Geedote Ikkanno Katama Agadhe

1. Yesuusi umi xibbi diro Yerusaalame ma ikkitanno yee masaalino?

YESUUSI KIRISTOOSI reyara shiimu barri albaanni mitte masaalo daafira tittire kulino; tini masaalo umo woꞌmitinohu Yerusaalamenna qullaawu mini bai woyiteeti. Isi mitto barra “Yerusaalame olanto doyissitinota” kule qorowisiisino. (Luq. 21:20) Yesuusi, haꞌrunsaanosi tenne Roomu olanto laꞌanno woyite bayichonkonni heedhanno qooxeessa agurte xooqqanno gede kulinonsa.—Luq. 21:21, 22.

2. Soqqamaasinchu Phaawuloosi Yihudahonna Yerusaalamete heeꞌranno Kiristaana mayyee amaalino?

² Olanto Yerusaalame doyissitara boodu dirira albaanni, soqqamaasinchu Phaawuloosi mitte kaajja sokka borreessino; tenne sokka xaa yannara Ibiraawootu maxaafa yinanni. Tenne sokkara Phaawuloosi Yihudahonna Yerusaalamete heeꞌranno Kiristaani albillitte iillannonsa coyira qixxaawe agadhanno gede kaaꞌlitannonsa amaale borreessino. Albillitte iillannonsa coyi maati? Yerusaalame baꞌanno. Kuri Kiristaani gate saꞌꞌa hasiꞌriro qaensanna loosonsa agurate qixxaawa hasiissannonsa. Konnira Phaawuloosi Yerusaalamete katama lainohunni, “Geedote ikkanno katami tenne gobbara dinonke” yee borreessino. Isi lede, “Ninke albillitte daara noo katama agadhine heeꞌnoommo” yiino.—Ibi. 13:14.

3. “Jawaata safo” afiꞌrino katami maati? Konne katama agadha hasiissannonkehu mayiraati?

³ Yerusaalamenna Yihuda agure haꞌrate murciꞌrino Kiristaana mannu mishinonsahanna qacifatinonsaha ikkara dandaanno; kayinni hatto assansa heeshshonsa gatissino. Xaa yannara ninkeno manna addaxxineemmokkihura woy tenne alamera qawaaxxaame heeshsho heeꞌrate sharrammeemmokki daafira, mannu qacifatannonke. Ikkina togoo doorsha doodhineemmohu mayiraati? Tini alame mulenni baꞌannota anfoommo. “Albillitte daara nooha” “jawaata safo” afiꞌrino katama yaano Maganu Gashshoote agadhine heeꞌnoommo.a (Ibi. 11:10; Mat. 6:33) Konni birxichira noohu mittu mittunku cinaanchu birxichira aane noore xiinxallineemmo: (1) Phaawuloosi qullaawu ayyaaninni borreessino amaale umi xibbi diro heeꞌrino Kiristaani “albillitte daara noo katama” agadhanno gede kaaꞌlitinonsahu hiittoonniiti? (2) Phaawuloosi, insa albillitte ikkanno coyira qixxeessinonsahu ma garinniiti? hattono (3) isi amaalino amaale xaa yannara kaaꞌlitannonkehu hiittoonniiti?

HORONTA AGURANNOꞌNEKKIHA YIHOWA ADDAXXE

4. Kiristaanu Yerusaalame lowo geeshsha baxannohu mayiraati?

⁴ Kiristaanu Yerusaalame lowo geeshsha baxanno. Umi xibbi diriti Kiristaanu songo 33 M.D. xintantinohu Yerusaalameteeti; qoleno aliidi bisi heeꞌrannohu hakkooti. Tenneno agurranna batinyu Kiristaanira mininsanna jironsa noohu hakko katamiraati. Ikkirono, Yesuusi haꞌrunsaanosi Yerusaalame wole agurina Yihudu katama agurte xooqqanno gede qorowisiisinonsa.—Mat. 24:16.

5. Phaawuloosi, Kiristaanu albillitte daano coyira qixxaawanno gede kaaꞌlinonsahu hiittoonniiti?

⁵ Phaawuloosi Kiristaanu albillitte daanno coyira qixxaawanno gede assate, insa Yerusaalamete katama Yihowa ma garinni laꞌꞌannoro huwattanno gede kaaꞌlinonsa. Phaawuloosi Yihowa xaate qullaawa mine, kakkalaasinenna hakko shiqqanno kakkalo qullaawu coyi gede asse laꞌꞌannokkita qaagiissinonsa. (Ibi. 8:13) Hakko katamira heeꞌrannohu rooru manni Buuraminoha giwino. Yerusaalamete noohu qullaawu mini xaate halaalu magansiꞌrara mereerima bayicho ikkasi gattanno; hattono diigame baꞌꞌanno.—Luq. 13:34, 35.

6. Phaawuloosi Ibiraawoota 13:5, 6 amaalino amaale hatte yannara Kiristaanaho hasiissannote yineemmohu mayiraati?

⁶ Phaawuloosi Ibiraawootaho sokka borreessi yannara Yerusaalame iibbado katamaati. Hatte yannara heeꞌrinohu Roomu gobba borreessaanchi Yerusaalame “Soojjaatoonni noo katamma giddo egennantinota” ikkitinota kulino. Batinye gobbuwara heeꞌrannohu Yihudu manni ayyaanna ayirrisate diru kiiro Yerusaalame haꞌranno; tini katamu lophanno gede kaaꞌlitino. Katamu lophasi mito Kiristaana kaaꞌlitinoti dihuluullissannote. Phaawuloosi insara, “Woxu baxille qorophe; nooꞌnehu ikkoꞌne!” yee borreessinohu isera ikkara dandaanno. Hakkiinni isi Qullaawa Borro giddonni huluullammannikkiha Yihowa eino qaale qummi assinonsa; Phaawuloosi, Yihowa “Horo diagureemmohe; dicallachisheemmohe” yiinota qaagiissinonsa. (Ibiraawoota 13:5, 6 nabbawi; Mar. 31:6; Far. 118:6) Yerusaalametenna Yihudaho heeꞌranno Kiristaani tenne qaaga hasiissinonsa. Mayira? Korkaatuno insa tini sokka iillitunsahunni shiima yanna gedensaanni qaensa, daddalonsanna noonsaha roore coye agurte xooqa hasiissannonsa. Hakkiinni aane iillannonsa coyeno dandiite saꞌꞌa hasiissinonsa.

7. Xaanni albinni roore Yihowa addaxxa hasiissannonkehu mayiraati?

⁷ Maa ronseemmo? Albillitte iillannonke coyi maati? Muli yanna giddo “quuxxote qarri” hanafanno; hattono tini busha alame baꞌanno. (Mat. 24:21) Umi xibbi diri Kiristaani gede, baqqi yinenna qixxaambe heeꞌra hasiissannonke. (Luq. 21:34-36) Quuxxote qarri yannara, Yihowa mannasi horo agurannokkita woꞌmunni woꞌma addaxxine noonkeha mito coye woy baalanka agurre xooqa hasiissannonkeha ikkara dandaanno. Quuxxote qarri hanafara albaanni xaa yannara nafa aye addaxxineemmoro leellinsheemmo faro noonke. Ateneeto togo yite xaꞌmi: ‘Asseemmorinna mixoꞌya jiro ikkikkinni towaatannoeta kule qaale eino Magano addaxxeemmota leellishshanno?’ (1 Xim. 6:17) Umi xibbi diro ikkinorinni roso afiꞌneemmoha ikkirono, albillitte daannohu “quuxxote qarri” horo ikke diegenninoho. Ikkina quuxxote qarri hanafanno woyite maa assineemmoro afa dandiineemmohu hiittoonniiti?

ALBISA IKKITE MASSAGGANNORIRA HAJAJAMME

8. Yesuusi rosaanosira uyino biddishshi maati?

⁸ Phaawuloosi soyinonsa sokka iillitunsahunni shiimu diri gedensaanni Kiristaanu Roomu olanto Yerusaalamete katama doyissitinota laino. Tini Yerusaalamete katami diigame baꞌꞌanno daafira, insa xooqa hasiissannonsa yanna iillitinota leellishshannote. (Mat. 24:3; Luq. 21:20, 24) Kayinni insa mamira xooqa hasiissannonsa? Yesuusi “Yihudaho noori ilaalla xooqqo” calla yiino. (Luq. 21:21) Hakko qooxeessira batinye ilaalla no. Ikkina insa hiikkonne ilaala xooqqanno?

9. Kiristaanu xooqa dandaannoti mite ilaalla hiittenneeti? (Kaartano lai.)

⁹ Hanni Kiristaanu xooqa dandaannota mite ilaalla laꞌno: Samaariyu ilaalla, Galiilu Ilaala, Hermooni ilaalla, Libaanoosi ilaallanna Yordaanoosira wole widoonni noo ilaalla. (Kaarta lai.) Tenne ilaallara nooti mite katamma beꞌe yinikkinni heeꞌnannita labbara dandiitanno. Lawishshaho Gamila yinanni katami noohu mittu seedu ilaalira ikkino daafira hakkira fula shota diꞌꞌikkitanno. Mitu Yihudu manni kuni katami marre maaxamate malinoho yee hedino. Ikkirono Gamila katamira Yihudu manninna Roomu manni olamino hattono hakko katamihu lowo manni goofino.b

10-11. (a) Yihowa biddishsha uyinohu hiittoonni ikkara dandaanno? (Ibiraawoota 13:7, 17) (b) Albisa ikkite massaggannorira hajajama Kiristaana kaaꞌlitinonsahu hiittoonniiti? (Misileno lai.)

¹⁰ Yihowa hatte yannara Kiristaana massaginohu songote albisa ikkite massaggannori widoonni ikkara dandaanno. Xaggete fullahaanchi Yuusibeesi gedensoonni togo yee borreessino: “Yerusaalamete songora heeꞌranno mannira, Maganu shoomino labballi widoonni ajuujatenni, olu hanafara albaanni heedhanno kataminni fulte Peela yinanniha Peeriyu katama hadhanno gede biddishsha uyinonsa.” Peela katami Kiristaanaho haꞌrate malinoho. Kuni katami Yerusaalametenni lowo geeshsha xeertiꞌrannokki daafira hakkiira haꞌra qarra diꞌꞌikkitanno. Peela katamira heeꞌrannohu rooru manni Ayihudete wido diꞌꞌikkino; konnira hakko heeꞌranno manni Roomu manni ledo diolamino.—Kaarta lai.

¹¹ Ilaala xooqino Kiristaani Phaawuloosi ‘Gashshite nooꞌnerira [“songote giddo albisa ikkite massaggannorira”, NW] hajajamme’ yee uyino amaale haꞌrunsino. (Ibiraawoota 13:7, 17 nabbawi.) Hakko daafira Maganu manni gatino. ‘Jawaata safo afiꞌrino katama’ yaano Maganu Gashshoote agadhitinore Yihowa tuge agurannokkita xagge leellishshanno.—Ibi. 11:10.

12-13. Yihowa lowo geeshsha qarrissanno yannara mannasi massaginohu hiittoonniiti?

¹² Maa ronseemmo? Yihowa mannisira biddishsha aate albisa ikkite soqqantannore horoonsiꞌranno. Qullaawa Borro giddo Yihowa lowo geeshsha qarrissanno yannara mannasi massagate allaalaasine kayisinota leellishannohu batinyu lawishshi no. (Mar. 31:23; Far. 77:20) Xaa yannarano Yihowa albisa ikkite soqqantannore horoonsiꞌrannota leellishshannota batinye taje laꞌnanni heeꞌnoommo.

¹³ Lawishshaho Koroonu fayya ubbu yannara, albisa ikkite soqqantannori hasiisannonke biddishsha uyitinonke. Songote cimeeyye ammanate roduuwinsara ayyaanaamittete hasattonsa wonshitanno gara kulanno biddishsha uyinoonninsa. Koroonu fayya ubbuhunni shiima yanna gedensaanni interneetete, televizhiinetenna raadoonete widoonni 500 saꞌꞌanno afiinni dhagge ikkannoha qoqqowu gambooshshe assiꞌnoommo. Hatte yannarano falakkinota ayyaanaamittete sagale afiꞌnoommo. Hakko daafira mittimmanke dibaꞌino. Albillitte iillannonke fonqoli ikkihano ikkiro, Yihowa gara ikkinore assitanno gede albisa ikkite soqqantannore kaaꞌla agurannokkita addaxxineemmo. Yihowa addaxxanna hajajamano agurranna quuxxote qarrira qixxaawatenna hattee waajjishshanno yannara hayyoota ikkinoommota leellishate wole hiitti akatta hasiissannonke?

RODIIMMATE BAXILLE LEELLISHSHE HATTONO WOSINA ADHE

14. Ibiraawoota 13:1-3 kultanno garinni Yerusaalametenna qullaawu mini bao gambissu yannara Kiristaanu hiikkuri akatta leellisha hasiissinonsa?

¹⁴ Quuxxote qarri hanafanno woyite mimmitoho albinni roore baxille leellisha hasiissannonke. Tenne assate hunda Yihudahonna Yerusaalamete heeꞌrino Kiristaani lawishsha haꞌrunsa hasiissannonke. Insa woꞌmanka woyite mimmitoho baxille leellishshino. (Ibi. 10:32-34) Kayinni Yerusaalametenna qullaawu mini bao gambissu yannara, insa albinni roore mimmitoho ‘rodiimmate baxille’ leellishanna “wosina adha” hasiissinonsa.c (Ibiraawoota 13:1-3 nabbawi.) Tenne alame goofimarchi gambise dayi kiiro ninkeno rodiimmate baxille leellisha hasiissannonke.

15. Ibiraawootu Kiristaani xooqe haꞌrihu gedensaanni rodiimmate baxille leellishanna wosina adha hasiissinonsahu mayiraati?

¹⁵ Roomu olanto Yerusaalame doyissituta Kiristaanu hedeweelcho xooqino daafira shiimare calla adhe xooqinoha ikkara dandaanno. (Mat. 24:17, 18) Insa ilaala xooqqu woyitenna marte hakko mite yite heeꞌra hanaffuhu gedensaanni mimmito kaaꞌla hasiissinonsa. Hatte yannara batinye manna ‘quuxxi’ assanno qarri amadinonsati dihuluullissannote; hakko daafira Kiristaanu rodiimmate baxille leellishanno faro afiꞌra dandaanno.—Tit. 3:14.

16. Kaaꞌlo hasiissannonsari ammanate roduuwinkera baxille leellisha dandiineemmohu hiittoonniiti? (Misileno lai.)

¹⁶ Maa ronseemmo? Baxillu kaaꞌlo hasiissannonsa woyite ammanate roduuwanke kaaꞌlineemmonsa gede kakkayisannonke. Batinyu Maganu manni, muli yannara olunninna kalaqamu danonni kainohunni qaensanni agurte xooqqino roduuwira maalaamittetenna ayyaanaamittete hasiisannonsare asse kaaꞌlate maahoyye yiino. Olunni kainohunni qaesenni agurte xooqqinoti Yukireenete heedhannoti mitte rodoo togo yitino: “Ammanate roduuwinke widoonni Yihowa anga massagganninna kaaꞌlitanni noonketa huwantoommo. Insa Yukireenete, Hangaarinna xa kowiicho Jarmanete anga fante haadhinonke hattono lowo geeshsha kaaꞌlitinonke.” Ammanate roduuwansa wosinimma adhitannorinna insara hasiisannonsare assite kaaꞌlitanno roduuwi Yihowa anga noo uduunnichooti.—Law. 19:17; 2 Qor. 1:3, 4.

17. Xaa yannara rodiimmate baxille leellishanna wosina adha albinni roore hasiissannota ikkitinohu mayiraati?

¹⁷ Ammanate roduuwanke albillitte xa kaaꞌlineemmohunni roore kaaꞌla hasiissannonketi dihuluullissannote. (Imb. 3:16-18) Yihowa rodiimmate baxille leellinsheemmo gedenna wosina adhineemmo gede xaanni qajeelsanni noonke; tini akatta hatte yannarano hasiissannonkete.

ALBILLITTE IKKANNORI MAATI?

18. Umi xibbi diro heeꞌrinohu Ibiraawootu Kiristaani lawishsha haꞌrunsa dandiineemmohu hiittoonniiti?

¹⁸ Xagge leellishshannonte gede, ilaala xooqino Kiristaani Yerusaalamete daggino baonni gatino. Kuni Kiristaani katama agure haꞌrino; kayinni Yihowa insa horo diagurinonsa. Insa lawishshinni maa ronseemmo? Albillitte ikkannoha mitto mittonka coye dianfoommo. Yesuusi qaafo adhate qixxaamboommore ikkineemmo gede qorowisiisinonke. (Luq. 12:40) Qoleno Phaawuloosi Ibiraawootu Kiristaanira borreessino amaale haꞌrunsa hasiissaanke; tini amaale umi xibbi diro heeꞌrino Kiristaana kaaꞌlitinonte gede ninkeno kaaꞌlitannonke. Hattono Yihowa umisi horonta tuge agurannonkekkita kule qaale eino. (Ibi. 13:5, 6) Geedote ikkanno katama yaano Maganu Gashshoote quqquxamme agadhino; hatto assinummoro kuni gashshooti abbannoha hegere atoote afiꞌneemmo.—Mat. 25:34.