Hafatsy Baka amy Ndranahary ho Antsika ty Baiboly

Fanomeza soasoa baka amy Jehovah ty Baiboly. Misy boky 66 ty anatiny ao. Fe mety hieritseritsy iha hoe: ‘Akory ty nanomezany antsika ani-Baiboly io? Akory ty nanorata azy?’ Ndao hodinihintsika ty valini-fanontanea reo.

1. Manino ro volany hoe baka amy Ndranahary ty Baiboly, kanefa olombelo ty nanoratsy azy?

Olo 40 teo ho eo ro nanoratsy ty Baiboly. Tanatini-1600 tao mahery ty nanorata azy, zany hoe nanomboky tamy 1513 T.K. zisiky tamy 98 A.K. Tsy nitovy ty raha niainani-mpanoratsy reo, kanefa tsy mifanohitsy ty raha nisoratin-drozy. Ino ty antony? Satria Safà-Ndranahary ty Baiboly. (Vakio 1 Tesalonianina 2:13.) Tsy ze raha nieritseretini-mpanoratsy Baiboly rey avao ro nisoratin-drozy, ‘fa baka amy Ndranahary ro nivolanan-drozy araky ze nitarihani-fanahy masy an-drozy.’a (2 Petera 1:21) Nampiasa ty fanahy masy Ndranahary, amy zay hanoratsy ty hevitsy baka aminy lahilahy reo.​—2 Timoty 3:16.

2. Ia ro afaky mandramby soa baka amy Baiboly?

Afaky mandramby soa baka amy vaovao soa hita amy Baiboly ao iny iaby ty “firenena noho foko noho olo samby hafa fivolana noho ty vahoaky iaby.” (Vakio Apokalypsy 14:6.) Misy amy safà maro mandilatsy ty boky iaby ty Baiboly. Presky ty olo iaby henanizao ro afaky mamaky Baiboly, ndre mbaia mbaia ty misy azy, ndre ino ino ty fivolanany.

3. Akory ty niarovani-Jehovah ty Baiboly?

Tamy raha malaky simba ro nanorata ty Baiboly tamy voalohany. Fe nisy olo tea Baiboly nandika azy sady nitandrina soa mba ho marina avao ty raha anatiny ao. Niezaky nandrava ty Baiboly ty manam-pahefà noho ty mpitariky fivavaha sisany. Fe nisy avao ty olo niaro ani-raha io ndre mety hahavy an-drozy ho vonoa aza ty fanaova ani-zay. Tsy nisy raha nengani-Jehovah handrava ani-boky ahafahantsika mifandramby aminy io mihintsy. “Haharitsy zisiky farany” ty safàni-Ndranaharintsika iny, hoy ty Baiboly.​—Isaia 40:8.

DINIHO LALIKY

4. Atoroni-Baiboly hoe ia ty Nampanoratsy azy

Alefaso VIDEO toy. Bakeo vakio 2 Timoty 3:16, le iaraho midiniky fanontanea retoa:

VIDEO: Baka Amin’ia ty Baiboly?​—Tampatampany (2:48)

• Manino ro volany hoe Safà-Ndranahary ty Baiboly, kanefa olombelo ty nanoratsy azy?

• Akory ty hevitsinao, azo inoa va ty hoe nafindra-Ndranahary tamin’olo nanoratsy Baiboly rey ao ty hevitsiny?

5. Mbo misy avao ty Baiboly ndre maro ty ta ho nandrava azy

VIDEO: Lafovily Tamin-drozy ty Baiboly​—Tampatampany (William Tyndale) (6:17)

• Lasa ta hamaky Baiboly va iha lafa hainao hoe nisy olo niezaky mafy mba hiaro azy? Ino ty antony?

Vakio Salamo 119:97, le iaraho midiniky fanontanea toy:

• Manino ty olo sisany ro niezaky nandika noho nampiely ty Baiboly, ndre mety ho nahavy an-drozy ho vonoa raha zay?

6. Boky ho ahin’olo iaby

Ty Baiboly ro boky maro mpana marè sady voadika amy safà farani-ze maro. Vakio Asan’ny Apostoly 10:34, 35, le iaraho midiniky fanontanea retoa:

• Manino ty Baiboly ro tea-Ndranahary hiparitaky amy tany toy iaby sady ho voadika amy safà maro?

• Ino ty itiavanao ani-Baiboly io?

FAMINTINA

Safà-Ndranahary ty Baiboly, le nataony ze hahavy ty olo iaby ho afaky hahazo azy.

Famerena

• Akory ty natao-Ndranahary lafa nampanoratsy ty Baiboly?

• Ino ty tena nahatseriky anao lafa nianatsy ani-fianara toy?

• Ino ty tsapanao lafa nihainao hoe nanao ezaky Ndranahary mba hahavy antsika hana Baiboly hifandrambesa aminy?

DINIHO KOA RETOA

Vakio ato ty tantarani-Baiboly, nanomboky tamy ie mbo nisoraty tana zisiky amy androntsika henanizao.

“Nahoana ny Baiboly no Tody Hatratỳ Amintsika?” (Mifohaza! Novambra 2007)

Henteo ato hoe nanino ro mbo misy zisiky henanizao ty Baiboly ndre nandalo raha sarotsy maro.

“Nahoana no Mbola Misy Hatramin’izao ny Baiboly” (Ny Tilikambo Fiambenana No. 4 2016)

Henteo ato ty tantaran’olo hafa niezaky mafy mba handika ty Baiboly.

Sarobidy Tamin’izy Ireo ny Baiboly (14:26)

Fa nadikadika imaro ty Baiboly. Akory ty ahaizantsika hoe mbo tsy niova ty hevitsy anatiny ao?

“Niova ve ny Baiboly?” (Lahatsoratsy amy jw.org ao)