Danchumma​—Leellisha Dandiineemmo Gara

NINKE baalunku danchaho yinankera hasiꞌneemmo. Ikkollana, tenne heeꞌnoommo alamera danchumma leellisha shota diꞌꞌikkitino. Batinyu manni “danchumma giwanno.” (2 Xim. 3:3) Insa danchanna busha uminke afiꞌneemmo yee hedanno, yaano “busha danchaho; dancha bushaho” yee coyiꞌranno. (Isa. 5:20) Konni albaanni heeshshonke giddo iillinonkeri woy guuntete xeꞌne noonkere ikkanke danchumma leellisha qarra ikkitannonke gede assitanno. Konnira ninkerano Aneea yinanni rodoora macciishshaminoseri macciishshamankera dandaanno; ise Yihowara lowo diro soqqantinoha ikkirono, “Dancha ikka dandeemma yee heda qarrissinoe” yite coyidhino.

Ikkollana ninke baalunku danchummate akata lossiꞌra dandiineemmo. Danchumma Maganu ayyaani laalooti; qoleno isi ayyaani danchumma leellinsheemmokki gede guficho ikkitannonke coyibba baala roortanno wolqa afiꞌrino. Konninni aanchine danchummate daafira xiinxallineemmo; hattono konne akata albinni roore leellisha dandiineemmo gara ronseemmo.

DANCHUMMATE YAA MAYYAATE?

Haranchunni, danchummate yaa dancha ikkate yaate. Kuni akati, bushanna sholino coye agurre xalala amanyootenna arshimma harunsa leellishannoho. Mannaho kaaꞌlanno coye assine danchumma leellisha dandiineemmo.

Maatensaranna jaallansara dancha coye assa baxanno manna afoottoha ikkara dandaanno; ikkollana danchummate yaa hatto assa calla ikkitinoni? Qullaawu Maxaafi “mitte soꞌrono assikkinni, woꞌmanka woyite dancha looso calla loosannohu baattote aana mittuno dino” yaanno daafira, danchumma leellisha dandiineemmohu woꞌmante yannara diꞌꞌikkino. (Ros. 7:20) Soqqamaasinchu Phaawuloosi “Ane giddo woy mannimmaꞌya heeshsho giddo horonta danchu coyi nookkita egennoommo” yee maaxikkinni coyiꞌrino. (Rom. 7:18) Konni daafira, danchummate akata lossiꞌrate, konni akati Buicho ikkinohu Yihowa daafira rosa hasiissannonke.

YIHOWA DANCHAHO

Yihowa kuni bushaho kuni danchaho yee kulannonke. Qullaawu Maxaafi isi daafira kulanni togo yaanno: “Ati danchaho; loosikkino danchaho. Wogakki rosiisie.” (Far. 119:68, NW) Hanni konni qummeeshshira Yihowa danchumma leellishannoha lame coye laꞌno.

Yihowa danchaho. Maganu akatta giddo mitte danchummate. Hanni Yihowa Musera “Danchummaꞌya leellisheemmohe” yiisi yannara ikkinore hedi. Yihowa danchummanna gaamaarre albasiinni higge saꞌu yannara Muse togo yitanno huuro macciishshino: “Ani Kaaliiqi maareemmohonna hanqoho muddameemmokkiho mararaancho Maganooti; ammanamaꞌyanna bagamannokkihu baxilliꞌya batiꞌraho. Bagamannokkihu baxilliꞌya kumunni kiirranni ilamara iillanno; sao, sarxonna cubbo agureemmo; ikkirono, sao assinoha horonta dikeereenseemmo.” (Ful. 33:19; 34:6, 7) Konni daafira, mittu mittunku Yihowa akati danchumma afiꞌrino. Mannu ooso baalante giddo Yesuusi geeshsha danchu nookkiha ikkirono, isi “Mittu Magani kaꞌa danchu dino” yiino.—Luq. 18:19.

Yihowa loosi danchaho. Yihowa loosinore laꞌne isi danchumma huwata dandiineemmo. “Yihowa baalunkura danchaho; loosisi baalunku maarosi leellishanno.” (Far. 145:9, NW) Yihowa danchanna mallaadannokkiha ikkino daafira, mannu ooso baalate heeshshonna heeshshote hasiisannore uyinonsa. (Soq. 14:17) Isi gatona yaannonke woyiteno danchummasi leeltanno. Faarsaasinchu “Ati shaqqadohonna cubbono agurattoho” yee borreessino. (Far. 86:5) Qoleno Yihowa “danchumma assitannorira dancha coye dihoꞌlannonsa.”—Far. 84:11.

“DANCHARE ASSA ROSSE”

Kalaqammoommohu Maganu daninni ikkino daafira, danchuulle ikkatenna dancha coye assate dandoo noonke. (Kal. 1:27) Ikkollana Maganu Qaali isi soqqamaasine “danchare assa rosse” yee amaalanno. (Isa. 1:17) Ikkina konne kaajja akata lossiꞌra dandiineemmohu hiittoonniiti? Hanni togo assa dandiineemmota sase doogga laꞌno.

Umihunni, addu danchumma leellinsheemmo gede kaaꞌlannonkeha qullaawa ayyaana aannonke gede huuccatto assiꞌra dandiineemmo. (Gal. 5:22) Addaho, qullaawu ayyaani danchare banxeemmo gedenna bushare gimbeemmo gede kaaꞌlannonke. (Rom. 12:9) Qullaawu Maxaafi Yihowa ‘dancha coye baala assineemmonna coyiꞌneemmo gede wodananke jawaachishannota’ kulanno.—2 Tes. 2:16, 17.

Layinkihunni, qullaawu ayyaaninni borreessaminoha Maganu Qaale nabbawa hasiissannonke. Hatto assineemmoha ikkiro Yihowa “gara ikkino coyi” maatiro rosiisannonke, hattono “dancha coye assate” qixxaambeemmo gede kaaꞌlannonke. (Law. 2:9; 2 Xim. 3:17) Wodaninke tuutu uduunnicho wodhinanni saaxine gedeeti; Qullaawa Maxaafa nabbambeemmohanna nabbamboommore hiincineemmoha ikkiro, tenne “saaxine” giddo yannate gedensoonni kaaꞌlannokeha muxxe coye mareekkiꞌnanni heeꞌnoommo.—Luq. 6:45; Efe. 5:9.

Sayikkihunni, “dancha ikkinnina busha labbooti.” (3 Yoh. 11) Qullaawu Maxaafi giddo dancha lawishsha ikkitannonkeri no. Baalunkunni roore lawishsha ikkitannonkeri Yihowanna Yesuusaati. Ikkollana wole danchumma leellishino mannano heda dandiineemmo. Insa giddo Xabitanna Barnabaasi yinanni rosaano qaangeemmoha ikkara dandaanno. (Soq. 9:36; 11:22-24) Insa woloota kaaꞌlate yite assitinore xiinxallanke kaaꞌlitannonke. Atino maatekki giddo woy songote giddo mitoota shiqqe kaaꞌla dandaatto gara hedi. Xabitanna Barnabaasi danchumma leellishansanni afidhino suꞌmi majjaha diꞌꞌikkino. Atino danchumma leellishittoro lowo horo afiꞌratto.

Yannankerano danchumma leellishino manni lawishsha heda dandiineemmo. Lawishshaho, diinaggaabbe loossannotanna ‘dancha coye baxxannota’ songote cimeeyye heda dandaatto. Assootinsannino ikko coyiꞌrannorinni “dancha coye rosiisannore” meya roduuwano heda dandaatto. (Tit. 1:8; 2:3) Rooziliyiini yinanni rodoo togo yitino: “Jaalaꞌya songote giddo woloota kaaꞌlatenna jawaachishate sharrantanno. Ise insa noo gara heddanno, hattono duucha woyite insara shiima aamamooshshe uyitanno woy wolere assite kaaꞌlitanno. Danchaho yinannihu ise gedee manna lawannoe.”

Yihowa soqqamaanosi ‘dancha coye hassanno’ gede jawaachishinonsa. (Amo. 5:14) Hatto assanke, Yihowa seera banxeemmo gede calla ikkikkinni danchare assate murciꞌneemmo gede jawaante ikkitannonke.

Wolootaho danchumma leellishate yaa, hoola yinoonni aamamooshshe aate woy lowore assate yine heda dihasiissannonke. Hanni konne lawishsha hedi: Muꞌro lophitannohu waa mitte hinge calla faa assine dunne agurreenna ikkikkinni shiima shiima waa duucha hinge hayikkinsirooti. Hatteente gede, danchummanke babbaxxitino doogganni leellisha dandiineemmo.

Qullaawu Maxaafi danchare assate ‘qixxaambeemmo’ gede jawaachishannonke. (2 Xim. 2:21; Tit. 3:1) Wolootu noo gara illachinsheemmoha ikkiro, manna “dhaawate danchanna hagiirsiisannonsa coye” assineemmo faro hasiꞌneemmo. (Rom. 15:2) Togo assa dandiineemmo doogga giddo mitte noonkere insara aate. (Law. 3:27) Manna sagale koyisa woy ledonke jawaachishanno hasaawa hasaawanno gede koyisa dandiineemmo. Dhiwaminohu noota anfummoro, sokka borreessine soya, maꞌre laꞌꞌa, woy silke bilbila dandiineemmo. Konnira “wole manna hasiisinonsa garinni dhaawatenna macciishshitannorira qiniite ikkanno gede dancha coye” coyiꞌneemmo faro hasiꞌno.—Efe. 4:29.

Yihowa gede, baalunku mannira danchare assa hasiꞌneemmo. Konnira manna dimallaandeemmo. Manna mallaandeemmokkita leellisha dandiineemmoti kaajja doogo, Maganu Mangisteha dancha duduwo baalunkura duduwate. Yesuusi hajajinonke garinni, giwannonke mannirano nafa danchare assa hasiꞌneemmo. (Luq. 6:27) Mannaho shaqqille leellishanna danchare assa horo soꞌro diꞌꞌikkitino; korkaatuno “togoore giwanno seeri dino.” (Gal. 5:22, 23) Mannu giwannanke woy qarru iillanni heeꞌreennanke danchare assineemmoha ikkiro, wolootu halaalu minira dagganno gede kaaꞌlinammoranna Maganu ayirranno gede assinammora dandiineemmo.—1 Phe. 3:16, 17.

DANCHARE ASSANKE KIISSANNONKE

“Danchu [manchi] loosiꞌrinore adhanno.” (Law. 14:14) Danchare assa mayi horo afidhino? Wolootaho danchare assineemmoha ikkiro, insano ninkera hatto assitankera dandiitanno. (Law. 14:22) Wolootu danchare assa hooggunkerono nafa, agurrummokki danchumma leellishanke wodaninsa shaqqannonna hedonsa biddi assidhanno gede kaaꞌlitansara dandiitanno.—Rom. 12:20.

Batinyu manni danchare assansanna bushu coyiwiinni xeertiꞌransa kaaꞌlitinonsata huwatino. Hanni Naansii yinanni rodoo lawishsha laꞌno. Ise togo yitino: “Ani anjeꞌyanni kayise xelleqqisate, amanyoote bainore asseemmatenna manna diayirriseemmate. Maganu rosiisannori danchare ikkinota huwatanna konne roso harunsa hanafummati kayinni roore hagiirraame ikkoommo. Xa aneneetira dancha lao nooe.”

Danchumma leellinsheemmo gede assannonkehu baalunkunni roorino korkaati hatto assanke Yihowa hagiirsiissanno daafiraati. Assineemmore mannu laꞌꞌa hoogirono nafa, Yihowa laꞌꞌanno. Isi assineemmoha mitto mittonka dancha coyeno ikko hedonke afino. (Efe. 6:7, 8) Tini mayi guma abbitanno? “Keeraano [woy danchuulle] Kaaliiqi baxanno.” (Law. 12:2) Konni daafira, danchare assanke agurroonke. Yihowa “Dancha looso loossannore baala galantanninsa; ayirrinyenna keereno uyinanninsa” yee qaale eino.—Rom. 2:10.