XIINXALLOTE BIRXICHO 22
Heeshshonkera Kaaꞌlitanno Hayyo
“Egenno [“hayyo,” NW] aannohu Kaaliiqaati.”—LAW. 2:6.
FAARSO 89 Macciishshite Hajajami, Maassamattona
GUULCHOa
1. Ninke baalunkura Maganu aanno hayyo hasiissannonkehu mayiraati? (Lawishsha 4:7)
MITTO lowo geeshsha hasiisanno doorsha doodhite egennoottoha ikkiro, hayyo afiꞌrate balaxxe huuccatto assiꞌroottoti dihuluullissannote; qoleno hatto assakki hasiissannote. (Yai. 1:5) Moote Selemooni “Egenno [“hayyo,” NW] woꞌmunku coyira aliidita” ikkitinota coyiꞌrino. (Lawishsha 4:7 nabbawi.) Hige Selemooni baalunku gari hayyo daafira coyiꞌranni nooha diꞌꞌikkino. Isi Maganu Yihowa aanno hayyo daafira coyiꞌranni no. (Law. 2:6, NW) Kayinni Maganu aanno hayyo xaa yannara iillannonke qarra dandiine saꞌneemmo gede kaaꞌlitannonke? Konni birxichira ronseemmonte gede ee kaaꞌlitannonke.
2. Hayyoota ikka dandiineemmo gede kaaꞌlitannonketi mitte doogo hiitteeti?
2 Hayyoota ikka dandiineemmoti mitte doogo lowo geeshsha hayyoota ikkitinori lamu manni hayyote daafira coyidhinore xiinxallatenna loosu aana hosiisate. Umo Selemooni daafira ronseemmo. Qullaawu Maxaafi, “Kaaliiqi Selemoonira lowo hayyonna wodancha, hattonni gawalo nookki egenno uyinosi” yaanno. (1 Mot. 4:29) Layinkihunni Yesuusi daafira laꞌneemmo; isira taalle nookki hayyo noosi. (Mat. 12:42) Yesuusi daafira togo yine masaalloonni: “Kaaliiqi Ayyaani isi aana fooliishshiꞌranno; hayyotenna wodanchate Ayyaani . . . isi aana heeꞌranno.”—Isa. 11:2.
3. Konni birxichira maa ronseemmo?
3 Selemooninna Yesuusi Maganu uyinonsa hayyonni, ninke baalunkura lowo geeshsha kaaꞌlitanno amaale kultinonke. Konni birxichira tenne amaale giddonni sase laꞌneemmo: Insano woxeho, maalaamittete loosiranna uminke daafira gara ikkitino lao heedhannonke gede assiꞌrate.
WOXEHO GARA IKKITINO LAO HEEDHANNONKE GEDE ASSIꞌRA
4. Selemoonira noosihu maalaamittete coyi Yesuusira noosihunni baxxannohu ma garinniiti?
4 Selemooni hoqino dureessaatinna qawaaxxaame heeshsho heeꞌrannoho. (1 Mot. 10:7, 14, 15) Yesuusira kayi garihu maalaamittete coyi dinosi; isira umisi mini nafa dinosi. (Mat. 8:20) Ikkirono insa hayyo afidhinohu Maganu Yihowawiinni ikkino daafira, lamunkura maalaamittete coyira gara ikkitino lao noonsa.
5. Selemoonira woxeho hiittoo lao noosi?
5 Selemooni ‘woxu caalu gede’ ikkinota afino. (Ros. 7:12) Woxu heeꞌrinkero heeshshote hasiisannorenna mito hasiꞌnoommo coye afiꞌnammora dandiineemmo. Selemooni dureessa ikkirono woxe roorannori noota huwatino. Isi, “Lowo jironni danchu suꞌmi woyyanno” yee borreessino. (Law. 22:1) Qoleno Selemooni woxe baxanno manni duuchanka woyite hagiirraamo ikkannokkita wodanchino. (Ros. 5:10, 12) Qoleno Selemooni noonke woxi ikki geeshshihano ikkiro mulenni goofara dandaanno daafira, woꞌmunni woꞌma woxe addaxxineemmokki gede qorowisiisino.—Law. 23:4, 5.
Maalaamittete coyi daafira noonke lao Maganu Mangiste balaxisiinseemmokki gede ataawe ikkitanni noonke? (Gufo 6-7 lai)d
6. Yesuusira maalaamittete coyira hiittoo lao noosi? (Maatewoosi 6:31-33)
6 Yesuusira maalaamittete coyira gara ikkitino lao noosi. Isi itatenninna agatenni hagiidhino. (Luq. 19:2, 6, 7) Isi mitte yannara umi maalale loosi woyite waa dancha woyinete xajjera qole soorrino. (Yoh. 2:10, 11) Qoleno isi reyi barra lowo waagi uddano uddiꞌre no. (Yoh. 19:23, 24) Ikkirono Yesuusi maalaamittete coye dibalaxisiisino. Isi harunsaanosira togo yiino: “Mittu manchi lamu Mootichira soqqama didandaanno. . . . Maganohonna woxeho borojjicho ikka didandaanno.” (Mat. 6:24) Yesuusi, Maganu Mangiste balaxisiinseemmoha ikkiro, Yihowa hasiisannonkere wonshannonketa rosiisino.—Maatewoosi 6:31-33 nabbawi.
7. Mittu rodii woxeho gara ikkitiwo lao heedhawosi gede assiꞌrasi kaaꞌlitinosihu hiittoonniiti?
7 Batinye roduuwa Yihowa woxu daafira uyinonke amaale harunsansa kaaꞌlitinonsa. Hanni mittu seenne adhinokkihu Daanieeli yinanni rodii woꞌnaalsha laꞌno. Isi togo yiino: “Shiimu noommo yannara heeshshoꞌya giddo ayyaanaamittete coye balaxisiisate murciꞌroommo.” Daanieeli heeshshosi bikkunnita assiꞌrino daafira, yannasinna dandoosi horoonsiꞌre batinye tiokiraasete looso loosa dandiino. Isi lede togo yiino: “Noore coyiꞌniro doodhoommo coyinni horo digaabboommo. Heeshshoꞌya giddo woxe balaxisiisoommoro lowo woxe afiꞌra dandeemmo. Kayinni woxu xa nooe jaalla afiꞌreemmo gede assa didandaanno. Qoleno woxu Maganu Mangiste balaxisiisaꞌyanni afiꞌroommo harshammo afiꞌreemmo gede assa didandaanno. Yihowa uyinoe atooti aye woxinni diafiꞌnanniho.” Addanko woxe ikkikkinni ayyaanaamittete coye illachisha kaaꞌlitannonke.
MAALAAMITTETE LOOSIRA GARA IKKITINO LAO HEEDHANNONKE GEDE ASSIꞌRA
8. Selemoonira loosoho gara ikkitino lao noosita mayinni anfeemmo? (Rosiisaancho 5:18, 19)
8 Selemooni diinaggaambe loonse afiꞌnanni hagiirri “Maganu uyino elto” ikkinota coyiꞌrino. (Rosiisaancho 5:18, 19 nabbawi.) Isi, “Diinaggaambe loosiꞌra qiniite uyitanno” yee borreessino. (Law. 14:23) Selemooni coyiꞌrinori adda ikkinota afino. Isi diinaggaawe loosannoho! Selemooni minna miꞌnino, woyinenna caalu haqqe kaasiꞌrino hattono wayi eelanno kofammano uꞌmino. Qoleno isi katamma miꞌnino. (1 Mot. 9:19; Ros. 2:4-6) Selemooni konni garinni diinaggaawe loosasi mito geeshsha hagiidhanno gede assitinositi dihuluullissannote. Kayinni Selemooni togoo loosi calla addu hagiirre afiꞌranno gede assannosikkita afino. Isi batinye ayyaanaamittete coyeno assino. Lawishshaho isi Yihowa magansiꞌnanniha biifado qullaawa mine minsiisino; konne mine minne gundoonnihu lamalu dirinniiti! (1 Mot. 6:38; 9:1) Selemooni baalanka looso yaano maalaamittete loosonna ayyaanaamittete looso loosihu gedensaanni, roore hasiisannohu ayyaanaamittete looso ikkinota huwatino. Isi togo yee borreessino: “Coyi baalunku gumulo kuneetina, macciishshino. . . . Magano ayirrisi; hajajosino agadhi.”—Ros. 12:13.
9. Yesuusi maalaamittete loosira quwa saꞌꞌannokkita leellishinohu hiittoonniiti?
9 Yesuusi diinaggaawe loosannoho. Isi uullate aana noo yannara anjesinni hanafe hanaatsimmate looso loosino. (Maq. 6:3) Annisinna amasi maatensara hasiisannore wonshate diinaggaabbe loossanna, isino kaaꞌlinonsatera hagiidhitinoti dihuluullissannote. Yesuusi guuta hanaatsicha ikkino daafira, isi loosanno uduunne mannu lowo geeshsha baxannoti dihuluullissannote! Isino loosanno looso baxinoti dihuluullissannote. Yesuusi maalaamittete looso diinaggaawe loosannoha ikkirono, ayyaanaamittete loosirano woꞌmanka woyite yanna gaaꞌmanno. (Yoh. 7:15) Isi woꞌma yanna soqqamaancho ikkino daafira gedensoonni, macciishshannosi manna togo yee amaalino: “Baꞌanno sagalera loosidhinoonte! . . . hegere heeshshotera loosidhe.” (Yoh. 6:27) Qoleno Yesuusi Ilaalu Sibikatesi yannara, “Jiroꞌne . . . gordoho duuꞌne” yiino.—Mat. 6:20.
Maalaamittetenna ayyaanaamittete loosira gara ikkitino lao heedhannonke gede assiꞌra dandiineemmohu hiittoonniiti? (Gufo 10-11 lai)e
10. Maalaamittete looso diinaggaabbe loossannori mitu roduuwira mayi fonqolo ikkansara dandaanno?
10 Maganu aanno hayyo maalaamittete loosira gara ikkitono lao heedhannonke gede kaaꞌlitannonke. Kiristaana ikkinoommo daafira “dancha looso” diinaggaambe loosa hasiissannonketa ronsoommo. (Efe. 4:28) Loosiisaanonke duucha woyite, ammanammoommorenna diinaggaambe loonseemmore ikkinoommota wodanchitanno; hattono loonseemmo gara naaddannota kultankera dandiitanno. Loosiisaanchinke Yihowa Farciꞌraasine naadara yine seeda saate loosa hananfeemmoha ikkara dandaanno. Ikkirono mulenni, maatenkera hasiisannore wonshanna ayyaanaamittete looso loosa lashshi assinanni heeꞌnoommota huwantammora dandiineemmo. Hatto ikkiro roore hasiisanno coye balaxisiisate mito coye biddi assiꞌra hasiissannonke.
11. Mittu rodii loosoho quwa saꞌꞌa hoogate daafira maa rosino?
11 Mittu Wiiliyaami yinanni wedellichi maalaamittete loosira quwa saꞌꞌa hooga afidhino horo wodanchino. Isi konni albaanni qaxadhe loosiisiꞌrannosihu mittu songote cimeessi daafira coyiꞌranni togo yiino: “Kuni rodii loosoho quwa saeemmokki gede dancha lawishsha ikkinoe. Isi diinaggaawe loosannoho; loosanno loosino isilancho ikkino daafira dambanyootisi ledo dancha aante noosi. Isi looso gude haꞌranno woyite loosuyire heda agure maatesinna Yihowa magansiꞌra illachishanno. Ani egennoommohu lowo geeshsha hagiirraamu manni giddo mittu isooti!”b
UMINKE DAAFIRA GARA IKKITINO LAO HEEDHANNONKE GEDE ASSIꞌRA
12. Selemooni umisira gara ikkitino lao noosita leellishinohu ma garinniiti? Gedensoonni kayi tenne leellishikki gatinohu hiittoonniiti?
12 Selemooni Yihowara ammaname soqqamanni noo yannara umisi daafira gara ikkitino lao noosiho. Isi wedellichu noo yannara assa dandaannokkiri noota huwatino; hattono Yihowa biddishsha afiꞌrate huuccatto assiꞌrino. (1 Mot. 3:7-9) Selemooni moote ikke gashsha hanafi balla naaxxa abbitanno gawajjo huwatino. Isi, “Booꞌna baote widira haadhe hadhanno; boollaqiꞌrano uwate widira qolte massitanno” yee borreessino. (Law. 16:18) Gedensoonni kayi Selemooni umisi amaalino amaale harunsikki gatino; tini dadillissannote. Isi gashsha hanafihunni boode yanna gedensaanni naaxxe Maganu biddishsha lashshi assa hanafino. Lawishshaho Maganu uyino seeri giddo mittu, Israeelicha ikkino moote “Kaaliiqiwiinni xeertisannosina lowo meento adhoonke” yaanno. (Mar. 17:17) Selemooni konne seera diige 700 meentonna 300 irkote meento adhino; insa giddo batinyu kaphu maganna magansiꞌrannoreeti! (1 Mot. 11:1-3) Selemooni tini qarra diafidhino yee hedinoha ikkara dandaanno. Kayinni isi Yihowa seera diigasi gedensaanni qarramanno gede assitinosi.—1 Mot. 11:9-13.
13. Yesuusi umosi heeshshi assannoha ikkinota kultanno xagge hiincine maa rosa dandiineemmo?
13 Yesuusi umisi daafira gara ikkitino lao heedhannosi gede assiꞌrino; hattono umosi heeshshi assannoho. Isi uullara daara albaanni iima Yihowara soqqami yannara lowoha dhagge ikkanno looso loosino. “Gordohonna baattote aana noori baalu” kalaqaminohu Yesuusi widoonniiti. (Qol. 1:16) Isi cuuami woyite Annisi ledo noo yannara loosino looso qaaginoha ikkara dandaanno. (Mat. 3:16; Yoh. 17:5) Kayinni Yesuusi tenne qaagasi naaxxanno gede diassitinosi. Isi woloota roorannohu gede asse dihedino hattono tenne leellishannore diassino. Isi rosaanosira uullara dayinohu “soqqamaranna lowo manna wode gatisate lubbosi sayise aara” ikkinnina soqqammasira dayinokkita kulinonsa. (Mat. 20:28) Qoleno isi umisinni kae mitto coyeno assannokkita kulino. (Yoh. 5:19) Yesuusi umosi heeshshi assannoho; isi ninkera kaajja lawishsha ikkinonke.
14. Uminke daafira gara ikkitono lao heedhannonke gede assiꞌrate Yesuusi lawishshinni maa ronseemmo?
14 Yesuusi harunsaanosira uminsa daafira gara ikkitino lao heedhannonsa gede rosiisinonsa. Mitte yannara isi, “Umiꞌne dananchi baalu nafa kiirreenna no” yee kulinonsa. (Mat. 10:30) Tini hedo roorenkanni ninkeneeto woffi assine laꞌneemmo woyite lowo geeshsha sheshifachishshannonkete. Togo yaa iimi Anninke ninke daafira lowo geeshsha hedanno hattono isi albaanni waagu noonke yaate. Yihowa iso magansiꞌratenna haaro alamera hegere heeshsho afiꞌrate ikkadootaho yiinkero isi hedinori digaraho yaa dihasiissannonke.
Uminke daafira gara ikkitino lao heedhannonke gede assiꞌra hooga hiikkonne atoote hoongeemmo gede assitannonke? (Gufo 15 lai)f
15. (a) Uminke daafira gara ikkitino lao heedhannonke gede assiꞌrate daafira mitte Agarooshshu Shae mayitino? (b) Qoola 24 noo misile leellishshannonte gede, uminke daafira quwa saꞌne hendeemmoha ikkiro hiikkonne atoote hoongeemmo?
15 Mitu 15 diri albaanni mitte Agarooshshu Shae uminke daafira gara ikkitino lao heedhannonke gede assiꞌrate daafira togo yitino: “Uminke daafira quwa saꞌne hende naaxxa dihasiissannonke; qoleno umonke woffi assine laꞌne yaada dihasiissannonke. Hatteentenni uminke daafira gara ikkitino lao heedhannonke gede assiꞌrate sharrama hasiissannonke; togo yaa assa dandiineemmorinna assa dandiineemmokkiri noota wodanchate yaate. Tenne daafira mitte rodoo togo yitino: ‘Ani lowo geeshsha busha mancho diꞌꞌikkoomma; baalunkunni roore dancha manchono diꞌꞌikkoomma. Baalunku manninte gede jawaanteno laanfeno nooe.’”c Uminke daafira gara ikkitino lao heedhannonke gede assiꞌra kaaꞌlitannonke gara wodanchitto?
16. Yihowa hayyo noo biddishsha aannonkehu mayiraati?
16 Yihowa Qaalisi widoonni hayyo noo biddishsha aannonke. Isi baxannonke hattono hagiirraamma ikkinammora hasiꞌranno. (Isa. 48:17, 18) Lowo geeshsha hagiidhineemmo gede assannonkehu kaajju doorshi, heeshshonke giddo Yihowa balaxisiisate. Togo assineemmoha ikkiro, quwa sae woxe, maalaamittete loosonna uminsa daafira illachishanno mannira iillannonsahu lowo qarrinni ganteemmo. Mittu mittunku hayyoota ikkatenna Yihowa wodana tashshi assate murciꞌno!—Law. 23:15.
FAARSO 94 Qaalesi Uyinonkehura Magano Galanto
a Selemooninna Yesuusi lowo geeshsha hayyootaho. Tenne hayyo uyinonsahu Magano Yihowaati. Konni birxichira Selemooninna Yesuusi qullaawu ayyaani massageennansa amaaltino amaalenni woxeho, maalaamittete loosiranna uminke daafira gara ikkitino lao heedhannonke gede assiꞌra dandiineemmo gara ronseemmo. Qoleno mitu ammanate roduuwinke Qullaawu Maxaafi giddo noo amaale harunsansa tennera kaaꞌlitinonsahu hiittoonniitiro ronseemmo.
b Ammajje 1, 2015te Agarooshshu Shaera fulinoha “Loonseemmo Loosinni Hagiidha Dandiineemmo Gara” yaanno birxicho lai.
c Woxawaajje 1, 2005 Agarooshshu Shaera (Amaaru Afoo) fulinoha “Qullaawu Maxaafi Hagiirre Afiꞌratto Gede Kaaꞌlannohe” yaanno birxicho lai.
d MISILLATE XAWISHSHA: Jooninna Toomi mitte songora heedhannoreeti wedella roduuwaati. Jooni seeda yanna sayisannohu makeenasi towaaxxanniiti. Toomi kayinni makeenisinni roduuwu soqqansho fultanno woyitenna gambooshshu hadhanno woyite haaꞌre haꞌra kaaꞌlanno.
e MISILLATE XAWISHSHA: Jooni loosu basewa loosu yanna gedensaannino loosanni no. Isi loosiisaanchosi koffi assa dihasiꞌrino. Hakko daafira loosu yanna gedensaanni assi yaannosire baala assate maahoyye yaanno. Songote soqqamaancho ikkinohu Toomi hatte hawarronni mittu songote cimeessi ledo mitte rodoo towaatanni no. Toomi balaxe loosiisaanchisira, lamalate giddo hawarro hawarro ayyaanaamittete coye assanno yanna hasiissannosita kulinosi.
f MISILLATE XAWISHSHA: Jooni umisi daafira illachishino. Toomi umisi horonni roorse ayyaanaamittete coye balaxisiisannoho; isi Jajjabbu Gambooshshi Addaraashe gatamara kaaꞌli woyite batinye dancha jaalla kalaqiꞌrino.