Maganu Ledo Hasaawatto?

Muli jaalla mimmitu ledo xaadde, woy silketenni, imeeletenni, viidiyotenni woy dabdaabbete widoonni dandaaminsa deerrinni ganyite hasaabbanno. Maganu ledo jaalooꞌmateno isi ledo yannate kiiro hasaawa hasiissannonke. Ikkina konne assa dandiinannihu ma garinniiti?

Huuccattotenni Magano coyishiisha dandiineemmo. Ikkollana, huuccatto darawonke ledo hasaambeemmo hasaawi gede diꞌꞌikkitino. Huuccatto assiꞌneemmo wote, Kalaqaanchonkenna kalqete alamera Aliidi Mooticha coyishiinshanni heeꞌnoommota huwata hasiissannonke. Konni daafira, lowo ayirrinyinninna shooshanqenni huucciꞌra hasiissannonke yaate. Qoleno, Maganu huuccattonke macciishshanno gede wonsha hasiissannonkeri no. Hanni kuri giddo sase laꞌno.

Umihunni, huucciꞌra hasiissannonkehu Yesuusa, “qullaawoota” woy misile ikkikkinni Magano Yihowaati. (Wolapho 20:4, 5) Qullaawu Maxaafi xawise togo yaanno: “Aye coyirano yaaddinoonte; hatteentenni baalunku coyira huuccattotenninna eeggifatatenni galatu ledo dhiwinoꞌne coye Maganoho kulle.” (Filiphisiyusi 4:6) Layinkihunni, huucciꞌra hasiissannonkehu Maganu Beetti Yesuusi Kiristoosi suꞌminniiti. Yesuusi umisi togo yiino: “Ane widoonni ikkiro ikkinnina Anniꞌyawa daannohu dino.” (Yohaannisi 14:6) Sayikkihunni, huuccattonke Maganu fajjo ledo sumuu yitannota ikka hasiissannose. Qullaawu Maxaafi togo yaanno: “Fajjosi ledo sumuu yaanno garinni aye coyeno huucciꞌnummoro, isi macciishshannonke.”a—1 Yohaannisi 5:14.

Hige muli jaalla giddo mittu calla coyiꞌrannoha ikkiro jaaloomu digeedanno. Jaalla mimmito macciishshitanni hasaabbanno daafira, ninkeno Maganu coyishiishankera maahoyye yaanna coyiꞌranno wote macciishsha hasiissannonke. Maganu ninke coyishiishannohu hiittoonniitiro afootto?

Yannankera Maganu ninke “coyishiishannohu” borreessamino Qaalisi Qullaawu Maxaafi widoonniiti. (2 Ximootewosi 3:16, 17) Togo yineemmohu mayiraati? Lawishshaho, hanni jaalikki dabdaabbe borreesse soyennahe nabbabbanni noottohu gede assite hedi. Soyinohe dabdaabbe nabbawatto wote, isi mulekki hoogirono ledosi hasaabbanni noottohu gedeeti. Hatteente gede, Qullaawa Maxaafa nabbawattoha ikkiro Yihowa coyiꞌranna macciishshitanni nootto yaate. Umi birxichira qummi assiniti Jiina tennera togo yitino: “Maganu jaalisi gede asse laꞌꞌaera hasiꞌrummaro, soyinonke ‘dabdaabbe’ yaano Qullaawa Maxaafa xiinxalla hasiissannoe yee hedeemma.” Ise ledde togo yitino: “Qullaawa Maxaafa barru baala nabbawaꞌya, Maganunniwa albinni roore shiqeemma gede assitinoe.” Atina, Yihowa Qaale barru baala nabbabbe Isi barru barrunku coyishiishannohe gede assidhanni nootto? Hatto assattoha ikkiro, Maganunniwa albinni roore shiqatto.