FIANARA 11
Ino ty Hanampy Anao Handramby Soa Baka amy Famakia Baiboly?
Fa nisy fotoa va iha ta hanao raha raiky, fe atao raha sarotsy aminao ty hamita azy? Mety ho nataonao tsikelikely raha iny, amy zay mba moramora. Mitovy amy zay mihintsy koa ty famakia Baiboly. Mety hieritseritsy iha hoe: ‘Baka aia lahy ty hanombohako azy e?’ Hodinihintsika amy fianara toy ato hoe misy fomba tsotra afaky manampy anao ho tea mamaky noho mianatsy Baiboly.
1. Manino tsika ro tokony hamaky Baiboly sanandro?
“Ty lalànani-Jehovah” ro amy Baiboly ao, ka ho sambatsy noho hahavita raha soa ze olo mamaky azy sanandro. (Vakio Salamo 1:1-3.) Azonao atao tse amy voalohany ty manoka minity vitsivitsy sanandro mba hamakia Baiboly. Lafa mandeha ty fotoa, le mihazatsy iha ka lasa ho azonao tavy ty mamaky ty Safà-Ndranahary.
2. Ino ty hanampy anao handramby soa baka amy famakia Baiboly?
Mba handrambesa soa, le ilà ty mijano kelikely mba hieritsereta ani-raha nivakỳ iny. Sady mamaky zany tsika noho ‘mametsivetsy.’ (Josoa 1:8) Afaky mieritseritsy, ohatsy, iha hoe: ‘Ino ty ianarako mikasiky ani-Jehovah baka amy andinin-teny toy? Akory ty azoko anoriha azy? Akory ty azoko ampiasà azy mba hanampea olo?’
3. Akory ty hahità fotoa hamakia Baiboly?
Sarotsy aminao va ty mahita fotoa hamakia Baiboly? Sarotsy amy ty ankamaroantsika raha zay, ka mila miezaky ‘manararaotsy fotoa’ tsika. (Efesianina 5:16) Afaky manoka fotoa voafaritsy soa iha sanandro mba hamakia Baiboly. Ty olo sisany, ohatsy, mifoha maraindray be. Ty hafa mamaky lafa baka nihina midỳ, na alohani-hiroro hariva. Ka iha, fotoa manao akory ty mety aminao?
DINIHO LALIKY
Diniho hoe ino ty azonao atao mba ho azonao tavy ty mamaky Baiboly. Henteo koa ty raha azonao atao mba ho vita oma soa ty fianaranao Baiboly.
Mila miezaky tsika zay vo ho tea mihina sakafo tsy nahazatsy antsika. Ho zay koa fa mila miezaky tsika zay vo ho azontsika tavy ty mamaky Baiboly
4. Miezaha ho tea mamaky Baiboly
Mety tsy ho mora ty hoe hanomboky hamaky Baiboly. Fe mila ataontsika ze haniriantsika hanao ani-zay, manahaky olo raiky miezaky ho tea sakafo vaovao tsy mahazatsy azy io. Vakio 1 Petera 2:2, bakeo iaraho midiniky fanontanea toy:
Mety ho azonao tavy va ty mamaky Baiboly, laha miezaky mamaky azy sanandro iha?
Alefaso VIDEO toy, le ho hitanao hoe ino ty raha nataon’olo sisany ka nanampy an-drozy ho tea mamaky Baiboly. Bakeo iaraho midiniky fanontanea retoa:
Ino ty raha sarotsy natrehini-tanora tamy video tao rey?
Ino ty nanampy an-drozy hamaky Baiboly sanandro?
Ino ty nataon-drozy mba ho azon-drozy tavy ty mamaky Baiboly?
Hevitsy vitsivitsy hanampy anao:
Mifiliana Baiboly marina noho mazava soa. Andramo, ohatsy, ty Fandikan-tenin’ny Tontolo Vaovao laha misy amy fivolananareo.
Ze hevitsy teateanao amy Baiboly ao tse ro vakio. Mety hanampy anao ty tablò hoe “Vakio Sanandro ty Baiboly.”
Asio mariky ze fa nivitanao vaky. Ampiasao ty tablò hoe “Asio Mariky ty Famakianao Baiboly” amy boky toy ato.
Ampiasao ty programy JW Library®. Laha mampiasa an’io iha, le ho afaky hamaky Baiboly amy telefony na amy fitaova elektroniky hafa, ndre aia ndre aia ty misy anao. Afaky mijanjy Baiboly nalà feo koa iha ao.
Ampiasao ty bokikely hoe Fianaran-draha amy Safà Ndranahary Ao. Misy sarintany, tablò noho fanazavà safà ao, le hanampy anao raha rezay mba hahazo tavy famakia Baiboly.
5. Omano soa ty fianaranao Baiboly
Vakio Salamo 119:34, bakeo iaraho midiniky fanontanea toy:
Manino ro ilà ty mivavaky alohani-hamakia Baiboly na alohani-hanomana fianara Baiboly?
Ino ty hanampy anao handramby soa saky mianatsy Baiboly? Lafa manoma ty fianara kiraidraiky amy boky toy ato iha, le anovo retoa:
A. Vakio ty pejy voalohany amy fianara iny.
B. Vakio andinin-teny rey, le diniho hoe ino ty ifandrambesan-drozy amy ty hevitsy resahy eo.
D. Asio mariky ze fehezanteny mamaly ty fanontanea kiraidraiky. Hanampy anao raha zay lafa miaraky midiniky ani-fianara iny nareo amy mpampianatsy anao iny.
Fa nihainao va?
Maro ty fandikan-tenini-Baiboly fa nampiasani-Vavolombeloni-Jehovah. Fe Ny Soratra Masina—Fandikan-tenin’ny Tontolo Vaovao ro teanay ampiasà satria marina noho mazava soa sady mampiasa ty anara-Ndranahary.—Henteo ty lahatsoratsy hoe “Manana ny Baiboliny Manokana ve ny Vavolombelon’i Jehovah?”
MIERITSERITSY TY OLO SISANY HOE: “Sarotsy marè ty mianatsy raha amy Baiboly ao, ka tsy mana fotoa noho hery hianara azy aho.”
Akory ty hevitsinao?
FAMINTINA
Hahasoa anao ty Baiboly laha manoka fotoa hamakia azy iha, mivavaky mba hahay ani-ze vakinao, noho manoma ty fianara Baiboly ataonao.
Famerena
Ino ty hanampy anao handramby soa baka amy Baiboly?
Ino ty fotoa eritseretinao hamakia noho hianara Baiboly?
Manino ro ilà ty manoma lafa hianatsy Baiboly?
DINIHO KOA RETOA
Henteo ato ndraiky ty hevitsy sisany hanampy anao handramby soa amy famakia Baiboly.
“Inona no Hanampy Anao ho Tia Mamaky Baiboly” (Ny Tilikambo Fiambenana No. 1 2017)
Ino ty fomba telo azonao amakia Baiboly?
“Afaky Manampy Ahy va ty Baiboly?—Fizarà 1: Mazotoa Mandiniky Baiboly” (Lahatsoratsy amy jw.org ao)
Henteo ato ty raha azonao atao mba ho azonao tavy ty famakia Baiboly.
Mandrambesa torohevitsy baka amin’olo fa ela namakia Baiboly.