XIINXALLOTE BIRXICHO 23
FAARSO 2 Suꞌmikki Yihowaati
Yihowa Suꞌmi Qullaawanno Gede Assineemmo Gara
“Kiꞌne . . . naqaashsheꞌyaati.”—ISA. 43:10.
GUULCHO HEDO
Yihowa suꞌmi qullaawanna minshe nookkiha ikkanno gede assa dandiineemmo gara ronseemmo.
1-2. Yesuusi Yihowa suꞌmi qullaawanno gede assinota mayinni anfeemmo?
YESUUSI Yihowa suꞌmi qullaawanno gede assino. Albisa ikke Annisi suꞌmira halaminohu isooti. Sai birxichira ronsummonte gede, Yesuusi Yihowa suꞌmi qullaawanno gede assate reyate maahoyye yiino. (Maq. 14:36; Ibi. 10:7-9) Qoleno Yesuusi kumu diri gashshootisi jeefora, Yihowa suꞌmi qullaawa ikkara hasiꞌranno daafira silxaanesi baala umisi fajjonni aguranno. (1 Qor. 15:26-28) Yesuusi Yihowara yee assino coyi baalu iso lowo geeshsha baxannota leellishanno.
2 Yesuusi uullara dayinohu Annisi suꞌminniiti. (Yoh. 5:43; 12:13) Isi haꞌrunsaanosira Annisi suꞌma egensiisino. (Yoh. 17:6, 26) Isi Yihowa suꞌminni rosiisino hattono konni suꞌminni addi addi maalale loosino. (Yoh. 10:25) Isinni, Yesuusi rosaanosi daafira huuccanni Yihowa “suꞌmikkira yite agarinsa” yiino. (Yoh. 17:11) Ikkina Yesuusi Yihowa suꞌma togo baxannoha ikkiro mittu manchi Yihowa suꞌma afikki woy horoonsiꞌrikki ani Kiristoosiho addu haꞌrunsaanchooti yaa hiitto dandaanno?
3. Konni birxichira maa ronseemmo?
3 Kiristoosi lawishsha haꞌrunsate sharrammeemmo Kiristaana ikkinoommo daafira Annisi suꞌma lowo geeshsha banxeemmo. (1 Phe. 2:21) Konni birxichira, “Maganu Gashshootiha dancha duduwo” dudubbannori Yihowa suꞌminni woshshantannohu mayiraatiro ronseemmo. (Mat. 24:14) Qoleno ninke mittu mittunku Yihowa suꞌma mageeshshi geeshsha baxa hasiissannonkero xiinxallineemmo.
“SUꞌMISINNI WOSHSHAMANNO MANNA”
4. (a) Yesuusi iimira haꞌrara albaanni rosaanosi mayyee hajajino? (b) Tini hajajo hiitti xaꞌmo kaꞌanno gede assitanno?
4 Yesuusi iimira haꞌrara albaanni rosaanosira togo yiino: “Qullaawu ayyaani kiꞌne aana dirranno woyite wolqa adhitinanni; Yerusaalamete, Yihuda baalahonna Samaariyaho, hattono baattote qacce geeshsha farciꞌraasineꞌya ikkitinanni.” (Soq. 1:8) Hakko daafira dancha duduwo dudumbannihu Israeelete gobbara calla diꞌꞌikkino. Gale hose daga baalate giddo noo manni Kiristoosi haꞌrunsaano ikkanno faro afiꞌranno. (Mat. 28:19, 20) Kayinni Yesuusi “farciꞌraasineꞌya ikkitinanni” yiino. Ikkina kuri haaro rosaano Yihowa suꞌma afa hasiissannonsanso Yesuusi farciꞌraasine calla ikkitanno? Soqqamaasinete Looso fooliishsho 15 kulloonni xagge tenne xaꞌmora dawaro afiꞌneemmo gede kaaꞌlitannonke.
5. Soqqamaasinenna Yerusaalamete heedhanno cimeeyye baalunku manni Yihowa suꞌma afa hasiissannonsata leellishshinohu hiittoonniiti? (Misileno lai.)
5 Soqqamaasinenna Yerusaalamete heedhanno cimeeyye 49 M.D. Ayihudete wido ikkinokkihu barciminokki manni Kiristaana ikkate maa assa hasiissannonsaro hasaawate gamba yitino. Insa hasaabbe kaꞌuta Yesuusi rodii Yaiqoobi togo yiino: “Maganu dagate mereerinni suꞌmisinni woshshamanno manna gamba assiꞌrate, mite yee alba insawa higino gara Siimiooni seekke odeessino.” Yaiqoobi coyiꞌranni noohu aye suꞌmi daafiraati? Isi masaalaanchu Amootsi coyiꞌrino hedo qummi asse togo yiino: “Hatto asseemmohuno gatino manni daga baalate giddonni dayinohu suꞌmiꞌyanni woshshamino manni ledo Yihowa woꞌmu wodaninsanni hasiꞌranno gedeeti yee coyiꞌrino . . . Yihowa.” (Soq. 15:14-18) Tini haaro rosaano Yihowa daafira rosa calla ikkikkinni ‘suꞌmisinnino woshshama’ hasiissannonsa. Hatto yaa insa Maganu suꞌma duqqitanno hattono konni suꞌminni bande anfanninsa yaate.
Umi xibbi diro aliidi bisi gambooshshiwa, kuri ammanantino labballi Kiristaanu Maganoho suꞌmisinni woshshamanno manna ikka hasiissannota wodanchitino (Gufo 5 lai)
6-7. (a) Yesuusi uullara dayinohu mayiraati? (b) Isi uullara dayinohu wolu qaru korkaati maati?
6 Yesuusi suꞌmi “Yihowa Gatisannoho” yitanno tiro afiꞌrino; qoleno Yihowa ammana noonsare gatisate iso horoonsiꞌrino. Yesuusi uullara dayinohu mannu oosora heeshshosi sayise aateeti. (Mat. 20:28) Isi wodo baate mannu ooso gatonna hegere heeshsho afidhanno faro fanino.—Yoh. 3:16.
7 Ikkina mannu oosora gato hasiissinohu mayiraati? Edenete kaashshu basera kalaqamino coyinni kainohunniiti. Sai birxichira ronsummonte gede, Addaaminna Heewani Yihowara finqile hegerera heeꞌrate faro huꞌnino. (Kal. 3:6, 24) Ikkirono cubbaataammu mannu ooso gatonni roore lowo geeshsha hasiissanno hajo no. Sheexaanu Yihowa suꞌma hunino. (Kal. 3:4, 5) Hakko daafira Addaaminna Heewani sirchi gato afiꞌransa lowo geeshsha hasiissanno hajo yaano Yihowa suꞌmi qullaambe ledo xaadooshshe afidhino. Yesuusi Yihowa riqiwannohanna suꞌmasi duqqinoha ikkino daafira, Yihowa suꞌmi qullaawa ikkanno gede lowore assino.
Mittu manchi Yihowa suꞌma afikki woy horoonsiꞌrikki ani Kiristoosiho addu haꞌrunsaanchooti yaa hiitto dandaanno?
8. Yesuusa ammantannori baalu maa wodancha hasiissannonsa?
8 Yesuusa ammantannota leellishshannori Ayihudeno ikkito Ayihudete wido ikkitinokkiri baalu gatonsa Buicho Yesuusi Anna Magano Yihowa ikkinota ammante adha hasiissannonsa. (Yoh. 17:3) Hatteeno agurranna Yesuusi gede Yihowa suꞌminni woshshama hasiissannonsa. Qoleno Yihowa suꞌmi qullaambe mageeshshi geeshsha hasiissannoro huwata hasiissannonsa. Insa gato afidhannohu hatto assiturooti. (Soq. 2:21, 22) Hakko daafira baalanti ammanantinoti Yesuusi haꞌrunsaano Yihowanna Yesuusi daafira rosa hasiissannonsa. Yesuusi Yohaannisi fooliishsho 17 kulloonni huuccatto togo yee jeefisinohu iseraati: “Ati baxoottoe baxilli insarano heeꞌrannonsa gede hattono anerano insa ledo mittimma heedhannoe gede, suꞌmakki egensiisoommonsa; ledeno egensiiseemmo.”—Yoh. 17:26.
“KIꞌNE FARCIꞌRAASINEꞌYAATI”
9. Yihowa suꞌmi qullaawanno gede assa dandiineemmohu hiittoonniiti?
9 Hakko daafira baalanti Yesuusi haꞌrunsaano Yihowa suꞌmi qullaawa ikkanno gede assa hasiissannonsa. (Mat. 6:9, 10) Insa wolu baalunku suꞌminni Yihowa suꞌma roorsiꞌra hasiissannonsa. Assitannorinni tenne leellisha hasiissannonsa. Ikkina Yihowa suꞌmi qullaawanno gede assate woy Sheexaanu Yihowa daafira coyiꞌrinori kapho ikkinota leellishate ninke widiidire assa dandiineemmohu hiittoonniiti?
10. Isayaasi fooliishsho 42-44 mayi daafira kulloonni? (Isayaasi 43:9; 44:7-9) (Misileno lai.)
10 Yihowa suꞌmi qullaawa ikkanno gede assate ninke maa assa dandiineemmoro Isayyaasi fooliishsho 42-44 geeshsha kulloonni. Kuri fooliishshora maganna lawishshu yaattonni yoote albira shiqqinohu gede assine kulloonni. Yihowa, ninke magannate yitannori baalu addu maganna ikkansa leellishshanno taje shiqishshanno gede xaꞌmino. Qoleno kuri maganna coyidhannori halaale ikkasi buuxissanno naqaashshe abbidhanno gede kulinonsa. Ikkollana tenne buuxisa dandiinohu mittuno dino!—Isayaasi 43:9; 44:7-9 nabbawi.
Lawishshu yaattonni, duucha doogganni yoote albira shinqoommohu gedeeti (Gufo 10-11 lai)
11. Isayyaasi 43:10-12 geeshsha kultanno garinni Yihowa mannisira mayino?
11 Isayaasi 43:10-12 nabbawi. Yihowa mannisira “Magano ikkaꞌyara kiꞌne naqaashsheꞌyaati” yiino. Yihowa insa “Ane agurranna wolu Magani nooni?” yee xaꞌminonsa. (Isa. 44:8) Tenne xaꞌmora dawaro qola ninkera lowo ayirrinyeeti. Coyiꞌneemmorinninna assineemmorinni halaalaanchu Magani Yihowa calla ikkinota farciꞌneemmo. Isi suꞌmi wole baalanta suꞌmuwara aliidiho. Sheexaanu abbannonke fonqoli ikkihano ikkiro Yihowa lubbora baxeemmotanna isira ammanammoommota heeꞌneemmo heeshshonni leellinsheemmo. Konni garinni Yihowa suꞌmi qullaawa ikkanno gede kaaꞌlamate faro afiꞌnoommo.
12. Isayyaasi 40:3, 5 noo masaalo woꞌmitinohu hiittoonniiti?
12 Yihowa suꞌmira halammeemmo woyite Yesuusi lawishsha haꞌrunsinanni heeꞌnoommo. Qoleno Isayyaasi mittu manchi ‘Kaaliiqira doogo seekkannota’ masaalino. (Isa. 40:3) Tini masaalo woꞌmitinohu hiittoonniiti? Cuuaanchu Yohaannisi Yesuusira doogo qixxeessino; Yesuusi qole dayinohuno coyiꞌrinohuno Yihowa suꞌminniiti. (Mat. 3:3; Maq. 1:2-4; Luq. 3:3-6) Qoleno tini masaalo, “Kaaliiqi ayirrinyi leellanno” yitanno. (Isa. 40:5) Kaaliiqi ayirrinyi leellinohu hiittoonniiti? Yesuusi uullara dayi woyite guutu garinni Yihowa riqiwino daafira Yihowa umisi uullara dayinohu gedeeti.—Yoh. 12:45.
13. Yesuusi lawishsha haꞌrunsa dandiineemmohu hiittoonniiti?
13 Ninkeno Yesuusi gede Yihowa Farciꞌraasineeti. Yihowa suꞌma duqqinoommo; hattono xaandeemmo mannira baalaho isi assinoha dhagge ikkanno looso kulleemmo. Tenne assate Yesuusi Yihowa suꞌmi qullaawanno gede maa assinorono mannaho kula hasiissannonke. (Soq. 1:8) Yesuusi geeshsha Yihowa daafira farciꞌrinohu dino; ninkeno isi lawishsha haꞌrunsineemmo. (Aju. 1:5) Kayinni ninke mittu mittunku Yihowa suꞌmi qullaawanno gede maa assa hasiissannonke?
YIHOWA SUꞌMI QULLAAWANNO GEDE MAA ASSA HASIISSANNONKE?
14. Faarso 105:3 kultanno garinni Yihowa suꞌmi daafira mayi macciishshamannonke?
14 Yihowa suꞌminni naaxxineemmo. (Faarso 105:3 nabbawi.) Suꞌmisinni naaxxineemmo woyite Yihowara tashshi yaannosi. (Erm. 9:23, 24; 1 Qor. 1:31; 2 Qor. 10:17) ‘Yihowa suꞌminni naaxxate’ yaa isi Maganonke ikkino daafira fenjeejjate yaate. Yihowa suꞌma ayirrisanna suꞌmisira halama ninkera lowo qoossooti. Ledonke loossannorira, ledonke rossannorira, olliinke manniranna wolootaho Yihowa Farciꞌraasine ikkinoommota kula saala horo dihasiissannonke! Daawuloosi Yihowa suꞌmi daafira wolootaho kula agurrammora hasiꞌranno. (Erm. 11:21; Aju. 12:17) Isinni Sheexaanunna kaphu masaalaanosi mannu Yihowa suꞌma hawara hasidhanno. (Erm. 23:26, 27) Ninke kayinni Yihowa suꞌma banxeemmo daafira ‘suꞌmisinni barra woꞌma’ hagiidhineemmo.—Far. 5:11; 89:16.
15. Yihowa suꞌma woshshate yaa mayyaate?
15 Yihowa suꞌma woshsha diagurreemmo. (Iyu. 2:32; Rom. 10:13, 14) Yihowa suꞌma woshshate yaa suꞌmasi afanna horoonsiꞌra calla diꞌꞌikkitino. Isi ayimma afa, iso addaxxa hattono kaaꞌlonna biddishsha afiꞌrate alba isiwa higa hasiissannonke. (Far. 20:7; 99:6; 116:4; 145:18) Qoleno suꞌmasinna akattasi wolootaho kulleemmo; hattono wolootu maaro eꞌanno gedenna iso hagiirsiisate qaafo adhitanno gede kaaꞌline suꞌmasinna akattasi kulleemmo.—Isa. 12:4; Soq. 2:21, 38.
16. Sheexaanu kapho xawo fushsha dandiineemmohu hiittoonniiti?
16 Yihowa suꞌmira yine qarra adhate maahoyye yineemmo. (Yai. 5:10, 11) Qarru amadinkerono Yihowara ammanamme heeꞌneemmoha ikkiro Sheexaanu kaphaancho ikkinoti leeltanno gede assineemmo. Iyyoobi yannara Sheexaanu Yihowara soqqantannori daafira togo yiino: “Manchu noosire baala lubbosira yee aanno.” (Iyo. 2:4) Sheexaanu mannu Yihowara soqqamannohu faffote yannara calla ikkinohu gedenna qarru yannara Yihowa agurannohu gede asse coyiꞌrino. Ammanamino manchi Iyyoobi tini kisse kapho ikkase leellishino. Ninkeno Sheexaanu abbannonke fonqoli ikkihano ikkiro, Yihowara badhe wodhineemmokkita leellishate qoosso noonke. Yihowa suꞌmisira yee agarannonketa woꞌmunni woꞌma addaxxineemmo.—Yoh. 17:11.
17. Umi Pheexiroosi 2:12 kultanno garinni Yihowa suꞌmira ayirrinye aa dandiineemmoti wole doogo hiittenneeti?
17 Yihowa suꞌma ayirrinseemmota leellinsheemmo. (Law. 30:9; Erm. 7:8-11) Yihowa riqimbeemmorenna suꞌmasi duqqinoommore ikkinoommo daafira suꞌmisi ayirranno woy mishamanno gede assinammora dandiineemmo. (1 Pheexiroosi 2:12 nabbawi.) Hakko daafira coyiꞌneemmorinninna assineemmorinni Yihowa guwisate dandiinummore baala assa hasiꞌneemmo. Guuntete xeꞌne noonkere ikkinummorono konni garinni suꞌmisira ayirrinye aa dandiineemmo.
18. Yihowa suꞌmi qullaawanno gede assineemmoti wole doogo hiittenneeti? (Lekkaalliidi qaagiishshano lai.)
18 Uminke suꞌminni roore Yihowa suꞌmiri huluullannonke. (Far. 138:2) Tini lowo geeshsha hasiissannota ikkitinohu mayiraati? Korkaatuno Yihowa suꞌma banxeemmo daafira qooxeessinke manni mishankera dandaanno.a Yesuusi Yihowa suꞌmira yee jaddo loosinohu gede qarrame reyate maahoyye yiino. Isi ‘shollinye diwaajjino’ yaano mannu mayyaannoe yee umisi daafira quwa sae diyaadino. (Ibi. 12:2-4) Isi Maganu fajjo assa illachishino.—Mat. 26:39.
19. Yihowa suꞌmi daafira mayi macciishshamannohe? Mayira?
19 Yihowa suꞌminni naaxxineemmo; hattono Yihowa Farciꞌraasine ikka ninkera lowo ayirrinyeeti. Hakko daafira Yihowa suꞌmira yine iillannonke coye baala dandiine saꞌꞌate maahoyye yineemmo. Ninke uminke suꞌminni roore Yihowa suꞌma roorsiꞌneemmo. Hakko daafo Sheexaanu abbannonke fonqoli ikkihano ikkiro woꞌmanka woyite Yihowa suꞌma guwisate murciꞌno. Hatto assineemmoha ikkiro Yesuusi Kiristoosi gede Yihowa suꞌmi qullaawanno gede assineemmo.
FAARSO 10 Maganonke Yihowa Guwisse!
a Ammanamino manchi Iyyoobi nafa sasu jaallasi isi daafira gara ikkinokkire coyidhuta suꞌmisi daafira yaadino. Umi qara oososinna jirosi baala hoogi yannara “Iyyoobi sao diassino. Maganono dibushiishino.” (Iyo. 1:22; 2:10) Ikkirono Iyyoobi gara ikkinokkire assino yine kassansisita “qasanno coye” coyiꞌra hanafino. Isi Maganu suꞌmi qullaawa ikkanno woy keeraaꞌmanno gede assantenni umisi suꞌmira yaadino.—Iyo. 6:3; 13:4, 5; 32:2; 34:5.