Niripaky ty Antsasany Mahery amy ty Biby an-tany etoy Tanatin’ny 50 Tao Lasa Zay—Ino ty Volanin’ny Baiboly?

Tamy 9 Oktobra 2024 teo, le nampiboaky tatitsy mikasiky ty vokatsin’ny raha ataon’olombelo amy ty biby ty World Wildlife Fund (WWF). Voaresaky amy tatitsy io ao fa “tanatin’ny 50 tao lasa zay (1970-2020), le fa ho ty antsasany mahery amy ty biby an-tany etoy ro niripaky.” Nampitandrina avao koa tatitsy io hoe: “Tsy iankania laha mivola tsika hoe tena hisy vokany amy ty fiaina an-tany etoy vatany, ty raha hataontsika anatin’ny dimy tao manaraky.”

Tsy mahatseriky aloha laha meloky ty ankamaroan’olo lafa mahita tatitsy manahaky ani-reo. Tena teantsika tany misy antsika toy, le tsy teantsika koa ty mahita an’ny biby reo mijaly. Mampalahelo antsika raha zay satria natao hikarakara ty biby tsika olombelo. Fa zay ty nanamboara-Ndranahary antsika.—Genesisy 1:27, 28; Ohabolana 12:10.

Mety hieritseritsy amy zay iha hoe: ‘Mba ho vitantsika avao va ty hiaro ty biby an-tany etoy? Ino ty volanin’ny Baiboly?’

Raha tamàny mikasiky ty hoavy

Ndre hiezaky manao akory tsika olombelo, le tsy hahavita hanavotsy ty biby. Ndranahary raiky avao ro tena afaky miaro an-drozy. Fa nivola mialoha ty Baiboly amy Apokalypsy 11:18 ao hoe ‘handripaky ani-ze manimba ty tany’ Ndranahary. Misy raha roe ianarantsika baka amy andininy io:

1. Tsy hengà-Ndranahary hanimba na hamotiky an’ny tany toy mihintsy ty olombelo.
2. Kely sisa le hanao raha Ndranahary. Manino tsika ro mivola ani-zay? Satria vomaiky tena atahora handripaky ty biby ty olombelo amy androntsika zao.

Ino ty hatao-Ndranahary mba handamina an’ny problemo io? Hampiasa an’ny Fanjakàny an-danitsy any iny ie mba handay an’ny tany toy iaby. (Matio 6:10) Hampianarin’ny fanjakà io hikarakara noho hiaro ty biby an-tany etoy ty olombelo mpanoriky safà.—Isaia 11:9.