FIANARA 56
Miezaha Hiharo Raiky Avao
Lafa miaraky amy mpiara-manompo amintsika rey tsika, le mahatsapa ani-safàni-Davida Mpanjaka toy hoe: “Soa sady mahafalifaly lafa miharo petraky noho miharo raiky ty mpirahalahy!” (Salamo 133:1) Tsy mandeha ho azy avao fiharoa raiky zay, fa mila ezaky baka amintsika kiraidraiky.
1. Ino ty mampiavaky ty vahoaki-Ndranahary?
Fa nisy fotoa va iha namonjy fivoria tan-tany hafa any? Mety tsy ho azonao soa ty safàn’olo ao, fe tsy mahatiaro hoe vahiny mihintsy iha. Nanino? Satria mitovy iaby ty boky noho gazety ampiasantsika mba hianara Baiboly. Tsika koa samby miezaky hifankatea. Ndre aia ndre aia ty misy antsika, le samby ‘mikaiky ty anarani-Jehovah’ iaby tsika, sady ‘miharo raiky manompo azy.’—Zefania 3:9.
2. Ino ty azonao atao mba hampisy fiharoa raiky amy fiangona eo?
“Mifankatiava marè amy fo.” (1 Petera 1:22) Akory ty hanoriha ani-torohevitsy io? Ka mifantoky amy toetsy ratini-hafa, fa ilao hoe ino ty toetsy soany. Mety hoe miaraky matetiky amy mpiara-manompo sisany iha satria mitovy ty raha teanareo. Fe mba miezaha koa hinama amy rahalahy noho anabavy tsy mitovy aminao. Mila miezaky mafy koa iha mba tsy hanavakavaky mihintsy, ndre am-ponao ao avao aza.—Vakio 1 Petera 2:17.a
3. Ino ty hataonao laha mana problemo amy mpiara-manompo iha?
Miharo raiky tsika, fe samby tsy lavorary koa. Kindraiky zany tsika mety handiso fanantenà na hampalahelo olo, na mety hisy olo koa hanao raha mampalahelo antsika. Zay mahavy ty Safà-Ndranahary hivola hoe: ‘Mahaiza avao mifanenga hadisoa tanteraky. Nanenga tanteraky ty hadisoanareo Jehovah, le mba manaova ho zay koa nareo.’ (Vakio Kolosianina 3:13.) Fa imaro tsika ro nampalahelo ani-Jehovah, fe manenga ty hadisoantsika avao ie. Teany koa zany laha manenga ty hadisoani-mpiara-manompo reo tsika. Laha hitanao hoe nanao raha mampalahelo olo iha, le manaova raha malaky mba handamina ani-raha zay.—Vakio Matio 5:23, 24.b
DINIHO LALIKY
Hodinihintsika hoe ino iaby ty raha azo atao mba hiharo raiky noho hilongo soa avao ty fiangona.
Ino ty hataonao mba hilongoa amin’olo hafa?
4. Ka manavakavaky
Irintsika laha mba tea ani-mpiara-manompo reo iaby tsika. Fe mety tsy ho mora amintsika ty hinama amin’olo tsy mitovy amintsika. Ino ty afaky manampy antsika? Vakio Asan’ny Apostoly 10:34, 35, bakeo iaraho midiniky fanontanea retoa:
Ekeni-Jehovah ho Vavolombelony ty karazan’olo iaby. Ka akory zany ty tokony ho fiheveranao ty olo tsy mitovy fiavia aminao?
Ino ty karazani-fanavakavaha mpihita mbaminareo etoy? Manino iha ro tsy tokony hanao ho zay?
Vakio 2 Korintianina 6:11-13, bakeo iaraho midiniky fanontanea toy:
Ino ty azonao atao mba hifandrambesa marìny amy mpiara-manompo reo?
5. Miezaha hanenga hadisoa noho hilongo amin’olo hafa
Tsy manao hadisoa mihintsy Jehovah ka tsy mila fanengà hadisoa baka amintsika. Vakio Salamo 86:5, bakeo iaraho midiniky fanontanea retoa:
Ndranahary manao akory Jehovah laha hentea andinin-teny io?
Manino ro mahafalifaly anao ty mahay hoe manenga hadisoa ie?
Amy raha manao akory ro mety ho sarotsy ty hoe hilongo amin’olo?
Ino ty azontsika atao mba hanahafa ani-Jehovah, ka hilongo soa avao amy mpiara-manompo amintsika reo? Vakio Ohabolana 19:11, bakeo iaraho midiniky fanontanea retoa:
Ino ty azonao atao laha misy olo manao raha mampeloky na mampalahelo anao?
Kindraiky tsika manao raha mampalahelo olo. Ka ino ty tokony hataontsika? Alefaso VIDEO toy, bakeo iaraho midiniky fanontanea io.
Nana problemo tamy mpiara-manompo ranabavy tamy video teo iny. Ino ty nataony mba hilongo soa ndraiky rozy?
6. Mifantoha amy toetsy soani- rahalahy noho anabavy reo
Lafa mifampitakosiky marè amy mpiara-manompo reo tsika, le haintsika iaby ty toetsy soan-drozy noho ty handran-drozy. Ino ty azontsika atao mba hifantoha amy ty toetsy soan-drozy? Alefaso VIDEO toy, bakeo iaraho midiniky fanontanea io.
Ino ty afaky manampy anao hifantoky amy toetsy soani-mpiara-manompo reo?
Ze toetsy soantsika ro ifantohani-Jehovah. Vakio 2 Tantara 16:9a, bakeo iaraho midiniky fanontanea toy:
Ino ty tsapanao lafa hainao hoe mifantoky amy toetsy soanao Jehovah?
Mbo lafovily avao ty vatosoa ndre somary misy pilaky aza. Ho zay koa rahalahy noho anabavintsika reo, ndre tsy lavorary rozy le mbo lafovily amy Jehovah avao
MIERITSERITSY TY OLO SISANY HOE: “Zaho aloha tsy hanenga hadisoan’olo zao laha tsy mifona amiko tse ie.”
Manino tsika ro tokony ho tea manenga hadisoa?
FAMINTINA
Manampy ty fiangona hiharo raiky iha lafa manenga hadisoa sady tea ty rahalahy noho anabavy iabiaby.
Famerena
Ino ty hanampy anao tsy hanavakavaky?
Ino ty hataonao laha mana problemo amy mpiara-manompo iha?
Manino iha ro ta hanahaky ani-Jehovah ka hanenga ty hadisoan’olo?
DINIHO KOA RETOA
Manino ro manampy antsika tsy hitsaratsara olo ty fanohara raiky nataoni-Jesosy?
Mila miala tsiny va tsika ndre mahatsapa aza hoe tsy diso?
“Fomba Itandrovana Fihavanana ny Fialan-tsiny” (Ny Tilikambo Fiambenana 1 Novambra 2002)
Manino ro nanampy an-drozy tsy hanavakavaky ty raha nianaran-drozy?
Laha mana problemo amy mpiara-manompo iha, ino ty azonao atao sandrany tany mbo tsy miteraky koronta amy fiangona eo raha iny?
“Miezaha Haneho Fitiavana Rehefa Mandamina Tsy Fifankahazoana” (Ny Tilikambo Fiambenana Mey 2016)
a Hazavany amy Fanazavà Hevitsy 6 ao hoe be fitiava ty Kristiana ka mitandrina soa mba tsy hamindra arety amin’olo hafa.
b Hazavany amy Fanazavà Hevitsy 7 ao hoe akory ty handamina ty raha mifandramby amy resaky drala noho ty resaky fitsarà amy tribinaly.