“Lowo Qarri” Heeꞌrirono Maganoho Ammanantine Soqqamme

1. Maganu soqqamaanora qarru wosincho coye ikkannonsakkihu mayiraati?

HEGERE heeshsho shillimaate adhattora albaanni “lowo qarri” iillahera dandaannota hedatto wote waajjatto? Hakkeeshshi geeshsha waajja hoogattora dandaatto. Halaalu giddo lowo diro keeshshoottoha woy haaro ikkittorono, tenne Sheexaanu alamera heeꞌnummo geeshsha qarru iillankera dandaannota afootto.—Aju. 12:12.

2. (a) Guuntete xeꞌne noonsa mannira baalaho iillanno qarrano agurranna, Kiristaanaho iillanno qarri hiittooho? (Umi misile lai.) (b) Iillannonke qarrira kaima ikkannohu ayeti? Tenne mayinni anfeemmo?

² “Manna baalaho” yaano guuntete xeꞌne noonsa mannira baalaho iillanno qarrano agurranna, Kiristaanaho wolu qarrino iillannonsa. (1 Qor. 10:13) Hakku qarri hiikkonneeti? Kiristaanu Maganu higgera hajajamate murcidhe kaꞌꞌansanni buutote darti iillannonsa. Yesuusi harunsaanosira togo yee kulino: “Borojjichu mootichasi dirooranno. Ane darameemmo gede assitinoeha ikkiro, kiꞌneno darantinanni gede assitannoꞌne.” (Yoh. 15:20) Konni dartira kaima ikkinohu ayeti? Sheexaaneho; Sheexaanu Maganu manna “egemmate hasiꞌre ittananno doobbiichi” gede ikkannota Qullaawu Maxaafi kulanno. (1 Phe. 5:8) Sheexaanu Yesuusi rosaano Maganoho ammanantinore ikkitannokki gede assate dandaamisire baala assanno. Hanni hawaariya Phaawuloosira tuncu yiinore laꞌno.

LISXIRAHO IILLINOSI QARRA

3-5. (a) Phaawuloosira Lisxiraho mayi qarri iillinosi? (b) Isi albillitte daanno qarri daafira coyiꞌrinori jawaachishannohu ma garinniiti?

³ Phaawuloosira ammanasinni kainohunni lame sase hige dartu iillinosi. (2 Qor. 11:23-27) Lawishshaho, Lisxiraho togoo darti iillinosi. Hakkiicho isinna miilisi Barnabaasi, ilaminku jammare laanshaawino mancho hursitu gedensaanni mannu insa magannate gede asse hedino. Lamunku, mannootu magansidhannonsakki gede baasa eeggifattino! Kayinni hakkawontenni Yihudootu hakkira dagge mannootu hedo soorrate nookkire coyidhu. Bayichonko mannootu Yihudootu kapho ammantu! Hakko garinni Phaawuloosi kinnatenni gante reyinoha laweennansa agurte hadhino.—Looso 14:8-19.

⁴ Phaawuloosinna Barnabaasi Derbete katama hadhu gedensaanni, “Lisxira, Iqooniyoninna Antsookiya higgu. Insa hakkiicho rosaano kaajjishshanni hattono ammanatenni kaajjite uurritanno gede jawaachishshanni togo yitunsa: ‘Maganu Mangiste eate lowo qarri giddoonni saꞌꞌa hasiissannonke.’” (Looso 14:21, 22) Iimi adda laꞌniro tini yaatto gurcheessitannota labbanno. Korkaatuno “lowo qarri” iillannonketa heda dadillissannota ikkinnina jawaachishshannota dilabbanno. Ikkina, Phaawuloosinna Barnabaasi rooru qarri daara dandaannota kulansa ‘rosaano jawaachishshannohu’ hiittoonniiti?

⁵ Phaawuloosi coyiꞌrino qaale hixamanyine laꞌnummoro kuni coyi xawe leellannonke. Isi, “Lowo qarra dandee saꞌꞌa hasiissannonke” yee calla diagurino. Hatteentenni, “Maganu Mangiste eate lowo qarri giddoonni saꞌꞌa hasiissannonke” yiino. Konni garinni Phaawuloosi ammaname heeꞌra abbitannoha dancha guma luphi asse kule rosaano jawaachishino. Ammanammiro afiꞌnanni shillimaati haaqete halcho diꞌꞌikkino. Yesuusi togo yiino: “Goofimarchu geeshsha kaajje uurrannohu gatanno.”—Mat. 10:22.

6. Kaajjite uurritannori afidhanno shillimaati maati?

⁶ Kaajjine uurrinummoro, shillimaate afiꞌneemmo. Buuramino Kiristaani Yesuusi ledo iima mootumma adhe baꞌannokki heeshsho afiꞌranno. “Wolu geꞌreewi” kayinni “keeraanchimma woꞌmitanno” uulla aana hegere heeshsho afiꞌranno. (Yoh. 10:16; 2 Phe. 3:13) Hakka geeshsha kayinni Phaawuloosi yiinonte gede lowo qarri iillannonke. Hanni iillankera dandaannoha lamu gari fatana laꞌno.

XAADDOTE SIA

7. Xaaddote siaati yinara dandiinannihu hiittoo qarraati?

⁷ Yesuusi togo yee masaalino: “Mannootu yoote shongora sayisse uyitannoꞌne; mukuraabete giddo gannanniꞌne; hattono gashshaanotenna nugussate albaanni uurritinanni gede assitannoꞌne.” (Marq. 13:9) Tini xiqise kultannonte gede, mitu Kiristaanira xaaddote qarri lawishshaho dartu iillansara dandaanno; konnira kaima ikkitannori ammaꞌnote woy poletiku maroota ikkitara dandiitanno. (Looso 5:27, 28) Hanni xaano Phaawuloosi hendo. Isi togoo darti iillannosita hedi wote waajje sheke yiinoni? Deeꞌni, diyiino.—Hawaariyaatete Looso 20:22, 23 nabbawi.a

8, 9. Phaawuloosi kaajje uurrate murciꞌre kainota leellishinohu hiittoonniiti? Yannankera mitu roduuwino kaajjite uurrate murcidhinota leellishshinohu ma garinniiti?

⁸ Phaawuloosi Sheexaanu xaaddote abbanno qarra waajjikki gaaramino; isi togo yiino: “Qolchanshoꞌyalla gudummoronna Maganu eltohu danchu duduwi daafira seekke farciꞌrammora Mootichu Yesuusiwiinni adhoommo soqqansholla jeefo ganummoro lubboꞌya horo dimarareemmo.” (Looso 20:24) Addaho, Phaawuloosi iillasira dandaanno qarra hede waajje qece diyiino. Isi aye qarrino tuncu yiisiro kaajje uurrate murciꞌre kaino. Isiti qara hasatto baxi qarri heeꞌrirono “seekke farciꞌrate.”

⁹ Yannankera batinyu meyanna labbaa roduuwinke hattonni kaajjite uurrate murcidhe kaꞌino. Lawishshaho mitte gobbara, poletiku coyira anga wodha giwansanni kainohunni 20 meddi yaanno diro usuru mine keeshshitino roduuwinke no. Hatte gobbara tiiꞌꞌinsa wottaaddara ikkate fajjannonsakkiri wolere loossara assinoonni qixxaawo nookki daafira kuri roduuwinke hajo yoote mine horo dilaꞌnoonni. Kore roduuwa ayiddinsa usuru mine daye laꞌꞌannota hoolloonni, mitoota ganne gawajjinoonni hattono addi addi garinni shetinsoonni.

10. Hedeweelcho iillannonke qarra waajja hasiissannonkekkihu mayiraati?

¹⁰ Wolu roduuwinkera qole hedeweelchu qarri iillannonsa. Aterano togoo qarri iillihero, waajjite anga uyitooti. Yooseefi xagge hedi. Iso borojjicho ikkara hirroonni; Yihowa kayinni “qarrisi baalunkunni gatisinosi.” (Looso 7:9, 10) Yihowa ateno gatisahera dandaanno. “Yihowa isira galtinore fatanunni hiitto asse gatisannoro [afinota]” horo deꞌooti. (2 Phe. 2:9) Yihowa tenne busha alamenni gatise Mangistesi gashshooti giddo hegerera hagiidhitanni heeꞌratto gede assannoheta huwatte iso addaxxatto? Konne assatto gedenna dartu iillannohe wote kaajjite uurratto gede assannohehu gari korkaati no.—1 Phe. 5:8, 9.

GOꞌLE DAANNO FATANA

11. Sheexaanu abbannohu goꞌlino siꞌꞌi xaaddote siꞌꞌisinni baxxanohu hiittoonniiti?

¹¹ Qarra abbannonkehu woluri goꞌle daanno siaati. Togoo siꞌꞌi xaaddote daanno dartinni baxxannohu mayinniiti? Xaaddote siꞌꞌi, minna anga iima uullate gantanno hambabalatte gedeeti. Goꞌlino woy dahaawino siꞌꞌi kayinni, sununni minira eꞌe xarra shiima shiima ittanni galte hossanni mine kartanno hoolo gedeeti. Qaete anni minisi noo gara afannohu minu uwara kaeenna ikkara dandaanno.

12. (a) Sheexaanu horoonsiꞌrannote dahaabbino hayyo giddo mitte hiitteeti? Tini hayyosi qinaabbinosihu mayiraati? (b) Hexxo mudhate hedo Phaawuloosi qokkinosihu hiittoonniiti?

¹² Sheexaanu xaawate darte abbirono, woy dahaabbino doogonni ammananke shoshshoggishate woꞌnaalirono qara hasattosi Yihowa ledo noonke fiixooma hunate. Sheexaanu horoonsiꞌreenna qinaabbinosite dahaabbino ogimma giddo mitte hexxo mursiisate. Hawaariya Phaawuloosira saꞌe saꞌe togoo hedo macciishshantinosi. (Roomu Sokka 7:21-24 nabbawi.b) Ayyaanaamittetenni jawaata ikkinohunna miteekke umi xibbi dirira noohu aliidi bisi miila ikkinohu Phaawuloosi isonooto, “Ani horo tidhoommokki manchooti” yiinohu mayiraati? Isira togoo hedo macciishshantinosihu guuntete xeꞌnesinni kainohunniiti. Isi gara ikkinore assa lowo geeshsha hasiꞌrino, kayinni konne assannokki gede ataawe ikkitanno wolqa noota huwatino. Aterano sae sae togoori macciishshamihero, hawaariya Phaawuloosira nafa togoo hedo macciishshantinosita afa sheshifachishshahera dandiitanno.

13, 14. (a) Mite Maganu soqqamaano hexxo mudhitanno gede assannori maati? (b) Ammananke baꞌara hasiꞌrannohu ayeti? Mayira?

¹³ Batinyu roduuwinke mito wote hexxo mudhitanno, yaaddanno, hakkiinnino saꞌe waagu dinoe yite heddara dandiitanno. Lawishshaho, Diboorac yinanniti diinaggaabbe soqqantanno suwisaancho togo yitino: “Loosoomma soꞌro marro marro hige hedeemma; hakkawote lowo geeshsha xissiisiꞌreemma. Soꞌroomma coye baalanka hedeemma wote, mittu manchino wole agurina Yihowa nafa hiitto ikke baxannoe yee hedeemma.”

¹⁴ Diboora gedeehu Yihowara diinaggaawe soqqamanno manni hexxo mudhannohu mayiraati? Tennera kaima ikkannohu bacu coyi no. Mitu roduuwi insaneeto woy heeshshonsa misha rakkannonsare ikkitara dandiitanno. (Law. 15:15) Wolootu kayinni ordu keeri hooginonsa daafira simmeetensa gawajjantinoha ikkara dandaanno. Korkaatu baxihano ikkiro, togoo simmeete irkiꞌre ninke gawajjate woꞌnaalannohu ayetiro deꞌnoonke. Hexxo mudhine baalankare facci assine agurrammora hasiꞌrannohu ayeti? Isi baꞌꞌara farandoonninte gede, ninkeno hexxo noonkekkire ikkinoommohu gede assine hendammora hasiꞌrannohu ayeti? (Aju. 20:10) Sheexaane ikkinoti egennantinote. Sheexaanu xaaddote darteno horoonsiꞌriro, woy dahaabbino doogono horoonsiꞌriro mixosi ninke yaachishate, dhuka baꞌne diinaggaawa agurreemmo gede assatenna hexxo mursiisate. Ee, Maganu daga ayyaanaamittete oli giddo noota horo deꞌooti!

15. Hexxo mudhine dhuka baꞌneemmokki gede mayi aana illachisha hasiissannonke?

¹⁵ Olunni qeelante anga aattokki gede qodhite kai. Afiꞌratto shillimaate hedi. Phaawuloosi Qorontoosira noo Kiristaanira togo yee borreessino: “Hexxo dimudhineemmo; qoleno gobbayidi mannimmanke jaabbanni hadhannoha ikkirono, giddiidi mannimmanke kayinni barru barrunku haarooꞌmitanni hadhanno. Korkaatuno iillannonke qarri mito geeshsha keeshshannohanna shota ikkirono, yanna yannante lexxanni haꞌrannoha hegere ayirrinye abbannonke.”—2 Qor. 4:16, 17.

QARRU IILLANNONKE WOTIRA XAANNI QIXXAAMBO

16. Iillannonke qarrira xaanni qixxaawa hasiissannonkehu mayiraati?

¹⁶ Kageeshsha laꞌnummonte gede, Sheexaanu “xagarro” kiiro lowote. (Efe. 6:11) Ninke mittu mittunku 1 Pheexiroosi 5:9 aana noo amaale harunsa hasiissannonke: “Iso ammanatenni kaajjitine uurritine gibbe.” Konne assate, surrenkenna wodananke qixxeessiꞌra, hattono gara ikkinore assa xaanni rosiisiꞌra hasiissannonke. Lawishshaho, mitte olu saraawite olu kaꞌꞌara lowo yanna albaanni baxxinoha kabbaade qajeelsha duucha higge adhitanno. Yihowate ayyaanaamittete saraawite garino hattooti. Albillitte hiittoo oli tuncu yaannonkero dianfoommo. Konni daafira, mito geeshshano ikkiro salaame noote tenne yannara ninkeneeto qajeelsa hayyo diꞌꞌikkitanno? Phaawuloosi Qorontoosi Kiristaana togo yiino: “Ammanate giddo heedhinoonnitanna teꞌee afate kiꞌneneeto ganyitine fatanne; qoleno ayimmaꞌne buuxate kiꞌneneeto ganyitine layidhe.”—2 Qor. 13:5.

17-19. (a) Ninkeneeto hiittee doogganni marammadha dandiineemmo? (b) Wedellu rosu mine ammanansa daafira faajjete farciꞌrate qixxaawa dandiitannohu hiittoonniiti?

¹⁷ Phaawuloosi uyino amaale harunsa dandiineemmoti mitte doogo, ninkeneeto haja assine marammadhate. Ateneeto togoo xaꞌmo xaꞌmi: ‘Ceeꞌmummokki ganye huuccatto assiꞌreemmo? Darawoꞌya gara ikkinokkire asseemmo gede xixxiibbannoe wote manna agure Maganoho hajajameemmo? Kiristaanu gambooshshe ganye haꞌreemmo? Waajjummokki ammanaꞌya mannaho kuleemmo? Ammanate roduuwiꞌya ane xeꞌne cincite saꞌannonte gede anino insa xeꞌne cince saeemmo? Songonke giddonna alamete deerrinni nootera Maganu songora sooreeyye ikkite loossanno roduuwira maahoyye yee galeemmo?’

¹⁸ Kuri xaꞌmuwa giddo lame, waajjinummokki ammananke mannaho kulatenna darawonke xixxiibbannonketa qeeꞌlate daafira kultannota huwati. Batinyu wedellu roduuwinke tenne assitannohu rosu mineeti. Insa ammanansa daafira coyiꞌra saalfata woy waajja hasiissannonsakkita rossino. Hatteentenni faajjete coyidhanno. Metseettanke giddo tennera kaaꞌlitannoti duucha assaawe fultino. Lawishshaho, Maaja 2009⁠nnite Baqqi Yiiyye! yinanni metseetera fultino hedo laꞌno; ledokki rosanno beetti, “Suutu soorro noota ammanattokkihu mayiraati?” yiihero togo yite qola dandaatto: “Suutu soorro noota ammaneemmo gede assannoeri mayi no? Egennaammaho yinanniri sayinsete fullahaano nafa tenne hajora babbaxxitino hedo noonsa!” Annuwanna amuuwa, oosoꞌne rosu mine tuncu yaannonsahu togoo coyira qixxaabbanno gede rosiisidhanno pirogiraame qixxeessa deꞌinoonte.

¹⁹ Hige ammananke daafira faajjete coyiꞌra woy Yihowa asse yaannonkeha wole coye assa ayewoteno shotate yaa diꞌꞌikkino. Barra woꞌma loonsanni honsummo gedensaanni, gambooshshe haꞌrate ninkeneeto giddeessa hasiissankera dandiitanno. Soodimaroho soqqansho fulate coommino goxicho agure kaꞌꞌa shota ikka hooggara dandiitanno. Ikkollana, xa dancha ayyaanaamittete gade heedhuhero albillitte roorino fatani daanno wote dandee saꞌꞌate roore qixxaawoottoha ikkattota deꞌooti.

20, 21. (a) Wodote kakkalo daafira hiinca hexxo mudhate simmeete gargadhate kaaꞌlitannonkehu ma garinniiti? (b) Maaho murciꞌne kaꞌꞌa hasiissannonke?

²⁰ Goꞌle woy dahaawe daanno siꞌꞌi daafira mayyaa dandiinanni? Lawishshaho, hexxo mudhate simmeete qeeꞌla dandiineemmohu hiittoonniiti? Tennera kaaꞌlitannote qara doogga giddo mitte wodote kakkalo daafira hiincate. Hawaariya Phaawuloosino hatto assino. Isi tidhinokki mancho ikkinohu gede ikke macciishshamannosi woti noota afino. Ikkirono isi, Kiristoosi reyinohu keeraanote ikkikkinni cubbaataammaho ikkinotano afino. Cubbaataammu giddo qole mittu isooti. Isinni Phaawuloosi togo yee borreessino: “Heeꞌreemmohu, baxinoehunna ane daafira yee isonooto sayise uyinohura Maganu Beettira nooe ammananniiti.” (Gal. 2:20) Ee, Phaawuloosi wodote kakkalo ammanino. Isi wodo isira gilletenni kaaꞌlitannota huwatino.

²¹ Atino hakko garinni hedakki yaano wodote kakkalo Yihowa atera gilletenni uyinohe elto ikkitino gede assite laꞌꞌakki lowo geeshsha kaaꞌlitannohe. Hatto yaa kayinni hexxo mudhate hedo atewiinni bayichonko baꞌanno yaa diꞌꞌikkino. Mitu roduuwinkera haaro alame dagga geeshsha tenne simmeete ledo sharrama gidde ikkitansara dandiitanno. Ikkollana, hexxo mudhite anga uyitannokkiri baraarsha afidhannota deꞌooti. Maganu Mangiste salaame abbitannohunna ammanamino manni baalunku guuta ikkanno gede assitannohu bayiru barri lowonta gambise dayino. Lowo qarri heeꞌrirono hatte Mangiste ragiꞌrate murcidhe kai.