Akory ty Azonao Anampea Laha Nisy Loza Niseho?

Mihamaro mihamaro avao henanizao ty loza miseho. Lafa manampy ani-ze nitratsini-loza rey tsika, le tokony ho voalamy soa ty fomba anaova ani-zay. Zay ro nahavy ty Filan-kevi-pitantana hametraky Sampan-draharaha Mpanarombaky amy Loza amy sampana kiraidraiky.

Lafa haini-rahalahy amy sampan-draharaha io ao hoe nisy loza niseho, le kaihin-drozy ty anti-panahy amy pilasy nisehoani-raha iny mba hahaiza hoe ino ty fanampea ilàni-mpitory reo. Laha bevata marè ty voka-dratini-loza iny ka tsy ho voalamini-mpitory an-tanà eo avao, le hisy rahalahy mahay hotendreni-sampana mba hitariky ty fanampea tra-boina. Mety hanontaneani-rahalahy reo ze afaky manampy an-tsitrapo, na afaky manome fitaova. Mety hovilin-drozy an-tanà eo koa ze raha ilà le bakeo hozaràn-drozy.

Ahazoa tombony maro fomba fiasa io. Tsy mifangaro, ohatsy, ty asa, sady ze asa tokony hatao avao ro atao. Tsy mandany drala noho fitaova koa raha zay. Tsy zay ty raha miseho laha samby manatanteraky ze raha eritseretiny avao ty rahalahy noho anabavy.

Rahalahy nitendreni-sampana rey ro mety hamaritsy hoe hotrino ty drala ilà amy fanampea tra-boina iny, le firy ty mpiasa an-tsitrapo ilà. Mety hamonjy ty manam-pahefà an-tanà eo koa rozy, satria afaky manampy antsika hahavita ani-asa iny malaky raha zay matetiky. Ka tsy tokony hisy olo hitariky famorian-drala, na handefa enta fanampea, na handeha amy pilasy nisy loza iny, laha tsy nahazo toromariky hanao ani-zay.

Ndre eo zay, le maniry hanampy tsika lafa misy rahalahintsika tratsini-loza. (He 13:16) Tena teantsika rozy! Ka ino ty azontsika atao? Azontsika atao ty mivavaky ho ani-ze nitratsini-loza iny noho ho ani-azy manampy tra-boina reo. Zay ty vatan-draha marè. Afaky manao fanomeza ho ani-asa amy tany toy iaby koa tsika. Fa mahazo tari-dala baka amy Filan-kevi-pitantana ty biròni-sampana kiraidraiky, ka rozy ro tena mahay ty fomba farani-soa hampiasà ani-fanomeza rey. Fe laha maniry hanampy mivanta tsika sady afaky manao ani-zay, le afaky mameno ty taratasy Fangatahana ho Mpiasa An-tsitrapo Manao Fanorenana eo An-toerana (DC-50).

HENTEO TY VIDEO HOE RANOBE TA BREZILY TANY, BAKEO VALEO FANONTANEA TOY:

Ino ty tena nampieky anao tamy fanampea tra-boina nataoni-Vavolombeloni-Jehovah, lafa nisy ranobe ta Brezily tany tamy 2020?