Lawishshu Huuccatto Ledo Sumuu Yaannore Asse Gafa 1

1. Maatewoosi 6:9-13 noo huuccatto soqqanshonke yannara horoonsiꞌra dandiineemmohu hiittoonniiti?

BATINYU manni Mootichu rosiisino huuccatto seekke afino. Minunni mine haꞌne soqqammeemmo wote qaete annira Maganu Mangiste addinta noo gashshoote ikkitinotanna albillitte uulla gannate assitannota kulate duucha wote tenne huuccatto horoonsiꞌneemmo. Woy tenne huuccattora hanafote noo hedo horoonsiꞌne Maganoho ‘qullaawa’ woy xalala ikka hasiissannosihu umisi suꞌmi noosita kula dandiineemmo.—Mat. 6:9.

2. Yesuusi huuccatto assiꞌneemmo kiiro yinoommota calla yinammora hasiꞌrannokkita mayinni anfeemmo?

² Yesuusi tenne huuccatto Suꞌmu Kiristinna harunsitannori assitannohu gede wirro wirro qoltine huuccidhe yiinoni? Diyiino. Yesuusi tenne huuccatto rosiisara albaanni togo yiino: “Huuccidhinanni wote, yitinoonnire calla yitinoonte.” (Mat. 6:7) Isi gedensaanni hige tenne huuccatto wirro qummi assinoha ikkirono, mittu gari qaalla dihoroonsiꞌrino. (Luq. 11:1-4) Tini huuccatto mayi daafira huucciꞌranna huuccattonke giddo maa balaxisiisa hasiissannonkero afate kaaꞌlitannonke. Konni daafira, tenne huuccatto lawishshu huuccatto yaa garaho.

3. Lawishshu huuccattore ronseemmo wote hiitte xaꞌmuwa seekkine heda hasiissannonke?

³ Konniranna aananno birxichira, Yesuusi rosiisinoti lawishshu huuccatto amaddinore ronseemmo. Tenne assineemmo wote ateneeto togo yite xaꞌmi: ‘Tini lawishshu huuccatto, huucciꞌreemmo gara woyyeessiꞌrate kaaꞌlitannoehu hiittoonniiti? Roorenka kayinni, tenne huuccatto ledo sumuu yaannore assanni noommo?’

“IIMA HEEꞌRATTO ANNANKE”

4. Lawishshu huuccatto giddo “Annanke” yaanno qaali maa qaagiissannonke? Uulla ragiꞌrate hexxo noonsa Kiristaanira Yihowa “Anna” ikkinohu ma garinniiti?

⁴ Yesuusi tenne huuccattora hanafote “Annanke” yiino ikkinnina “Annaꞌya” diyiino; tini yaatto mimmito addinta baxannohu “roduuwu maamari” wido ikkinoommota qaagiissitannonke. (1 Phe. 2:17) Tini qolte shaaꞌꞌa qoosso diꞌꞌikkitino! Iimi heeshsho ragiꞌrate hexxo noonsari Maganu ooso ikkite kiirantino buuramaasine, Yihowa woꞌmunni woꞌma “Anna” yite woshshansa garaho. (Rom. 8:15-17) Uullate aana hegerera heeꞌrate hexxo noonsarino Yihowa “Anna” yite woshsha dandiitanno. Heeshsho uyinonsahu isooti; qoleno isi halaalunni magansidhannosirira baalaho hasiissannonsare baxillunni aannonsa. Uulla ragiꞌrate hexxo noonsari woꞌmunni woꞌma Maganu ooso yaamantannohu albillitte guuntete deerra martunna jeefote fonqolo ammanante saꞌu gedensaanniiti.—Rom. 8:21; Aju. 20:7, 8.

5, 6. Annunna ama oosonsara hiikkonne dancha coye aa dandiitanno? Ooso konne aamamooshshe ma garinni horoonsiꞌra hasiissannonsa? (Umi misile lai.)

⁵ Annunna ama oosonsara huuccidhanno gede rosiissuronna Yihowa shaqqado iimi Annansa ikkinota affanno gede kaaꞌlituro lowo waaga afiꞌrinore uyitinonsa yaate. Wodiidi Afirikira woradu aliidi laꞌꞌaancho ikke soqqamanni noohu mittu rodii togo yiino: “Meya qaaqquulliꞌya ilami barrinni hanafe qaetella heeꞌrummoro insa ledo hashsha hashsha mitteenni huucciꞌreemmo. Insa hakkawaro hashsha hashsha mayyee huucceemmoro qaaggannokkita coyidhanno. Ikkollana hakkawote noo ikkito, Anninke Yihowa ledo hasaawa qullaawa ikkitinota, hattono hakkawote salaamenna geꞌne macciishshantannonsata qaagganno. Insa huuccatto assiꞌra dandaanno deerra iillita, hedonsanna giddonsata fushshe Yihowara coyiꞌranna macciishsha hasiꞌroommo daafira huuronsa gotti asse huucciꞌranno gede jawaachishummonsa. Togo assaꞌya wodaninsa giddo noo hedo caakkeesseemmo gede dancha faro fantinoe. Hakkiinni huuccattonsa xintu noota ikkitanno gede lawishshu huuccatto giddonni mite qara qara hedono karsiise huucciꞌranno gara shaqqillunni qajeelsoommonsa.”

⁶ Konni daafira konni rodiiri shiimaaddu seenni ayyaanaamittetenni dancha gede lophino. Insa xa mine assiꞌre hagiirrunni heeꞌranni no; hattono minaannuwinsa ledo Maganu fajjo assate woꞌma yanna soqqansho soqqamanni no. Annunna ama oosonsara uyitanno coyi baalunku giddo roorinohu oosonsara Yihowa ledo gamba yiinohunna danchu fiixoomi heeꞌrannonsa gede kaaꞌlate. Hige Yihowa ledo noonkeha muxxe fiixooma baꞌꞌannokki gede assiꞌra annu annunku assannoreeti. Ooso tenne assate Maganu suꞌma baxanna konne suꞌma ayirrisa hasiissannonsa.—Far. 5:11, 12; 91:14.

“SUꞌMIKKI QULLAAWO”

7. Maganu daga mayi qoosso afidhino? Ninke assa hasiissannonkeri maati?

⁷ Ninke Maganunniha gillete suꞌma afa calla ikkikkinni “suꞌmisira ikkanno manna” yaamamme woshshamate qoossono afiꞌnoommo. (Looso 15:14; Isa. 43:10) Iimi Annanke, “Suꞌmikki qullaawo” yine huucciꞌneemmo. Togo yine huucciꞌranke Yihowaha xalala suꞌma xonsiisannore coyiꞌneemmokki woy assineemmokki gede kaaꞌlankera huucciꞌneemmo gedeno assitannonke. Rosiissanno rosi ledo sumuu yite heedhannokkiri mitootu umi xibbi diri mannooti gede ikka dihasiꞌneemmo. Hawaariya Phaawuloosi insa daafira togo yee borreessino: “Kiꞌnenni kainohunni Maganu suꞌmi dagate mereero xonamanno.”—Rom. 2:21-24.

8, 9. Yihowa suꞌmisi qullaawanno gede lowo geeshsha hasidhannore maassiꞌranno gara leellishanno lawishsha kuli.

⁸ Ninke Maganu suꞌmi qullaawara hasiꞌneemmo. Mitte Noorweyi gobbara heedhanno rodoo minaannase shiidhe lamu diri qaaqqise ledo callatte heedhino. Ise togo yitino: “Hatti heeshshoꞌya giddo lowo geeshsha qarra ikkitinoe yannaati. Hatte yannara gara ikkinokkire asseenna woy ammanama hoogeenna Sheexaanu Yihowa xonannokki gede Yihowa jawaante aannoe gede barru baala wole agurina saate saatete kiiro huucciꞌreemma. Yihowa suꞌmi qullaawaranna qaaqqiꞌya annasi Gannatete wirro laꞌꞌara hasiꞌreemma.”—Law. 27:11.

⁹ Yihowa huuccattosera dawaro qoliyya? Ee, qolino. Tini rodoo ammanate roduuwisewa ganyite aanasenni hasiissannose irko afidhino. Ontu diri gedensaanni tini rodoo cimeessu rodiira assidhino. Xa 20 diro ikkinosihu qaaqqise cuuamino rodooti. Ise togo yitino: “Minaanniꞌya qaaqqoꞌya lossiꞌreemma gede kaaꞌlinoe daafira lowo geeshsha hagiidhoomma.”

10. Maganu suꞌmi woꞌmunni woꞌma qullaawanno gede hasiisannori maati?

¹⁰ Maganu suꞌmi woꞌmunni woꞌma qullaawannonna mishsho nookkiha ikkanno gede hasiisannori maati? Kuni ikkanno gede, Yihowa aliidimmasi adha gibbannore baala gudanno. (Hiziqeeli 38:22, 23 nabbawi.a) Hakkiinni mannu ooso sunu sununni guuta ikkitanno. Hedate dandoo noonsa kalaqami baalunku Yihowaha qullaawa suꞌma ayirrisanno yanna lowo geeshsha halchineemmo! Jeefoteno baxannonkehu iimi Anninke “baalunkura baalankare ikkanno.”—1 Qor. 15:28.

“MANGISTEKKI DAGGO”

11, 12. Tonaa honsikki sani goofara kaita Yihowa addu Kiristaani maa huwatanno gede assino?

¹¹ Yesuusi iimira haꞌrara albaanni hawaariyaatesi, “Mooticha, Isiraeelete mangiste wirro xintattohu xaatini?” yite xaꞌmitinosi. Yesuusi qolino dawaro hatti yanna hawaariyaatesi Maganu Mangiste gashsha hanaffannohu mamooteetiro affanno yanna ikkitinokkita leellishshanno. Isi rosaanosira lowo geeshsha hasiisannohu sabbakate loosi aana illachishshanno gede kulinonsa. (Looso 1:6, 7; Hawaariyaatete Looso 1:8 nabbawi.b) Ikkollana, Yesuusi harunsaanosi Maganu Mangiste daggannota quqquxantanni agadhitanno gedeno rosiisino. Konni daafira hawaariyaatete yannanni kayise Kiristaanu tini Mangiste daggara huucciꞌranni keeshshino.

¹² Yesuusi iima Maganu Mangistera nugusa ikkanno yanna gambissuta, Yihowa dagasi hattee yanna huwattanno gede kaaꞌlinonsa. Charlesi Teezi Raasili 1876⁠nni borreessinohu mittu birxichi Bayibili Egizaamineri yinanni metseetera fulino. “Dagate Diri Gumulamannohu Mamooteeti? yaannohu kuni birxichi, 1914 baxxino diro ikkinota xawisino. Kuni birxichi Daanieeli masaalinohu “lamalu dirinna” Yesuusi coyiꞌrinohu “muraminohu dagate diri” xaado afiꞌrinota kulino.c—Dan. 4:16; Luq. 21:24.

13. Tonaa honsu tonaa shoolunni mayi ikkino? Hakkawarinni kayise alamete aana ikkanni noori maa buuxisanno?

¹³ Awuroppu daga mereero 1914⁠nni kaino oli halaꞌle alame woꞌma iillino. Kuni oli 1918⁠nni uurrita, quuxxi assitanno hudenna taraawanno dhibbi eino; kuni dhibbi olunni reyino manna rooranno manna gudino. Konni garinni, Yesuusi haaro uullate Nugusa ikke iima moohinota leellishanno “malaati” woꞌma hanafino. (Mat. 24:3-8; Luq. 21:10, 11) Mootichu Yesuusi Kiristoosira ‘zawude uyinoonnihu’ 1914⁠nni ikkinota leellishshannoti lowo taje no. “Isino qeelanni qeelle gudise adhate hadaraasi.” (Aju. 6:2) Isi iima Sheexaanunna agaanintete ledo olame insa uullara qole tuge iima keereensino. Hatte yannanni kayisse mannu ooso aane noo qummeeshshi woꞌmanna laꞌanni no: “Uullanna baara kayinni hunsha! Korkaatuno Daawuloosi gattinosi yanna shiima ikkitinota afino daafira baasa hanqe kiꞌnewa dirrino.”—Aju. 12:7-12.

14. (a) Xaano ikkiro, Maganu Mangiste daggara huucciꞌra hasiissannonkehu mayiraati? (b) Hiikkonne kaajja looso loosate qoosso noonke?

¹⁴ Ajuuja 12:7-12 noo masaalo Maganu Mangiste xintantu yannara mannu ooso buuto qarrisannori ikka hanafinohu mayiraatiro huwatate kaaꞌlitannonke. Maganu Mangiste Nugusa ikkinohu Yesuusi diinnasi mereero gashsha hanafino. Isi qeelle gudise adha geeshshanna uullate aaninni bunshe baala huna geeshsha Maganu Mangiste daggara huucciꞌranke diagurreemmo. Qoleno Yesuusi coyiꞌrino “malaati” wido ikkinoha dhaggete looso loonse tenne huuccatto ledo sumuu yaannore assa hasiissannonke. Yesuusi togo yee masaalino: “Daga baalantera naqaashe ikkanno gede, kuni Mangistennihu danchu duduwi uulla woꞌmate sabbakamanno; hakkiinnino goofimarchu daanno.”—Mat. 24:14.

“FAJJOKKI . . . UULLANO IKKITO”

15, 16. Maganu fajjo uullate aana ikkitara huucciꞌneemmo huuccatto ledo sumuu yaannore assa dandiineemmohu hiittoonniiti?

¹⁵ Mitu 6,000 diri albaanni, Maganu fajjo uullate aana woꞌmunni woꞌma ikkitino. Yihowa “duuchunkuri lowo geeshsha danchaho” yiinohu iseraati. (Kal. 1:31) Hakkuyi gedensaanni, Sheexaanu finqilino; hakkuyinku kayise uullate aana Maganu fajjo assino manni shiimaholla yaa dandiinanni. Ikkollana yannankera Maganu fajjo uullate aana ikkitanno gede huucciꞌra calla ikkikkinni tenne huuccatto ledo sumuu yaannore assannohu sette miliyoone meddi yaanno manni noo yannara heeꞌranke kaajja qoossooti. Kuni manni Magano hagiirsiissanno heeshsho heeꞌranno, hattono manna rosaano assate looso diinaggaawe loosanno.

¹⁶ Lawishshaho, mitte 1948⁠nni cuuantinoti Afirikaho misiyoone ikkite soqqantino rodoo togo yitino: “Duucha wote, geꞌreewu gedee manni yanna gooffukki Yihowa afanno gede xaande kaaꞌlinanninsa gede huucciꞌreemma. Qoleno mittu manchira farciꞌrammara albaanni wodanasi kakkayisate kaaꞌlitannoe hayyo afiꞌrate huuccatto assiꞌreemma. Hakkiinni saeno kaaꞌlinanni heeꞌnoommoha geꞌreewu gedee manna towaatate sharrammeemmo sharro maassiꞌrannonke gede Yihowa huucciꞌreemma.” Tini 80 diri rodoonke soqqanshosenni lowo guma afidhino; qoleno wolu roduuwi kaaꞌlannase batinye manna Yihowa Farciꞌraasine ikkanno gede kaaꞌlitino. Atino diru akkalle abbitanno qarra dandee Maganu fajjo assate insaneeto sayise uyinohu dancha lawishsha ikkannohu afootto roduuwi nooha ikkara dandaanno.—Filiphisiyusi 2:17 nabbawi.d

17. Yihowa albillitte uullatenna mannu oosora assannore hedatto wote mayi macciishshamannohe?

¹⁷ Maganu Mangiste diinna uullate aaninni baꞌa geeshsha, Maganu fajjo uullate aana ikkitara huucciꞌranke diagurreemmo. Hakkiinni lowo biliyoone ikkanno manni gannate ikkitino uullara reyotenni kaꞌꞌanno yannara Maganu fajjo uullate aana roorenka woꞌmunni woꞌma ikkitanna laꞌneemmo. Yesuusi togo yiino: “Kuni dhagge ikkoonkeꞌne, korkaatuno qaagooshshu waamma giddo noori baalunku [huuroꞌya] macciishshitanno yanna dagganni no.” (Yoh. 5:28, 29) Shiiꞌnoommo manni reyotenni kaeenna xaandeemmo yanna lowo geeshsha hagiirsiissannota ikkitanno! Maganu “hindiiddo duuchanta [illenkenni] feyanno.” (Aju. 21:4) Reyotenni kaꞌannori giddo rooru manni, Maganu Yihowanna Beettisi daafira halaale rossukki reyitino “finqilaasineeti.” Reyotenni kaꞌꞌanno mannira Maganu fajjorenna alaamisire affanno gede rosiisa kaajja qoossooti; tini qolte “hegere heeshsho” afidhannore ikkitanno gede kaaꞌlitannonsa.—Looso 24:15; Yoh. 17:3.

18. Mannu oosora roore hasiissanno coyibba hiikkuriiti?

¹⁸ Kalqete alame giddo salaamenna mittimma heedhannohu Maganu Mangiste Yihowa suꞌma qullaawa assituro callaati. Konni garinni, Yihowa lawishshu huuccattora nooha umiha sase coye wonshanno wote, mannu ooso roore hasiissannonsa coyibba afidhanno. Hakka geeshsha kayinni, Yesuusi lawishshu huuccatto giddo qummi assinohu wolu shoolu hasiisannonke coyi no. Tenne coyibba aane noo birxichira ronseemmo.