Shesho Afiꞌrate Alba Yihowawa Higge

1. Qafadote giddo heeꞌrannohu Yihudu manni noo gara xawisi.

BAABILOONETE qafadame noohu Yihudu manni hiitto ikkinoro hanni hedi. Insa gobbansa horrinanna laꞌino. Insanna annuwansa loossino cubbinni kainohunni wole gobba haaꞌne massinoonninsa. (2 Dud. 36:15, 16, 20, 21) Baabiloonete qafadante heedhe barru dilgonsa assiꞌrate mito geeshshi wolapho afidhinoti egennantinote. (Erm. 29:4-7) Kayinni heeshsho diꞌꞌinjiitinonsa; heedhanni noo heeshshono heeꞌra hasidhinota diꞌꞌikkitino. Insa togoo heeshsho heedhanno daafira mayi macciishshaminsayya? Insa giddonni ammanaminohu mittu manchi togo yiino: “Baabilooni wayibba mule ofolline, Tsiyooni qaangummo woyite wiꞌlinoommo.” (Far. 137:1) Konni hexxo mudhinohu qafadamino mannira shesho hasiissinonsa; ikkina insa shesho afiꞌra dandiitannohu hiikkiinniiti?

2-3. (a) Yihowa qafadame heeꞌrannohu Yihudu mannira maa assinonsa? (b) Konni birxichira maa xiinxallineemmo?

² ‘Yihowa shesho baalate Maganooti.’ (2 Qor. 1:3) Isi baxillaancho Magano ikkino daafira, isiwa shiqqannore baala sheshifachisha hagiirsiissannosi. Yihowa qafadote giddo noohu mitu manni seejjo adhannotanna isiwa higannota afino. (Isa. 59:20) Hakko daafira Yihowa Yihudu manni qafadame Baabiloone haꞌrara 100 diri albaanni masaalaanchu Isayyaasi widoonni togo yee hexxote qaale uyino: “Mannaꞌya jawaachishshe! Mannaꞌya jawaachishshe!” (Isa. 40:1) Addanko, masaalaanchu borreessino sokka widoonni Yihowa qafadame noohu Yihudu mannira hasiissannonsa jawaante uyinonsa.

³ Qafadote giddo noohu Yihudu manninte gede ninkerano yannate kiiro jawaante hasiissannonke. Konni birxichira Yihowa qafadote giddo noo mannasi jawaachishinota sase doogga laꞌneemmo: (1) Isi maaro eꞌinore gatona yaannota kule qaale eino, (2) mannisira hexxo uyino, hattono (3) waajjitannokki gede kaaꞌlinonsa. Tenne hedo xiinxallineemmo woyite, Yihowa xaa yannara ninkeno sheshifachishannonkehu hiittoonniitiro wodanchate woꞌnaalle.

YIHOWA SHAQQILLUNNI GATONA YAANNONKE

4. Yihowa maaranno Magano ikkinota leellishinohu hiittoonniiti? (Isayaasi 55:7)

⁴ Yihowa ‘mararrote Annaati.’ (2 Qor. 1:3) Isi maaro einoha qafadotenni higinoha Yihudu manna maarannota kule qaale ei yannara konne akata leellishino. (Isayaasi 55:7 nabbawi.) Isi, “Marare hegere geeshsha baxeemmohe [“maareemmohe,” NW]” yiino. (Isa. 54:8) Yihowa maarosi leellishinohu hiittoonniiti? Yihudu manni qarramanni noohu loosino soꞌronni kainohunni ikkirono, Yihowa insa hegerera Baabiloonete giddo heedhannokkita kule qaale eino. Insa Baabiloonete qafado giddo heedhannohu boode yanna geeshsha callaati. (Isa. 40:2) Tini, maaro einoha Yihudu manna lowo geeshsha sheshifachishshinoti dihuluullissannote!

5. Yihowa maarannonketa Yihudu manninni roore addaxxineemmo gede assannonkeri maati?

⁵ Maa ronseemmo? Yihowa soqqamaanosi cubbo woꞌmunni woꞌma gatona yaate qixxaawinoho. Xaa yannara ninkera, Yihowa cubbonke gatona yaannota Yihudu manninni roore woꞌmunni woꞌma addaxxineemmo gede assanno korkaati noonke. Hatto yineemmohu mayiraati? Ninke Yihowa cubbonke gatona yaate maa qixxeessinoro anfoommo. Isayyaasi masaalo coyiꞌrihunni lowo xibbi diri gedensaanni, Yihowa cubbo loosse maaro eꞌannorira baalaho wodo ikkanno gede baxanno Beettosi uullara soyino. Tini kakkalo cubbinke woꞌmunni woꞌma ‘feyamamanno’ gede assitanno. (Soq. 3:19; Isa. 1:18; Efe. 1:7) Addanko, soqqammeemmosi Magani Yihowa maarote Maganooti!

6. Yihowa maaro illachisha kaaꞌlitannonkehu hiittoonniiti? (Misileno lai.)

⁶ Loonsoommo soꞌronni kainohunni ninkeneeto bushiinshanni heeꞌnoommoha ikkiro, Yihowa ayyaanisinni borreessiisinohu Isayyaasi 55:7 noo qaali sheshifachishannonke. Ninke giddo mitu maaro eꞌnoommoha ikkirono, alba loonsoommo soꞌrora ninkeneeto bushiisha agura qarra ikkitinonkeha ikkara dandaanno. Roorenkanni alba loonsoommo soꞌronni kainohunni qarru iillanni noonkeha ikkiro ninkeneeto bushiinshammora dandiineemmo. Ikkirono, loonsoommo cubbo kulloommohanna heeshshonke biddi assiꞌnoommoha ikkiro Yihowa gatona yiinonketa addaxxa dandiineemmo. Yihowa cubbonke gatona yiinkehu gedensaanni qaaga dihasiꞌranno. (Ermiyaasi 31:34 ledo heewisiisi.) Hakko daafira Yihowa alba loonsoommo cubbo qaagannokkiha ikkiro ninkeno qaaga dihasiissannonke. Yihowa illachishannohu xa loonsanni heeꞌnoommoreeti ikkinnina alba loonsoommo cubbo diꞌꞌikkino. (Hiz. 33:14-16) Qoleno muli yanna giddo mararrote Anninke Yihowa loonsoommo soꞌro abbitino qarrinni keere fushshannonke.

7. Cubbo loonse maanxoommoha ikkiro songote cimeeyyera kulleemmo gede kakkayisannonkeri maati?

⁷ Jawa cubbo loonse maanxoommo daafira tiiꞌꞌinke bushiishanni noonkeha ikkiro ma assa hasiissannonke? Qullaawu Maxaafi cimeeyye kaaꞌlo xaꞌmiꞌneemmo gede jawaachishannonke. (Yai. 5:14, 15) Kayinni loonsoommo cubbo kula shota ikka hooggankera dandiitanno. Ikkirono maaro eꞌneemmohanna Yihowanna isi shoominori kuri ammanantino labballi shaqqillunni gatona yitannonketa qaangeemmoha ikkiro insa shinqe hasaawisa qarra diꞌꞌikkitannonke. Hanni Yihowa maaro Arteria yinanni rodoo sheshifachishshinosi gara laꞌno; iso tiiꞌꞌisi lowo geeshsha bushiishinosi. Isi togo yiino: “Mittu diri geeshsha teeda baꞌino misilla laꞌꞌanni keeshshoommo. Kayinni tiiu daafira kultanno lallawo macciishshummohu gedensaanni, loosoommo cubbo minaamaꞌyaranna songote cimeeyyera kuloommo. Hakkuyi gedensaanni fooliishsho afiꞌroommo; ikkirono loosoommo soꞌronni kainohunni xaa geeshsha baasa dadilleemmo. Songote cimeeyye, Yihowa tuge agurinoekkita qaagiissitinoe. Isi seejjannonkehu baxannonke daafiraati. Insa shaqqillunni coyidhino qaali jawaachishinoe; hattono hedoꞌya biddi assiꞌreemmo gede kaaꞌlinoe.” Xa Arteri woꞌma yanna suwisaanchonna songote soqqamaancho ikke soqqamanni no. Maaro eꞌnummoro Yihowa maarannonketa afa lowo geeshsha sheshifachishshannote!

YIHOWA HEXXO AANNONKE

8. (a) Qafadote giddo noohu Yihudu mannira Yihowa mayi hexxo uyino? (b) Isayaasi 40:29-31 kultanno garinni hexxo maaro einoha Yihudu manna kaaꞌlitannohu hiittoonniiti?

⁸ Mannu illenni laꞌniro qafadote giddo noohu Yihudu mannira hexxo nooha dilawanno. Alamennihu Wolqaataamu Baabiloonete Gashshooti qafadino manna haꞌrara horo diagurannoho. (Isa. 14:17) Ikkirono Yihowa mannisira hexxo uyino. Isi mannisira wolassannonsata kulinonsa; tenne assannokki gede hoolannosiri qole dino. (Isa. 44:26; 55:12) Baabiloonootu Yihowa albaanni bukote gedeeti. (Isa. 40:15) Uffi yiniro buko bayichonko baꞌanno. Tini hexxo qafadote giddo nooha Yihudu manna kaaꞌlitannohu hiittoonniiti? Sheshifachishshannonsa. Qoleno hakkiinni sainore assitannonsa. Isayyaasi, “Kaaliiqi kayinni iso hexxitannorira, wolqansa haaroonsanno” yee borreessino. (Isayaasi 40:29-31 nabbawi.) Addanko, hexxo insa jawaachishshannonsa; “allamurchu gede qoolunni buubbanno.”

9. Qafadote giddo noohu Yihudu manni Yihowa uyino hexxo addaxxanno gede assannonsari maati?

⁹ Yihowa qafadote giddo noohu Yihudu mannira isi uyino hexxo addaxxanno gede assannoreno kulino. Hiittoonni? Hanni hakkuyira albaanni woꞌmitino masaalo daafira hendo. Insa Asooru Israeelenniha aliyye gashshoote qeelinotanna manna qafade adhe haꞌrinota affino. (Isa. 8:4) Qoleno Baabiloonootu Yerusaalame huntinotanna hakko heeꞌranno manna qafadde adhite hadhinota affino. (Isa. 39:5-7) Moote Sedeqiyaasi ille hunnoonnitanna iso amande Baabiloone haaꞌne haꞌnoonnitano affino. (Erm. 39:7; Hiz. 12:12, 13) Yihowa balaxe kulinori baaluri woꞌmino. (Isa. 42:9; 46:10) Kuni baalunku coyi Yihudu manni Yihowa qafadotenni fushshannonsata kule uyino hexxo albinni roore ammananno gede assinonsati dihuluullissannote!

10. Tenne goofimarchu barruwa giddo hexxonke kaajjishiꞌneemmo gede kaaꞌlannonkeri maati?

¹⁰ Maa ronseemmo? Dadillineemmo woyite hexxo sheshifachishshannonke hattono wolqanke haaroonsitanno. Heeꞌnoommo yanna qarrissannote hattono wolqaataamma diinna noonke. Ikkirono hexxo mudha dihasiissannonke. Yihowa Gannate ikkitanno uullara hegerera heeꞌneemmota kule qaale einonke; hakkiicho beꞌe yinummokkinni keere heeꞌneemmo. Tini hexxo surrenkeranna wodaninkera xabbe leeltanno gede assiꞌra hasiissannonke. Hakkuyi kaꞌa, biifado uulla xurtinote masikootete hincilaallo widoonni laꞌnanni heeꞌnoommohu gede hexxonke caangitara dandiitanno. “Hincilaallote aana noo xure fiine hoola” yaano hexxonke xabbe leeltanno gede assiꞌra dandiineemmohu hiittoonniiti? Haaro alamera hiittoo heeshsho heeꞌneemmoro hedate woꞌmanka woyite yanna gaaꞌma dandiineemmo. Hexxonke daafira kultanno birxichuwa nabbawa, viidiyubba laꞌꞌanna faarso macciishsha dandiineemmo. Qoleno hexxonke woꞌmitanna laꞌꞌate quqquxammoommota huuccattotenni Yihowara kula dandiineemmo.

11. Buutote dhibbi waadannoseta mitte rodoo wolqase haarooꞌmitanno gede kaaꞌlinoseri maati?

¹¹ Hanni buutote dhibbi waadannoseta Joyi yinanni rodoo hexxo sheshifachishshinosenna jawaachishshinose gara laꞌno. Ise togo yitino: “Yaaddo waaddannoe woyite qarriꞌya leellannosita afoomma daafira giddoꞌyata gudise Yihowara hasaapheemma. Yihowano ‘mannu wolqara aleenni ikkitino wolqa’ oye huuccattoꞌyara dawaro qolinoe.” (2 Qor. 4:7) Qoleno Joyi ‘dhiwamoommo yaannoha anfannikkite’ haaro alamera noohu gede assite heddanno. (Isa. 33:24) Ninkeno giddonketa gudinse Yihowara hasaaphineemmohanna hexxonke illachinsheemmoha ikkiro wolqanke haarooꞌmitanno.

12. Yihowa uyino hexxo addaxxineemmo gede assannonkeri maati? (Misileno lai.)

¹² Yihowa qafadote giddo noohu Yihudu mannira assinte gede, ninkerano isi uyino hexxo woꞌmitannota addaxxineemmo gede assannore kulinonke. Hanni woꞌmitanna laꞌnanni heeꞌnoommo masaalo hendo. Lawishshaho, alamennihu wolqaataamu gashshooti ‘gama darate jawaata gama darate wolqiweelo’ ikkinota laꞌnanni heeꞌnoommo. (Dan. 2:42, 43) Qoleno ‘addi addi darga baatto huxidhanna’ laꞌnanni heeꞌnoommo; hattono dancha duduwo “daga baalate” farciꞌnanni heeꞌnoommo. (Mat. 24:7, 14) Tininna wole batinye masaalo albillitte woꞌmitannota sheshifachishshannota Yihowa uyino hexxo albinni roore addaxxineemmo gede assitannonke.

YIHOWA WAAJJINEEMMOKKI GEDE KAAꞌLANNONKE

13. (a) Yihudu manni qafadotenni fulanno yannara mayi fonqoli tuncu yaannonsa? (b) Isayaasi 41:10-13 kultannonte gede, Yihowa Yihudu manna sheshifachishinohu hiittoonniiti?

¹³ Yihowa qafadote giddo noohu Yihudu mannira dhagge ikkitanno hexxo oye sheshifachishinonsaha ikkirono, isi insa qafadotenni fultanno yannara qarra ikkannori tuncu yaannonsatano afino. Yihowa Yihudu manni qafadotenni fulanno yanna iillitanno woyite, mittu wolqaataamu gashshaanchi qooxeessaho noo daganna Baabiloone horrannota balaxe kulino. (Isa. 41:2-5) Yihudu manni yaada hasiissannonsayya? Yihowa balaxe mannasi, “Ani ledokki noommona waajjitooti; ani Maganokkiitina hexxo mudhitooti” yee sheshifachishinonsa. (Isayaasi 41:10-13 nabbawi.) Isi “Ani Maganokkiiti” yiinohu mayyaateeti? Yihudootu iso magansiꞌra hasiissannonsata qaagiissanni nooha diꞌꞌikkino; insa wonanni tenne assa hasiissannonsata affe no. Hatteentenni isi xaano ledonsa noota qaagiissanni noonsa.—Far. 118:6.

14. Yihowa qafadote giddo noohu Yihudu manni waajjannokki gede kaaꞌlate wolere maa assino?

¹⁴ Qoleno Yihowa qafadote giddo noohu Yihudu manni waajjannokki gede kaaꞌlate wolqasinna egennosi taalle nookkita ikkitinota qaagiissinonsa. Isi qafadote giddo noohu Yihudu manni iimira hige gordo woꞌmitino beeddahe laꞌꞌanno gede koyisino. Isi beeddahe kalaqinota calla ikkikkinni mitte mittenta suꞌmisenni woshshannotano kulinonsa. (Isa. 40:25-28) Hatto ikkiro Yihowa isira soqqamannohu mittu mittunku manchi suꞌma afinoti dihuluullissannote! Yihowara beeddahe kalaqate wolqa noosiha ikkiro mannasi kaaꞌlateno wolqa noosi. Addanko, qafadote giddo noohu Yihudu manni yaadanno woy waajjanno gede assannonsari dino.

15. Maganu qafadote giddo noohu Yihudu manni albillittete yannara qixxaawanno gede assinohu hiittoonniiti?

¹⁵ Yihowa mannasi albillitte iillannonsa coyirano qixxeessinonsa. Isi Isayyaasi maxaafi giddo dagasira togo yee kulinonsa: “Mannaꞌya, miniꞌnera eꞌine cufana cufidhe; hanqu saꞌꞌa geeshsha shiima yanna maaxamme.” (Isa. 26:20) Tini masaalo umo woꞌmitinohu Moote Qiroosi Baabiloone horre qeeli yannara ikkikki digatino. Mittu hundihu Giriikete xagge borreessaanchi, Qiroosi Baabiloone ei yannara “[olantosi] gobba affu manna baala shitanno gede hajajinota” coyiꞌrino. Hanni Baabiloonete heeꞌranno manni mageeshshi geeshsha waajjinoro hedi! Qafadote giddo noohu Yihudu manni kayinni Yihowara hajajamino daafira gatinoha ikkara dandaanno.

16. Albillittete yanna daafira quwa saꞌne yaada hasiissannonkekkihu mayiraati? (Misileno lai.)

¹⁶ Maa ronseemmo? Muli yanna giddo konni albaanni ikke egenninokkihu quuxxote qarri hanafanno. Kuni qarri hanafanno woyite alamete aana noo manni gurchaawanno hattono mase qece yaanno. Yihowa manni kayinni hatto diꞌꞌikkanno. Ninke Yihowa Maganonke ikkinota anfoommo. ‘Gatonke gambissinota anfoommo’ daafira milli miqiqqi diyineemmo. (Luq. 21:28) Buusantino daga siꞌannonke woyite nafa kaajjine uurrineemmo. Yihowa sokkaasinesi widoonni agarannonke; hattono heeshsho gatisanno biddishsha aannonke. Konne biddishsha afiꞌneemmohu ma garinniiti? Hattee marranni anfeemmo. Ikkirono togoo biddishsha uyinanninkehu songonke widoonni ikkikki digatanno. Hatte yannara songo beꞌe yinummokkinni agarooshshe afiꞌneemmo ‘minenke’ ikkitara dandiitanno. Albillittete yannara qixxaawa dandiineemmohu hiittoonniiti? Ammanate roduuwinkewa gamba yaa, tiokiraasete biddishshira hajajamate qixxaawanna Yihowa dirijjitenke massaganni noota ammana hasiissannonke.—Ibi. 10:24, 25; 13:17.

17. Shesho afiꞌrate alba Yihowawa higa dandaattohu hiittoonniiti?

¹⁷ Qafadote giddo noohu Yihudu mannira heeshsho injaa hooggunsarono, Yihowa hasiissannonsa shesho uyinonsa. Isi ninkeno sheshifachishannonke. Hakko daafira albillitte daanno coyi ikkihano ikkiro shesho afiꞌrate woꞌmanka woyite alba Yihowawa hingo. Isita batiꞌra maaro addaxxino. Hexxonke xabbe leeltanno gede assiꞌno. Yihowa Maganonke ikkino daafira waajjineemmo gede assannonkeri mitturino nookkita qaango.