Manino ty Vavolombeloni-Jehovah ro Tsy Mamaly ty Fandratiratia Iaby Ataon’olo Amin-drozy?
Manaraky ty torohevitsini-Baiboly ty Vavolombeloni-Jehovah ka tsy mamaly ty fandratiratia noho fangalà baraka ataon’olo. Mivola, ohatsy, ty Baiboly hoe: “Mangala baraka ty vatany ze olo mananatsy ty mpikizakizaky.” (Ohabolana 9:7, 8; 26:4) Ka mba tsy hahavoatariky anay amy fifamalea amy fandratiratia ataon’olo, le aleonay mifantoky amy fanaova ty raha mampifaly a Ndranahary.—Salamo 119:69.
Ndre ty Baiboly aza mivola hoe “misy fotoa tsy ivolana, le misy fotoa ivolana.” (Mpitoriteny 3:7) Mamaly ty fanontanean’olo ta hahay ty fahamarina zahay, fa tsy militsy amy aly hevitsy tsy misy dikany. Manaraky ty fampianara noho ty ohatsy nameani-Jesosy noho ty Kristiana tamy taonjato voalohany zahay amy raha zay.
Jesosy: Tsy namaly mihintsy Jesosy lafa nisy nandratiraty, tamy ie tanatrehani-Pilato teo. (Matio 27:11-14; 1 Petera 2:21-23) Nasaran’olo ho mpiboboky divay noho tea hany koa Jesosy fe tsy namaly. Mifanohitsy amy zay fa, nengàny ho ty raha nataony ro hanaporofo amin-drozy fa tsy diso ie, mifanaraky amy torolala hoe: “Ty fahendrean’olo, le hamarinini-ze raha ataony.” (Matio 11:19) Fe namaly ty olo mpandratiraty azy ie, lafa hitany hoe mitaky ani-zay ty raha miseho.—Matio 15:1-3; Marka 3:22-30.
Nampeani-Jesosy ty mpanori-dia azy mba tsy ho kivy lafa misy mandratiraty. Hoy ty asany: “Sambatsy nareo laha ratiratìn’olo noho enjehiny voho amoronany vandy ka asarany nanao kila raha raty iaby zao, ka zaho ro antony.” (Matio 5:11, 12) Fe laha afaky manararaotsy mitory ty mpanori-dia azy lafa ratiratìn’olo, le hotanterahiny raha nampitamaniny toy hoe: ‘Hanome anareo vava noho fahendrea tsy haini-fahavalonareo iaby resea na tohery aho.’—Lioka 21:12-15.
Apostoly Paoly: Nanoro hevitsy ty Kristiana koa ie, mba tsy hifamaly amin’olo mpanohitsy, ka nivolaniny fa “tsy mahasoa noho tsy misy dikany” raha zay.—Titosy 3:9; Romanina 16:17, 18.
Apostoly Petera: Nampirisiky ty Kristiana ie, mba hiaro ty finoan-drozy laha mbo azo atao. (1 Petera 3:15) Fe maneky koa ie fa tena soa laha aseho amy ty raha atao raha zay fa tsy amy raha volàny. Nanoratsy ie fa: ‘Amy fanaova raha soa ro hampienenanareo ty vavan’olo tsy mahihitsy, mivola raha tsy hainy.’ —1 Petera 2:12-15.