“Egennaamu Coyiꞌrannore Macciishshi”

1. Amaale afiꞌneemmohu hiittoonni ikkara dandaanno? Ninke baalunkura amaale hasiissannonkehu mayiraati?

NINKE baalunkura amaale hasiissannonke woyiti no. Mito woyite uminkenni kaꞌne mitto ayirrinseemmo mancho amaale xaꞌmiꞌnammora dandiineemmo. Wole woyite kayinni mittu ninkeri huluullisinosi rodii ganaanni gaabbineemmo gede assitannonke ‘soꞌro loonsammora’ kaꞌnoommota kulankera dandaanno. (Gal. 6:1) Woy jawa cubbo loonsummohu gedensaanni seejjinankera dandiinanni. Amaallanninke gari ikkihano ikkiro amaale macciishsha hasiissannonke. Togo assanke kaaꞌlitannonke hattono heeshshonke gatissanno!—Law. 6:23.

2. Lawishsha 12:15 kultanno garinni amaale macciishsha hasiissannonkehu mayiraati?

² Cuꞌmote qummeeshshi, ‘egennaamu coyiꞌrannore macciishshineemmo’ gede jawaachishannonke. (Law. 22:17) Baalankare afino manchi dino; ikkirono ninketenni roortino egenno woy woꞌnaalshi noosi manchi nooti dihuluullissannote. (Lawishsha 12:15 nabbawi.) Hakko daafira, amaale macciishsha umonke heeshshi assineemmore ikkinoommota leellishshanno. Qoleno assa dandiineemmokkiri nootanna mixonke wonshiꞌrate kaaꞌlo hasiissannonketa huwantoommota leellishshanno. Hayyichu manchi Moote Selemooni qullaawu ayyaaninni, “Malu seyiro . . . halchinoonniri woꞌmanno” yee borreessino.—Law. 15:22.

3. Amaale afiꞌneemmohu hiitte doogganni ikkara dandaanno?

³ Amaale xaaddotenni woy wolu garinni afiꞌnammora dandiineemmo. Wolu garinni afiꞌneemmo amaale yaa mayyaate? Qullaawu Maxaafinni woy borronke giddonni nabbamboommori assootenke taxxi yine hendeemmo gedenna biddi assiꞌra hasiissannonkere biddi assiꞌneemmo gede kakkayisankera dandaanno. (Ibi. 4:12) Wolu garinni afiꞌneemmo amaale yinanniti togoote. Xaaddote amaale yinanniti hiittoote? Mittu songote cimeessi woy ayyaanaamittetenni gikki yiino rodii biddi assiꞌra hasiissannonkere kulankera dandaanno. Xaaddote amaale yinanniti togoote. Mittu manchi baxannonke daafira Qullaawu Maxaafi aana xintantino amaale amaalannonke woyite, amaale macciishshine adhine galanteemmosita leellisha hasiissannonke.

4. Rosiisaancho 7:9 kultanno garinni amaallanninke woyite maa assa dihasiissannonke?

⁴ Noore coyiꞌniro xaaddote amaallanninke amaale macciishshe adha qarra ikkitankera dandiitanno. Wole agurina koffi nafa yinammora dandiineemmo. Mayira? Guuntete xeꞌne noonkere ikkinoommota anfoommoha ikkirono, mittu manchi soꞌronke bade kule amaalannonke woyite macciishshe adha qarra ikkitankera dandiitanno. (Rosiisaancho 7:9 nabbawi.) Soꞌronke gara lawisate nafa woꞌnaallammora dandiineemmo. Mitto mancho amaalannonke gede assinosire huluullammammora woy amaalinonke gari koffi assankera dandaanno. ‘Isi ane amaalannoehu maa ikkeeti? Isi umisi disoꞌro loosanni no?’ yinanni amaalinke manchi soꞌro xinqisiisiꞌneemmoha ikkara dandaanno. Amaalloonninke amaale baxisa hooggunkero lashshi assinammora woy macciishsha banxeemmo amaale hasiꞌnanni wolewa haꞌneemmoha ikkara dandaanno.

5. Konni birxichira maa ronseemmo?

⁵ Konni birxichira Qullaawu Maxaafi giddo kulloonnihu amaale macciishsha giwinohunna amaale macciishshino manni xagge xiinxallineemmo. Qoleno amaale macciishshine adhine horo afiꞌneemmo gede kaaꞌlannonkeri maatiro ronseemmo.

AMAALE MACCIISHSHA GIBBINORE

6. Moote Roobiaami amaallisi woyite assinorinni maa ronseemmo?

⁶ Hanni Roobiaami lawishsha laꞌno. Isi Israeelete moote ikkita gashshino manni isiwa daye mitte xaꞌmo xaꞌmino. Insa annisi Selemooni duhisiisinonsa duha shaashshansara xaꞌmidhino. Roobiaami mayyee dawara hasiissannosiro afate, Israeelete geerra amaaꞌlino; hatto assasi danchate. Israeelete geerri, moote mannu yiinore assannonsaha ikkiro, mannu maahoyye yee galannosita kultinosi. (1 Mot. 12:3-7) Roobiaami tini amaale diduushshitinosi; hakko daafira isi darawosi amaaꞌlino. Konni mannira mitu 40 diri balla ikkinsakkinni digatino; hakko daafira mito geeshshi woꞌnaalshshi noonsare ikkitinoti dihuluullissannote. (2 Dud. 12:13) Ikkollana insa tenne yannara Roobiaamira busha amaale amaaltino. Insa, isi mannaho duha ledanno gede amaaltinosi. (1 Mot. 12:8-11) Roobiaami tenne lamente addi addi amaale giddo hiittee amaale adha hasiissannosiro afate huuccattotenni Yihowa xaꞌmiꞌra dandaanno. Isi kayinni maccate baxissinosita darawosi amaaltinosi amaale adhino. Tini abbitino qarri isono Israeelete mannano gawajjino. Ninkeno mito woyite amaallanninke amaale baxa hoongammora dandiineemmo. Ikkirono Maganu Qaali aana xintantinota ikkitu geeshsha macciishshine adha hasiissannonke.

7. Moote Ooziya xaggenni maa ronseemmo?

⁷ Moote Ooziya amaale macciishsha giwino. Isi kakkalaasine calla eꞌara fajjinoonniwa qullaawu mini kifile eꞌꞌe hixaana giirate woꞌnaalino. Yihowa kakkalaasine iso togo yitino: “Ooziya! Kaaliiqira hixaana giira ate looso diꞌꞌikkitino. Konne coye assitara baxxitinore qeesoota . . . calla worroonni.” Ooziya maa assiyya? Isi umosi heeshshi asse amaale macciishshe qullaawu mininni bayichonko agure fuloommero Yihowa gatona yaasira dandaanno. Ooziya kayinni ‘hanqino.’ Isi amaale macciishshe adha giwinohu mayiraati? Ooziya moote ikkino daafira hasiꞌrire baala assa dandaannoha lawinosi. Yihowa kayinni isi assinore dibaxino. Ooziya booꞌnannota leellishannore assino daafira gogu dhibbinni amadamino; isi “reya geeshsha taraawannohu gogu dhibbi aanisinni dihoꞌlino.” (2 Dud. 26:16-21) Ooziya xaggenni, ayeno ikkinummoro Qullaawu Maxaafi aana xintantino amaale macciishshine adha gimbeemmoha ikkiro Yihowa hagiirsiisa dandiineemmokkita ronseemmo.

AMAALE MACCIISHSHITINORE

8. Iyyoobi amaallisi woyite maa assino?

⁸ Aleenni laꞌnummoha qorowishsha ikkanno lawishshano agurranna, Qullaawu Maxaafi giddo amaale macciishshino daafira atoote afiꞌrinoha dancha lawishsha ikkannonke mannano kulloonni. Hanni Iyyoobi lawishsha laꞌno. Isi Magano waajjannoha ikkirono guuta mancho diꞌꞌikkino. Iyyoobi qarru batiꞌrisi yannara gara ikkinokkire coyiꞌrino. Hakko daafira Eelihuno Yihowano xaaddote amaaltinosi. Iyyoobi maa assiyya? Isi umosi heeshshi asse amaale macciishshe adhino. Togo yiino: ‘Buuxoommokkire coyiꞌroommo.  . . Kunnira, coyiꞌroommo coyi baalu, ane umoꞌya saalfachishinoe. Kunni daafira, buluulunna bukote aana ofolle aagintaaweemmo.’ Iyyoobi umosi heeshshi assinotera Yihowa maassiꞌrinosi.—Iyo. 42:3-6, 12-17.

9. Muse amaale macciishshate dancha lawishsha ikkinonkehu hiittoonniiti?

⁹ Muse jawa soꞌro loosihu gedensaanni seejjinoonnisi seejjo macciishshe dancha lawishsha ikkinonke. Isi mitte yannara hanqosi eemadha hoogino daafira Yihowa ayirranno gede assikkinni gatino. Hakko daafira Muse Hexxote Gobba eate qoosso hoogino. (Kir. 20:1-13) Muse tennera dadille Yihowa hedinore aguranno gede xaꞌmiꞌrita, Yihowa “Xaate ikkinona konne coye [kayissootie]” yiinosi. (Mar. 3:23-27) Muse tennera dicaaccaawino. Hatteentenni isi Yihowa yiinore maahoyye yee adhino; hattono Israeele massaganno gede Yihowa iso horoonsiꞌra diagurinosi. (Mar. 4:1) Iyyoobinna Muse amaale macciishshite adhite dancha lawishsha ikkitinonke. Iyyoobi hedosi biddi assiꞌrino; hattono soꞌrosi gara lawisate diwoꞌnaalino. Muse lowo geeshsha halchanno coye hoogirono ammaname heeꞌrasi, Yihowa amaale macciishshe adhinota leellishshanno.

10. (a) Lawishsha 4:10-13 amaale macciishshe adha kaaꞌlitannonke gara leellishshannohu hiittoonniiti? (b) Mitu roduuwi amaallinsa yannara leellishshinohu danchu akati hiikkonneeti?

¹⁰ Iyyoobinna Muse gedeehu ammanamino manni lawishsha harunsanke kaaꞌlitannonke. (Lawishsha 4:10-13 nabbawi.) Batinyu roduuwinke ammanamino manni lawishsha harunsitino. Hanni Kongo Dimokiraatike Rippaabilikete heeꞌrannohu Imaanueeli yinanni rodii amaalloonnisi amaale daafira yiinore laꞌno; isi togo yiino: “Songote giddo noori ayyaanaamittetenni gikki yitino roduuwi ayyaanaamitteꞌya baꞌara kaꞌe noota huwattuti kaaꞌlitinoe. Insa amaaltinoe amaale macciishshe adhoommo; tini lowo qarrinni gatissinoe.”b Kanaadaho heedhannoti Megani yinanni suwisaancho amaalloonnise amaale daafira togo yitino: “Amaallannie amaale duuchanka woyite macciishsha hasiꞌreemmate yaa diꞌꞌikkitino; kayinni macciishsha hasiissannoete.” Kiroeshiyaho heeꞌrannohu Maarko yinanni rodiino togo yiino: “Songote giddo nooe qoosso hoogoommoha ikkirono, hakkawaro amaalloonnie amaale ayyaanaamittetenni jawaateemmo gede kaaꞌlitinoeta qaageemmo.”

11. Roduu Kaarli Kileeni amaale macciishshe adhate daafira mayino?

¹¹ Amaale macciishshe adhasi kaaꞌlitinosihu wolu, Aliidi Bisi miila ikke soqqaminoho Rodoo Kaarli Kileeniiti. Isi heeshshosi xaggera, muli jaalisi Roduu Raazerfordi mitte yannara kaajjishe amaalinosita kulino. Roduu Kileeni umi qara amaale koffi assitinosita coyiꞌrino. Isi togo yiino: “Wole woyite Roduu Raazerfordi ‘Keereho Kaarli?’ yiinoe. Ani kayinni koffi yee noommo daafira sheshifate keereholla yoommo. Hakkiinni, ‘Kaarli qorophi! Daawuloosi hordofanni noohena!’ yiinoe. Saalfatoommohu mitu, ‘Rodoo Raazerfordi koffi diyoommowe’ yoommo. Isi koffi yee noommota afino daafira, ‘Maahoyyena qorophi; Daawuloosi hordofanni noohena’ yee lede qorowisiisinoe. Isi yiinori garaho! Mittu rodii amaalannonke woyite hakko iso hatto assate qoosso noosi rodii amaalannonke woyite koffi yine keeshsha Daawuloosira faro fanate.”c (Efe. 4:25-27) Roduu Kileeni, Roduu Raazerfordi amaalinosi amaale macciishshe adhino; hattono insa jaaloominsa baikkinni heedhino.

AMAALE MACCIISHSHINE ADHATE KAAꞌLANNONKERI MAATI?

12. Umonke heeshshi assa amaale macciishshine adhate kaaꞌlitannonkehu hiittoonniiti? (Lawishsha 27:6)

¹² Amaale macciishshine adhate kaaꞌlannonkeri maati? Guuntete xeꞌne noonkere ikkinoommotanna mito woyite mito coye gowwimmatenni assinammora dandiineemmota qaange umonke heeshshi assa hasiissannonke. Aleenni laꞌnummonte gede Iyyoobira gara ikkitinokki lao noosi. Ikkirono isi gedensoonni hedosi biddi assiꞌrino; Yihowano tennera maassiꞌrinosi. Mayira? Korkaatuno Iyyoobi umosi heeshshi assanno manchooti. Iyyoobi, diro Eelihu lowo geeshsha roorannoha ikkirono, Eelihu amaalinosi amaale macciishshe adhe umosi heeshshi assannoha ikkinota leellishino. (Iyo. 32:6, 7) Hatteente gede umonke heeshshi assanke, amaale hasiissannonkekkiha lawinkerono woy amaalinonke manchi diro ninkenni ajannoha ikkirono amaale macciishshine adhate kaaꞌlitannonke. Kanaadaho heeꞌrannohu mittu cimeessi togo yiino: “Ninkeneeto wolootu laꞌannonke garinni layiꞌra dandiineemmokki daafira, wolootu amaala hooggunkero woyyeessiꞌra hasiissannonkere woyyeessiꞌra didandiineemmo.” Ninke baalunku albinni roore ayyaanu gumi laalo laalanna dancha duduwo sabbakatenna rosiisate dandoonke woyyeessiꞌra hasiissannonke.—Lawishsha 27:6 nabbawi.

13. Amaallanninke amaale ma garinni laꞌꞌa hasiissannonke?

¹³ Amaale Maganu baxannoꞌneta leellishanno doogo gede assitine laꞌe. Yihowa ninkera woyyannore malanno. (Law. 4:20-22) Isi Qaalisi, Qullaawu Maxaafi aana xintantino borro widoonni woy ayyaanaamittetenni gikki yiino rodii widoonni amaalannonke woyite baxannonketa leellishanni noonke. Ibiraawoota 12:9, 10 isi tenne assannohu “ninkera seyara yee” ikkinota kultanno.

14. Amaallanninke woyite maa illachisha hasiissannonke?

¹⁴ Amaallanniꞌne gara ikkikkinni amaale illachishshe. Mito woyite, amaalloonninke gari didanchaho yine hendeemmoha ikkara dandaanno. Hige amaalanno manchino amaale macciishshe adha qarra ikkitannokki garinni amaalate woꞌnaala hasiissannosi.d (Gal. 6:1) Mittu manchi amaalinonke gari baxisa hooginkero nafa amaale illachisha hasiissannonke. Ninkeneeto togo yine xaꞌma dandiineemmo: ‘Amaalloonnie gari baxisa hoogiero nafa amaaletenni afiꞌreemmo rosi no? Amaalie manchi soꞌro agure amaale illachisha dandeemmo?’ Amaallanninke amaale baalantenni horo afiꞌrate woꞌnaala hayyote.—Law. 15:31.

AMAALE XAꞌMIDHINE HORO AFIDHE

15. Amaale xaꞌmiꞌra hasiissannonkehu mayiraati?

¹⁵ Qullaawu Maxaafi amaale xaꞌmiꞌneemmo gede jawaachishannonke. Lawishsha 13:10 “Amaallannire adhitannori [“amaale xaꞌmidhannori,” NW] egennaammaho” yitanno. Tini halaaleho! Amaallansa geeshsha agadhantenni uminsanni amaale xaꞌmidhannori duucha woyite, amaale xaꞌmidhannokkirinni roore ayyaanaamittetenni rakke lophitanno. Hakko daafira uminkenni kaꞌne amaale xaꞌmiꞌra hasiissannonke.

16. Amaale xaꞌmiꞌneemmohu hiittoo woyite ikkara dandaanno?

¹⁶ Ammanate roduuwanke amaale xaꞌmiꞌneemmohu hiittoo woyite ikkara dandaanno? Hanni mito lawishsha laꞌno. (1) Mitte rodoo woꞌnaalshu nooseta wole halashshaancho ledose Qullaawa Maxaafa xiinxallissara koyisse, rosiisate dandoose woyyeessidhanno gara afate hatte rodoo amaale xaꞌmiꞌra dandiitanno. (2) Mitte mine assidhinokki rodoo uddidhanno uduunne hidhate heddanno woyite doodhitino uduunni daafira mitte ayyaanaamittetenni gikki yitino rodoo amaaꞌla dandiitanno. (3) Mittu rodii mite yee lallawo shiqishanno gede kullisiro, mittu lallawo shiqishate woꞌnaalshu noosi rodii, lallawo shiqishanno woyite seekke macciishshe mito woyyeessiꞌranno coye kulannosi gede amaale xaꞌmiꞌra dandaanno. Lowo diro lallawo shiqishanni keeshshino rodii nafa lallawo shiqishate woꞌnaalshu noonsa roduuwa amaale xaꞌmiꞌranna amaaltinosi amaale loosu aana hosiisa dandaanno.

17. Amaale kaaꞌlitannonkehu hiittoonniiti?

¹⁷ Ninke baalanka dagganno lamalara woy agannara xaaddotenni woy wolu garinni amaallankera dandiinanni. Hattoo woyite konni birxichira ronsummore qaango. Umonke heeshshi assa agurroonke. Amaallanninke gara ikkikkinni amaale illachinsho. Qoleno amaallanninke amaale macciishshine adhino. Ninke giddo egennaamo ikke ilaminohu dino. Ikkollana Maganu Qaali, ‘amaale macciishshineemmohanna seejjo adhineemmoha ikkiro egennaamma ikkineemmota’ kulanno.—Law. 19:20.