Misy Fanjakà Tsy Misy Koronta va Afaky Manday an’ny Tanintsika toy?​—Ino ty Volanin’ny Baiboly?

Maro ty fanjakà mikoronta henanizao amy tany toy iaby. Ndre amy tany eritseretintsika hoe milamy rey koa aza, le mbo misy avao ty koronta satria manao raha manafa-baraka ty fanjakà avao ty mpanao politiky. Mifankariny loatsy koa ty valim-pifidiana amy tany sisany, le eo koa ty alihevitsy politiky noho ty grevy.

Mivola ty Baiboly fa misy fanjakà raiky tsy misy koronta. Mety fa naharè mikasiky an’ny fanjakà io vasa iha. Io fanjakà niresahin’i Jesosy tamy vavaky nampianariny iny.

•  “Mivolana manahaky ani-zao zany lafa mivavaky: ‘Babanay an-danitsy any, enganè hohamasìny ty anaranao! Enganè ho avy ty Fanjakànao! Enganè hatao an-tany etoy ty sitraponao, manahaky ty an-danitsy any!’”​—Matio 6:9, 10.

Ino ty raha volanin’ny Baiboly mikasiky an’ny Fanjakà io?

Fanjakà raiky tsy misy koronta

Manjaka an-danitsy any Fanjakà io.

•  Nikaihin’i Jesosy hoe “Fanjakàn’ny lanitsy” fanjakà io. (Matio 4:17; 5:3, 10, 19, 20) Zay mahavy azy nivola hoe: “Tsy anisani-zao tontolo zao ty Fanjakàko.”​—Jaona 18:36.

Hisolo ty fanjakàn’olombelo ty Fanjakà-Ndranahary.

•  Zao ty volanin’ny Baiboly mikasiky ty raha hataon’ny Fanjakà io: “Hotorotoroeny noho haravany fanjakà iaby reo [ty fanjakàn’olombelo], fa ie ho eo avao zisiky amy fotoa tsy voafaritsy.”​—Daniela 2:44.

Tsy ho rava mihintsy Fanjakà io satria Jesosy Kristy ro Mpanjakany.

•  Mivola ty Baiboly hoe: “Ty fandaisany haharitsy zisiky amy fotoa tsy voafaritsy fa tsy handalo, le ty fanjakàny tsy ho rava.”​—Daniela 7:13, 14.

Handay fiadana noho filamina an-tany etoy Fanjakà io.

•  Hoy ty Baiboly: “Samby hipetraky ambanin’ny voalobokiny noho ty aviaviny eny iaby rozy, sady tsy hisy hampatahotsy an-drozy.”​—Mika 4:4

Mianara misimisy mikasiky an’ny Fanjakà io

Tamy Jesosy tan-tany etoy, le nataony vatan’asa ty “nitory ty vaovao soan’ny Fanjakà iny.” (Matio 9:35) Fa nivola koa ie hoe:

•  “Hotorỳ amy tany toy iaby ty vaovao soan’ny Fanjakà iny, ho vavolombelo amy firenena iaby, zay vo ho avy ty farany.”​—Matio 24:14.

Torỳ amy tany 240 mahery henanizao ty vaovao soan’ny Fanjakà io. Mampirisiky anao zahay mba hianatsy misimisy mikasiky an’ny Fanjakà io noho ty soa ho azonao lafa manday ie.

Henteo azafady ty video hoe Ino Fanjakà-Ndranahary Zao?