Manao Akory ty Mariazin’ny Vavolombelon’i Jehovah?

Matetiky ty mariazin’ny Vavolombelon’i Jehovah misy fety tsotsotra noho tsy misehoseho sady misy lahateny boribory miory amy Baiboly. Afarani-zay le mety hanasa olo hiaraky hisakafo amin-drozy mpivaly rey.a Soa ho hay fa nanatriky mariazy koa Jesosy tamy tanà kaihy hoe Kana, tamy ie vo nanomboky ty fanompoany.​—Jaona 2:1-11

• Ino iaby ty atao amy mariazy iny?

• Aia ty anaova ty mariazin’ny Vavolombelon’i Jehovah?

• Ia ty afaky manatriky?

• Akanjo manao akory ro azo andesy?

• Azo atao va ty manome kadô an’ny mpivaly rey?

• Azo atao va ty mampiakatsy vera mba hiraria soa an’ny mpivaly rey?

• Misy famitsaza fotsimbary na tapatapaky taratasy va?

• Misy hany noho raha inomy va?

• Misy moziky alefa na tsinjaky va?

• Mankalaza aniversera mariazy va ty Vavolombelon’i Jehovah?

Ino iaby ty atao amy mariazy iny?

Anisan’ny tampany bevata amy mariazy iny ty lahatenim-panambalia. Maharitsy 30 minity eo ho eo raha io, le misy Vavolombelon’i Jehovah raiky manao azy. Avanta amy mpivaly rey lahateny io. Misy torohevitsy baka amy Baiboly ao hazavany soa amin-drozy mba hanampea an-drozy hana tokantrano sambatsy noho hifankatea avao.​—Efesianina 5:33.

Amy tany maro, le misy mpiandraikitsy anivon’ny Vavolombelon’i Jehovah eo mahazo alala amy fanjakà hanoratsy fanambalia. Amy raha manahaky ani-zay, lafa ho tampitsy lahateny iny, le hifanao voady azy hifanambaly rey. Afaky mifanolotsy peratsy koa rozy. Lafa vita zay, le ho volanini-azy nanoratsy fanambalian-drozy iny hoe mpivaly ara-dalàna rozy.

Amy tany hafa, le takìn’ny lalàna ty hanaova fisoratam-panambalia amy birom-panjakà, ohatsy hoe amy lapan’ny tanàna, na anatrehan’ny solontenam-panjakà. Manao ani-zay rozy aloha kelin’ny hanaova an’ny lahatenim-panambalia iny. Laha mbo tsy nifanao voady rozy tamy birom-panjakà any, le mety ho azon-drozy atao ty manao an’ny raha zay lafa marìny ho tampitsy lahateny iny. Laha fa nisy voady nifanaovan-drozy tany, fe mbo ta hanao an’ny raha zay ndraiky rozy, le azon-drozy atao zay. Fe hataon-drozy amy filazàm-potoa lasa raha zay. Hisy vavaky lafa vita lahateny iny mba hangataha fitahia amy Ndranahary ho an’ny mpivaly vao rey.

Aia ty anaova ty mariazin’ny Vavolombelon’i Jehovah?

Maro amy Vavolombelon’i Jehovah ro mifily hanao ty mariaziny amy Efitrano Fanjakà any, laha misy ty eo.b Laha handamy fetifety rozy afarani-zay, le hataon-drozy amy pilasy hafa raha zay.

Ia ty afaky manatriky?

Laha atao amy Efitrano Fanjakà any mariazy iny, le matetiky azon’olo iaby atrehy, ndre Vavolombelo zay ndre tsy Vavolombelo. Laha hanisy fetifety mpivaly rey, le rozy ro hitingy ty olo hasàn-drozy.

Akanjo manao akory ro azo andesy?

Tsy misy akanjo manoka tsy maintsy andesy, laha atao amy Efitrano Fanjakà any mariazy iny. Fe miezaky manoriky ty torolalan’ny Baiboly ty Vavolombelon’i Jehovah, ka manao akanjo maontina noho manaja ty olo hafa. Tean-drozy laha manao ani-zay koa ty olo hafa. (1 Timoty 2:9) Mazava ho azy fa mbo manoriky an’ny torolala zay avao mpivaly rey, laha mifily hanisy fetifety.

Azo atao va ty manome kadô an’ny mpivaly rey?

Mampirisiky antsika hatariky ty Baiboly. (Salamo 37:21) Mahafalifaly ty Vavolombelon’i Jehovah zany ty manome kadô na mahazo kadô mariazy. (Lioka 6:38) Fe tsy mangataky hamea kadô ty mpivaly Vavolombelon’i Jehovah, sady tsy tononin-drozy amin’olo maro eo ty anarani-ze olo nanome kadô an-drozy. (Matio 6:3, 4; 2 Korintianina 9:7; 1 Petera 3:8) Tsy mandrara ani-zay aloha ty Baiboly. Fe hahavy an’olo nasà rey hahatiaro hafahafa raha zay.

Azo atao va ty mampiakatsy vera mba hiraria soa an’ny mpivaly rey?

Tsy raràn’ny Baiboly ty mampiakatsy vera na mifandom-bera. Fe mety hangataky an’ny vahiny nasà rey tsy hanao ani-zay ty mpivaly sisany, mba tsy hanafintohy ty olo hafa.​—Romanina 14:21.

Misy famitsaza fotsimbary na tapatapaky taratasy va?

Aha. Amy tany sisany, misy olo mamitsy fotsimbary, tapatapaky taratasy, na raha hafa mitovitovy amy reo, amy mpivaly vao rey. Mino rozy fa handay sansy, hasambara, ho an’ny mpivaly rey raha zay, sady hahavy an-drozy ho lava velo. Fe tsy manao ze raha misy ifandrambesany amy finoanoam-poana ty Vavolombelon’i Jehovah. Anatini-zay ty firarian-tsoa mba ho soa vinta, satria tsy mifanaraky amy raha volanin’ny Baiboly.​—Isaia 65:11.

Misy hany noho raha inomy va?

Tsy misy hany noho raha inomy haroso anatin’ny fandahara na lahateny atao amy Efitrano Fanjakà any. Misy mpivaly sisany manisy fetifety afarani-zay, amy zay mba hisy hany na fangalà hetaheta haroso ty vahiny. (Mpitoriteny 9:7) Laha manapa-kevitsy mpivaly rey hoe hanisy raha misy alkôly na toaky, le mila ataon-drozy azo antoky hoe tsy hisy olo ho mamo. Mila ataon-drozy azo antoky koa hoe ze olo fa ampy tao avao ro mahazo mino.​—Lioka 21:34; Romanina 13:1, 13.

Misy moziky alefa na tsinjaky va?

Laha nanapa-kevitsy mpivaly rey hoe hanao fetifety, le afaky mifily rozy hoe hanisy moziky noho tsinjaky. (Mpitoriteny 3:4) Rozy ro hitingy ty hira halefa arakaraky ze teatean-drozy noho ty kolontsain-drozy. Laha amy Efitrano Fanjakà any ty anaova azy, le matetiky hira miory amy Baiboly ro alefa.

Mankalaza aniversera mariazy va ty Vavolombelon’i Jehovah?

Anjaran’ny mpivaly Vavolombelon’i Jehovah ro manapa-kevitsy na hankalaza aniversera ty mariazin-drozy na tsy hankalaza, satria tsy mampirisiky na mandrara ty hanaova ani-zay ty Baiboly. Laha manapa-kevitsy rozy hoe hankalaza, le rozy roe avao ro hanao ani-zay, na miaraky amy nama noho fianakavian-drozy.