Tahafo ty Anjely Tsy Mivaliky

1-2. a) Ino ty tsy mampitovy antsika amy ty anjely? b) Ino ty itovizantsika amin-drozy?

VAHOAKIN’i Jehovah tsika ka anisan’ny fianakavia mifankatea sady manompo azy. Anisan’ny fianakavia io ty rahalahy noho anabavintsika maneran-tany, noho ty anjely an-tapitrisany. (Dan. 7:9, 10) Lafa mandiniky ty anjely tsika, le mety hivola hoe tena tsy mitovy amintsika rozy. Fa nisy, ohatsy, ty anjely, fa ela biby talohan’ny namorona antsika. (Joba 38:4, 7) Tena mahery rozy laha ampitovizy amintsika. Masy noho marina rozy, fa tsika tsy lavorary.​—Lioka 9:26.

² Fe ndre eo aza zay, le misy raha maro koa itovizantsika amin-drozy. Samby afaky manahaky ty toetsy soasoa ananan’i Jehovah, ohatsy, tsika. Mana safidy malalaky manahaky ty anjely avao koa tsika. Samby mana ty anarany noho ty toetsiny ty anjely, mitovy amintsika avao, le samby mana ty andraikitsiny amy fanompoa an’i Jehovah. Mila manompo an’ny Mpamoro antsika iny tsika, manahaky ty ataon’ny anjely.​—1 Pet. 1:12.

3. Ino ty azontsika ianara baka amy ty anjely tsy mivaliky?

³ Hitantsika teo hoe maro ty raha itovizantsika amy ty anjely. Afaky mampahery noho mampianatsy antsika raha maro zany ty modely soa ananan-drozy. Miambany ty anjely, tea olo, miaritsy, noho miezaky mafy mba hahavy ty fiangona halio avao. Hodinihintsika ato hoe akory ty azontsika anahafa an-drozy.

MIAMBANY TY ANJELY

4. a) Akory ty ampisehoan’ny anjely fa miambany rozy? b) Manino ty anjely ro miambany? (Salamo 89:7)

⁴ Miambany ty anjely tsy mivaliky. Manaraky ty toromarikin’i Jehovah avao rozy ndre mana traikefa maro aza, tena mahery, sady hendry. (Sal. 103:20) Tsy mirengirengy mihintsy rozy lafa manao ze raha nampanovin’i Jehovah an-drozy, na mampiasa ty hery ananan-drozy mba hanomeza voninahitsy ty vatan-drozy. Falifaly rozy manao ze raha ampanovin’i Jehovah an-drozy, ndre tsy hain’olo aza ty anaran-drozy.a (Gen. 32:24, 29; 2 Mpanj. 19:35) Lafa misy manome voninahitsy an-drozy, le tsy maneky rozy satria hain-drozy fa tokony ho an’i Jehovah raha zay. Manino zany ty anjely ro miambany manahaky ani-zay? Satria tea an’i Jehovah rozy sady tena manaja azy.​—Vakio Salamo 89:7.

5. Akory ty nampisehoan’ny anjely iny fa niambany ie lafa nananatsy an’ny apostoly Jaona? (Henteo koa sary io.)

⁵ Toy misy tantara raiky ahità hoe miambany ty anjely. Tokony tamy tao 96 A.K. tany ty nisehoany. Nisy anjely tsy hay anara zay nampiseho fahità tena mahatseriky tamy apostoly Jaona. (Apok. 1:1) Nanao akory Jaona lafa nahita an’ny raha rey? Niankohoky tamy anjely iny teo ie mba hivavaky taminy. Fe avy le nisakanan’ny anjely iny ie sady nivolaniny hoe: “Tandremo! Ka manao ani-zao! Fa mpanompo avao aho, manahaky anao noho ty rahalahinao ... Ndranahary ro ivavaho!” (Apok. 19:10) Tena niambany anjely io! Tsy nila voninahitsy na dera ie. Avy le niresahiny Jaona hivavaky amy Jehovah Ndranahary. Fe tsy nanambany an’i Jaona koa anjely iny tamy fotoa io. Tsy mitovy amy Jaona aloha anjely io satria fa nanompo an’i Jehovah fa ela biby sady tena mahery. Fe niambany ie ka nivola tamy apostoly io ie hoe mpanompo manahaky azy avao. Marina fa nila nananatsy an’i Jaona ie, fe tsy nasiaky ie lafa nanao ani-zay fa nisoa fanahy. Mety hainy hoe navaka Jaona lafa nahita an’ny raha tamy fahità rey, le zay ty antony nahavy azy niankohoky taminy teo.

6. Akory ty ampisehoantsika hoe miambany manahaky ty anjely tsika?

⁶ Akory ty azontsika anahafa ty anjely? Ta hiasa mafy amy fanompoa an’i Jehovah koa tsika, fe tsy mirengirengy amy ty raha ataontsika, na mampiseho hoe tena mahay raha. (1 Kor. 4:7) Ankoatsini-zay, tsy tokony hieritseritsy tsika hoe anabo laha ampitovizy amin’olo hafa satria hoe fa nanompo an’i Jehovah fa ela, na mana tombotsoa tsy ananan-drozy. Tokony vomaiky hiambany tsika arakaraky ty ananantsika andraikitsy maro. (Lioka 9:48) Ta hanompo ty hafa tsika, manahaky ty ataon’ny anjely. Tsy teantsika laha mieritseritsy ty olo hoe anabo tsika laha ampitovizy aminy.

7. Akory ty ampisehoantsika hoe miambany tsika lafa mananatsy na manome torohevitsy olo?

⁷ Afaky asehontsika koa hoe miambany tsika lafa mananatsy na manoro hevitsy olo, ohatsy hoe ty rahalahy noho anabavintsika, na ty anakintsika. Mila manome torohevitsy mivanta tsika kindraiky. Fe akory ty ampisehoantsika hoe soa fanahy manahaky an’ny anjely nananatsy an’i Jaona iny tsika? Mila mitandrina tsika mba tsy hanao ze hahakivy an’ny olo iny. Laha tsy mieritseritsy ty vatantsika ho anabo mandilatsy ty olo hafa tsika, le hanaja olo noho ho soa fanahy ka hanome torohevitsy baka amy Baiboly ao.​—Kol. 4:6.

TEA OLO TY ANJELY

8. a) Laha hentea ty Lioka 15:10, akory ty ampisehoan’ny anjely hoe tea olo rozy? b) Akory ty anampean’ny anjely antsika lafa tsika mitory? (Henteo koa sary io.)

⁸ Tsy hoe tsy midary ty raha mahazo ty olombelo ty anjely na mieritseritsy hoe tsy misy dikany tsika. Vomaiky aza asehon-drozy hoe tea olo rozy. Falifaly rozy lafa misy mpanota mibebaky, zany hoe lafa misy aondry very mimpoly amy Jehovah, na lafa misy olo manova ty fomba fiainany ka manaraky ty fahamarina. (Vakio Lioka 15:10.) Manampy antsika koa ty anjely lafa tsika mitory. (Apok. 14:6) Tsy mitory mivanta amin’olo aloha rozy, fe mety hitariky antsika mba hahita olo ta hianatsy mikasiky an’i Jehovah. Mazava ho azy fa tsy afaky mivola tsika hoe tsy maintsy mitariky antsika hahita olo manahaky ani-zay avao ty anjely. Afaky mampiasa fomba hafa koa Jehovah, ohatsy hoe ty fanahiny masy, mba hanampea ze olo ta hianatsy mikasiky azy, na hanampea ty mpanompony hahita an’olo rey. (Asa. 16:6, 7) Fe ty anjeliny ro tena ampiasany mba hanampy antsika lafa tsika mitory. Ka lafa mitory ty vaovao soa zany tsika, le afaky matoky fa ho eo avao ty anjely hanampy antsika.​—Henteo ty efajoro hoe “Nivaly ty Vavakin-drozy.”b

9. Akory ty ampisehoantsika hoe tea olo manahaky ty anjely tsika?

⁹ Akory ty azontsika anahafa ty anjely? Lafa tsika maharè fampandrenesa hoe voaray ndraiky ty olo raiky, le afaky falifaly manahaky ty anjely koa tsika. Ataontsika azo antoky fa hain’ny rahalahy na anabavintsika iny hoe tea azy tsika sady falifaly mahita azy manompo an’i Jehovah ndraiky. (Lioka 15:4-7; 2 Kor. 2:6-8) Afaky asehontsika koa hoe manahaky ty anjely tsika ka manao ze fara herintsika amy asa fitoria. (Mpito. 11:6) Manampy antsika ty anjely lafa tsika mitory. Afaky mila fomba koa tsika mba hanampea ty rahalahy noho anabavintsika amy ty fanompoan-drozy. Afaky manao fandahara va, ohatsy, tsika mba hiaraha amy mpitory vaovao? Sa tsika afaky manampy ty rahalahy noho anabavy be tao na tsy salama, amy zay rozy afaky manompo avao?

10. Ino ty ianarantsika baka amy tantaran’i Sara?

¹⁰ Fe manao akory laha ta hanao raha maro amy fanompoa an’i Jehovah tsika, fe tsy ahafahantsika manao ani-zay ty raha iainantsika? Ino ty azontsika atao? Mbo afaky mila fomba avao tsika mba hahafahantsika miaraky miasa amy ty anjely, amy asa fitoria. Diniho ty raha iainan’i Sara,c ranabavy mipetraky an’Inde any. Fa 20 tao eo ty nanaovany mpisava lala, fe narary ie ka tsy afaky niala tam-pandria teo. Tena nikivy ie. Fe lasa nifalifaly ndraiky Sara satria nanampy azy ty mpiara-manompo tamy fiangona teo. Niezaky namaky Baiboly tsy tampaky koa ie. Mazava ho azy fa tsy maintsy nila fomba hafa ie mba hanaovany ty fanompoany. Ndre ty hipetraky aza tsy vitany ka tsy afaky nanoratsy taratasy ie. Fitoria an-telefony avao ro mba niazony natao. Farany nikaihiny an-telefony olo nitsidihiny rezay, le nivola rozy fa ta hianatsy Baiboly. Ino ty vokany? Vola vitsivitsy avao, le nana mpianatsy 70 Sara! Tsy afaky nampianatsy an’olo maro reo ie, farany nafindrany tamy mpitory hafa ty sisany. Fa mivory henanizao ty ankamaroan’ny mpianatsy reo. Azo antoky fa falifaly biby ty anjely miaraky miasa amy rahalahy noho anabavy manahaky an’i Sara, satria manao ze fara herin-drozy rozy amy asa fitoria!

MIARITSY TY ANJELY

11. Akory ty ampisehoan’ny anjely tsy mivaliky hoe tena miaritsy rozy?

¹¹ Tena miaritsy ty anjely tsy mivaliky ka modely soa ho antsika. Fa an’arivony tao zay ty nampisy ty tsy rariny noho ty faharatia, le niaritsy ani-zay avao rozy. Nihitan-drozy ty nanoheran’i Satana noho ty anjely maro hafa an’i Jehovah, kanefa niaraky nanompo azy rozy taloha. (Gen. 3:1; 6:1, 2; Joda 6) Mivola ty Baiboly fa nisy anjely raiky tsy mivaliky nitoherin’ny demonia mahery, tanatin’ny andro maromaro. (Dan. 10:13) Tsy zay avao fa nanomboky nampisy ty olombelo, le olo vitsivitsy avao ro nihitan’ny anjely hoe nifily hanompo an’i Jehovah. Fe ndre eo raha iaby rezay, le mbo falifaly manompo an’i Jehovah avao ty anjely sady tena mafana fo. Hain-drozy fa tsy maintsy mbo hofafà-Ndranahary ty tsy rariny iaby amy fotoa mety.

12. Ino ty hanampy antsika hiaritsy?

¹² Akory ty azontsika anahafa ty anjely? Mety hiatriky ty tsy rariny tsika, manahaky ty anjely. Fe matoky manahaky an-drozy tsika fa amy fotoa mety, le halà-Ndranahary ty raha raty iaby. Tsy “vozaky manao raha soa mihintsy” zany tsika, manahaky anjely tsy mivaliky reo. (Gal. 6:9) Mampitamà koa Ndranahary fa hampeany hiaritsy tsika. (1 Kor. 10:13) Afaky mangataky ty fanahiny amy Jehovah tsika mba hanampy antsika hanam-pahareta noho ho falifaly. (Gal. 5:22; Kol. 1:11) Ka manao akory laha miatriky fanohera tsika? Matokisa tanteraky an’i Jehovah sady ka matahotsy. Hanoha noho hampahery anao avao ie.​—Heb. 13:6.

MANAMPY TY FIANGONA MBA HALIO AVAO TY ANJELY

13. Ino ty asa manoka nampanovy ty anjely amy andro farany zao? (Matio 13:47-49)

¹³ Nitendren’i Jehovah hanao asa manoka ty anjely amy andro farany zao. (Vakio Matio 13:47-49.) An-tapitrisany ty olo kinto amy vaovao soa. Manao fanovà ty sisany amin’olo reo mba hiay mifanaraky amy ty fitsipikin’i Jehovah noho hanompo azy amy fomba itiavany azy, fa tsy manahaky ani-zay ty hafa. Ty anjely ro nitendrè mba “hanavaky ty raty fanahy amin’olo marina.” Andraikitsin-drozy zany ty miaro ty fiangona mba halio avao. Fe tsy midika zay hoe tsy afaky mimpoly amy Jehovah sasy ze olo niala taminy, ndre ino ino antony. Tsy midika koa zay hoe tsy hisy problemo mihintsy amy fiangona eo. Fe afaky matoky tsika fa miasa mafy ty anjely mba hahavy ty fiangona halio avao.

14-15. Akory ty ampisehoantsika hoe ta hiaro ty fiangona mba halio avao tsika, manahaky ty ataon’ny anjely? (Henteo koa sary reo.)

¹⁴ Akory ty azontsika anahafa ty anjely? Mila miezaky mafy tsika mba hahavy antsika hifandramby soa amy Jehovah avao. Manao ani-zay tsika laha ze olo tea azy avao ro inamantsika sady miezaky tsika manalavitsy ze raha mety hanimba ty finamantsika aminy. Manampy ty fiangona halio avao tsika amy zay. (Sal. 101:3) Afaky manampy ty mpiara-manompo amintsika koa tsika mba hahavy an-drozy tsy hivaliky amy Jehovah avao. Ino, ohatsy, ty tokony hataontsika laha haintsika hoe misy mpiara-manompo nanao fahotà bevata? Teantsika ie ka hampirisihintsika hamonjy anti-panahy. Ka manao akory laha tsy mamonjy anti-panahy ie? Mila resahintsika amy anti-panahy ty raha nataony. Teantsika laha mahazo fanampea malaky mpiara-manompo amintsika iny satria fa simba ty fifandrambesany amy Jehovah!​—Jak. 5:14, 15.

¹⁵ Mampalahelo fa tsy maintsy alà tsy ho anisan’ny fiangona ty olo sisany manao fahotà bevata. Laha miseho raha zay, le ‘tsy hifandramby’ amin-drozy sasy tsika.d (1 Kor. 5:9-13) Manampy ty fiangona halio avao fandahara zay. Ankoatsini-zay, laha tsy mifandramby amin’olo nalà tsy ho anisan’ny fiangona rey tsika le mampiseho amin-drozy hoe teantsika rozy. Mety hanampy an-drozy hahatsapa raha zay hoe mila mimpoly amy Jehovah rozy. Laha mimpoly rozy, le miaraky falifaly amy Jehovah noho ty anjeliny tsika.​—Lioka 15:7.

16. Ino iaby ty teanao hiezaha mba hanahafa ty anjely?

¹⁶ Mana tombotsoa bevata tsika satria engàn’i Jehovah hianatsy mikasiky ty anjely noho hiaraky hiasa amin-drozy! Enganè tsika hanahaky ty toetsy soan-drozy ka hiambany, ho tea olo, hiaritsy, noho hiezaky mafy mba hahavy ty fiangona halio avao. Laha manahaky ty anjely tsy mivaliky tsika, le ho anisan’ny fianakavian’i Jehovah koa tsika ka hanompo azy mandrakizay.