Cuꞌmidhe Noottohu Halaale Ikkinota Ammanootto? Mayira?

1. Suꞌmu Kiristinni qeesooti olu yannara ma assitino?

MAGANU addu Kiristaani olaho karsame wole gobba manna shaara hasiꞌrannoni? Saihu 100 diri giddo, ninke Kiristaanaho yaannohu batinyu manni tenne duucha hige assino. Kaatolikete qeesooti olantonna olu massaaransa maassidhe wole gobbara noo Kaatolike qassara sokkino. Pirotestaantete qeesootino tenne assitanni keeshshitino. Layinkihu Alamete Oli tennera qara lawishshaati.

2, 3. Yihowa Farciꞌraasine Layinkihu Alamete Olinna hakkuyi kawa kaino oli yannara ma assitino? Mayira?

² Yihowa Farciꞌraasine hattee olu yannara ma assitinoyya? Insa olaho karsantukki baxxite heedhinota xagge leellishshanno. Tennera xinta ikkinonsahu qaru coyi, Yesuusi lawishshaatinna isi rosiisino rosooti. Isi togo yiino: “Mereeroꞌne baxillu heeꞌriro rosaanoꞌya ikkitinoonnita mannu baalunku konninni afanno.” (Yoh. 13:35) Qoleno, Yihowa Farciꞌraasine Phaawuloosi Qorontoosi Kiristaanira borreessino sokkara nooha xintu seera huwattino hattono harunsitino.—2 Qorontoosi 10:3, 4 nabbawi.a

³ Konni daafira, tiiansa Qullaawu Maxaafinni qajeelsiꞌrinohu addu Kiristaani ola dirosanno woy olaho dikarsamanno. Lowo kume ikkitannori wedelluno ikko jajjabbu, hattono meentunna labballu Yihowa Farciꞌraasine togoo coyira karsama gibbinohura dartu iillinonsa. Kuri giddo batinyu, giddeessine wolqate looso loosiinsanni kaampera hattono usuru mine baasa qarrantino. Jarmanete Naazi gashshooti yannara mitoota isinni shinoonni. Yihowa Farciꞌraasine Awuroppaho lowo darti iillinonsaha ikkirono, Yihowa Mangisteha dancha duduwo sabbakkara uyinoonninsa hajajo kayinni horo dideꞌino. Insa usuru mine, usuranyu gamba yiino kaampera hattono darante hadhino gobbara ammanante sabbakkino.b Dirra saꞌu gedensaanni, 1994⁠nni Ruwaandaho mitte gaꞌre feye gudate kaꞌni yannara Yihowa Farciꞌraasine dikarsantino. Qolteno insa, albiti Yugozilaaviyu gobba billa biinxe fultu wote lowo mundee duꞌnantu yannara anga diwodhitino.

4. Mannu Yihowa Farciꞌraasine olaho karsantannokkita lae maa huwatino?

⁴ Yihowa Farciꞌraasine poletiku coyiranna olaho anga wodhitannokkire ikkansa laino manni insa Maganonna olliichonsa addinta baxxannore ikkitinota huwatino. Wole yaattonni insa addu Kiristinna cuꞌmidhe no. Ikkollana, batinyu manni Yihowa Farciꞌraasine addu Kiristaana ikkitinota ammananno gede assinonsahu wolu coyino no.

TAALLE NOOKKIHA ROSIISATE LOOSO

5. Hundite Kiristoosi harunsaanora haaro coye ikkinonsari maati?

⁵ Yesuusi soqqanshosi jammari yannanni kayise, Maganu Mangisteha dancha duduwo sabbakate loosi lowonta hasiisannoha ikkinota seekke xawisino. Isi alame woꞌmate halaꞌlitanno soqqanshora ledosi safo saffanno gede 12 rosaano doorino; hakkuyi gedensaanni 70 rosaano qajeelsino. (Luq. 6:13; 10:1) Tini rosaano dancha duduwo umo Yihudootaho kulate qixxaabbino. Hakkiinnino dhagge ikkitanno hajajo uyininsa! Barcintinokki dagara sabbakkanno gede hajanjinsa. Yihudu wido ikkitino rosaanora kuni lowo geeshsha haaro coyeeti!—Looso 1:8.

6. Pheexiroosi Yihowa mallaadannokki Magano ikkinota huwatanno gede assinosiri maati?

⁶ Hawaariya Pheexiroosi, Qornelewoosi yinanni manchi qae haꞌranno gede sonkoonni; kuni manchi barcintinokki daga widooti. Hakkiinnino Pheexiroosi, Maganu mallaadannokkiha ikkinota huwatino. Qornelewoosinna minisi manni cuuamino. Hakkuyi gedensaanni Kiristaanu ammaꞌno sabbankanniti halaꞌlado battala faꞌnantu; duuchante daga giddo noo manni halaale macciishshe adhanno faro afiꞌranno yaate. (Looso 10:9-48) Sabbakate loosi battala woꞌma alame ikkitino.

7, 8. Yihowa Farciꞌraasine mannu dancha duduwo macciishshanno gede ma assitanni no? (Umi misile lai.)

⁷ Dirinketa Yihowa Farciꞌraasine xagge laꞌnummoro, dirijjitete giddo albisa ikkitino roduuwi dancha duduwo alame woꞌmate dudumbanni gede diinaggaabbe loossanni keeshshitino. Xaa yannara sette miliyoone meddi yitannori Yihowa Farciꞌraasine Kiristoosi sokka 600 saꞌꞌanno afiinni mannaho kulate diinaggaabbe loossanni no! Dancha duduwo dudumbeemmo afii xaano lexxanni no. Yihowa Farciꞌraasine minunni mine hadhenna gudumaaleho sabbakansanni hattono mitu qooxeessira doogote borro xarapheessahonna gaarete worte tuqisansanni baxxite egennantino.

⁸ Alamete deerrinni 2,900 saꞌanno roduuwi Qullaawa Maxaafanna Qullaawu Maxaafi aana xintantino borro tirtanno gede baxxino qajeelsha uyinoonninsa. Kuri roduuwi borro tirtannohu alamete aana lowo manni coyiꞌranno afiinni calla diꞌꞌikkino. Lowo geeshsha egennama hoogirono haammata miliyoone ikkanno manni coyiꞌrannohu lowo xibbe ikkanno afiinnino borro qixxaabbanni no. Lawishshaho, Ispeenete gobbara haammata miliyoone ikkitannoti Katalaani daga, afoo dadhitinoha Katalaani qaale barru baala coyidhanno. Hakko iso muli yanna kawa, Andoorunna Alikaante qooxeessira, hattono Baaliyariki Giddichuwaranna Vaalensiyaho Katalaani afoo coyiꞌranno manni lexxino. Xaa yannara Yihowa Farciꞌraasine Katalaani afiinni borro qixxeessitanni no; hattono konne afoo coyiꞌranno mannira wodana kakkayisanno gambooshshe assinanni heeꞌnoonni.

9, 10. Yihowa dirijjite mannu baalunkura ayyaanaamittete hasattonsa woꞌmitara hasidhannota leellishannohu maati?

⁹ Alame woꞌmate aana mannu borro afoo dadhino qaalinni afiꞌranno gede assinanninna qaalinsanni rosiinsanni heeꞌnoommonsa. Meksiko rooru manni Ispeenete afoo coyiꞌranno gobbaati; ikkirono hakkonni wolu qaalinni afoo dadhinohu lowo manni no. Kuri giddo mitte Maya gosaati. Meksikote nooti sinu biironke Maya afiita tirote gaamo kalaqqe tini gaamo konne afoo barru barrunku coyiꞌranna macciishsha dandiitanno qooxeessira heedhe loossanno gede assitino. Lawishsha ikkannohu wolu kayinni Neppaali gobbara coyiꞌnanniho Neppaali afooti; tenne gobbara mannu kiiro 29 miliyoone saꞌanno. Hatte gobbara mito 120 ikkanno afoo coyiꞌnanniha ikkirono, tonne miliyoone saꞌꞌanno manni Neppaali afoo coyiꞌranno; wolu batinyu manni kayinni konne afoo layinki afiinsa gede asse horoonsiꞌranno. Borronke konni afiinnino tirranni heeꞌnoonni.

¹⁰ Yihowa dirijjite Maganu Mangisteha dancha duduwo alame woꞌmate sabbakate looso lowonta kaffi assite laꞌanno; alamete deerrinni nootera batinye tirote gaamora uyinanni kaaꞌlo tenne leellishshanno. Lowo miliyoone ikkitanno tiraaktuwa, birosherubba, hattono metseetta woxe kaffalsiinsummokki zamachunni gobba gosate tuqinsoommo. Tennera fultino wocera baantoonni woxi Yihowa Farciꞌraasine uminsa fajjonni fushshitinoho; insa Yesuusi togo yee uyino hajajo harunsitanno: “Mulla uyinoonniꞌnente gede, kiꞌneno mulla uuyye.”—Maatewoosi 10:8.

11, 12. Yihowa Farciꞌraasine alame woꞌmate aana sabbakansa mannu maa huwatanno gede assitino?

¹¹ Yihowa Farciꞌraasine cuꞌmidhinohu halaale ikkinota seekkite affino daafira, dancha duduwo babbaxxino mannira kulate yite uminsa horo facci assite agurte loossanno. Batinyu roduuwi konne lowonta hasiisanno looso loosate yite shota heeshsho heeꞌrate wossaꞌnitino, wolu manni afoo rossino, hattono wolu qooxeessi budi ledo sumuu yite heedhanno. Kuni alame woꞌmate loonsanni heeꞌnoommohu sabbakatenna rosiisate loosi, batinyu manni Yihowa Farciꞌraasine addu Kiristaana ikkitinota ammananno gede assino.

¹² Yihowa Farciꞌraasine konne baalanka assitannohu cuꞌmidhinohu halaale ikkinota mittoreno huluullantannokki daafiraati. Ikkina lowo miliyoone ikkanno manni Yihowa Farciꞌraasine halaale cuꞌmidhinota ammananno gede assinori woluri maati?—Rom. 14:17, 18.

CUꞌMIDHINOHU HALAALE IKKINOTA AMMANTANNOHU MAYIRAATI?

13. Yihowa Farciꞌraasine dirijjitensa xuru nookkita ikkite heedhanno gede assitinohu hiittoonniiti?

¹³ Kiristaanu roduuwinke cuꞌmidhinohu halaale ikkinota ammantanno gede assinonsare kultanna macciishsha kaaꞌlitannonke. Seeda diro Yihowara soqqaminohu mittu rodii togo yee hedosi kulino: “Amaallannihu woy seejjinannihu ayeno ikkiro, Yihowa dirijjite amanyootunni xuru nookkita xalala ikkite heedhanno gede assate lowore assinanni.” Yihowa dirijjite amanyootunni togooha xalallete dirima mara dandiitinohu hiittoonniiti? Maganu Qaali giddo noo wodho harunsankenniiti, hattono Yesuusinna rosaanosi faale haꞌrankenniiti. Hakko daafira yannankera Yihowa Farciꞌraasine xagge laꞌnummoro, Maganu seeri ledo sumuu yaa hoogansanni songotenni bohantinori kiiro boodete yaa dandiinanni. Roore Yihowa Farciꞌraasine xuru nookkitanna lawishsha ikkitanno heeshsho heedhanni no; kuri giddo mitu bashsho Maganu fajjo ledo sumuu yaannokki garinni heedhannore ikkiturono xa soorrante woyyaabbinoreeti.—1 Qor. 6:9-10; 1 Qorontoosi 6:11 nabbawi.c

14. Bohaminohu lowo manni ma assino? Tini mayi guma abbitino?

¹⁴ Qullaawa Borro uyitanno biddishshi garinni songote giddonni bohantinorina? Kuri giddo lowo kume ikkitannori gara ikkinokki assootinsara maaro eꞌe higgino daafira songo anga fante haadhinonsa. (2 Qor. 2:6, 8; 2 Qorontoosi 2:7 nabbawi.d) Qullaawu Maxaafi seera seekkine harunsanke Kiristaanu songo xuru nookkita ikkitanno gede assitino; konni daafira dirijjitenke Maganu irko afidhinota ikkase dihuluullammeemmo. Yihowa Farciꞌraasine batinye beetekiristaanna giddo rosamino gede ikkikkinni, Maganu wodho ledo sumuu yite heedhannore ikkansa lowo manni halaalu noohu ninkewa ikkinota huwatanno gede assitinonsa.

15. Mittu rodii cuꞌmirinohu halaale ikkinota ammananno gede assinosihu maati?

¹⁵ Lowo temokkiro afidhinori wolootu roduuwi cuꞌmidhinohu halaale ikkinota ammantinohu mayiraati? Mittu 50 diro sainosi rodii togo yiino: “Wedellimmaꞌya dirinni jammare ammanaꞌya sasu qaru tuuqi aana xintantinota ikkase ammaneemmo: (1) Maganu heeꞌraati; (2) Qullaawu Maxaafi Maganu ayyaaninni borreessaminoha ikkasiiti; hattono (3) yannankera Yihowa Farciꞌraasineti Kiristaanu songo isi horoonsiꞌranninna maassiꞌranni noota ikkaseeti. Tini tuuqqa kaajjadu xinti aana uurritinota ikkansa lowo diro xiinxallotenni fatane laꞌꞌanni keeshshoommo. Tenne coyibba ammaneemmo gede assitannoe taje diru dirunku lexxitanni hadhino daafira ammanaꞌya jawaattino; hattono cuꞌmiꞌnoommohu addinta halaale ikkinota albinni roore ammaneemmo gede assitinoe.”

16. Mitte rodoo cuꞌmidhe noohu halaale ikkinota ammantanno gede assinoseri maati?

¹⁶ Niwu Yoorkete qara biironkera soqqantanni nooti mitte mine assidhino rodoo Yihowa dirijjite daafira togo yitino: “Yihowa suꞌma diinaggaabbe dudubbanni nooti tenne dirijjite callate. Maganu suꞌmi Qullaawu Maxaafi giddo mito 7,000 bayicho noota hendanni wote tenne assa garankolla! Layinki Zeena 16:9 aana, ‘Woꞌmu wodaninsanni iso addaxxitannore jawaachishara, Yihowa ille uulla woꞌmate aana kawanna kaꞌa laꞌanno’ yaannoha jawaachishanno qaale baxeemma.” Ise ledde togo yitino: “Yihowa jawaachishannoe gede woꞌmu wodaniꞌyanni iso addaxxeemma gara huwateemma gede halaalu kaaꞌlinoe. Yihowa ledo nooe fiixoomi anera lowonta muxxe coyeeti. Magano seekke afeemma gede Yesuusi kaaꞌlannoe kaaꞌlono kaffi asse laeemma. Maganu ledo muli jaalooma kalaqiꞌraꞌya lowo jawaante ikkitinoe.”

17. Alba Maganu dino yee ammanannohu mittu rodii xa mayyee ammananno? Mayira?

¹⁷ Alba Maganu dino yee ammanannohu mittu rodii togo yino: “Kalaqo Maganu mannu hagiidhanni heeꞌrara hasiꞌrannotanna qarra hegere geeshsha wore agurannokkita ammaneemmo gede assitinoe. Qoleno, alame maaeeltanni hadhanna Yihowa daga kayinni ammanatenni lophitanni no, albinni roore diinaggaabbanni no, hattono baxillinsa lexxanni haꞌrino. Yannankera togooha dhaggete coye assa dandaannohu Yihowa ayyaanaatilla.”—1 Phe. 4:1-4.

18. Wolootu lamu roduuwinke cuꞌmidhinohu halaale ikkinota ammantinohu mayiraati? Tenne taje daafira atera mayi macciishshamannohe?

¹⁸ Halaalu giddo lowo diro keeshshinohu mittu rodii sabbankeemmo sokka halaale ikkitinota ammananno gede assinosire kulanni togo yiino: “Lowo diro xiinxalloommo xiinxallo Yihowa Farciꞌraasine umi xibbi diro noo Kiristaani faale harunsate lowore assitinota huwateemmo gede assitinoe. Duucha gobba haꞌroommo daafira Yihowa Farciꞌraasine alamete deerrinni mittimma noonsare ikkitinota illeꞌyanni laꞌꞌa dandoommo. Rosoommohu Qullaawu Maxaafi halaali harshammi assinoe, hattono hagiirsiisinoe.” Leyawo diro saꞌꞌannosihu mittu rodii cuꞌmirinohu halaale ikkinota ammanannohu mayiraatiro xaꞌmineennasi qolanni Yesuusi Kiristoosi aana illachishe togo yiino: “Yesuusi heeshshorenna soqqanshosire seekkine xiinxallinoommo daafira isi lawishsha kaffi assine laꞌneemmo. Kiristoosi Yesuusi widoonni Maganunniwa shiqate heeshshonke gara biddi assiꞌnoommo. Gato afiꞌneemmohu Kiristoosite wodote kakkalonni ikkinota huwantoommo. Hattono isi reyotenni kainota anfoommo. Hatte yannara tenne illensanni laꞌinori coyidhino taje noonke.”—1 Qorontoosi 15:3-6 nabbawi;e 1 Qor. 15:7, 8.

AFIꞌNOOMMO HALAALE HIITTO ASSA HASIISSANNONKE?

19, 20. (a) Phaawuloosi Roomaho noo songora luphi asse xawisino halaafinati hiikkonneeti? (b) Heeshshonke Yihowara sayinse uyinoommore ikkinoommo daafira, hiitti qoosso noonke?

¹⁹ Olliichonke banxeemmo Kiristaana ikkinoommo daafira, noonketa muxxe halaalu egenno uminkera calla adhine sammi yaa dihasiꞌneemmo. Phaawuloosi tennera korkaata ikkannore kulanni Roomu songora noo Kiristaanira togo yiino: “Yesuusi Mooticha ikkinota afiikkinni faajjete farciꞌrittoro, hattono Maganu iso reyotenni kayisinota wodanikkinni ammanittoro gatatto. Korkaatuno, mittu manchi wodanisinni ammane keeraaꞌmanno; hattono afiisinni faajjete farciꞌre gatanno.”—Rom. 10:9, 10.

²⁰ Heeshshonke Yihowara sayinse uyinoommo Farciꞌraasinesi ikkinoommo daafira cuꞌmiꞌnoommohu halaale ikkinota ammanneemmo; qoleno Maganu Mangisteha dancha duduwo sabbakate qoosso noonketa huwantoommo. Konni daafira mannaho Qullaawa Maxaafa rosiisa calla ikkikkinni cuꞌmiꞌne heeꞌnoommohu halaale ikkinota heeshshonkenni leellishate murciꞌne kaꞌno.