Bushu Coyi Woꞌmino!

Baangilaadeshete gobbara Daaka katamira shaqqadonna manna baxxannoti Simiitaa yinanniti 35 diri mancho no. Mannu ise qarooyye minaamanna Maganu daafira rossinore mannaho kula baxxannota hagiirraame mancho ikkitinota huwatino. Ikkollana Simiita hedeweelcho dhiwante mitte lamala nafa ikkikki reyiteenna, maatesenna jaallase lowo geeshsha xissiisidhino!

Sajjoo diro sainonsari Jeemsinna galtesino Simiita gede dancha suꞌma afiꞌrinoreeti. Mitte badheessu woggara, lamunku Yunayitidi Isteetete Galchimi Qaccera noo jaallansa layiꞌrara haꞌrino. Hakkiinni kayinni qaensa dihigino. Haꞌrinowa makeenu danonni reyino; konninni kainohunni ayiddinsanna ledonsa loossannori baasa xissiisidhino.

Yannankera bunshenna qarru batiꞌrinota huwatate xeertowa haꞌra dihasiissannonke. Wottaaddaruno wottaaddara ikkinokki mannino olunni goofanno. Jaddonna finqille beebbaataamo manna gawajjitanno. Danonna dhibbu manna shaannohu dirinsanna dagoomu giddo noonsa bayichi garinni diꞌꞌikkino. Kalaqamu dano mittu dagoomi giddo noo manna ewelumma baddukki guddanno. Manna mulla kae giwanna taashshote xeꞌne baalankawa no. Togoori aterano iillinoheha ikkara dandaanno.

Tenne baala hendanni wote togo yee xaꞌma garankolla:

• Danchu mannira bushu coyi iillannohu mayiraati?

• Togoo coye assannohu Maganoho?

• Buutote qarri iillannohu hedeweelchootinso, mannu afanni assannorinniiti?

• Mittu manchira qarru iillannosihu albi heeshshosi yannara assino coyinni (Karma) kainohunniiti?

• Duuchanka dandaanno Magani nooha ikkiro, danchu mannira qarru iillannota hoolannokkihu mayiraati?

• Bunshenna qarru nookki heeshsho heeꞌnanni yanna dagga ikka?

Kuri xaꞌmuwara dawaro afiꞌrate aane nooha lame qara coye huwata hasiissannonke: Bushu coyi ikkannohu isi mayiraati? Maganu qarra hoolate maa assanno?