Ampeo Hiaritsy Raha Sarotsy ty Olo Hafa

1. Ino matetiky ty ataoni-Jehovah mba hamalea ty vavaky ataoni-mpanompony?

FA NIHAINAO va hoe afaky mampiasa anao Jehovah mba hamalea ty vavaky ataon’olo hafa? Afaky manampy iha ndre anti-panahy, ndre mpikarakara fiangona, ndre mpisava lala, na mpitory amy fiangona eo. Afaky manampy koa iha ndre tanora ndre antitsy, ndre rahalahy ndre anabavy. Lafa misy olo tea ani-Jehovah mangataky fanampea aminy, le matetiky Ndranaharintsika io mampiasa ty anti-panahy noho ty mpanompony hafa tsy mivaliky mba ‘hanampy noho hampahery’ ani-olo iny. (Kol. 4:11) Tena tombontsoa bevata ty manompo ani-Jehovah noho mpiara-manompo amintsika reo manahaky ani-zay! Afaky manampy noho mampahery ani-mpiara-manompo amintsika reo tsika lafa misy arety miparitaky, loza, na fanenjeha.

AMPEO TY HAFA LAFA MISY ARETY MIPARITAKY

2. Manino ro mety ho sarotsy ty manampy ty hafa lafa misy arety miparitaky?

² Mety ho sarotsy amintsika ty mifanampy lafa misy arety miparitaky. Mety ho teantsika, ohatsy, ty hamangy ty namantsika, fe mampidi-doza ty manao ani-zay. Mety ho teantsika koa ty hanasa an’olo sahira amy resaky drala rey mba hiaraky hihina amintsika an-trano any, fe mbo tsy azo atao koa raha zay amy fotoa iny. Mety ta hanampy ty hafa tsika, fe mety ho sarotsy amintsika ty hanao ani-zay laha misy marary ty fianakaviantsika na sahira tsika. Fe ndre zay, le teantsika ty manampy ani-rahalahintsika reo, sady falifaly Jehovah laha manao ze azontsika atao tsika mba hanampea an-drozy. (Ohab. 3:27; 19:17) Ino ty azontsika atao?

3. Ino ty ianarantsika baka amy anti-panahy tamy fiangonan-dry Desi eo rey? (Jeremia 23:4)

³ Ino ty azoni-anti-panahy atao? Laha anti-panahy iha, le miezaha hahay soa ani-aondry reo. (Vakio Jeremia 23:4.) Hoy Desi, azy ranabavy niresahintsika tamy lahatsoratsy taloha tao iny: “Fa niaraky niasa tamiko noho tamy mpitory hafa avao ty anti-panahy tamy andia-mpitory nisy ahy, ndre tamy fanompoa eny zay ndre tamy fotoa hafa.”b Lasa nimoramora tamy anti-panahy rey amy zay ty nanampy ani-Desi lafa niseho ty arety mandripaky COVID-19 noho lafa nimatini-arety io ty sisany amy fianakaviany.

4. Nanino ty anti-panahy ro nahavita nanampy ani-Desi, le ino ty fianara ho ani-anti-panahy?

⁴ Nivola Desi hoe: “Fa nirambesiko ho nama anti-panahy rey, ka nimora tamiko ty niresaky tamin-drozy ze raha tsapako noho nampiasa loha ahy.” Ino ty fianara ho ani-anti-panahy? Araho soa aondry nampikarakarà anareo reo tany mbo tsy misy ty raha sarotsy. Minamà amin-drozy. Laha misy arety miparitaky ka tsy afaky mamangy ani-rahalahy noho anabavy reo mivanta iha, le milà fomba hafa hifandrambesa amin-drozy. Hoy Desi: “Misy fotoa, nisy anti-panahy maromaro nikaiky ahy na nandefa mesazy amiko tanatini-andro raiky. Tena nidosiky ty foko andinin-teny nivakin-drozy tamiko rey ndre andinin-teny fa haiko aza.”

5. Akory ty ahaizani-anti-panahy hoe ino ty raha ilàni-rahalahy noho anabavy reo, le ino ty azoni-anti-panahy atao mba hanampea an-drozy?

⁵ Akory ty ahaizanao hoe ino ty raha ilàni-rahalahy noho anabavinao reo? Afaky manontany an-drozy, ohatsy, iha, fe manaova soa mba tsy hahamenatsy azy. (Ohab. 20:5) Ampy soa va ty hanin-drozy, fanafody, noho ze raha hafa mety hilàn-drozy? Mety ho very asa va rozy na mety tsy hanan-drala handoava hofan-trano? Mila antsika va rozy mba hanampy an-drozy hahazo fanampea baka amy fanjakà laha misy raha zay? Nahazo fanampea baka amy mpiara-manompo Desi. Fe ty fitiava nasehoni-anti-panahy noho fampahereza namean-drozy ro tena nanampy azy. Hoy ty asany: “Niaraky nivavaky tamiko ty anti-panahy. Tsy tena tiaroko aloha hoe ino ty raha nivolanin-drozy, fe tsy halinoko ty raha nitsapako tamy rey. Sahala nivola tamiko Jehovah hoe: ‘Tsy raiky zao iha Desi.’ ”​—Isaia 41:10, 13.

6. Ino ty azoni-rahalahy noho anabavy amy fiangona eo atao mba hanampea olo hafa? (Henteo sary io.)

⁶ Ino ty azon’olo hafa atao? Fa haintsika hoe hikarakara ty rahalahy noho anabavy amy fiangona eo ty anti-panahy. Fe tsika iaby mihintsy ro teani-Jehovah hampahery noho hanampy ty olo hafa. (Gal. 6:10) Ndre manao raha kelikely aza tsika mba hanampea olo marary, le fa mampahery azy raha zay. Afaky miaraky amy babany, ohatsy, ty ajà lafa ie mamangy rahalahy raiky. Ty tanora afaky manao bazary na manao raha hafa ho ani-ranabavy raiky. Mety afaky miketriky hany ho an’olo marary koa ty olo hafa amy fiangona eo le manatitsy ani-raha iny an-tranony any. Mazava ho azy fa mila fampahereza ty olo iaby amy fiangona eo lafa misy arety miparitaky. Vasa afaky mijano kelikely tsika lafa vita fivoria le miresaky amy rahalahy noho anabavy reo, ndre mivanta zay ndre atao amy alalani-vidéoconférence. Na ty anti-panahy koa aza mila fampahereza. Misy mpiara-manompo sisany mandefa taratasy fisaora ho ani-anti-panahy, satria miasa mafy ho ani-rahalahy noho anabavy reo rozy sirtò lafa misy arety miparitaky. Tena soa laha manao ty anjarantsika tsika mba “hifampahery noho hifanampy avao”!​—1 Tes. 5:11.

AMPEO TY HAFA LAFA MISY LOZA

7. Ino ty raha sarotsy mety hiseho lafa misy loza?

⁷ Mety hiova tampoky ty fiainan’olo raiky lafa misy loza. Mety hamoy raha maro ty olo sisany, ohatsy hoe ty raha ananany, ty tranony, na ty olo teany mihintsy. Mety ho tratsini-loza reo koa ty rahalahy noho anabavintsika. Ino ty azontsika atao mba hanampea an-drozy?

8. Ino ty azoni-anti-panahy noho ty loham-pianakavia atao tany mbo tsy misy loza?

⁸ Ino ty azoni-anti-panahy atao? Nareo anti-panahy, ampeo ty rahalahy noho anabavinao mba hioma sandrany tany mbo tsy misy loza. Anovo azo antoky hoe hain’olo iaby amy fiangona eo ty raha mila ataon-drozy mba ho voaro, le akory ty fomba hifandrambesan-drozy amy anti-panahy. Hoy Margaret, azy ranabavy niresahintsika tamy lahatsoratsy taloha teo iny: “Nanao raha ilàni-fiangona ty anti-panahinay, mba hampitandrema anay hoe mbo manjeky afo amy faritsy misy anay iny. Nivola rozy hoe lafa zahay volanini-manam-pahefà hoe mila miala ty tranonay, na lafa mampidi-doza ty mijano ao, le tsy maintsy miala malaky.” Tena niavy amy fotoa mety fanazavà iny, satria nisy afo nanjeky ndraiky vola raiky mahery tafarani-zay. Lafa manao fotoam-pivavaha ty fianakavia, le azoni-loham-pianakavia resahy ty raha tokony hataon-drozy kiraidraiky. Laha mioma sandrany nareo trano raiky, le tsy hatahotsy iha fa ho kalma avao lafa misy loza.

9. Akory ty ataoni-anti-panahy mba hiaraky miasa soa rozy aloha noho afarani-loza iny?

⁹ Mpiandraikitsini-andia-mpitory va iha? Laha zay ie, le anovo azo antoky hoe anananao ty nimero noho adiresini-mpitory iaby amy andia-mpitory misy anao, le anovo mialoha raha zay tany mbo tsy misy loza. Manaova lista le henteo matetiky laha mbo marina raha iny. Lafa avy amy zay ty loza, le ho afaky hikaiky ty mpitory kiraidraiky iha mba hahaizanao ty raha ilàn-drozy. Avy le resaho amy anti-panahy mpandrindra raha zay, le ie amy zay ro hifandramby amy mpiandraikitsini-faritsy. Tena afaky hanampy rahalahy reo laha miaraky miasa. Lafa nitampitsy afo tamin-dry Margaret any iny, le tsy niroro tanatini-ndraiky andro noho tampany mpiandraikitsini-faritsin-drozy iny. Nandamy ty asa hataoni-anti-panahy rey ie, mba hahafahan-drozy hifandramby noho hikarakara ty raha ilàni-rahalahy noho anabavy 450 tsy maintsy niala ty tranon-drozy rey. (2 Kor. 11:27) Afaky nanampy rozy satria niaraky niasa ka nahazo pilasy hipetraha ze nila ani-zay.

10. Manino ro tokony ho vatan-draha amy ty anti-panahy ty fikarakarà ty aondry? (Jaona 21:15)

¹⁰ Andraikitsini-anti-panahy koa ty manome fampahereza baka amy Baiboly ao ho ani-rahalahy noho anabavy, noho manampy ani-ze kivy. (1 Pet. 5:2) Amy fotoa andalovani-loza iny, le tokony hataoni-anti-panahy azo antoky hoe voaro noho mana hany ty rahalahy noho anabavy kiraidraiky sady mana akanjo noho pilasy hipetraha. Fe vola maromaro afara atoy le mbo mila fampahereza baka amy Baiboly ao rozy sady mila olo hidary an-drozy. (Vakio Jaona 21:15.) Anisani-Komitini-Sampana Harold, sady fa nifampiresaky tamy rahalahy noho anabavy maro nitratsini-loza. Zao ty nivolaniny: “Elaela vo himpoly amy pilasiny ty fiainan-drozy. Mety hanomboky hiova tsikelikely ty fiainan-drozy, fe mety mbo tsy ho afaky an-tsainy ao ty longony nimaty, na ty hananany, na loza iny. Lasa malahelo amy zay ie saky mahatiaro ani-reo. Ara-dalàna fihetseham-po zay, fa tsy midika zay hoe tsy ampy finoa rozy.”

11. Ino ty raha mety hilàni-fianakavia?

¹¹ Manoriky ani-torohevitsy toy ty anti-panahy: “Miaraha mitany amy ze mitany.” (Rom. 12:15) Mila manome toky ani-azy nitratsini-loza rey ty anti-panahy hoe mbo tea an-drozy avao Jehovah noho mpiara-manompo reo. Hampeani-anti-panahy fianakavia rey mba hanohy ty fahazaran-drozy manao raha ara-panahy, ohatsy hoe mivavaky, mianatsy Baiboly, mivory, noho mitory. Azoni-anti-panahy ampirisihy koa ty ray aman-dreny mba hanampy ty anan-drozy hifantoky amy raha tsy vitani-loza simbà. Nareo ray aman-dreny, ampitiarovo ty ananareo hoe mbo Naman-drozy avao Jehovah sady eo avao ie hanampy an-drozy. Hazavao amin-drozy koa hoe mana rahalahy noho anabavy parè hanampy an-drozy amy tany toy iaby rozy.​—1 Pet. 2:17.

12. Ino ty azon’olo hafa atao mba hanampea tra-boina? (Henteo sary io.)

¹² Ino ty azon’olo hafa atao? Laha nisy loza mbaminareo mbeny, le anontaneo ty anti-panahy hoe ino ty azonao anampea. Mety afaky mampiantrano ani-azy tsy maintsy niala ty tranony rey vasa iha na mampiantrano ani-azy mpanarombaky amy loza rey. Mety afaky manome hany na raha hafa ilàni-mpitory sahira rey koa iha. Mbo afaky manampy avao iha ndre lavitsy anareo ty nandalovani-loza iny. Amy fomba akory? Afaky mivavaky ho ani-azy nitratsini-loza rey iha. (2 Kor. 1:8-11) Afaky manampy tra-boina koa iha laha manao fanomeza ho ani-asa maneran-tany. (2 Kor. 8:2-5) Laha afaky mandeha amy pilasy nandalovani-loza iny any iha, le anontaneo ty anti-panahy hoe ino ty azonao anampea. Laha nitendrè hanampy any iha, le mety hahazo fampiofana, amy zay iha azo ampiasà amy ze tena ilà anao.

AMPEO TY MPIARA-MANOMPO MBA HIARITSY FANENJEHA

13. Ino ty raha sarotsy atrehini-mpiara-manompo mipetraky amy tany andrarà ty asantsika rey?

¹³ Tena mafy ty fiaina amy tany andrarà ty asantsika rey. Mbo misy raha hafa koa atrehini-mpiara-manompo amy tany rey. Mety tsy manan-drala rozy, marary, noho maty longo. Vokatsini-fandrarà rey, le mety tsy ho afaky hitsidiky na hifampiresaky soa amy ze mila fampahereza ty anti-panahy. Zay, ohatsy, ty raha niseho tamy Andrei, azy niresahintsika tamy lahatsoratsy taloha teo iny. Nisahira ranabavy tamy andia-mpitoriny ao zay satria tsy nanan-drala. Mbo niaksidà tamy tomobily koa ranabavy iny. Niopereva matetitetiky ie ka tsy afaky niasa. Fe ndre teo fandrarà noho arety miparitaky iny, le nanao ze azony natao ty mpiara-manompo mba hanampea azy. Sady Jehovah koa moa mahay soa ty raha nahazo azy.

14. Akory ty ampisehoani-anti-panahy hoe miantehitsy amy Jehovah rozy?

¹⁴ Ino ty azoni-anti-panahy atao? Nivavaky Andrei sady nanao ze azony natao. Akory ty namaleani-Jehovah ty vavaky nataony? Nampiasa ani-ze olo afaky manampy amy fiangona eo Jehovah mba hanampea ani-ranabavy iny. Ty sisany nanatitsy azy amy dokotera. Misy koa nanome drala mba hanampea azy. Nataoni-Jehovah ze hahavy an-drozy hazoto hanampy azy. Le nataony azo antoky hoe nahavita nanome ze raha iaby nilàni-ranabavy io ty rahalahy noho anabavy amy fiangona eo. (Heb. 13:16) Laha voarara ty asantsika, le azonareo anti-panahy atao ty mangataky fanampea amin’olo hafa. (Jer. 36:5, 6) Fa ty tena vatan-draha, miantehera amy Jehovah. Afaky manampy anao ie mba hahafahanao mikarakara ani-rahalahy noho anabavintsika reo.

15. Ino ty azontsika atao mba hahavy antsika hiharo raiky avao lafa misy fanenjeha?

¹⁵ Ino ty azon’olo hafa atao? Lafa misy fandrarà, le mety ho zarazarà tsika ka olo vitsivitsy avao ro hiaraky mivory. Vomaiky zany tena ilà ty milongo soa amy rahalahy noho anabavintsika reo avao henanizao. Satana ro ialio fa tsy rahalahy noho anabavinao reo. Engao any ty hadisoani-rahalahinao reo, na iezaho alamy malaky ze raha tsy nifanarahanareo. (Ohab. 19:11; Efes. 4:26) Manaova raha voalohany mba hanampea olo hafa. (Tit. 3:14) Nisy vokany soa tamy mpiara-manompo tamy andia-mpitory nisy ani-ranabavy iny ty fanampea nameani-hafa azy. Lasa nifandramby marìny manahaky fianakavia io rozy.​—Sal. 133:1.

16. Laha hentea ty Kolosianina 4:3, 18, ino ty azontsika atao mba hanampea ani-rahalahy noho anabavintsika enjehy rey?

¹⁶ Maro ty rahalahy noho anabavintsika manompo ani-Jehovah avao ndre eo aza ty fandrarà ataoni-fanjakà. Ty sisany amin-drozy aza nigadrà. Azontsika atao ty mivavaky ho an-drozy noho ho ahi-ty fianakavian-drozy. Azontsika atao koa ty mivavaky ho ani-mpiara-manompo be herim-po rey. Mbo manoha ani-rahalahy noho anabavintsika gadra rey avao rozy, ndre mety ho voasambotsy aza. Mampahery ani-rahalahy rey rozy mba hahavy an-drozy hatòky ani-Jehovah avao, manome ze raha ilàn-drozy, sady miaro an-drozy amy fitsarà eny.c (Vakio Kolosianina 4:3, 18.) Ka halino mihintsy fa tena afaky manampy ani-rahalahy noho anabavy reo ty vavaky ataonao!​—2 Tes. 3:1, 2; 1 Tim. 2:1, 2.

17. Ino ty azonao atao henanizao mba ho parè hiatriky fanenjeha?

¹⁷ Afaky mioma sandrany iha noho ty fianakavianao mba hiatriky fanenjeha. (Asa. 14:22) Ka mifantoky marè amy ze raha raty mety hiseho. Aleo miezaky hifandramby soa amy Jehovah, le ampeo hanao manahaky ani-zay koa ty ananao. Laha miasa loha iha kindraiky, le aboraho amy Ndranahary iaby ze am-ponao ao. (Sal. 62:7, 8) Resaho amy ty fianakavianao ty antony mahavy anao matoky ani-Jehovah.d Manampy ty ananao hiatriky loza iha laha mioma mialoha. Manahaky ani-zay avao koa fa hanampy an-drozy iha laha mioma sandrany mba hiatriky fanenjeha. Ho lasa be herim-po rozy sady tsy hatahotsy satria fa nampianarinao hatòky ani-Jehovah.

18. Ino ty raha mandiny antsika amy hoavy?

¹⁸ Manampy antsika hilamin-tsay ty fiadana-Ndranahary. (Fil. 4:6, 7) Manome fiadana antsika Jehovah mba hanampea antsika ho kalma avao ndre eo ty arety, loza, noho ty fanenjeha mety hahazo antsika henanizao. Mampiasa ani-anti-panahy miasa mafy reo ie mba hikarakara antsika. Ameany tombontsoa koa tsika iaby mba hifanampy. Mbo milamindamy tse tsika henanizao ka afaky mioma amy ty raha tena sarotsy hiseho amy hoavy, anatini-zay ty “fijalea bevata.” (Mat. 24:21) Amy fotoa zay, le mila miezaky hilamin-tsay avao tsika sady hampeantsika hanao manahaky ani-zay koa ty olo hafa. Lafa tampitsy fotoa io, le tsy hisy sasy ty raha iaby mampiasa loha antsika. Zay amy zay tsika vo hahazo tavy ty raha teani-Jehovah hamea antsika, tsy ino zay fa ty hoe ho lavorary noho hiada mandrakizay!​—Isaia 26:3, 4.