Manao Akory Mianatsy Baiboly Miaraky amy Vavolombelon’i Jehovah zao?
Misy fandahara ataon’ny Vavolombelon’i Jehovah mba hahafahanao mianatsy Baiboly amy fomba tsotra sady mandaitsy. Lafa mianatsy Baiboly miaraky aminay iha, le ho hainao hoe akory ty atao laha teanao ty:
Ho sambatsy
Ho lasa nama-Ndranahary
Hahay ty raha ampitamanin’ny Baiboly mikasiky ty hoavy
Amy pejy toy ato
Tsy maintsy manjary Vavolombelon’i Jehovah va aho laha maneky hianatsy Baiboly?
Fa nianatsy Baiboly tamy Vavolombelon’i Jehovah aho taloha. Mbo afaky mianatsy ndraiky va aho?
Afaky mianatsy Baiboly avao va aho ndre tsy misy mpampianatsy aza?
Ino ty atao lafa mianatsy Baiboly?
Hisy olo raiky hampianatsy anao. Hianaranareo kiraidraiky ty foto-kevitsy amy Baiboly ao. Lafa mianatsy amy boky Ho Azonao Tavy ty Fiaina Zisiky Farany! iha, le ho hainao tsikelikely ty hafatsy amy Baiboly ao sady ho hitanao hoe manino raha zay ro afaky manampy anao. Laha mila fanazavà fanampiny iha, le henteo video toy.
Andoava drala va fianara io?
Aha. Manoriky an’ny safàn’i Jesosy toy ty Vavolombelon’i Jehovah: “Nahazo maimaim-poana nareo, le manomeza maimaim-poana.” (Matio 10:8) Fanampini-zay, le tsy andoava drala na vilỳ koa ty fitaova noho ty Baiboly ampiasà amy fianara io. Anatini-zay ty boky hoe Ho Azonao Tavy ty Fiaina Zisiky Farany!
Manao akory ty halavan’ny fianara io?
Misy fianara 60 hianaranareo. Laha mazoto iha, le afaky mianatsy indraiky na mandilatsy ani-zay nareo sankerinandro.
Ino ty azoko atao laha ta hianatsy aho?
1. Fenò ty fangataha hianatsy Baiboly amy internet ato. Hampiasànay ty fanazavà nampilirinao ato, amy zay hisy Vavolombelon’i Jehovah raiky hifandramby aminao.
2. Hisy mpampianatsy hifandramby aminao. Hohazavanin’ny mpampianatsy io aminao hoe ino ty hatao amy fianara Baiboly io. Laha mana fanontanea koa iha, le parè ie hamaly ty fanontaneanao.
3. Hifanarahanareo amy mpampianatsy anao iny ty fotoa noho ty pilasy hianaranareo. Afaky mianatsy an-tranonao any na an-telefony, na amy vidéoconférence, na an-taratasy, na amy alalan’ny email nareo. Lera raiky avao matetiky ty faharetan’ny fianaranareo, fe mety misy fotoa ho latsakini-zay na handilatsy ani-zay.
Afaky manohatsy avao tse va aho?
Eka. Fenò tse ty fangataha hianatsy Baiboly amy internet ato. Lafa misy mpampianatsy amy zay mikaiky anao, le hazavao aminy hoe zisita hanohatsy avao tse iha mba hahitanao azy. Hampiasa an’ny bokikely Ho Azonao Tavy ty Fiaina Zisiky Farany! iny ie. Misy fianara telo anatin’ny bokikely io ao. Ho hitanao afarani-zay hoe soa va sa manao akory mianatsy Baiboly zao.
Tsy maintsy manjary Vavolombelon’i Jehovah va aho laha maneky hianatsy Baiboly?
Aha. Teanay aloha ty mampianatsy olo ty raha resahin’ny Baiboly. Fe tsy misy olo forosevanay ho lasa Vavolombelon’i Jehovah zao. Atoronay azy avao hoe ino ty raha resahin’ny Baiboly sady hazavaninay aminy am-panajà raha zay. Ekenay fa samby mana ty safidiny ty olo, ka anjarany ty mifily ty raha hinoany.—1 Petera 3:15.
Afaky mampiasa ty Baiboliko manoka va aho?
Eka. Azonao ampiasà ze Baiboly teanao hampiasà. Ty Soratsy Masy—Fandikan-tenin’ny Tontolo Vaovao aloha ro tena fampiasànay. Mora azo sady marina soa fandikan-teny io. Fe ndre zay, le afaky mampiasa ze fandikan-teny fa nahazatsy azy ty olo lafa mianatsy Baiboly.
Azoko atao va ty manasa olo hafa hiaraky hianatsy amiko?
Eka. Tsy manahy aza ndre asanao iaby ty fianakavianao noho ty namanao.
Fa nianatsy Baiboly tamy Vavolombelon’i Jehovah aho taloha. Mbo afaky mianatsy ndraiky va aho?
Eka. Ho teanao biby aza ty fianara Baiboly amy zao, satria nampifanarahy amy ze tena mety amin’olo. Lasa vomaiky soasoa koa ie henanizao satria nasia video noho sarisary maro sady sahala miresadresaky io avao ty fianara azy.
Afaky mianatsy Baiboly avao va aho ndre tsy misy mpampianatsy aza?
Eka. Ie misy mampianatsy iny aloha ro tena tea ty ankamaroan’olo. Fe ndre zay, le misy avao koa ty ta hianatsy am-batany avao. Misy fitaova noho lahatsoratsy afaky manampy anao amy hoe Fitaovana Fianarana Baiboly ao. Anisan’ny raha ho hitanao ao retoa:
Video Mifototsy amy Baiboly. Ahità fampianara fototsy baka amy Baiboly ao video boribory reo.
Valin’ny Fanontanea Ara-baiboly. Ho hitanao ao ty valin’ny fanontanea sankarazany fapetrakin’olo mikasiky ty Baiboly.
Fanazavà Andinin-teny. Ho hitanao ao ty fanazavà mikasiky ty andinin-teny na fehezanteny fampiasàn’olo matetiky.