“Ane Ledo Gannate Eatto”

1. Yesuusi reyara shiima yannara albaanni, ledosi sutaminohura jaddo loosi manchira mayino? (Luqaasi 23:39-43)

YESUUSINNA ledosi sutantinori lamu jaddo loossinori reyitara kaꞌe lowo geeshsha qarrante no. (Luq. 23:32, 33) Lamunku ledosi sutantinori jaddo loossinori Yesuusa xontino daafira isi rosaano ikkitinokkiti egennantinote. (Mat. 27:44; Maq. 15:32) Insa giddonni mittu kayinni hedosi biddi assiꞌrino. Isi, “Mootichaꞌya! Gashshootikkinni daatto woyite qaagie” yiino. Yesuusi qole: “Halaale kuleemmohena techo, ane ledo Gannate eatto” yiinosi. (Luq. 23:43, NW) (Luqaasi 23:39-42 nabbawi.) Kuni jaddo loosino manchi Yesuusi “Gordu Gashshooti” daafira sabbaki woyite macciishshe adhinota leellishannori dino. Qoleno Yesuusi kuni manchi gordu Gashshoote ragiꞌranno horo diyiino. (Mat. 4:17) Yesuusi coyiꞌranni noohu albillitte uullate aana heedhanno Gannate daafiraati. Hatto yineemmohu mayiraati?

2. Maaro einohu jaddo loosino manchi Yihudicha ikkinota leellishannori maati?

² Maaro einohu jaddo loosino manchi Yihudicha ikkikki digatino. Kuni manchi ledosi sutaminohura, “Ati umikkira togoo yoo agarte heedheennahe Magano diwaajjatto?” yiino. (Luq. 23:40) Yihudootu mitto Magano magansidhanno; wole daga kayinni lowo maganna no yite ammantanno. (Ful. 20:2, 3; 1 Qor. 8:5, 6) Kuri jaddo loossinori Yihudoota ikka hooggoommero, jaddo loosinohu ledosi sutaminoha “maganna diwaajjatto?” yee xaꞌmannoha ikkara dandaanno. Qoleno Yesuusi dayinohu ‘Israeelete giddonni geꞌreewu gede ikke ballehino manniraati’ ikkinnina wole dagara diꞌꞌikkino. (Mat. 15:24) Maganu Israeelete mannira isi reyitinore kayisannota kulinonsa. Maaro einohu jaddo loosino manchi tenne afinoha ikkara dandaanno; qoleno isi coyiꞌrinori Yihowa Yesuusa reyotenni kayise Gashshootisira Moote assannosita afinota leellishanno. Kuni manchi Maganu isono reyotenni kayisannosita hexxinoha ikkara dandaanno.

3. Yesuusi Gannatete daafira coyiꞌrita maaro einohu jaddo loosino manchi maa qaaginoha ikkara dandaanno? Xawisi. (Kalaqama 2:15)

³ Maaro einohu jaddo loosino manchi Yihudicha ikkinoha ikkiro, isi Addaaminna Heewani daafira hattono Yihowa insa worino Gannate daafira afinoha ikkara dandaanno. Hakko daafira kuni manchi Yesuusi yii Gannate uullate aana heeꞌrannoha biifado bayicho ikkinota wodanchikki digatino.—Kalaqama 2:15 nabbawi.

4. Yesuusi jaddo loosino manchira coyiꞌrinori maa hendeemmo gede assannonke?

⁴ Yesuusi jaddo loosino manchira coyiꞌrinori Gannatete giddo heeshsho hiittoota ikkitannoro hendeemmo gede assannonke. Keeru woꞌminohu Moote Selemooni gashshooti daafira xiinxalline Gannatete daafira mitore rosa dandiineemmo. Qullaawu Maxaafi Yesuusi Selemooni roorannota kulanno; hakko daafira Yesuusinna ledosi gashshitannori uulla biifado gannate assitannota heda dandiineemmo. (Mat. 12:42) ‘Wolu geꞌreewi’ wido ikkitinori Gannatete giddo hegerera heeꞌrate ikkadoota ikkate quqquxantannoti dihuluullissannote.—Yoh. 10:16.

GANNATETE GIDDO HEESHSHO HIITTOOTA IKKITANNO?

5. Gannatete giddo heeshsho hiittoota ikkitannoha lawannohe?

⁵ Gannatete giddo heeshsho hiittoota ikkitannoro hedatto woyite maa qaagatto? Edenete kaashshu base gedeeta biifado paarke hedattoha ikkara dandaanno. (Kal. 2:7-9) Qoleno, Mikiyaasi Maganu manni daafira coyiꞌranni, ‘annu annunkunni kaasiꞌrino balasenna woyinete caali hunda fooliishshiꞌranno’ yiino masaalo qaagattoha ikkara dandaanno. (Mik. 4:3, 4) Hakkiinni saeno Qullaawu Maxaafi falakkino sagale heedhannota kulannota qaagattoha ikkara dandaanno. (Far. 72:16; Isa. 65:21, 22) Hakko daafira hanni biiffinote kaashshu base giddo xarapheessaho lowota coommitanno sagale worroonniwa noottohu gede assite hedi. Muronna daraaro tanni yite suꞌniitanno gara heda dandaatto. Maatekkinna jaallakki hattono reyotenni kaino manni gamba yee hasaawanni osoꞌlanna hedattoha ikkara dandaanno. Kuni baalu coyi mulla haaqeete halcho diꞌꞌikkino. Kuni coyi baalu uullate aana ikkannota dihuluullammeemmo. Ikkirono, Gannatete giddo hagiirsiisanno loosino heeꞌranno.

6. Gannatete giddo maa loonseemmo? (Misile lai.)

⁶ Yihowa loonseemmo loosinni hagiidhineemmo gede asse kalaqinonke. (Ros. 2:24) Roorenkanni Kiristoosihu Kumu Diri Gashshooti yannara lowo loosi heeꞌrannonke. Bayira qarra gate sainohunna reyotenni kaꞌꞌannohu lowo miliyoone ikkanno mannira, uddano, sagalenna minu hasiisannonsa. Kuri coyibba wonsha lowoho hagiirsiisanno loosooti. Addaaminna Heewani qaensa ikkitinota Edeni Gannate towaattara kulloonninsante gede, ninkeno Gannate ikkitanno uulla towaatate qoosso afiꞌneemmo. Hanni Yihowanna isi mannaho hedinore afinokkiha lowo miliyoone ikkanno manna rosiisanna Yesuusi ilamara lowo diri albaanni heedhinori ammanantino mannooti insa reyitunkunni kayise ikkinore affanno gede kaaꞌla mageeshsha hagiirsiissannoro hedi!

7. Huluullammeemmokki coyi maati? Mayira?

⁷ Albillitte Gannatete giddo heeshsho keeru woꞌminota, qawaaxxiꞌne heeꞌnannitanna qinaabbinota ikkitannota dihuluullammeemmo. Mayira? Korkaatuno Yihowa Beettisi gashshanno woyite heeshsho hiittoota ikkitannoro leellishinonke. Moote Selemooni gashshooti daafira kultanno xagge tenne leellishshanno.

MOOTE SELEMOONI GASHSHOOTI GANNATETE GIDDO HEESHSHO HIITTOOTA IKKITANNORO LEELLISHANNOHO

8. Faarso 37:10, 11, 29 noo hexxo alba woꞌmitinohu hiittoonniiti? (Tenne metseetera nooha “Nabbawaano Xaꞌmitanno Xaꞌmo” yaanno birxicho lai.)

⁸ Moote Daawiti Maganu ayyaani massageennasi, albillitte hayyichunna ammanamino moote gashshanno woyite heeshsho hiittoota ikkitannoro borreessino. (Faarso 37:10, 11, 29 nabbawi.) Duucha woyite albillitte dagganno Gannate daafira wolootaho kulleemmo woyite Faarso 37:11 nabbambeemmo. Tenne assanke garankolla; mayira yiniro, Yesuusino Ilaalu Sibikatesi yannara albillitte ikkannore kulate konni qummeeshshira noo hedo kulino. (Mat. 5:5) Ikkirono Daawiti coyiꞌrinori Moote Selemooni gashshooti yannara heeshsho hiittoota ikkitannoro leellishanno. Moote Selemooni gashshi yannara Maganu manni baxxino keere afiꞌrino; hattono ‘malawunna ado lolakkanno gobbara’ qawaaxxiꞌre heeꞌrino. Maganu togo yiino: “Wogaꞌya garinni heedhiniro . . . baattote keere eemmo; waajjishannori nookkiha goxxine galtinanni.” (Lew. 20:24; 26:3, 6) Selemooni gashshooti yannara kuni qaali woꞌmino. (1 Dud. 22:9; 29:26-28) Qoleno Yihowa bushuullu baꞌannota kule hexxo uyino. (Far. 37:10) Hakko daafira Faarso 37:10, 11, 29 noo hexxo alba woꞌmitino; qoleno albillitte woꞌmitanno.

9. Saaba mootitte Moote Selemooni gashshooti daafira mayitino?

⁹ Selemooni gashshooti yannara Israeelete manni keere afiꞌrinotanna qawaaxxiꞌre heeꞌranni noota Saaba mootitte macciishshitino. Ise tenne buuxate xeerto gobbanni kaꞌe Yerusaalame hadhino. (1 Mot. 10:1) Ise Selemooni gashshoote marte laꞌuhu gedensaanni togo yitino: “Maccaꞌyanni macciishshoommahu xa illeꞌyanni laummahu darate nafa diꞌꞌikkino. . . . Mulekki heeꞌre hayyonniha hasaawakki macciishshannohu mannikkinna ledokki gashshaano baꞌraadhinoreeti!” (1 Mot. 10:6-8) Ikkollana Selemooni gashshooti, Yihowa albillitte Beettisi Yesuusi gashshanno woyite mannaho maa assannoro leellishannoho.

10. Yesuusi Selemooni roorannohu ma garinniiti?

¹⁰ Yesuusi Selemooni baalunkurinni rooranno. Selemooni guuntete xeꞌne noosiho hattono isi gedensoonni Maganu manni buuto qarramanno gede assitanno soꞌro loosino. Yesuusi kayinni soꞌro loosannokkiho guuta Gashshaanchooti. (Luq. 1:32; Ibi. 4:14, 15) Yesuusi Sheexaanu abbinosiha buutote qarra dandee saino. Kiristoosi horo cubbo loosannokkita woy gashshanno manna gawajjannore assannokkiha ikkasi leellishino. Isi Mootenke ikkino daafira ninke baraaꞌnoommoreeti!

11. Yesuusi ledo gashshitannori ayeooti?

¹¹ Yesuusi ledo kaaꞌlante mannu ooso gashshitannorinna Yihowa uullate hedinori woꞌmanno gede assitannori 144,000 no. (Aju. 14:1-3) Kuri labballinna meenti lowo fonqoli iillinonsareeti; hattono insa uullate aana noo yannara lowo qarra dandiite saꞌino daafira qarrinke leellannonsa. Insa loossanno loosi maati?

BUURANTINORI LOOSSANNO LOOSI MAATI?

12. Yihowa 144,000 uyino loosi maati?

¹² Yesuusiranna ledosi gashshitannorira uyinoonni loosi Selemoonira uyinoonni looso lowo geeshsha rooranno. Selemooni gashshinohu boode miliyoone ikkannoho mitte gobbara calla heeꞌranno mannaati. Maganu Mangiste mootoolla ikkitannori kayinni alamete doyichora heeꞌrannoha lowo biliyoone ikkanno manna gashshitanno. Yihowa 144,000 uyino qoosso dhagge ikkitannote!

13. Yesuusi ledo gashshitannori loossannohu qaru loosi maati?

¹³ Yesuusi gede 144000 mootoollanna kakkalaano ikkite soqqantanno. (Aju. 5:10, NW) Muse Seeri yannara kakkalaano loossannohu qaru loosi, mannu fayyimmansanna Yihowa ledo noonsa jaalooma agadhe heeꞌranno gede kaaꞌlate. Muse Seeri “albillitte daara noohu danchu coyi hincilaallooti”; hakko daafira Yesuusi ledo gashshitannori Maganu manni maalaamittetenna ayyaanaamittete hasiisannonsare afiꞌranno gede kaaꞌlitanno yee heda garaho. (Ibi. 10:1) Kuri mootoollanna kakkalaano uullate aana noohu Maganu manni ledo xaaddannohu ma garinniitiro marrayi anfeemmo. Yihowa qixxeessanno qixxaawo ikkitutano ikkituro, Gannate ikkitanno uullara heeꞌranno manni hasiisannonsa biddishsha afiꞌrannota dihuluullammeemmo.—Aju. 21:3, 4.

‘WOLU GEꞌREEWI’ WIDO IKKITINORI GANNATETE HEEꞌRATE MAA ASSA HASIISSANNONSA?

14. ‘Wolu geꞌreewi’ widonna shiima hoshsha wido ikkitinori mereero noo xaadooshshi maati?

¹⁴ Yesuusi ledosi gashshitannore “shiima hoshsha” yiino. (Luq. 12:32) Isi layinki gaamono noota coyiꞌrino; isi hakkuri ‘wole geꞌreewooti’ yiino. Tini lamenti gaamo mitte hoshsha ikkitanno. (Yoh. 10:16) Xaa yannara tini lamenti gaamo mitteenni loossanni no; uulla Gannate ikkitanno yannarano mitteenni loosa diagurtanno. “Shiima hoshsha” wido ikkitinori iimira hadhanno; ‘wolu geꞌreewi’ wido ikkitinori kayinni hegerera hagiidhitanni uullate aana heedhanno. Kayinni wolu geꞌreewi wido ikkitinori Gannatete giddo heeꞌrate ikkadda ikkate xa assa hasiissannonsa coyi no.

15. (a) ‘Wolu geꞌreewi’ wido ikkitinori Kiristoosi roduuwi ledo kaaꞌlante loossannohu hiittoonniiti? (b) Xagichu mine farciꞌranni noo rodii lawishsha harunsa dandaattohu hiittoonniiti? (Misile lai.)

¹⁵ Maaro einohu jaddo loosino manchi Kiristoosi assinosirira galata qoꞌlanno faro afiꞌrikkinni reyino. ‘Wolu geꞌreewi’ wido ikkinoommori kayinni Yesuusi assinonkerira galatu noonketa leellinsheemmoti lowo faro noonke. Lawishshaho buurantino roduuwasi kaaꞌline iso banxeemmota leellisha dandiineemmo. Yesuusi yoo yaannonkehu tenne lae ikkinota coyiꞌrino. (Mat. 25:31-40) Sabbakatenna manna rosaano assate looso diinaggaambe loonse, Kiristoosi roduuwa kaaꞌla dandiineemmo. (Mat. 28:18-20) Qullaawa Maxaafa xiinxallinseemmo gede qixxeessinoonninke uduunne lawishshaho, Hegerera Hagiidhitanni Heeꞌra Dandaatto! yaanno maxaafa dancha gede horoonsiꞌneemmohu iseraati. Xa Qullaawa Maxaafa xiinxallisatto manni noohekkiha ikkiro, lowo manni Qullaawu Maxaafi xiinxallo hanafanno gede koyisate dandiittore baala assi.

16. Maganu Mangiste qansoota ikkate xa ma assa hasiissannonke?

¹⁶ Yihowa haaro alamera heeꞌrara hasiꞌranno manchi gedeeha ikkate haaro alame dagga geeshsha agara dihasiissannonke. Coyiꞌneemmorinninna assineemmorinni ammanammoommore ikkine hattono bikku heeshsho heeꞌne xaanni sharrama dandiineemmo. Qoleno Yihowara, galtenkeranna ammanate roduuwinkera ammanammoommore ikka dandiineemmo. Xa tenne busha alame giddo heeꞌne Yihowara hajajammummoro, Gannatete giddo isira hajajama qarra diꞌꞌikkitannonke. Qoleno hakkiicho heeꞌrate qixxaambanni heeꞌnoommota leellishate xa dandoonkenna akattanke woyyeessiꞌra dandiineemmo. Tenne metseetera nooha “‘Baatto Ragiꞌrate’ Qixxaawootto?” yaanno birxicho lai.

17. Alba loonsoommo soꞌro qaanganni ninkeneeto bushiisha hasiissannonke? Xawisi.

¹⁷ Qoleno alba loonsoommohu lowo cubbinni kainohunni ninkeneeto bushiisha agurate sharrama hasiissannonke. Ikkirono, Yesuusiti wodote kakkalo noo daafira “anfanni heeꞌnenni cubbo loonsummoro” qarru dino yine heda dihasiissannonke. (Ibi. 10:26-31) Kayinni loonsoommohu lowo cubbira addinta maaro eꞌnummoro, Yihowa qixxeessino qixxaawo horoonsiꞌnummoronna akatanke biddi assiꞌnummoro isi woꞌmunni woꞌma gatona yaannonketa addaxxa dandiineemmo. (Isa. 55:7; Soq. 3:19) Yesuusi Farisichaho “Ani cubbaataamma ikkinnina, keeraano woshshammora didayommo” yiinota qaagi. (Mat. 9:13) Wodote kakkalo cubbonke baala diwate wolqa afidhinote.

GANNATETE HEGERERA HEEꞌRA DANDAATTO

18. Yesuusi ledo sutaminohu jaddo loosino manchi ledo maa hasaawa baxatto?

¹⁸ Hanni Gannatete giddo, Yesuusi ledo hasaawinohu jaddo loosino manchi ledo hasaabbanni noottohu gede assite hedi. Lamunku Yesuusi kakkalora galatu nooꞌneta hasaabbinanniti dihuluullissannote. Yesuusi reyara albaanni noote shiima saate giddo mayi ikkinoronna Yesuusi xaꞌmosira dawaro qolisita mayi macciishshaminosiro xaꞌmattoha ikkara dandaanno. Isi kayinni Sheexaanunnite busha alame goofimarchi yanna giddo heeꞌra maa labbannoro xaꞌmahera dandaanno. Konni manchi gedee mannira Maganu Qaale xiinxallisa lowo qoossooti!—Efe. 4:22-24.

19. Gannatete heeꞌra ceeꞌmishshannokkihu mayiraati? (Aaniidi qoolira noo misile lai.)

¹⁹ Gannatete giddo heeꞌra horo diceeꞌmishshanno. Woꞌmanka woyite danchu manninni xaandeemmo hattono hagiirsiisanno loosi heeꞌranno. Baalunkunni roore, barru barrunkunni iimi Anninke daafira roore anfanni haꞌneemmo; hattono isi qixxeessinonkerinni hagiidhineemmo. Isi daafira ronseemmori horo digoofanno hattono kalaqinori daafira lowore ronseemmo. Lowo yanna heeꞌnummo kiiro Maganoho noonke baxillino lexxanni haꞌranno. Yihowanna Yesuusi Gannatete hegerera heeꞌrate hexxo uyitinonke daafira lowo geeshsha galaxxineemmonsa!