Nabbawaano Xaꞌmitanno Xaꞌmo

Kiristaanu sokka sonkanni appilikeeshiine horoonsiꞌranno woyite qoropha hasiissannonsahu mayiraati?

Mitu Kiristaani maatensanna ammanate roduuwinsa ledo xaadate yanna abbitino tekinooloje horoonsiꞌranno. Ikkollana gikki yiino Kiristaani, “Egennaamu manchi bushare afiro maaxamanno; hawanyu kayinni eꞌꞌe qarramanno” yitanno amaale dideanno.—Law. 27:12.

Yihowa ninke agara hasiꞌrannota anfoommo. Konnira babbadooshshe kalaqa hasidhannoriwa, bohantinoriwa woy kaphu hedo tareessitannoriwa aana dihasiꞌneemmo. (Rom. 16:17; 1 Qor. 5:11; 2 Yoh. 10, 11) Sonogote giddo noorirano mitootaho danchu amanyooti noonsakkiha ikkara dandaanno. (2 Xim. 2:20, 21) Jaalla doodhineemmo woyite tenne dea dihasiissannonke. Sokka sonkanni appilikeeshiine widoonni dancha jaalla doodha qarra ikkitara dandiitanno.

Hakko iso appilikeeshiinete widoonni lowo manni noo gaamo wido ikkate hendeemmo woyite qoropha hasiissannonke. Lowo manni noo gaamo giddora einohu mitu Kiristaani qarru giddo uwino. Mittu Kiristaanchi lowo xibbe woy kume ikkanno manni noo gaamo giddora eꞌꞌe heeꞌre hiitto ikke qoropha dandaanno? Gaamote giddo noohu mittu mittunku manchi ayimmanna ayyaanaamittesi afa didandiinanni. Faarso 26:4, “Kaphaanote songo disongeemmo; lawisiisaanote ledo dihoseemmo” yitanno. Kuni qummeeshshi sokka sonkanni appilikeeshiine anfoommo manni ledo calla xaadate horoonsiꞌra hasiisannonketa leellishannoha diꞌꞌikkino?

Gaamote giddo noo manni shiima ikkiro nafa, mittu Kiristaanchi hasaawanni mageeshshi yanna gudannoronna mayi hajo daafira hasaambanniro buuxa hasiissannosi. Hasaambanni gundanni yanna woy hasaambanni hajo ikkitutano ikkituro, anino hasaawa hasiissannoe yine heda dihasiissannonke. Phaawuloosi Ximootewoosi, mitootu ‘manni coyi giddora eꞌanni, hasiisannokkire coyidhannota’ kule qorowisiisinosi. (1 Xim. 5:13) Xaa yannarano elektiroonikisete uduunne horoonsidhe hatto assitannori heedhara dandiitanno.

Gikki yiino Kiristaanchi ammanate roduuwasi dimishanno hattono insa fojo woleho dikulanno; qoleno wolootu togoore kultanna dimacciishshanno. (Far. 15:3; Law. 20:19) Iibbinshe woy buunxikkinni coyiꞌnannire dimacciishshanno hattono woleho ditareessanno. (Efe. 4:25) JW Biroodikaastenna jw.org webisayitenke widoonni falakkinota ayyaanaamittete sagalenna addaxxinanni mashalaqqe afiꞌneemmo.

Mite Yihowa Farciꞌraasine mitore hiꞌrate, hidhate hattono mitore egensiisate woy loosu egensiishsha fushshate sokka sonkanni appilikeeshiine horoonsidhanno. Kuni ayyaanaamittete coye ikkikkinni daddalu hajooti. ‘Woxu baxille qorophanno’ Kiristaani roduuwu maamara horo daddaloho dihoroonsiꞌranno.—Ibi. 13:5.

Qarrantinore woy dano iillitinonsa roduuwa kaaꞌlate sokka sonkanni appilikeeshiine horoonsiꞌne woxe gamba assa garahoyyani? Roduuwanke banxeemmo daafira insa kaaꞌlanna jawaachisha hasiꞌneemmo. (Yai. 2:15, 16) Kayinni lowo manni noo gaamo widoonni hatto assate woꞌnaalleemmoha ikkiro, sinu biiro woy songo togoo roduuwa kaaꞌla qarra ikkitannonsa gede assinanni heeꞌnoommo. (1 Xim. 5:3, 4, 9, 10, 16) Qoleno Maganu geꞌreewo towaatate baxxino qeechi nooe yine hendeemmoha lawisannore assa dihasiꞌneemmo.

Assineemmori baalu Yihowara ayirrinye abbannoha ikkara hasiꞌneemmo. (1 Qor. 10:31) Konnira sokka sonkanni appilikeeshiine woy wole tekinooloje horoonsiꞌneemmo woyite qarra abbara dandaannore hedanna qoropha hasiissannonke.