Ino Iaby ty Raha Anampeanay ty Kristiana Namanay Tratsy ty Loza?

Lafa misy loza, le manao raha malaky ty Vavolombelo Jehovah soa hanampea ty Kristiana namany. Hita baka amy raha zay fa mifankatea vatany zahay. ( Jaona 13:34, 35; 1 Jaona 3:17, 18) Manao akory ro anomezanay fanampea zay?

Manome drala zahay. Nanome drala hanampea ty Kristiana namany ta Jodia any ty Kristiana baka Antiokia any, lafa nisy mosary. (Asan’ny Apostoly 11:27-30) Manahaky zay koa fa lafa renay fa misy Kristiana namanay tratsy ty loza, le mandefa drala ty fiangona misy anay, soa hanampea an-drozy.—2 Korintianina 8:13-15.

Manome fanampea hafa zahay. Anovy ty anti-panahy ze ahaiza hoe manao akory iaby ty olo kiraidraiky amy fiangona ao lafa misy loza. Misy komity mikarakara amy fanomeza hany, rano malio, siky, trano, aoly. Maro amy ty Vavolombelo Jehovah ro mianto-bata handehana amy tany tratsy ty loza. Manampy amy fanamboara trano noho Efitrano Fanjakà rozy lafa avy any. Mifankatea noho fa zatsy miaraky miasa zahay, le zay ro mahavy anay ho afaky mifanampy malakilaky lafa misy loza. Manampy ty olo ‘finoa raiky aminay’ zahay, fe afaky manampy olo hafa koa ndre ino ndre ino ty fivavaha misy azy.—Galatianina 6:10.

Manome fanampea baka amy Baiboly ao zahay. Kivy marè ty olo lafa tratsy ty loza, le mila fanampea. Amy fotoa manahaky zay, le ilà ty hery baka amy Jehovah azy ‘Ndranahary manao ze tsy hahakivy olo’ iny. (2 Korintianina 1:3, 4) Volaninay aminolo tratsy ty loza ty raha soa ampitamany amy Baiboly ao. Volaninay amin-drozy fa tsy ho ela le hatao ty Fanjakà Ndranahary tsy misy sasy ty loza mampijaly antsika.—Apokalypsy 21:4.

• Manino ty Vavolombelo Jehovah ro afaky manome fanampea malakilaky lafa misy loza?

• Ino ty fanampea baka amy Baiboly ao volaninay aminolo tratsy ty loza?