Manino ro Ilà ty Fanajaria Boky Amy Efitrano Fanjakà Ao?

Teanao va ty hanao fikaroha soa hampitombo ty fahaizanao ty raha volany amy Baiboly ao? Misy andinin-teny, olo, tanà, na raha hafa teanao ho hay soa va amy Baiboly ao? Mety hanontany koa iha hoe afaky manampy ahy amy ty raha mahazo ahy va ty safà Ndranahary? Afaky mandeha amy fanajaria boky amy Efitrano Fanjakà ao iha laha ta hanao fikaroha.

Manampy amy fanaova fikaroha. Mety tsy hanananao iaby ty boky noho gazety naboaky ty Vavolombelo Jehovah amy ty fivolana hainao. Fe maro amy boky vaovao vo naboaky ro fa misy amy fanajaria boky amy Efitrano Fanjakà ao. Misy Baiboly amy fandikan-teny samby karazany, dikisionera noho boky maro hafa koa ty ao. Afaky manenty boky ao iha aloha na afara ty fivoria. Mety hisy Watchtower library koa ty ao laha misy ordinatera. Hita anatiny ao ty maro amy boky noho gazetinay reny. Mora ampiasà koa raha io. Afaky mikaroky fanazava mikasiky foto-kevitsy na andinin-teny na safà ao iha.

Manampy ty mpianatsy amy Fivoria Fiaina Noho Fanompoa. Afaky mampiasa soa fanajaria boky amy Efitrano Fanjakà ao iha lafa manoma ty anjaranao. Ty mpiandraikitsy Fivoria Fiaina Noho Fanompoa ro mikarakara fanajaria boky io. Henteany laha milamy soa boky ao reo sady tafilitsy ao iaby ty boky noho gazety niboaky farany. Afaky manambara anao ty fomba hahita ty fanazava ilanao koa ie na ty mpampianatsy Baiboly anao. Fe tsy azo andesy moly boky reo fa amy Efitrano ao avao iha ro mamaky azy. Anovintsika soa avao boky reo tsy no ho simba. Tsy azo asia sorasoratsy koa boky reo.

Manazava ty Baiboly fa laha ta ‘hahay raha mikasiky Ndranahary’ tsika le mila mazoto mikaroky ‘manahaky fikaroha hanana milevy io.’ (Ohabolana 2:1-5) Afaky manampy anao hanao fikoraha ty fanajaria boky amy Efitrano Fanjakà ao.

• Ino iaby ty fitaova fanaova fikaroha amy fanajaria boky amy Efitrano Fanjakà ao?

• Ia ty afaky manambara aminao ty fampiasà fitaova amy fanajaria boky ao?