Banxeemmo Manni Yihowara Soqqama Aguranno Woyite

1. Maatete miili bohamanno woyite mayi macciishshamankera dandaanno?

BAXXINANNI manni songotenni bohaminoni? Kuni lowo geeshsha dadillisanno coyeeti! Hilda yinanni rodoo togo yitino: “Minaanniꞌya adhammummohunni 41 diri gedensaanni reyi woyite, tenne saꞌino busha dino yee hedoomma.b Beettiꞌya songotenni bohami woyitenna galtesinna oososi agure haꞌri woyite kayinni, coyi roore ayirrinoe.”

2-3. Faarso 78:40, 41 kultanno garinni, Yihowara soqqamaasinesi iso agurtanno woyite mayi macciishshamannosi?

² Yihowa maatesi giddo noori mite sokkaasine iso agurtu woyite mageeshshi geeshsha dadillinoro hanni hedi! (Yih. 6) Qoleno baxanno mannisi Israeele xaa xaa isira finqiltu yannara Yihowa mageeshshi geeshsha xissiisiꞌrinoro heda dandaatto. (Faarso 78:40, 41 nabbawi.) Baxillaanchu iimi Anninke, baxxinanni manni isira soqqama aguranno woyiteno dadillannoti dihuluullissannote. Isira dadilliꞌnenna xissoꞌne leeltannosi. Mararanno Anna ikkino daafira, hasiissannoꞌne jawaante aannoꞌne, hattono irkisannoꞌne.

³ Konni birxichira, banxeemmo manni Yihowara soqqama aguranno woyite Yihowa aanno kaaꞌlo afiꞌrate maa assa dandiineemmoro ronseemmo. Qoleno songote giddo togoo coyi tuncu yiinonsa roduuwa kaaꞌla dandiineemmo gara laꞌneemmo. Hanni kayi balanxe hooꞌla hasiissannonketa mitte gara ikkitinokki hedo laꞌno.

KIꞌNENEETO BUSHA ASSITINOONTE

4. Batinyu anninna amara beettinsa woy beettonsa Yihowara soqqama agurtanno woyite mayi macciishshamannonsa?

⁴ Annunna ama baxxanno beettinsa woy beettonsa Yihowara soqqama agurtanno woyite, beettonsa kaaꞌlate assa hasiissannonsari gatinoha lawansara dandaanno. Luuki yinanni rodii beettinsa bohamihu gedensaanni togo yiino: “Bushu aneeti yee hedoommo. Qoleno goxoommowa bararraaqeemmo. Mito woyite wiꞌleemmo; wodaniꞌyano xissiisiꞌranno.” Hattonni beettise bohaminoti Elizaabeeti yinanni rodoo togo yitino: “Ama assa hasiissannosere assoommaha dilawannoe. Qaaqqiꞌya wodanira halaalu qaꞌmanno gede assa didandoomma yaate yee hedoomma.”

5. Mittu manchi Yihowara soqqama aguranno woyite, hatti aye soꞌrooti?

⁵ Yihowa ninke mittu mittunkura doodhate dandoo uyinonketa qaaga hasiissannonke. Hatto yaa Yihowara hajajama woy hajajama hooga doodha dandiineemmo yaate. Mite ooso anninsa woy amansa dancha lawishsha ikka hooggunsarono, Yihowara soqqamanna isira ammaname heeꞌra doodhitino. Mite ooso kayinni anninsanna amansa insa Qullaawu Maxaafihu xintu seeri garinni lossate sharranturono, lophituhu gedensaanni Yihowara soqqama agura doodhitino. Konni daafira, mittu mittunku Yihowara soqqama woy soqqama hooga doodha dandiineemmo. (Iya. 24:15) Konnira, oosoꞌne Yihowara soqqama agurtino daafira dadillitinoonni annuwanna amuuwa, bushu aneeti yitine heddinoonte!

6. Annu woy ama Maganoho soqqama agurtanno woyite oosote mayi macciishshamansara dandaanno?

⁶ Mito woyite, annu woy ama halaalu mininni fularanna maatensa nafa agure haꞌrannoha ikkara dandaanno. (Far. 27:10) Kuni annansanna amansa danchu lawishshi gede assite layidhanno oosora lowo geeshsha xissiisanno coyeeti. Annise bohaminoti Isteri yinanni rodoo togo yitino: “Anniꞌya halaalu mininni fulinohu sunu sununni doogame diꞌꞌikkino; isi Yihowa facci asse agurinohu baxe doodheeti. Tenne afoomma daafira duucha woyite wiꞌleemma. Annaꞌya baxeemma daafira, bohamita isi keeri daafira woꞌmanka woyite yaadeemma. Qoleno hedeweelcho baasa masisannoe.”

7. Annu woy ama bohantinonsa wedellooti daafira Yihowara mayi macciishshamannosi?

⁷ Wedelloota, anniꞌne woy amaꞌne bohantinoha ikkiro, lowo geeshsha mararreemmoꞌne! Yihowarano xissoꞌne leeltannosita horo huluullantinoonte. Yihowa lowo geeshsha baxannoꞌne; qoleno ammanantine soqqantinannisi daafira tashshi yaannosi. Ninke roduuwiꞌneno banxeemmoꞌne. Anniꞌne woy amaꞌne assitannorira xaꞌmantinanniri kiꞌne ikkitinoonnikkitano qaagge. Aleenni laꞌnummonte gede, Yihowa mittu mittunku manchira doodhate dandoo uyino. Heeshshosi Maganoho sayise oye cuuaminohu “mittu mittunku [manchi] umisi duha duqqa” woy assannore umisi doodha hasiissannosi.—Gal. 6:5.

8. Ammanantinori maatete miilla bohaminohu Yihowawa higanno yanna agadhitanno woyite maa assa dandiitanno? (“Yihowawa Higi” yitanno saaxineno lai.)

⁸ Baxxinanni manni bohamiro, barrunni mitto barra higanno yitine hexxaꞌne nooreentilla. Hakka geeshsha kayi maa assa dandiitinanni? Umiꞌne ammana kaajjishiꞌrate sharrama dandiitinanni. Hatto assitiniro, maatete giddo wolootaho, wole agurina bohamihura nafa dancha lawishsha ikkitinanni. Qoleno xissoꞌne dandiitine heedhinanni gede kaaꞌlitannoꞌne jawaante afidhinanni. Hanni ammanaꞌne kaajjishiꞌrate assa dandiitinanniha mito coye laꞌno.

AYYAANAAMITTEꞌNE KAAJJISHIꞌRATE ASSA DANDIITINANNIRE

9. Yihowawiinni jawaante afiꞌra dandaattoti mite doogga hiikkuriiti? (“Baxxinanni Manni Bohaminoha Ikkiro, Jawaachishshannoꞌne Qummeeshshuwa” yitanno saaxineno lai.)

⁹ Ammanaꞌne kaajjite heedhanno gede dandaamiꞌnere baala asse. Kiꞌnetano ikko maateꞌne ayyaanaamitte kaajjishate sharrama agurtinoonte. Tenne assa dandiitinannihu hiittoonniiti? Ganyitine Qullaawa Maxaafa nabbabbinenna hiincitine, hattono woꞌmanka woyite songote gambooshshe hadhine Yihowawiinni jawaante afiꞌrate sharramme. Annisenna rodoose bohaminoti Joaana yinanni rodoo togo yitino: “Qullaawu Maxaafi giddonni Abigayeeli, Asteeri, Iyyoobi, Yooseefi, Yesuusinna woleno togoo xagge nabbaweemma woyite, wodaniꞌya gaꞌlabbi yaanno. Insa lawishshi jawaachishannoe, hattono xissoꞌyanni beedho afiꞌreemma gede kaaꞌlannoe. Baxxitino faarsonkeno lowo geeshsha jawaachishshannoe.”

10. Faarso 32:6-8 xisso dandiine heeꞌnanni gara kultannohu hiittoonniiti?

¹⁰ Yaachishannoꞌnere baalankare Yihowara hasaaphe. Lowo geeshsha dadillitinanni yannarano Yihowa huucciꞌra agurtinoonte. Baxillaanchu Maganinke coye isi hedanno garinni heddinara kaaꞌlannoꞌne gede eeggifatte; qoleno ‘rosiisannoꞌne gedenna hadhinanni doogo kulannoꞌne gede’ huuccidhe. (Faarso 32:6-8 nabbawi.) Hige giddoꞌneta Yihowara hasaaphitinanni woyite, lowo geeshsha xissiisidhinanniha ikkara dandaanno. Ikkirono, wodaniꞌne xisso Yihowara gudisante leeltannosi. Isi lowo geeshsha baxannoꞌne; hattono giddoꞌneta gudissine hasaaphitinasira koyisinoꞌne.—Ful. 34:6; Far. 62:7, 8.

11. Ibiraawoota 12:11 kultanno garinni, Yihowa baxillunni seejjanno seejjo addaxxa hasiissannonkehu mayiraati? (“Boha Yihowa Baxille Leellishshanno” yitanno saaxineno lai.)

¹¹ Cimeeyye murtino muro ayirrisse. Boha Yihowa mitto mancho baxillunni seejjanno doogooti. Qoleno bohami manchirano ikko wolu baalunkura kaaꞌlitanno qixxaawooti. (Ibiraawoota 12:11 nabbawi.) Songote giddo mitootu, ‘Cimeeyye ewela bohansa digaraho’ yitara dandiitanno; ikkollana, duucha woyite hatto yitannori cubbo loosino mancho bushiisha hasidhannokkire ikkitinota qaaga danchate. Anfoommokkihu lowo coyi heeꞌrara dandaanno. Konni daafira, yoote komite ikkite loossu cimeeyye addaxxanke hayyote; mayira yiniro, cimeeyye Qullaawa Borroha xintu seera harunsatenna ‘Kaaliiqa hagiirsiissanno yoo’ yaate dandiiture baala assitanno.—2 Dud. 19:6.

12. Mitootu Yihowa seejjora halamansanni mayi horo afidhino?

¹² Cimeeyye baxxinanni manchi bohamanno gede murteenna hatteera halamaꞌne, bohamino manchi Yihowawa higanno gede kaaꞌlitasira dandiitanno. Aleenni kulliti Elizaabeeti togo yite noore coyidhino: “Beettinke ledo noonke aante facci asse agura lowo geeshsha qarra ikkitinonke.” Ise ledde togo yitino: “Ikkollana, isi Yihowawa higihu gedensaanni, bohama hasiissinoenkulla bohamoommo yiino. Gedensoonni isi tennenni lowore rosinota coyiꞌrino. Yihowa seejjo woꞌmanka woyite gara ikkitinota huwatoomma.” Minaannise Maarki qole togo yiino: “Lowo yanna saꞌu gedensaanni, beettinke Yihowawa higanno gede kaaꞌlinosiri giddo mittu ninke isi ledo noonke aante aguranke ikkitinota kulinonke. Yihowa hajajammeemmosi gede kaaꞌlinonke daafira lowo geeshsha galaxxeemmosi.”

13. Xissoꞌne dandiitine heedhinanni gede mayi kaaꞌlaꞌnera dandaanno?

¹³ Qarraꞌne huwata dandiitanno jaallaꞌnera giddoꞌneta hasaaphe. Hexxo mudhitinannikki gede jawaachishshaꞌnera dandiitannori gikki yitino roduuwiwa aanne. (Law. 12:25; 17:17) Aleenni qummi assiniti Joaana togo yitino: “Callimma amaddinoe woyiti no. Ammaꞌneemma jaallaꞌyara hasaaphaꞌya kayinni lowo geeshsha kaaꞌlitinoe.” Ikkina songote giddo mitu roduuwi roore dadillitinanni gede assannoꞌnere coyidhuro maa assa dandiitinanni?

14. ‘Mimmitu soꞌro aguranna mimmito cinca’ hasiissannonkehu mayiraati?

¹⁴ Roduuwaꞌne cincitine saꞌe. Baalunku manni gara ikkinore coyiꞌranno yine heda didandiineemmo. (Yai. 3:2) Ninke baalunku guuntete xeꞌne noonkereeti; hakko daafira, mitootu yitannore habbe gurchaabburo woy heddukkinni xissiisannoꞌnere coyidhuro dhagge assidhinoonte. Soqqamaasinchu Phaawuloosi togo yee amaalinonketa qaagge: “Kiꞌne kiꞌneneewa koffi yitinoonni coye baala cincatenni agurre. Kiristoosi agurinoꞌnente gede, kiꞌneno mimmitiꞌnera agurre.” (Qol. 3:13) Fiixise bohaminoti mitte rodoo togo yitino: “Yihowa, sheshifachinsheemmo yite dadillissinoe roduuwa gatona yeemma gede kaaꞌlinoe.” Songo ammanantinore maatete miilla kaaꞌla dandiitannohu hiittoonniiti?

SONGO KAAꞌLA DANDIITANNO GARA

15. Baxxanno manni muli yannara bohaminonsa maate ma garinni kaaꞌla dandiineemmo?

¹⁵ Ammanantinore maatete miilla anga fantine haadhensa. Miiriyaami yinanni rodoo, rodiise bohamihu gedensaanni gambooshshe haꞌra waajjitinota coyidhino. Ise togo yitino: “Mannu mayyaaekka yee waajjoomma. Ikkollana batinyu roduuwi anente gede dadillitino; qoleno insa bohamino rodiiꞌyara koffi yitinota leellishannore mittoreno dicoyidhino. Roduuwaho Maganu ikkonsana, xissiisiꞌre noomma woyite callate diegennoomma.” Wole rodoo qolte togo yitino: “Beettinke bohamihu gedensaanni, roduuwu dagge sheshifachishshinonke. Mitu roduuwi yineemmori leella giwinonke yitino. Insa ledoꞌya wiꞌlitino, hattono jawaachishshanno sokka borreessite sokkinoe. Insa assinori lowo geeshsha kaaꞌlinoe!”

16. Songo shesho hasiissannonsare agurtukki kaaꞌla dandiitannohu hiittoonniiti?

¹⁶ Ammanantinore maatete miilla kaaꞌla agurtinoonte. Wolu woyitinni roore insara kiꞌne baxillinna jawaante hasiissannonsahu xaati. (Ibi. 10:24, 25) Mito woyite, bohamino manchi maate songote giddo mitootu insano bohantinohu gede assite kiirte gambo gibbannonsata wodanchitino. Togoori kalaqamanno gede assinoonke! Roorenkanni anninsa woy amansa bohamino wedelloota galatanna jawaachisha hasiissanno. Minaannise bohame maatesi agure haꞌrinoti Maariya togo yitino: “Mitu roduuwi minira dagge sagale wortinonke; hattono maatete magansiꞌra assiꞌneemmo gede kaaꞌlitinonke. Insara xissoꞌya leeltinonsa; hakko daafira ledoꞌya wiꞌlitino. Mannu ane daafira gara ikkinokkire coyiꞌri woyiteno insa anera haꞌlite coyidhino. Insa addinta wodanaꞌya diggi assitinoe.”—Rom. 12:13, 15.

17. Cimeeyye shaqqillunni kaaꞌla dandiitannohu hiittoonniiti?

¹⁷ Cimeeyye, ammanantinore maatete miilla jawaachishate afidhini faro baala horoonsidhe. Baxxanno manni Yihowara soqqama agureenna dadillitino roduuwa sheshifachishate baxxino hadari nooꞌne. (1 Tes. 5:14) Gambooshshu hanafara albaanninna gambooshshu gedensaanni insa jawaachishate faro hasidhe. Qaensa martine hasaawissensa, hattono huuccatto assensa. Ledonsa soqqamme; woy mito woyite maatete magansiꞌrara koyissensa. Cimeeyye dadillinoha Yihowa geꞌreewo towaata, hattono insara baxillenna shaqqille leellisha hasiissannonsa.—1 Tes. 2:7, 8.

HEXXO MUDHITINOONTE, WOꞌMANKA WOYITE YIHOWA ADDAXXE

18. Layinki Pheexiroosi 3:9 kultanno garinni, Yihowa cubbo loossinori ma assitara hasiꞌranno?

¹⁸ Yihowa “baalunku aagintaawe higara” ikkinnina ‘ayino baꞌꞌara dihasiꞌranno.’ (2 Pheexiroosi 3:9 nabbawi.) Mittu manchi jawa cubbo loosinoha ikkirono, heeshshosi Maganu albaanni muxxete. Yihowa ninke cubbaataammu daafira yee lowo waaga yaano Beettisi wodo baatinota qaagge. Yihowa iso agurtinori wirro isiwa higganno gede baxillunni kaaꞌla hasiꞌranno. Isi insa higganno yee hexxanno; Yesuusi qaetenni fule baino beetti daafira coyiꞌrino lawishshi tenne leellishanno. (Luq. 15:11-32) Halaalu mininni fulinohu batinyu manni gedensoonni baxillaanchu iimi Anninsawa higino. Songono insa anga fante haadhinonsa. Aleenni kulliti Elizaabeeti beettise songo higeenna lowo geeshsha hagiidhitino. Ise hakkawarita qaagge togo yitino: “Batinyu roduuwi hexxo mudhineemmokki gede jawaachishshinonke daafira galaxxeemmansa.”

19. Woꞌmanka woyite Yihowa addaxxa hasiissannonkehu mayiraati?

¹⁹ Woꞌmanka woyite Yihowa addaxxa dandiineemmo. Isi aannonke biddishshi ninke kaaꞌlannonkeho ikkinnina gawajjannonkeha diꞌꞌikkino. Isi baxxannosirenna magansidhannosire baala lubbora baxannoho shaqqado Annaati. Xissiisidhinanni woyite Yihowa horonta tuge diagurannoꞌne. (Ibi. 13:5, 6) Aleenni kullihu Maarki togo yiino: “Yihowa horo tuge diagurinonke. Isi qarru amadannonke woyite ninkewiinni horo dixeertiꞌranno.” Yihowa mannu hedora aleenni ikkitinota “jawa wolqa” kiꞌnera aa diaguranno. (2 Qor. 4:7) Addanko, baxxinanni manni Yihowara soqqama aguriro nafa, ammanantinenna hexxo mudhitinikki heeꞌra dandiitinanni.