsha loosse abbino guma laꞌꞌatto wote, lowo geeshsha tashshi yaannohe. Harancho doogo hasiꞌrattoha woy assa hasiissannohe geeshsha calla assite agurattoha ikkiro hattoo hagiirre diafiꞌratto.”
LOOSIKKI WOLE MANNA KAAꞌLANNO GARA HEDI
Loosse afiꞌratto woxe calla heddooti. Hatteentenni ateneeto togo yite xaꞌmi: ‘Konne looso loosa hasiissinoehu mayiraati? Kuni loosi horonta loosama woy garunni loosama hoogiro mayi kalaqamanno? Kuni loosi woloota kaaꞌlannohu hiittoonniiti?’
Roorenka tenne jeefote xaꞌmo seekkine heda hasiissannonke; korkaatuno looso loosa roore hagiirsiissannohu loosinke woloota kaaꞌlanno gara hendeemmoha ikkirooti. Yesuusi umisi togo yiino: “Adhantenni aa roore hagiirre abbitanno.” (Hawaariyaatete Looso 20:35) Loosinkenni xaaddote horo afiꞌranno manna lawishshaho dambanyootanna loosiisannonke manchono agurranna, diinaggaambe loosanke kaaꞌlitannohu wolu mannino no. Kuri giddo mininke mannanna qarramino manna kula dandiinanni.
Mininke manna. Qaete anni diinaggaawe loose maatesira hasiisannore shiqishannoha ikkiro, minisi manni ajayi ajeenna lamu gari horo afiꞌranno. Umihunni, maalaamittete hasiisannonsare sagale, uddanonna galannowa afiꞌranno gede kaaꞌlanno. Isi konne asse “umisire ikkitinore towaatanno” gede Maganu uyinosi halaafinate wonshanno. (1 Ximootewosi 5:8) Layinkihunni, diinaggaawe loosanno anni oososi looso baxxanno gede dancha lawishsha ikkanno. Sai birxichira kullihu Sheeni togo yiino: “Anniꞌya diinaggaawe loosate dancha lawishsha ikkannoho. Isi roore diro hanaaxicha ikke diinaggaawe loosinoho ammanamino manchooti. Mittu manchi ogimma heedheennasi mannaho kaaꞌlannore loosasi mageeshshi geeshsha hagiirsiissannoro isiwiinni rosoommo.”
Qarramino manna. Hawaariya Phaawuloosi Kiristaanu ‘qarraminohura aannori heeꞌrannonsa gede diinaggaawe loosanno’ gede amaalino. (Efesooni 4:28) Uminkeranna mininke mannira hasiisannore shiqishate diinaggaambe loonseemmoha ikkiro, qarrantinorirano uyineemmori heeꞌrannonke. (Lawishsha 3:27) Konni daafira, diinaggaawe loosa uyine afiꞌnanni hagiirre afiꞌrate kaaꞌlitannonke.
YINOONNIHE GEESHSHA CALLA LOOSSE AGURTOOTI
Yesuusi Ilaalu Sibikatesi yannara togo yiino: “Silxaane noosi manchi mitte kiilomeetire haꞌrattora giddeessihero, lame kiilomeetire ledosi haꞌri.” (Maatewoosi 5:41) Tenne xiqisera nooha xintu seera harunsa dandaattohu hiittoonniiti? Shiimare calla assite agurantenni, yinoonnihehunni saꞌe loosatto doogga hasiꞌri. Mixo fushshiꞌri; kaajja gede loosate woy rakke rakke loosate woꞌnaali. Shiimaaddu coyi nafa gatikki baalankare dancha gede loosi.
Yinoonnihehunni saꞌe loosate woꞌnaalattoha ikkiro, loosatto loosinni roore hagiidhatto. Hiittoonni? Tenne assattoha ikkiro, umokki hajajjanni noottohu ateeti yaate. Yinoonnihehunni saꞌe loossanni noottohu, wolu giddeesseennahe ikkikkinni ati umikki hasiꞌrootto daafiraati. (Filimoona 14) Tini assaawe Lawishsha 12:24te noohu xintu seeri ledo sumuu yitannote: “Diinaggaawe loosanno manni anga gashshaancho ikkitanno; ceeꞌmaleette anga kayinni borojjicho ikkitanno.” Ninke giddo borojjimmate looso loosannohu hakkeeshshi geeshsha hoogara dandaanno. Ikkollana, yinoonnisi geeshsha calla loosanno manchi wolu manchira borojjicho ikkinohu gede ikke macciishshamasira dandaanno. Yinoonnisihunni sae loosannohu kayinni umisi baxe assannore ikkino daafira, isonooto hajajannohu iso umosi ikkinota hedanno. Kuni manchi umisira mooticha ikkanno yaate.
LOOSOHO QUWA SAꞌꞌATTOKKI GEDE QOROPHI
Diinaggaawe loosa kaajja coyeeti; ikkirono, heeshshote giddo looso roore hasiisanno coyi noota dea dihasiissannonke. Qullaawu Maxaafi ceeꞌminikki loonsanni gede amaalanno. (Lawishsha 13:4) Ikkirono, loosu araado amaddannonkekki gedeno amaalannonke. Mekibibi 4:6 togo yitanno: “Daafurrenna bubbe shorrine afiꞌnannite lame cuꞌmonni, fooliishshotenni afiꞌnanniti mitte cuꞌmo roortanno.” Tennenni maa ronseemmo? Loosu araado amaddinosi manchi loosu yannasinna wolqasi gudannoha ikkiro, loosisi guminni hagiidhe diafanno. Wole yaattonni, konni manchira loosu ‘bubbe shorrate’ gede mittoreno ledannokkiha ikkanno.
Qullaawu Maxaafi loosoho quwa saꞌinokki lao heedhannonke gede kaaꞌlannonke. Diinaggaambe loonseemmo gede amaalannonkeha ikkirono, ‘roore hasiissanno coyibba bande anfeemmo’ gede kulannonke. (Filiphisiyusi 1:10) Roore hasiissanno coyibba yinanniri hiikkuriiti? Kuri giddo mitte maatenkenna jaallanke ledo yanna sayisate. Hakkiinnino sae hasiisannori kayinni ayyaanaamittete coyibbaati; hakkurino Maganu Qaale nabbawanna hiinca labbinoreeti.
Quwa saꞌinokki heeshsho heedhannori loossanno loosinni roore hagiidhitanno. Aleenni qummi assinihu Wiiliyaami togo yiino: “Alba looseemmo manni giddo mittu loosoho quwa saꞌꞌannokkiho dancha lawishsha ikkanno manchooti. Isi diinaggaawe loosanno; qoleno loosisi isilancho ikkino daafira dambanyootisi ledo danchu xaadooshshi noosi. Kayinni hawarro loosu goofanno wote, loosu hajo facci asse agure maatesinna magansiꞌrasiwa higanno. Ani afoommohu hagiirraamu manni giddo mittu isooti!”