Maganu Eltore Kulannoha Dancha Duduwo Dudubbe

1, 2. Soqqamaasinchu Phaawuloosi Maganu uyinosi eltora galatannota leellishinohu hiittoonniiti?

SOQQAMAASINCHU Phaawuloosi, “[Maganu] uyinoe elto mullawa digattino” yee coyiꞌrino. (1 Qorontoosi 15:9, 10 nabbawi.) Phaawuloosi alba Kiristaanaho darte iillishannoha ikkino daafira, Maganu maaro afiꞌrinohu Yihowa eltonni ikkinota seekke afino.

² Isi reyara albaanni ledosi soqqamannohu Ximootewosira togo yee sokka borreessino: “Ane soqqanshosira doore, ammanamoommoha asse kiire jawaante uyinoeha Mooticha Kiristoosa Yesuusa galaxxeemmo.” (1 Xim. 1:12-14) Phaawuloosi konni qummeeshshi giddo kulino “soqqansho” maati? Isi Efesooni songo cimeeyyera tenne soqqansho giddo mittu maatiro kulanni togo yiino: “Ani kayinni Mootichu Yesuusi uyinoeha Maganu eltoha Dancha Duduwo kulate looso gudammo geeshsha lubboꞌya nafa dimarareemmo.”—Soq. 20:24.

3. Phaawuloosira hiittenne baxxitino soqqansho uyinoonnisi? (Hanafote noo misile lai.)

³ Phaawuloosi Maganu elto leellishannoha hiikkonne “Dancha Duduwo” duduwino? Isi Efesooni Kiristaanira togo yee borreessino: “Kiꞌne qiniitira yee Maganu anera soqqamate elto uyinoeta addinta macciishshitinoonni.” (Efe. 3:1, 2) Phaawuloosi, daga Kiristoosi Gashshino Mangiste miilla ikka dandiitanno gede dancha duduwo duduwara hajanjoonnisi. (Efesooni Sokka 3:5-8 nabbawi.) Isi sabbakate looso diinaggaawe loose yannankera noo Kiristaanira dancha lawishsha ikkino; hattono Maganu uyinosi elto ‘mullawa gattinokkita’ leellishino.

MAGANU ELTO LOOSOHO KAKKAꞌꞌATTO GEDE ASSITANNOHE?

4, 5. ‘Maganu Gashshootihu Danchu Duduwinna’ ‘Maganu eltore’ kulannohu danchu duduwi mittoho yineemmohu mayiraati?

⁴ Tenne heeꞌnoommote goofimarchu yannara Yihowa soqqamaano, “Maganu Gashshootiha Dancha Duduwo gobba baalate” kultanno gede hajanjoonninsa. (Mat. 24:14) Tini dudumbeemmo sokka ‘Maganu eltohu Danchu Duduwi’ giddo mittete; korkaatuno Maganu Gashshooti hunda atoote afiꞌneemmohu Isi elto widoonniiti. (Efe. 1:3) Ninkeno Phaawuloosi gede diinaggaambe soqqamme, Yihowa uyinonke eltora galanteemmosita leellinshanni heeꞌnoommo?—Roomu Sokka 1:14-16 nabbawi.

⁵ Sai birxichira, cubbaataamma ikkinummorono Yihowa eltonni addi addi horo afiꞌnanni heeꞌnoommohu hiittoonniitiro ronsoommo. Yihowa manna baala baxannota leellishannohu hiittoonniitironna insa tennenni horo afiꞌra dandaannohu ma garinniitiro kulate dandiinummore baala assa hasiissannonke. Mannu huwatanno gede rosiisa hasiissannonketi mite Yihowa elto hiitteeti?

WODOTE DAAFIRA KULANNOHA DANCHA DUDUWO DUDUBBE

6, 7. Wodote daafira mannaho kulleemmo wote, Maganu eltore kulannoha dancha duduwo dudumbanni heeꞌnoommo yineemmohu mayiraati?

⁶ Tenne maaeeltino alamera mannu cubbo loosa soꞌro afiꞌrinokkiri gede asse laꞌꞌanno; hakko daafira batinyu mannira wodo hasiissannonsaha dilawannonsa. Ikkirono, maaeelare assa addu hagiirre afiꞌnanni gede assitannokkita huwatanno manni kiiro lexxitanni daggino. Lowo manni Yihowa Farciꞌraasine ledo xaadara albaanni cubbu maatiro, manna gawajjannohu hiittoonniitironna cubbu borojjimmanni fulate maa assa hasiissannoro diafino. Suwashsho wodana afiꞌrino manni, Yihowa Beettisi uullara daye cubbunna reyote borojjimmanni wodannonke gede assinota rose, Yihowa baxillaanchonna elto aannoha ikkinota huwatino.—1 Yoh. 4:9, 10.

⁷ Phaawuloosi Yihowa Beetti daafira togo yee borreessino: “Maganu elto woꞌma ikkitinohura, Beettisi Yesuusi mundeenni wodamme, cubbinkera maaro afiꞌnoommo.” (Efe. 1:7) Maganu, Kiristoosi ninkera yee reyanno gede assasi, Isi lowo geeshsha baxannonketanna eltosi lowota ikkitinota leellishshannote. Yesuusi ninkera yee reyinota ammannummoro cubbinkera maaro afiꞌneemmotanna keeraanchu tiiꞌꞌi heeꞌrannonketa afanke lowo geeshsha hagiirsiissannote! (Ibi. 9:14) Ee, kuni mannaho kula hasiissannonkeho dancha duduwooti!

MANNU MAGANU LEDO JAALA IKKANNO GEDE ROSIISSE

8. Mannu ooso Maganu ledo araarama hasiissannonsahu mayiraati?

⁸ Mannu Kalaqaanchinsa ledo jaalooꞌma dandaannota kula hasiissannonke. Insa Yesuusita wodote kakkalo ammanannota leellishannokkiha ikkiro, Maganu diina ikkanno yaate. Soqqamaasinchu Yohaannisi togo yee borreessino: “Beettosi ammaꞌninohura hegere heeshsho noosi. Beettosi ammaꞌninokkihura kayinni, Maganu hanqi aanasi heeꞌranno ikkinnina heeshsho diafiꞌranno.” (Yoh. 3:36) Kiristoosi wodote kakkalo ikke reyasi, Maganu ledo araarammeemmo faro fantinonke; tini hagiirsiissannote. Phaawuloosi togo yiino: ‘Kunni albaanni Maganuwiinni xeertidhine heedhinoonni; hedoꞌnenninna bushu loosiꞌnenni isira diina ikkitine heedhinoonni. Xa kayinni . . . Beettisi reyo widoonni qole umisi ledo araarsinoꞌne.’—Qol. 1:21, 22.

9, 10. (a) Yesuusi buurantino roduuwisira hiikkonne loosu qeecha uyinonsa? (b) “Wolu geꞌreewi” buuramino roduuwansa kaaꞌlanni noohu hiittoonniiti?

⁹ Phaawuloosi, Kiristoosi uullate aana noohu buuramino roduuwisira uyino looso, “araarsate soqqansho” yiino. Phaawuloosi tenne xawisanni umi xibbi dirihu buuramino Kiristaanira togo yee borreessino: “Kuni baalunku, ninke isinii ledo Kiristoosi widoonni qole araarsihunna araarsate soqqansho uyinonke Maganiwiinni dayino. Hatto yaa, Maganu Kiristoosi widoonni qole kalqe isinii ledo araarsino yaate. Saonsa dikiirino; ninkerano araarsate sokka uyinonke. Kunnira, Maganu manna ninke widoonni qole woshshanno daafira, ninke Kiristoosi lekkaati. Kunni daafira, ‘Maganu ledo araaramme!’ yine Kiristoosi suꞌminni huucciꞌneemmoꞌne.”—2 Qor. 5:18-20.

¹⁰ “Wolu geꞌreewi” tenne soqqansho soqqame ayyaanunni buuramino roduuwansa kaaꞌlate qoossonsa lowori gede asse laꞌꞌanno. (Yoh. 10:16) Insa Kiristoosi soqqamaano ikke mannaho ayyaanaamittete coye rosiisenna mannu Maganu ledo jaalooꞌmanno gede kaaꞌle lowo looso loosanni no. Tini Maganu eltoha dancha duduwo duduwate widira gaamantanno.

MAGANU HUUCCATTO MACCIISHSHANNOHA IKKINOTA DUDUBBE

11, 12. Mannu Yihowa huucciꞌra dandaannota rosiisa dancha duduwooti yineemmohu mayiraati?

¹¹ Batinyu manni yaachishannonsa coyinni shesho afiꞌrate huuccatto assiꞌranno; ikkollana, addinta Maganu huuccatto macciishshannoha ikkinota diammananno. Insa Yihowa ‘huuccatto macciishshannoha’ ikkinota huwata hasiissannonsa. Faarsaasinchu Daawiti togo yee borreessino: “Mannu baalu cubbinsa daafira yee, atewa daanno; atino huuccattonsa macciishshatto; cubbu lowo geeshsha ayirrannonke yannara, ati saonke agurattonke.”—Far. 65:2, 3.

¹² Yesuusi rosaanosira togo yiino: “Aye coyeno suꞌmiꞌyanni huuccidhiniro, ani eemmoꞌne.” (Yoh. 14:14) Yesuusi “aye coyeno” yiinohu Yihowa fajjo ledo sumuu yaannore xawisateeti. Yohaannisi togo yee buuxisinonke: “Isiwa noonkehu hawaqiꞌneemmo coyi konneeti; isi hedino garinni huucciꞌneemmore baala macciishshannonke.” (1 Yoh. 5:14) Huuccatto yaachishanno coyinni shesho afiꞌneemmo gede assitannonkeha calla ikkikkinni “ayirradu Maganu barcimiwa” shinqeemmo gede kaaꞌlitannonketa mannaho rosiisa kaajja qoossooti! (Ibi. 4:16) Mannu Maganu fajjo ledo sumuu yaanno garinni, huucciꞌra hasiissannohuwanna hasiissannonsa coyibba afiꞌrate huucciꞌranno gede rosiinse Yihowawa shiqannonna qarru iillannonsa yannara shesho afiꞌranno gede kaaꞌla dandiineemmo.—Far. 4:1; 145:18.

MAGANU HAARO ALAMERANO ELTO AANNONKE

13, 14. (a) Buuramino Kiristaani albillitte hiittenne kaajja qoosso afiꞌranno? (b) Buuramino Kiristaani mannu oosora hiikkonne dhagge ikkanno coye assanno?

¹³ Yihowa xaa yannara calla ikkikkinni albillitte haaro alamerano elto aannonke. Phaawuloosi Maganu Kiristoosi ledo iima heeꞌre gashshara doorinohu 144,000 manni afiꞌrino qoosso daafira coyiꞌranni togo yiino: “Ikkollana maarote dureessa ikkinohu Maganu lowo geeshsha baxannonke daafira, saonkenni kainohunni reyine heeꞌneenna, Kiristoosi ledo heeshsho uyinonke. Kiꞌneno gattinoonnihu eltosinniiti. Maganu Kiristoosi Yesuusi ledo reyotenni kayise gordu gobbara isi ledo worinonke. Hatto assinohuno, dagganno yanna baalate Kiristoosi Yesuusi widoonni qole xawisinonke shaqqillinni uyinonketa dannu nookki eltosi leellishankera yeeti.”—Efe. 2:4-7.

¹⁴ Buuramino Kiristaani iima Yesuusi ledo moohanno wote Yihowa aannonsa atooti konneeeti yine kulle dianfanniho. (Luq. 22:28-30; Fil. 3:20, 21; 1 Yoh. 3:2) Insara Yihowa “dannu nookki eltosi” aannonsa. Insa Haaro Yerusaalame yaanno Kiristoosi idayicho ikkanno. (Aju. 3:12; 17:14; 21:2, 9, 10) Insa hajajamanno manni cubbunna reyote borojjimma giddonni fule guuta ikkanno gede asse Kiristoosi ledo kaaꞌlame ‘gosa hursanno.’—Yohaannis Ajuuja 22:1, 2, 17 nabbawi.

15, 16. Yihowa albillittete ‘wolu geꞌreewira’ eltosi aannonsahu hiittoonniiti?

¹⁵ Efesooni Sokka 2:7 Maganu ‘dagganno yannara’, yaano haaro alamerano eltosi aannonketa kultannonke. Yihowa haaro alamera uullate aana heeꞌranno mannirano “dannu nookki eltosi” aannoti dihuluullissannote. (Luq. 18:29, 30) Yihowa eltosinni uullate aana assannohu dhagge ikkanno coyi giddo mittu, reyino manna “jeennaatu” woy waammate giddonni kayisate. (Iyo. 14:13-15; Yoh. 5:28, 29) Yesuusi wodote kakkalo ikkara albaanni reyinohu ammanamino labballinna meenti, hattono tenne goofimarchu yannara ammaname heeꞌre reyannohu “wolu geꞌreewi” reyotenni kae biꞌreensa gede Yihowara soqqamanno.

¹⁶ Maganu daafira afikkinni reyinohu lowo miliyoone ikkanno mannino reyotenni kaꞌꞌanno. Insano Yihowa aliidimmara maahoyye yee galanno faro afiꞌranno. Yohaannisi togo yee borreessino: “Reyinohu shiimmaaddunna jajjabbu manni ayirradu barcimira albaanni uurre nooha afummo. Maxaaffano faꞌnantu; heeshshonnihu wolu maxaafino faꞌnami. Reyino mannirano maxaaffate giddo borreessinoonni garinni loosinsara yoo yini. Baaruno giddosi nooha reyino manna fushshe uyi; reyonna jeennaatuno giddonsa nooha reyino manna uyi. Mittu mittunku manchira loosisi garinni yoo yini.” (Aju. 20:12, 13) Reyotenni kaꞌannori Qullaawu Maxaafi giddo kulloonniha Maganu seera harunsa dandiitanno gara rosa hasiissannonsati egennantinote. Qoleno, ‘haaru maxaafi’ giddo heeꞌrannoha Yihowa haaro alame giddo heeꞌranno mannira fushshannoha horo aanno biddishsha harunsa hasiissannonsa. Yihowa hakko maxaafi woy xaaxo giddo fushshino biddishsha aasino isi elto leellishshannote.

DANCHA DUDUWO DUDUWAꞌNE AGURTINOONTE

17. Sabbankeemmo wote qaaga hasiissannonke coyi maati?

¹⁷ Goofimarchu barri gambisanni daanno wote, Maganu Gashshootiha dancha duduwo dumbeemmo gede uyinoonninke looso diinaggaambe loosa hasiissannonke. (Maq. 13:10) Ee, danchu duduwi Yihowa eltooti! Sabbankeemmo wote tenne qaaga hasiissannonke. Sabbankeemmohu Yihowa ayirrisateeti. Haaro alame giddo woꞌmanno atooti baalu Yihowa eltosinni mannaho aannoha ikkinota kulle tenne assa dandiineemmo.

18, 19. Elto uyinonke Magano galata dandiineemmohu hiittoonniiti?

¹⁸ Sabbankeemmo wote, Kiristoosi Gashshooti hunda mannu wodote kakkalonni woꞌmunni woꞌma horo afiꞌrannotanna gale hosanni guuta ikkannota kula dandiineemmo. Qullaawu Maxaafi togo yaanno: “Kalaqamu baote borojjimmanni gate, Maganu oosota ayirrinyu wolapho gutamanno gedeeti.” (Rom. 8:21) Kuni ikkannohu Yihowa eltonni callaati.

¹⁹ Ninke baalunku, macciishshannonke manni baalaho Yohaannis Ajuuja 21:4, 5 giddo noota dhagge ikkitanno hexxo kulleemmo; qummeeshshu togo yaanno: “‘Maganu . . . hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.’ . . . Ayirradu barcimira ofollinohu, ‘Kune ani baalanka coye haaro asseemmo’ yii. Ledeno ‘Kuni qaali hawaqiꞌnannihonna halaalehona borreessi! yiie.’” Dancha duduwo mannaho diinaggaambe kulleemmoha ikkiro, mannu Yihowa eltore afanno gede assineemmo!