‘Yahi Buwani’ Xoannokki Gede Asse

1. Qullaawu Maxaafi addu baxilli daafira mayyaanno?

“BAXILLU giirate gede buwanno; baxillu Kaaliiqi buwanooti. Wayi batinyi baxillu giira xoyissa didandaanno; lolahuno fee haaꞌre haꞌra didandaanno.”b (Farf. 8:6, 7) Tini addu baxille dancha gede assite xawissanno hedooti! Tini hedo minaannanna minaama lowo geeshsha jawaachishshanno: Mimmitoho nooꞌne baxilli geedonniha ikkara dandaanno.

2. Minaanninna minaama baxillinsa qiidannokki gede maa assa hasiissannonsa?

² Minaanniranna minaamara heeshshonsa diro baala geedanno baxilli heeꞌransara dandaannohu insa assa hasiissannonsare assituro callaati. Lawishshaho giira buwa agurtannokki gede haqqe wora hasiissanno; haqqe wora agurriro kayinni sunu sununni xoꞌe baꞌanno. Hatteente gede minaanninna minaama mereero noo baxilli kaajje heeꞌrannohu insa mereeronsa noo jaalooma kaajjishidhuro callaati. Minaanniranna minaamara roorenkanni angate anje amaddannonsa woyite, dhibbu waadannonsa woyite woy ooso lossiꞌra qarra ikkitannonsa woyite baxillinsa qiidara dandaanno. Ikkina adhantinoonnire ikkitiniro mereeroꞌne noohu ‘Kaaliiqi buwani’ xoannokki gede assiꞌra dandiitinannihu hiittoonniiti? Konni birxichira, mereeroꞌne noo baxilli kaajje heeꞌranno gedenna adhamaꞌne hagiirru noota ikkitanno gede assiꞌra dandiitinannita sase doogga laꞌneemmo.c

WOꞌMANKA WOYITE YIHOWA LEDO NOOꞌNE JAALOOMA KAAJJISHIDHE

3. Minaanninna minaama Yihowa ledo noonsa jaalooma kaajjishiꞌransa baxillinsa qiidannokki gede kaaꞌlitannonsahu hiittoonniiti? (Rosiisaancho 4:12) (Misileno lai.)

³ ‘Kaaliiqi buwani’ xoannokki gede assiꞌrate minaanninna minaama Yihowa ledo noonsa jaalooma kaajjishiꞌrate sharrama hasiissannonsa. Hatto assansa kaaꞌlitannonsahu ma garinniiti? Minaanninna minaama iimi Anninsa ledo noonsa jaalooma lowori gede assite laꞌannoha ikkiro, isi aannonsa biddishsha quqquxante harunsitanno; hatto assansa mereeronsa noo baxilli qiidanno gede assara dandaanno qarra hooꞌlatenna qeele saꞌꞌate kaaꞌlitannonsa. (Rosiisaancho 4:12 nabbawi.) Ayyaanaamittetenni gikki yiino Kiristaani Yihowa lawishsha harunsatenna Yihowa akatta lawishshaho danchumma, cincanna maaro leellishate sharramanno. (Efe. 4:32–5:1) Togoo akatta noonsa minaanninna minaamara baxillinsa lexxanno gede assiꞌra qarra diꞌꞌikkitannonsa. Mine assidhunkunni 25 diro saꞌꞌannoseti Liina yinanni rodoo, “Ayyaanaamittetenni gikki yiino mancho baxanna ayirrisa qarra diꞌꞌikkitanno” yitino.

4. Yihowa albillitte buuramanno Mootera annanna ama ikkanno gede Yooseefinna Maariyaami doorinohu mayiraati?

⁴ Hanni mitto Qullaawu Maxaafi lawishsha laꞌno. Yihowa albillitte buuramanno Mootera annanna ama ikkanno gede batinyu Daawiti sirchi giddonni Yooseefinna Maariyaami doorino. Mayira? Insara Yihowa ledo kaajju jaaloomi noonsa; qoleno Yihowa insa isi fajjo wonsha balaxisiissannota afino. Minaannuwanna minaamuwa, kiꞌne Yooseefinna Maariyaami lawishshinni maa rosa dandiitinanni?

5. Minaannuwu Yooseefi lawishshinni maa rosa dandiitanno?

⁵ Yooseefi Yihowa biddishsha harunsate maahoyye yiino; tini qolte dancha minaanna ikkanno gede assitinosi. Ajayi ajeenna sase hige Yihowa Yooseefira maatesi daafira biddishsha uyinosi. Lowore biddi assiꞌra hasiissannosiha ikkirono, Yooseefi sasente yannara Yihowara bayichonko hajajamino. (Mat. 1:20, 24; 2:13-15, 19-21) Yooseefi Yihowa biddishsha harunse Maariyaami agarinose, kaaꞌlinose hattono towaatinose. Yooseefi assinori Maariyaami iso mageeshshi geeshsha baxxannonna ayirrissanno gede assinosero hanni hedi! Minaannuwa, maateꞌne towaaxxate Qullaawu Maxaafi amaale harunsitine kiꞌneno Yooseefi lawishsha harunsa dandiitinanni.d Biddi assiꞌra hasiissannoꞌneri heeꞌriro nafa tenne amaale harunsitiniro, minaamaꞌne baxxinannita leellishshinanni; hattono adhamaꞌne kaajjitanno. Mine assidhunkunni 20 diro saꞌꞌannoseti Vaaniwaatu yinanniwa heedhanno rodoo togo yitino: “Minaanniꞌya Yihowa biddishsha hasiꞌrannonna loosu aana hosiisanno woyite albinni roore ayirriseemmasi. Iso addaxxeemmasi hattono danchare assannota dihuluullameemma.”

6. Minaamuwu Maariyaami lawishshinni maa rosa dandaanno?

⁶ Maariyaamira Yihowa ledo kaajju jaaloomi noose; ise umisenni ammanase kaajjado ikkite heedhanno gede assidhino. Qoleno ise Qullaawa Borro seekkite affino.e (Luq. 1:46) Hattono hiincate yanna gaaꞌmitino. (Luq. 2:19, 51) Maariyaami ayyaanaamittetenni worba ikkase dancha minaama ikkitanno gede assitinoseti dihuluullissannote. Xaa yannara noori batinyu minaamuwi Maariyaami assitinore assate sharramanno. Lawishshaho Emiko yinanni rodoo togo yitino: “Mine assiꞌrammara albaanni ayyaanaamittete coye ganye asseemmati umiꞌya pirogiraame nooe. Mine assiꞌrummahu gedensaanni kayinni huuccatto assannohunna maatete magansiꞌra massagannohu minaannaꞌyaati; hakko daafira xaate kuri coyibba assannoehu iso ikkinota wodanchoomma. Konnira Yihowa ledo nooe jaaloomi kaajjanno gede assiꞌrate umiꞌya duha duqqa hasiissannoeta huwatoomma. Hakko daafira callaꞌya Maganiꞌya ledo yanna sayisate yaano huuccatto assiꞌrate, Qullaawa Maxaafa nabbawatenna Yihowa daafira hiincate yanna gaaꞌmoomma.” (Gal. 6:5) Minaamuwa, woꞌmanka woyite Yihowa ledo nooꞌne jaalooma kaajjishidhinanniha ikkiro, minaanniꞌne albinni roore guwisannoꞌne hattono baxannoꞌne.—Law. 31:30.

7. Minaannuwunna minaamuwu Yihowa mitteenni magansiꞌrate daafira Yooseefinna Maariyaami lawishshinni maa rosanno?

⁷ Yooseefinna Maariyaami Yihowa ledo noonsa jaalooma kaajjishiꞌrate mitteennino sharramino. Insa Yihowa maatete deerrinni magansiꞌra lowo geeshsha hasiissannota ikkitinota wodanchino. (Luq. 2:22-24, 41; 4:16) Roorenkanni maatensa kiiro lexxitanni hadhuta hatto assa qarra ikkitinonsaha ikkara dandaanno; kayinni insa Yihowa mitteenni magansiꞌrino. Insa xaa yannara noo minaannuwinna minaamuwira kaajja lawishsha ikkitino! Yooseefinna Maariyaami gede kiꞌnerano ooso nooꞌneha ikkiro, gambooshshe haꞌra woy maatete magansiꞌra assiꞌrate pirogiraame fushshiꞌra qarra ikkitaꞌnera dandiitanno. Kiꞌne lamunku calla nafa xiinxallate woy huuccatto assiꞌrate yanna afiꞌra qarra ikkitaꞌnera dandiitanno. Ikkirono Yihowa mitteenni magansidhinanni woyite isiwanna mimmitiꞌnewa albinni roore shiqqinannita qaagge. Hakko daafira Yihowa magansiꞌra balaxisiisse.

8. Mereeronsa qarru kalaqamino minaanninna minaama maatete magansiꞌranni woꞌma horo afiꞌrate maa assa dandaanno?

⁸ Minaannanna minaama, mereeroꞌne qarru kalaqaminoha ikkiro maa assa dandiitinanni? Maatete magansiꞌra mitteenni assiꞌra ceeꞌmishaꞌnera dandaanno. Hatto ikkiro lamunku baxxinannihanna hagiirsiisannoꞌne coye hasaabbine hanafa dandiitinanni. Tini mimmito albinni roore baxxinanni gedenna Yihowa mitteenni magansiꞌrate hasattoꞌne lexxitanno gede assitaꞌnera dandiitanno.

MITTEENNI YANNA SAYISSE

9. Minaanninna minaama mitteenni yanna sayisa hasiissannonsahu mayiraati?

⁹ Minaannuwanna minaamuwa, mitteenni yanna sayissineno baxilliꞌne kaajje heeꞌranno gede assiꞌra dandiitinanni. Hatto assaꞌne galteꞌne hedo affinanni gede kaaꞌlitannoꞌne. (Kal. 2:24) Adhaminkunni 15 diro saꞌꞌannonsari Liiliyanna Rusilaani adhamihunni shiima yanna gedensaanni maa huwatinoro laꞌno. Liiliya togo yitino: “Hendoommo geya gari yanna mitteenni sayinsanni heeꞌnoommokkita huwantoommo. Maalaamittete loosonna mini giddo looso loonseemmo daafira hattono gedensoonni oosonke towaaxxineemmo daafira loosu batiꞌrinonke. Mitteenni yanna sayisate pirogiraame fushshiꞌneemmokkiha ikkiro mimmituwiinni xeertiꞌnammora dandiineemmota huwantoommo.”

10. Minaanninna minaama Efesooni Sokka 5:15, 16 nooha xintu seera loosu aana hosiisa dandaannohu hiittoonniiti?

¹⁰ Minaanninna minaama mitteenni sayisanno yanna afiꞌrate maa assa dandaanno? Mitteenni yanna sayisate pirogiraame fushshiꞌra hasiissannonsaha ikkara dandaanno. (Efesooni Sokka 5:15, 16 nabbawi.) Nayijeeriyaho heeꞌrannohu Uzondu yinanni rodii togo yiino: “Pirogiraame fushshiꞌreemmo woyite anninna minaamaꞌya mitteenni sayinseemmo yannano borreessiꞌreemmo; qoleno ise ledo sayiseemmo yannara wolere diasseemmo.” (Fil. 1:10) Hanni Moldoovaho heeꞌrannohu woradu aliidi laꞌꞌaanchi minaama Anesteesiya yannase danchu garinni horoonsidhannohu hiittoonniitiro laꞌno. Ise togo yitino: “Minaanniꞌyara loosu batiꞌrannosi woyite ani loosa hasiissannoe looso loosate woꞌnaaleemma. Konni garinni gedensaanni mitteenni sayinseemmo yanna afiꞌra dandiineemmo.” Kayinni mitteenni sayissinanni yanna afiꞌra qarra ikkitannoꞌnehalla ikki?

11. Aqiilanna Phirisqilla mitteenni maa maa assino?

¹¹ Minaannuwunna minaamuwu Aqiilanna Phirisqilla lawishshinni rosa dandaanno; hundi waro heeꞌrinohu batinyu Kiristaani insa lowo geeshsha baxanno. (Rom. 16:3, 4) Qullaawu Maxaafi insa adhama daafira mitto mittonka coye kulannokkiha ikkirono, insa loosonsa loosiꞌrate, sabbakatenna woloota kaaꞌlate mitteenni loosinota kulanno. (Soq. 18:2, 3, 24-26) Isinni Qullaawu Maxaafi Aqiilanna Phirisqilla daafira kulanno woyite woꞌmanka woyite lamenka mitteenni qummi assanno.

12. Minaanninna minaama albinni roore mitteenni sayisanno yanna afiꞌrate maa assa dandaanno? (Misileno lai.)

¹² Minaannuwunna minaamuwu Aqiilanna Phirisqilla lawishsha harunsa dandaannohu hiittoonniiti? Galteꞌnenna kiꞌne loosa hasiissannoꞌneha batinye looso hedde. Mito looso calluwiꞌne ikkikkinni galteꞌne ledo loosa dandiitinanni? Lawishshaho, Aqiilanna Phirisqilla mitteenni sabbakkino. Kiꞌneno ganyitine mitteenni sabbakate pirogiraame fushshiꞌra dandiitinanni? Qoleno Aqiilanna Phirisqilla mitteenni loosino. Ateranna minaamakkira mittu gari loosi nooꞌnekkiha ikkara dandaanno; ikkirono mini giddo looso mitteenni loosa dandiitinanni? (Ros. 4:9) Mitto looso mitteenni loossinanni woyite, mimmitunniwa albinni roore shiqqinanni hattono mimmitu ledo hasaabbinanni faro afidhinanni. Roobertinna Linda adhaminkunni 50 diro sainonsa. Rooberti togo yiino: “Noore coyiꞌniro boohaarranni mitteenni sayinseemmoti lowo yanna dinonke. Ikkollana ani sayinna hayishshanna minaamaꞌya mooshshitanno woyite woy ani akaakilte towaatanna ise dagge ledoꞌya loossanno woyite lowo geeshsha tashshi yaannoe. Mitteenni loosanke mimmitunniwa albinni roore gamba yineemmo gede assitinonke. Baxillinkeno lexxanni haꞌrino.”

13. Minaanninna minaama mittimmansa kaajjishiꞌrate maa assa hasiissannonsa?

¹³ Ikkollana mitteenni heeꞌraꞌne calla mittimmaꞌne kaajjishshanno yaa ikkitinokkita qaagge. Biraazilete heedhannoti mitte minaama togo yitino: “Xaa yannara loosu batiꞌrannonke daafira, mitto mine heeꞌnoommo daafira calla mitteenni yanna sayinsanni heeꞌnoommo yine hendammora dandiineemmo. Mitteenni heeꞌratenni sainore assa hasiissannonketa huwatoomma. Minaanniꞌya yaannore seekke macciishsha hasiissannoe.” Hanni Biruunonna minaamasi Teezi mimmito seekke macciishshannota leellishinohu hiittoonniitiro laꞌno. Isi togo yiino: “Mitteenni yanna sayinseemmo woyite silke kikkisa agurre hagiirsiissanno yanna sayinseemmo.”

14. Minaanninna minaama mitteenni sayisanno yanna hagiirsiissannonsakkiha ikkiro maa assa dandiitanno?

¹⁴ Ikkirono mitteenni sayissinanni yanna hagiirsiisalla hoogguꞌne? Assa baxxinanni coyi addi addiha ikkara woy mimmitoho caaccaabbinanniha ikkara dandiitinanni. Hatto ikkiro maa assa dandiitinanni? Hanni aleenni kulli giira daafira galagalle laꞌno. Giira bayichonkonni bukki yite dibubbanno. Xigiro worranni hakkiinni sunu sununni jajjabba haqqe wora hasiissanno. Hatteente gede barru baala mitteenni shiima shiima yanna sayissine hanafa dandiitinanni. Kanca assannoꞌneha ikkikkinni lamenka hagiirsiisannoꞌne coye assa deꞌinoonte. (Yai. 3:18) Shiimare assitine hanaffine baxilliꞌne lexxanno gede assiꞌra dandiitinanni.

MIMMITOꞌNE AYIRRISSE

15. Minaanninna minaama baxillinsa qiidannokki gede mimmitonsa ayirrisa lowo geeshsha hasiissannote yineemmohu mayiraati?

¹⁵ Minaanninna minaama mimmito ayirrisa lowo geeshsha hasiissannote. Mimmito ayirrisa giira wala yite bubbanno gede assitanno oksijiine gedeeti. Oksijiine hoogguro giira bayichonkonni xoꞌara dandiitanno. Hatteente gede minaanninna minaama mimmito ayirrisannokkiha ikkiro baxillinsa bayichonko qiidara dandaanno. Mimmito ayirrisate sharramanno minaanninna minaama kayinni baxillinsa kaajje heeꞌranno gede assiꞌranno. Ikkirono qaru coyi kiꞌne galteꞌne ayirrissinannihu gede assitine heda ikkikkinni galteꞌne ayirrinsannie yite hedaseeti. Peeninna Areeti adhaminkunni 25 diro saꞌꞌannonsa. Peeni togo yitino: “Lamunku mimmito ayirrinseemmo daafira mininke giddo baxillu no. Kuꞌu coyiꞌrannota kuꞌu seekke macciishshannota anfoommo daafira giddonketa mimmitoho ruxxi yinummokki hasaaphineemmo.” Ikkina galteꞌne ayirrissinannita affanno gede assate maa assa dandiitinanni? Hanni Abirihaaminna Saara lawishsha laꞌno.

16. Minaannuwu Abirihaami lawishshinni maa rosanno? (1 Pheexiroosi 3:7) (Misileno lai.)

¹⁶ Abirihaami Saara ayirrisannose. Isi Saara yitannore macciishshanno hattono hedose ayirrisanno. Mitte yannara ise Abirihaamira hanqitino hattono kalaqamino coyira nafa iso bushiishshino. Abirihaami tennera hanqe gara ikkinokkire coyiꞌrinoyya? Dicoyiꞌrino. Abirihaami Saara hajajantannotanna isi murino coyiꞌra maahoyye yite galtannota ikkitinota afino. Abirihaami ise yitinore macciishshino hattono kalaqamino qarra tirate woꞌnaalino. (Kal. 16:5, 6) Ninke tennenni maa ronseemmo? Minaannuwa, maateꞌne giddo mitto coye murate silxaane nooꞌne. (1 Qor. 11:3) Ikkirono mitto coye murtinara albaanni, hakko iso minaamaꞌne qohara dandaannore ikkiro ise amaaꞌlaꞌne baxxinanniseta leellishshanno. (1 Qor. 13:4, 5) Mito woyite minaamaꞌne caaccaabbaranna macciishshaminosere hanqite coyidhara dandiitanno. Togoo woyite ise coyidhannore seekkitine macciishshitine ayirrissinanniseta leellishshinanni? (1 Pheexiroosi 3:7 nabbawi) Anjeelanna Dimitiri adhaminkunni 30 diro meddi yaannonsa. Anjeela minaannise ayirrisannose gara coyidhanni togo yitino: “Dimitiri hanqe coyiꞌreemma woyite woy mitto coye hasaaweemma woyite woꞌmanka woyite seekke macciishshannoe. Isi lowo geeshsha caaccaaweemma woyite nafa cince macciishshannoe.”

17. Minaamuwu Saara lawishshinni maa rosanno? (1 Pheexiroosi 3:5, 6)

¹⁷ Saara Abirihaami murino coyira maahoyye yite iso ayirrissannota leellishshino. (Kal. 12:5) Mitte yannara Abirihaami hedeweelcho dayino wosina wosinsiꞌrate kaino. Isi Saara assitannore agurte mitto jawa tima gantanno gede kulinose. (Kal. 18:6) Hakkiinni Saara bayichonkonni Abirihaami hajajinosere assitino. Minaamuwa, minaanniꞌne murino coyira maahoyye yitine Saara lawishsha harunsa dandiitinanni. Hatto assitinanni woyite adhamaꞌne kaajjitanno. (1 Pheexiroosi 3:5, 6 nabbawi.) Aleenni kullihu Dimitiri minaamasi ayirrissannosi gara kulanni togo yiino: “Anjeela muroommo coyira sumuu yitannokkiha ikkiro nafa maahoyye yaate sharrantannotera galateemmose. Ise muroommo coyi dancha guma abba hoogiro nafa hakko coye kayisse dimishshannoe.” Ayirrisannohe mancho baxa qarra diꞌꞌikkitannohe.

18. Baxillinsa baꞌꞌannokki gede assiꞌra minaannanna minaama kaaꞌlitannonsahu hiittoonniiti?

¹⁸ Xaa yannara Sheexaanu Kiristaana ikkino minaanninna minaama mereero noo baxille huna hasiꞌranno. Isi minaanninna minaama mimmito baxa aguriro Yihowawiinni xeertiꞌrara dandaannota afino. Ikkirono addu baxilli baꞌꞌara didandaanno! Hakko daafira mereeroꞌne noo baxilli Faarso Roore Faarso giddo noo baxilli gedeeha ikkanno gede assidhe. Heeshshoꞌne giddo Yihowa balaxisiisate, mitteenni yanna sayisatenna mimmito ayirrisate murcidhe. Hatto assitiniro adhamaꞌne addu baxilli Buicho ikkinohu Yihowa ayirranno gede assitanno; hattono baxilliꞌne heeshshotenni heedhinoonni geeshsha geedonniha ikkanno.