Hanjary Vavolombeloni-Jehovah va Aho Laha Mianatsy Baiboly Miaraky Amin-drozy?

Aha, tsy voatery. An-tapitrisany ro mianatsy Baiboly miaraky aminay, fe tsy voatery hanjary ho mpikamba amy fiangonanay ao.a Hampiseho aminao ty raha ampianarini-Baiboly ro raha kendreni-fandahara io. Iha avao ro mifily hoe ino ty hataonao lafa mahazo ani-fahaiza io iha. Maneky zahay fa anjaran’olo kiraidraiky ro mifily ty raha inoany.​—Josoa 24:15.

Afaky mampiasa ty Baiboliko va aho lafa mianatsy?

Eka. Marina aloha fa teanay ty mampiasa ty dikan-teny moderna hoe Ny Soratra Masina—Fandikan-tenin’ny Tontolo Vaovao, noho hanome raiky amy raha io ho anao tsy andoava drala laha ta hana azy iha, fe tsy mampanino anay koa laha mampiasa ty Baibolinao manoka iha. Afaky mianatsy mikasiky ty fanavota noho ty raha soa ampitamany amy Baiboly ao iha amy alalani-fampiasà ze dikan-teny misy.

Manino nareo ro mianatsy Baiboly miaraky amin’olo tsy finoa raiky aminareo?

• Ty fitiava ani-Jehovah Ndranahary ro antony voalohany mahavy anay hampianatsy ty hafa ty raha nianaranay, satria teany hanao ani-raha zay ty Kristiana. (Matio 22:37, 38; 28:19, 20) Tsapanay fa tsy misy tombontsoa bevata mandilatsy ty hoe “mpiaraky miasa amy Ndranahary”, ka zay ro mahavy anay manampy ty olo hianatsy ty raha ampianary amy Safàny ao.​—1 Korintianina 3:​6-9.

• Ty fitiava ty mpiara-belo koa ro mandrisiky anay hanao ani-raha zay. (Matio 22:39) Mahafaly anay ty mizara amin’olo hafa ty raha soa nianaranay.​—Asa 20:35