FIANARA 12
Ino ty Hanampy Anao Hanohy Hianatsy Baiboly Avao?
Mahasoa ty mianatsy Baiboly, fe tsy mora raha zay kindraiky. Mety hieritseritsy iha hoe ho vitanao avao va ty hanohy hianatsy Baiboly. Manino iha ro mila miezaky mafy mba hanohy hianatsy avao? Ino ty hanampy anao hanohy avao ndre misy raha sarotsy aza?
1. Manino ro vatan-draha ty mianatsy Baiboly?
“Velo noho mahery ty Safà-Ndranahary.” (Hebreo 4:12) Lafovily ty Baiboly satria manambara ty hevitsi-Ndranahary sady ahità hoe tea antsika ie. Manampy anao hahay raha maro koa ty Baiboly sady mahavy anao ho hendry noho hanan-draha tamany. Fa ty tena maha vatan-draha azy, manampy anao ho namani-Jehovah ie. Lafa mianatsy Baiboly iha, le hihasoa ty fiainanao.
2. Manino ro mila resy lahatsy tsika hoe vatan-draha ty fahamarina amy Baiboly ao?
Azo ampitovizy amy hanana lafovily ty fahamarina amy Baiboly ao. Zay mahavy ty Baiboly mampirisiky antsika hoe “vilio ty fahamarina le ka avily sasy.” (Ohabolana 23:23) Laha resy lahatsy tsika fa lafovily vatany ty fahamarina amy Baiboly ao, le hiezaky mafy hanohy hianatsy avao ndre misy raha manahira aza.—Vakio Ohabolana 2:4, 5.
3. Ino ty ataoni-Jehovah mba hanampea anao hanohy hianatsy avao?
Jehovah ro Namoro anao sady Namanao, ka teany ty hanampy anao hianatsy mikasiky azy. Afaky manampy anao ‘haniry noho hananteraky’ ani-raha zay ie. (Vakio Filipianina 2:13.) Midika zay hoe afaky manome hery anao ie mba hanohizanao mianatsy avao noho hanorihanao ze raha ianaranao. Hanampy anao handresy koa ie lafa misy olo na raha manahira manakasaka ty fianaranao. Mangataha amy Jehovah amy alalani-vavaky, amy zay ho vitanao ty hanohy hianatsy Baiboly avao.—1 Tesalonianina 5:17.
DINIHO LALIKY
Diniho hoe ino ty azonao atao mba hanohiza fianara Baiboly avao, ndre tery ty fotoanao na misy olo manohitsy anao. Diniho koa ty fomba hanampeani-Jehovah anao mba hahafahanao hianatsy Baiboly avao.
4. Ataovo vatan-draha aminao ty fianara Baiboly
Sahira tsika kindraiky, le atao raha tsy mana fotoa hianara Baiboly. Ino ty hanampy antsika? Vakio Filipianina 1:10, bakeo iaraho midiniky fanontanea retoa:
Ino iaby ty raha hitanao hoe “vatan-draha marè” amy ty fiainanao?
Akory ty ampisehoanao hoe vatan-draha aminao ty mianatsy Baiboly?
Laha fenoanao fasy ty sihoa raiky, bakeo asianao vato, le tsy ho tafilitsy ao ty vato sisany
Fa laha vato rey ro ampilirinao aloha, le ho tafilitsy amy sihoa iny ao ty ankamaroani-fasy rey bakeo. Laha “ze vatan-draha marè” ro ataonao voalohany, le ho vitanao soa sady mbo hanam-potoa hanaova raha hafa koa iha
Manampy antsika hifandramby soa amy Ndranahary ty fianara Baiboly, satria lasa mahay azy noho afaky manompo azy tsika. Vakio Matio 5:3, bakeo iaraho midiniky fanontanea toy:
Ino ty soa ho azontsika laha ataontsika vatan-draha ty fianara Baiboly?
5. Tohizo avao ty fianara ndre misy manohitsy
Mety hanao ze hahakivy anao ty olo sisany, soa iha tsy hianatsy Baiboly sasy. Diniho ty tantarani-Francesco. Alefaso VIDEO toy, bakeo iaraho midiniky fanontanea retoa:
Nanao akory namani-Francesco rey noho ty fianakaviany lafa nivolanany ty raha nianarany?
Ino ty vokany lafa nanohy nianatsy avao ie?
Vakio 2 Timoty 2:24, 25, bakeo iaraho midiniky fanontanea retoa:
Akory ty fahitani-fianakavianao noho ty namanao ty raha ianaranao?
Laha hentea andinin-teny reo, ino ty tokony hataonao lafa tsy mazoto ty olo sisany mahita anao mianatsy Baiboly? Ino ty antony?
6. Mangataha fanampea amy Jehovah
Vomaiky ta hampifalifaly ani-Jehovah tsika lafa mifandramby marìny aminy. Fe mety ho sarotsy amintsika ty miala amy ty raha sisany mba hanoriha ty fitsipiki-Ndranahary. Laha zay ty mahazo anao, le ka kivy satria hanampy anao Jehovah. Alefaso VIDEO toy, bakeo iaraho midiniky fanontanea retoa:
Ino ty fiovà nataoni-Jim mba hampifalifalea ani-Jehovah?
Ino amy ty fiovà nataony ro hitanao hoe miavaky?
Vakio Hebreo 11:6, bakeo iaraho midiniky fanontanea retoa:
Ino ty hataoni-Jehovah ho ani-ze “mila azy marè”, zany hoe ze miezaky mafy mba hahay azy noho hampifalifaly azy?
Laha hentea andinin-teny io, ino ty tsapani-Jehovah lafa hitany hoe miezaky hianatsy Baiboly avao iha?
MIERITSERITSY TY OLO SISANY HOE: “Mba ino zao ty antony ianaranao Baiboly?”
Akory ty hamalianao azy?
FAMINTINA
Tsy mora ty mianatsy Baiboly kindraiky, fe tiarovo fa hanampy anao hahazo tavy ty fiaina zisiky farany raha zay. Mangataha fanampea amy Jehovah, le hameany raha soa iha.
Famerena
Manino ro lafovily aminao ty fahamarina amy Baiboly ao?
Akory ty hampisehoanao hoe ‘hainao soa ze vatan-draha marè’?
Manino iha ro mila mangataky ty fanampeani-Jehovah laha ta hanohy hianatsy Baiboly avao?
DINIHO KOA RETOA
Diniho ato ty fomba efatsy nanampy olo maro hampiasa soa ty fotoany.
Henteo ty fomba nanampeani-Jehovah ani-ampela raiky toy, lafa neloky azy valiny satria niezaky nampifalifaly a-Ndranahary ie.
Henteo hoe ino ty soa niazoni-lahilahy raiky toy lafa nanohy nianatsy Baiboly avao valiny.
Misy mivola hoe mampisaratsaraky fianakavia ty Vavolombeloni-Jehovah. Marina va raha zay?
“Mampisara-bazana Fianakaviana ve ny Vavolombelon’i Jehovah?” (Lahatsoratsy amy jw.org ao)