Milà Fampionona amy Jehovah

1. Nanao akory ty fiainan’ny Jiosy natao sesitany ta Babylona any rey?

TAO maro lasa zay, tsy nankatò an’i Jehovah avao matetiky ty Jiosy. Farany nengan’i Jehovah horavàn’ny Babylonianina rey ty tanàn-drozy, le bakeo rozy natao sesitany ta Babylona any. Nanao akory ty fiainan-drozy lafa rozy nipetraky tany? (2 Tan. 36:15, 16, 20, 21) Marina aloha hoe afaky nanao ty fiainan-drozy mahazatsy an-drozy avao rozy tany. (Jer. 29:4-7) Fe tsy nimora ty fiainan-drozy sady tsy ho zay koa moa ty fiaina nirin-drozy. Ino ty nitsapan-drozy? Mariho ty safàn’ny Jiosy raiky natao sesitany tsy nivaliky toy: “Tamoron’ny vavarano ta Babylona any zahay ro nipetrapetraky. Nitany zahay lafa nahatiaro an’i Ziona.” (Sal. 137:1) Tena nikivy Jiosy natao sesitany reo ka nila fampionona, fe aia ty hahitan-drozy ani-zay?

2-3. a) Ino ty nataon’i Jehovah ho an’ny Jiosy natao sesitany rey? b) Ino ty hodinihintsika amy lahatsoratsy toy ato?

² “Ndranaharin’ny fampionona iaby” Jehovah. (2 Kor. 1:3) Be fitiava ie, ka teany ty mampionona ani-ze olo iaby mamonjy azy. Hain’i Jehovah fa haneky ty fananarany ty sisany amy Jiosy natao sesitany rey, le himpoly aminy. (Isaia 59:20) Farany nampanoratin’i Jehovah boky raiky manday ty anarany Isaia mpaminany, 100 tao mahery talohan’ny nanaova sesitany an-drozy ta Babylona any. Ino ty raha kendreny? Hoy Isaia: “‘Ampaherezo, ampaherezo ty vahoakiko,’ hoy Ndranaharinareo iny.” (Isaia 40:1) Nampiasa an’ny boky nisoratin’Isaia mpaminany zany Jehovah mba hampahereza an’ny Jiosy natao sesitany rey.

³ Mila fampionona koa tsika kindraiky, manahaky an’ny Jiosy natao sesitany rey. Hodinihintsika amy lahatsoratsy toy ato ty fomba telo nampiononan’i Jehovah an’ny Jiosy rey: 1) Nampitamà ie fa hanenga ty hadisoani-ze mibebaky, 2) nanome fanantenà ty vahoakiny ie, le 3) nanampy an-drozy mba tsy hatahotsy ie. Lafa mandiniky an’ny hevitsy reo tsika, le mariho hoe manino ro mahasoa antsika fanomezan-toky namean’i Jehovah reo.

MANENGA TY HADISOANTSIKA JEHOVAH

4. Akory ty nampisehoan’i Jehovah fa Ndranahary mamindra fo ie? (Isaia 55:7)

⁴ “Ndranaharin’ny fiferinesa” Jehovah. (2 Kor. 1:3) Nampiseho an’ny toetsiny zay ie lafa nampitamà fa hanenga ty hadisoani-ze Jiosy mibebaky. (Vakio Isaia 55:7.) Hoy ty asany: “Tea anao noho tsy mivaliky aminao mandrakizay aho ka hamindra fo aminao.” (Isaia 54:8) Akory ty hampisehoan’i Jehovah hoe mamindra fo ie? Nijalijaly vahoaky jiosy rey vokatsy ty raha nataon-drozy, fe nampitamà Jehovah fa tsy ho andevo a Babylona any mandrakizay rozy. Voafetra avao zany ty fotoa hijanonan-drozy any. (Isaia 40:2) Azo antoky fa nampahery noho nanome toky an’ny Jiosy nibebaky rey safà reo!

5. Laha ampitovizy amy Jiosy natao sesitany rey, manino tsika amy zao ro afaky matoky tanteraky hoe manenga ty hadisoantsika Jehovah?

⁵ Ino ty ianarantsika baka amy zay? Parè hanenga tanteraky ty fahadisoan’ny mpanompony Jehovah. Vomaiky mana antony hatokisa ani-zay tsika amy zao, laha ampitovizy amy Jiosy natao sesitany rey. Fa manino? Satria haintsika hoe ino ty raha fa nataon’i Jehovah mba hanengà ty fahotantsika. An-jatony tao tafaran’ny nivolanan’Isaia an’ny faminania iny, le naniraky an’ny Anakilahiny teany iny Jehovah mba hanome ty ainy ho vilim-panavota ho ani-ze mpanota iaby mibebaky. Vokatsin’ny soro nataony zay, le afaky ‘mamafa’ tanteraky ty fahotantsika Jehovah. (Asa. 3:19; Isaia 1:18; Efes. 1:7) Tena mamindra fo vatany Ndranahary tompoantsika iny!

6. Manino ro mampahery ty mieritseritsy hoe manenga hadisoa Jehovah? (Henteo koa sary io.)

⁶ Afaky mampahery antsika safàn’i Jehovah amy Isaia 55:7 ao io, laha mbo manome tsiny marè ty vatantsika tsika. Mety mbo manome tsiny ty vatany vokatsin’ny fahadisoa nataony taloha tany ty sisany amintsika, ndre fa nibebaky aza. Mety hahatsapa ho zay tsika sirtò laha mbo mizaka ty vokatsin’ny fahadisoa nataontsika iny tsika. Fe laha fa nibebaky noho niova tsika, le afaky matoky hoe fa nanenga ty hadisoantsika Jehovah. Ka lafa manenga ty hadisoantsika ie, le mifily tsy hahatiaro ty fahotantsika sasy. (Ampitovizo amy Jeremia 31:34.) Laha Jehovah aza fa tsy mahatiaro sasy ty fahotantsika taloha, tsy tokony mba hanao ho zay koa va tsika? Ty ezaky ataontsika amy zao ro vatan-draha aminy, fa tsy ty fahadisoa nataontsika taloha. (Ezek. 33:14-16) Kely sisa, le hamafa tanteraky ty vokatsin’ny fahadisoa nataontsika Jehovah Babantsika, azy Baban’ny fiferinesa iny.

7. Ino ty hanampy antsika hila fanampea laha nanota tsika fe namonivony an’ny raha iny?

⁷ Ino ty tokony hataontsika laha manenjiky antsika ty eritseritsintsika satria nanao fahotà bevata tsika, fe navonivonintsika raha zay? Mampirisiky antsika ty Baiboly mba hila fanampea amy anti-panahy. (Jak. 5:14, 15) Mety tsy ho mora aloha ty hanao ani-zay. Fe ho voatosiky hamonjy an’ny lahilahy tsy mivaliky reo tsika laha mibebaky noho tiarovintsika hoe be fitiava noho manenga hadisoa Jehovah noho lahilahy nitendreny hanampy antsika reo. Diniho moa ty raha niseho tamy rahalahy Arthur.a Nanome tsiny marè ty vatany ie vokatsin’ny raha tsy nety nataony taloha, fe nampiasa anti-panahy Jehovah mba hampahereza azy. Hoy ty asany: “Nanenty sary tiva avao aho tanatin’ny tao raiky. Fe lafa naharè lahateny raiky zay aho, le nieky ty fahotako tamy valiko noho tamy anti-panahy. Nahatiaro maivamaiva aho tafarani-zay, fe mbo nanome tsiny marè ty vatako avao. Nampahatiaro ahy anti-panahy rey hoe tsy nanary ahy Jehovah. Manity antsika ie satria teany tsika. Nisoa fanahy rozy lafa niresaky tamiko, le nidosiky ty foko raha zay sady nanampy ahy hanity ty toe-tsaiko.” Mpisava lala maharitsy Arthur henanizao sady mpikarakara fiangona. Tena mampahery ty mahay hoe mamindra fo amintsika Jehovah lafa tena mibebaky tsika!

MANOME FANANTENÀ ANTSIKA JEHOVAH

8. a) Ino ty nampitamanin’i Jehovah an’ny Jiosy natao sesitany rey? b) Araky ty Isaia 40:29-31, ino ty vokatsin’ny fanantenà zay tamy Jiosy nibebaky rey?

⁸ Atao raha tsy nisy raha tamany sasy Jiosy natao sesitany rey, laha ty fomba fanentin’olombelo azy. Fanjakà farani-ze natanjaky eran-tany Babylona sady nalaza hoe tsy namototsy ani-ze andevo niazony. (Isaia 14:17) Fe namean’i Jehovah fanantenà vahoakiny rey. Nampitamà ie fa hanafaky an-drozy, sady tsy misy afaky hanaka azy tsy hanao ani-zay. (Isaia 44:26; 55:12) Mitovy amy lemboky io ty fahitan’i Jehovah an’i Babylona. (Isaia 40:15) Tsofiny indraiky mandeha avao le rava. Ino ty vokatsin’ny fampitamana zay tamy Jiosy rey? Azo antoky fa nampahery an-drozy raha zay. Fe mbo mandilatsini-zay aza, satria nanoratsy Isaia hoe: “Ze mitamà an’i Jehovah ro hahazo hery ndraiky.” (Vakio Isaia 40:29-31.) Hanome hery an-drozy zany fampitamana zay “ka hitily anabo rozy, sahala hoe mana elatsin’ny voromahery.”

9. Manino Jiosy rey ro natoky hoe hanatanteraky ty fampitamanany Jehovah?

⁹ Namean’i Jehovah porofo koa Jiosy rey mba hahavy an-drozy hatòky ty fampitamanany. Ino ty porofo nameany an-drozy? Mba diniho tse moa ty faminania fa nitanteraky tamy zay. Fa nihain-drozy, ohatsy, hoe niresin’i Asyria ty fanjakàn’Israely tavaratsy any le nataony sesitany ty vahoaky. (Isaia 8:4) Nihitan-drozy koa ty nandravan’i Babylona an’i Jerosalema noho ty nanaova sesitany ty olo tao. (Isaia 39:5-7) Tsy zay avao fa nihitan-drozy koa hoe nipotsehy ty mason’i Zedekia Mpanjaka, le nandesy ta Babylona any ie. (Jer. 39:7; Ezek. 12:12, 13) Nitanteraky iaby raha nivolanin’i Jehovah reo. (Isaia 42:9; 46:10) Vomaiky raha zay nahavy an-drozy hatòky fa ho tanteraky koa ty fampitamanan’i Jehovah hoe hafahy baka Babylona any rozy!

10. Ino ty hanampy antsika hifantoky amy raha tamanintsika iny avao amy andro farany zao?

¹⁰ Ino ty ianarantsika baka amy zay? Lafa tsika kivy le afaky mampionona noho manome hery antsika ndraiky ty raha ampitamanin’i Jehovah amy hoavy. Miay amy fotoa sarotsy tsika henanizao. Manohitsy antsika koa ty fahavalo-Ndranahary sady tena mahery rozy. Fe tsy tokony ho kivy tsika. Mampitamà Jehovah fa hiay mandrakizay amy Paradisa ao tsika. Tena hilamy soa tsika lafa ao sady tena hiada. Tokony ataontsika mazava soa am-po noho an-tsaintsika ao avao fanantenà zay. Laha tsy zay, le hanjavozavo raha tamanintsika io, manahaky olo manenty zariday soasoa amy lafonety maloto rey. Lasa tsy hita ty mahasoa an’ny zariday iny. Ka manao akory zany ty “hanadiovantsika an’ny lafonety io,” amy zay hazava soa avao ty raha tamanintsika? Azontsika atao ty manoka fotoa matetiky mba hametsivetsea hoe hanao akory ty fiainantsika lafa amy tontolo vaovao ao. Afaky mamaky lahatsoratsy, manenty video, noho mijanjy hira miresaky mikasiky ty raha tamanintsika tsika. Lafa mivavaky tsika, le azontsika resahy amy Jehovah ze raha fa tsy linintsika ty hahatanteraky azy amy Paradisa ao.

11. Ino ty nanampy an’ny ranabavy mana arety miteza io hahazo hery hiatrehany an’ny raha mahazo azy io?

¹¹ Tena mampionona noho mampahery vatany ty hoe mana fanantenà. Diniho moa ty tantaran’ny ranabavy Joy. Mana arety miteza ie. Zao ty nivolaniny: “Lafa kivy biby aho, le resahiko amy Jehovah ze raha tsapako. Haiko fa hainy ty raha mahazo ahy. Lafa manao ani-zay aho, le tsapako hoe amean’i Jehovah ‘hery mandilatsy ty ahin’olombelo’ aho.’” (2 Kor. 4:7) Mametsivetsy ty fiainany amy tontolo vaovao ao koa ranabavy Joy, satria amy fotoa zay le “tsy hisy olo hivola hoe: ‘Marary aho.’” (Isaia 33:24) Hahazo hery koa tsika laha mamboraky ty am-pontsika ao amy Jehovah noho mifantoky amy ty raha tamanintsika avao.

12. Manino tsika ro afaky matoky ty raha ampitamanin’i Jehovah? (Henteo koa sary io.)

¹² Manahaky ty nataon’i Jehovah tamy Jiosy natao sesitany rey koa ty ataon’i Jehovah henanizao. Maro biby ty antoky ameany mba hahavy antsika hatòky ty fampitamanany. Eritsereto ty faminania hitantsika fa tanteraky amy zao. Hitantsika, ohatsy, ty firenena matanjaky resahin’ny Baiboly hoe hanjaka amy zao, tsy ia zay fa ty Firenena Matanjaky Anglè-Amerikein. ‘Hisy ampahany amy fanjakà io hatanjaky, fa hisy ampahany halemy.’ (Dan. 2:42, 43) Maharè koa tsika hoe misy “horohoron-tany amy pilasy samby hafa”, le mitory amy “firenena iaby” tsika. (Mat. 24:7, 14) Lafa hitantsika hoe tanteraky ty faminania manahaky ani-reo noho ty maro hafa, le vomaiky mino tsika hoe tsy maintsy ho tanteraky ty raha soa iaby ampitamanin’i Jehovah antsika.

MANAMPY ANTSIKA TSY HATAHOTSY NA HIASA LOHA JEHOVAH

13. a) Ino ty raha sarotsy hatrehin’ny Jiosy rey lafa mihamarìny ty fanafaha an-drozy? b) Laha hentea ty Isaia 41:10-13, akory ty nampiononan’i Jehovah an’ny Jiosy rey?

¹³ Fa nampitamà an’ny Jiosy nipetraky ta Babylona any rey Jehovah hoe hafaha tsy ho andevo rozy. Fe hainy fa hiatriky raha sarotsy rozy arakaraky ty mampariny an’ny fotoa io. Fa nivola Jehovah hoe hisy firenena matanjaky raiky hanafiky noho hifehy ty firenena manodidy an’i Babylona, le bakeo hanafiky an’i Babylona, lafa marìny ty fotoa hanafaha an-drozy. (Isaia 41:2-5) Fe tsy misy antony tokony hampatahotsy an-drozy. Fa manino? Satria fa nampionona ty vahoakiny Jehovah taloha tany hoe: “Ka matahotsy fa manoha anao aho. Ka miasa loha fa zaho ro Ndranaharinao.” (Vakio Isaia 41:10-13.) Ino ty teany hovolany amy hoe: “Zaho ro Ndranaharinao”? Tsy hoe nampahatiaro an’ny Jiosy rey ie mba hivavaky aminy satria fa hain-drozy hoe mila manao ani-zay rozy. Ta hampahatiaro avao ie hoe mbo nanoha an-drozy ie sady hanampy an-drozy.​—Sal. 118:6.

14. Ino koa ty nataon’i Jehovah mba hanampea ty Jiosy tsy hatahotsy?

¹⁴ Ino koa ty nataon i Jehovah mba hanampea an’ny Jiosy natao sesitany rey tsy hatahotsy? Nampahatiaroviny rozy fa tsy misy mahery noho mahay raha mandilatsy azy. Nivolaniny Jiosy rey mba hanenty ty lanitsy feno basia. Bakeo nivola tamin-drozy ie hoe ie ro namoro an’ny raha rey sady hainy mihintsy ty anaran-drozy kiraidraiky. (Isaia 40:25-28) Laha ty basia aza hain’i Jehovah ty anaran-drozy kiraidraiky, handraky moa ty mpanompony! Mazava ho azy fa hainy koa ty anaran-drozy kiraidraiky. Laha nana hery hamorona ty basia Jehovah, tsy hana hery hanampea ty mpanompony koa va ie? Tsy nisy antony tokony hampiasa loha na hampatahotsy an’ny Jiosy natao sesitany rey zany.

15. Ino ty nataon’i Jehovah mba hampiomàna an’ny Jiosy natao sesitany rey amy ty raha hiseho?

¹⁵ Natoron’i Jehovah ty vahoakiny koa ty raha mila ataon-drozy lafa avy ty fotoa hanafaha an-drozy. Nivola tamy firenena io ie amy voalohandohan’ny bokin’i Isaia iny hoe: “Mandehana militsy amy efitranonareo anatiny ao, nareo vahoakiko, le hilio ty varavara. Mivonia tsielatsiela avao, zisiky hialan’ny heloky iny.” (Isaia 26:20) Mety nanaraky an’ny toromariky io ty Jiosy lafa nanafiky an’i Babylona Kyrosy Mpanjaka. Nivola mpahay tantara grika raiky zay fa lafa nilitsy ta Babylona tao Kyrosy, le “nanome baiko [ty maramilany] mba hamono ani-ze olo iaby hitan-drozy ivelany any.” Mba eritsereto avao moa hoe mety ho nanao akory zay ty raha tsapan’olo ta Babylona tao! Fe mety tsy natahotsy Jiosy rey satria nanoriky ty toromarikin’i Jehovah rozy.

16. Manino tsika ro tsy tokony hatahotsy ty raha hiseho amy hoavy? (Henteo koa sary io.)

¹⁶ Ino ty ianarantsika baka amy zay? Kely sisa le hiatriky ty fijalea bevata tsika. Anisan’ny fotoa tena mafy amy tantaran’olombelo raha io. Lafa manomboky raha io, le hikorotan-tsay noho hatahotsy ty olo iaby amy tany toy. Fe tsy hanahaky ani-zay ty vahoakin’i Jehovah. Haintsika fa Jehovah ro Ndranaharintsika. Tsy hatahotsy tsika satria haintsika hoe “fa marìny ty fanafaha [antsika].” (Lioka 21:28) Mbo hatòky an’i Jehovah avao tsika ndre manafiky antsika aza ty firenena maromaro mitambatsy. (Ezek. 38:18) Hampiasa ty anjeliny Jehovah mba hiarova antsika. Tsy maintsy hanome toromariky koa ie mba hiarova ty aintsika. Akory ty hanomezany an’ny toromariky rezay? Mbo tsy haintsika zay. Fe mety ho amy alalan’ny fiangona misy antsika ro hahazoantsika toromariky manahaky ani-zay. Mety ho ty fiangona ro teany hovolany amy hoe ‘efitranontsika anatiny,’ satria voaro mafy tsika lafa ao. Akory zany ty hiomanantsika amy ty raha hiseho tsy ho ela? Mila mifandramby marìny amy rahalahy noho anabavintsika reo tsika, manoriky ty toromariky baka amy fandaminan’i Jehovah, sady resy lahatsy hoe Jehovah ro mitariky ty fandamina misy antsika.​—Heb. 10:24, 25; 13:17.

17. Ino ty azonao atao mba hahazoa fampionona baka amy Jehovah?

¹⁷ Ndre niatriky raha sarotsy aza Jiosy natao sesitany rey, le nampionona an-drozy Jehovah. Hanao manahaky ani-zay amintsika koa ie. Ka ndre ino ino ty raha mety hiseho hamaray, le milà fampionona amy Jehovah avao. Matokisa fa tena mamindra fo ie. Mifantoha amy ty raha tamaninao avao. Tiarovo fa Jehovah ro Ndranaharinao, ka tsy hisy raha hampatahotsy anao mihintsy.