Asan’ny Apostoly
5 Namarotsy ty taniny koa ty lahilahy kaihy hoe Ananiasy, noho Safira valiny. 2 Fe nisy nitanjahiny tambalimbaliky any ty viliny, le nihain’ny valiny koa raha zay. Ty sisany avao ro nandesiny, ka napetrakiny tan-tombon’ny apostoly rey eo. 3 Fe hoy ty asan’i Petera: “Nao Ananiasy, nanino iha ro nataon’i Satana nahasaky navandy tamy fanahy masy, le nitanjahinao tambalimbaliky any ty sisany tamy vilin’ny tany iny? 4 Tsy fa ahinao avao va tany iny, tamy ie mbo tsy navily? Sady lafa navily raha iny, tsy ahinao avao va ty viliny, ka azonao ampiasà amy ze itiavanao azy? Nanino iha nieritseritsy tam-ponao ao hanao raha ho zay io? Tsy olo ro navandesanao fa Ndranahary.” 5 Lafa naharè an’ny raha zay Ananiasy, le niravoky ka nimaty. Le navaka iaby ze olo naharè an’ny raha niseho zay. 6 Bakeo nitsanga pamaraky maromaro rezay le nifonosan-drozy lamba faty iny, ka nandesin-drozy noho nalevin-drozy.
7 Lafa niafaky lera telo teo ho eo, le niavy koa valiny fe tsy nihainy ty raha niseho teo. 8 Le hoy Petera taminy: “Nao tse, zay vatany va ty namarotanareo an’ny tany io?” Le hoy ty asany: “Eka, ie zay!” 9 Le hoy ty asan’i Petera taminy: “Nanino nareo morovaly ro niharo loha mba hamitaha ty fanahin’i Jehovah? Fa am-baravara eo henanizao ty tombon’olo nandevy an’ny valinao iny, le handay anao hiboaky koa rozy.” 10 Avy le niravoky tan-tombon’i Petera eo ie, ka nimaty. Lafa nilitsy pamaraky rey, le nahita azy fa maty, ka nanday azy niala teo noho nandevy azy tanilan’ny valiny eo. 11 Le navaka ty fiangona iaby noho ty olo iaby naharè an’ny raha niseho zay.
12 Mbo nanao famantara noho fahagagà* maro tamy vahoaky rey teo koa apostoly rey. Le niaraky nivory avao rozy iaby tamy Lala Mitafon’i Solomona teo. 13 Marina fa tsy nisy olo hafa nahasaky nifandramby amin-drozy, fe ndre zay le niresaky raha soa maro mikasiky an-drozy avao ty olo. 14 Ankoatsini-zay, le nitombo avao ty isakin’olo nino an’ny Tompo, sady nimaro biby rozy, ndre lahilahy zay ndre ampela. 15 Nandesin’olo tamy lala be eny mihintsy aza ty marary ka napetrakin-drozy teny, le nataon-drozy tanabo fandrea kelikely na tihy. Amy zay lafa mandalo eo Petera, le mba azon’ny talinjony ty sisany amin-drozy fara faharatiny. 16 Nisy vahoaky maro koa niavy tamy apostoly rey teo avao. Baka amy tanà manodidy an’i Jerosalema any vahoaky reo. Nanday marary noho olo nampijalin’ny fanahy maloto rozy, le niafaky ty aretin’olo iaby reo.
17 Fe nialona mpisorobe iny noho ty olo iaby niaraky taminy, zany hoe azy anisan’ny sektan’ny Sadoseo rey. Nitsanga amy zay rozy, 18 ka nisamborin-drozy apostoly rey le nataon-drozy amy prizon* ao. 19 Fe lafa nihaly ty andro, le nisokafin’ny anjelin’i Jehovah varavaran’ny prizon iny, ka naboakiny tao rozy. Le hoy ty asan’ny anjely iny tamin-drozy: 20 “Mandehana mitsanga amy tempoly eo, le torio amin’olo avao ty safà iaby mikasiky an’ny fiaina zay.” 21 Lafa naharè ani-zay apostoly rey, le nilitsy tamy tempoly ao vo maray vaky andro, ka nampianatsy.
Niavy amy zay ty mpisorobe noho olo niaraky taminy rey, ka navorin-drozy ty Fitsarà Anabo Jiosy noho ty anti-panahy iaby tamy anan’Israely eo. Le naniraky olo hangalaky an’ny apostoly rey tamy prizon any rozy, mba handesy amin-drozy eo. 22 Fe lafa niavy tany mpiamby reo, le tsy nahita an’ny apostoly rey tamy prizon ao. Farany nimpoly rozy, le nitantara ty raha niseho. 23 Hoy ty asan-drozy: “Hitanay nihily soa prizon iny, le nitsanga tam-baravara eo mpiamby rey, fe lafa nisokafinay raha iny, le tsy nahita olo tao zahay.” 24 Lafa naharè ani-zay sefon’ny mpiamby tempoly iny noho sefon’ny mpisoro rey, le samby niasa loha hoe ino ty ho vokatsin’ny raha zay. 25 Fe nisy olo niavy, le nivola tamin-drozy hoe: “Amy tempoly ao lahilahy nigadranareo rey! Mitsanga noho mampianatsy ao rozy!” 26 Bakeo nangalaky an’ny apostoly rey ty sefon’ny mpiamby noho olo ambany fahefàny rey, fe tsy nanerisery an-drozy rozy satria natahotsy tsy no hotorahin’ny vahoaky rey vato.
27 Nandesin-drozy amy zay apostoly rey, ka nampitsanganin-drozy tamy Fitsarà Anabo Jiosy eo. Le nanao ankety an-drozy ty mpisorobe, 28 ka nivola hoe: “Fa namepetsy anareo zahay hoe ka mampianatsy amy anara zay sasy. Fe henteo, nifenoanareo ty fampianaranareo Jerosalema. Tapa-kevitsy koa nareo hanao anay ho tompon’antoky amy fahafatesan’ny lahilahy iny.”* 29 Fe hoy ty navalin’i Petera noho apostoly hafa rey: “Ndranahary ro mpanday anay, ka ie ro tsy maintsy orihinay safà fa tsy olo. 30 Fa nivelomin’ny Ndranaharin’ny razambentsika iny Jesosy, azy nivonoanareo le nahantonareo tamy tsato-kazo* eo iny. 31 Fe nasondrotsi-Ndranahary ho ankavanany eo ie, ka lasa Mpitariky Farany Anabo noho Mpanavotsy, mba hahafahan’ny Israely hibebaky noho hahazo fanengà hadisoa. 32 Le vavolombelon’ny raha zay zahay. Eo koa ty fanahy masy, azy amea-Ndranahary ani-ze maneky azy ho mpanday noho ze manoriky ty safàny.”
33 Niromotsy rozy lafa naharè an’ny raha zay, ka nita hamono an-drozy. 34 Fe nitsanga tamy Fitsarà Anabo Jiosy eo ty Fariseo raiky kaihy hoe Gamaliela. Mpampianatsy Lalàna Gamaliela io sady nanaja azy ty olo iaby. Nampiboahiny tsielatsiela tse apostoly rey. 35 Le hoy ty asany: “Nareo lahilahy israelita, mitandrema soa nareo amy ty raha eritseretinareo hatao amy lahilahy reo. 36 Nisy fotoa, ohatsy, teo Teodasy, azy nanao ty vatany ho tsy misy mandilatsy azy iny. Lahilahy 400 teo ho eo ro lasa nanaraky azy. Fe nivonoa ie, ka niparitaky iaby mpanaraky azy rey le tsy nihita sasy. 37 Tafaran’i Teodasy, le teo koa Jodasy baka a Galilia any, tamy fotoa fanisaha vahoaky, le nitao olo hanaraky azy ie. Fe nimaty koa ie, le niparitaky iaby ty mpanaraky azy. 38 Ka amy raha miseho henanizao toy, le zao ty raha volaniko aminareo: Engaonareo lahilahy reo fa ka tolòny. Satria laha baka amin’olombelo raha tean-drozy hatao io na asa io, le ho rava. 39 Fa laha baka amy Ndranahary raha ataon-drozy io, le tsy ho vitanareo ty handrava azy. Tsy no nareo koa ro ho lasa mpialy amy Ndranahary.” 40 Narahin-drozy amy zay torohevitsin’i Gamaliela iny, ka nampikaihin-drozy apostoly rey. Le nifilapilarin-drozy* noho nafepetsin-drozy tsy hivola amy anaran’i Jesosy sasy apostoly rey, bakeo nengan-drozy handeha.
41 Farany niala tamy Fitsarà Anabo Jiosy teo apostoly rey, le nifalifaly satria natao maeva ho afa-baraka ho an’ny anaran’i Jesosy. 42 Le tsy nieny nampianatsy noho nitory ty vaovao soa mikasiky an’i Kristy, zany hoe Jesosy, rozy sanandro. Nanao ani-zay rozy, ndre tamy tempoly ao ndre santrano.