Tiaronao va?

Nivakinao soa va gazety Tilikambo Fiambena tamy tao toy rey? Henteo moa vasa hainao ty mamaly ani-fanontanea manaraky retoa:

Ino ty soa ho azontsika laha manoka fotoa hiresaha, hijanjina, noho hieritsereta mikasiky ani-Jehovah tsika?

Hahay hanapa-kevitsy tsika, hahay hampianatsy, hana finoa matanjaky, sady hitombo ty fitiavantsika ani-Jehovah.​—w22.01, p. 30-31.

Manino tsika ro handramby soa laha mianatsy hatòky ani-Jehovah noho ty solontenany?

Henanizao mihintsy tsika ro mila mianatsy matoky a Ndranahary. Manao ani-zay tsika laha tsy misalasala lafa misy toromariky ameani-anti-panahy noho fanapahan-kevitsy rambesin-drozy. Lafa avy ty fijalea bevata, le ho parè hanoriky avao tsika lafa misy toromariky somary hafahafa amintsika na tsy azo orihy ty fahitantsika azy.​—w22.02, p. 4-6.

Ino ty teani-anjely iny hovolany lafa ie niresaky tamy Zakaria mikasiky “ani-plon an-tanani-Zerobabela [Governera] eny” iny? (Zak. 4:8-10)

Nanome toky ty vahoaki-Ndranahary fahità io hoe ho vita soa tempoly iny sady hifanaraky amy ze itiavani-Jehovah azy.​—w22.03, p. 16-17.

Ino ty azontsika atao mba ho ‘modely lafa mivola’? (1 Tim. 4:12)

Tokony ho soa fanahy noho hanaja olo tsika lafa amy fanompoa eny, mihira amy fo noho manome valin-teny avao lafa mivory, le mivola ty marina noho mivola raha mampahery, fa tsy manao safà raty.​—w22.04, p. 6-9.

Manino biby efatsy (fanjakà) resahy amy Daniela toko faha-​7 ao rey ro natambatsy ho biby raiky avao amy Apokalypsy 13:1, 2 ao?

Tsy manondro fanjakà raiky avao, manahaky ani-Roma biby resahy amy Apokalypsy toko faha-​13 ao iny. Mampiseho ani-ze fanjakà iaby fa nanday ty olombelo raha io.​—w22.05, p. 9.

Akory ty ampisehoantsika fa matoky tsika hoe manao ty rariny avao Ndranahary?

Laha misy olo nivola na nanao raha nampalahelo antsika, na nanota tamintsika, le miezaky tsika mba tsy heloky noho hitanjaky lolompo, fa hametraky ani-raha iny amy Jehovah. Hanafaky ze raha raty iaby vokatsini-fahotà Jehovah.​—w22.06, p. 10-11.

Ino ty tokony hotiarovini-rahalahy raiky lafa ie manao vavaky am-pivoria any?

Tsy natao hanomeza torohevitsy ty fiangona ty vavaky, na hanaova fampandrenesa. Tsy ilà ty manao vavaky “lava marè” sirtò amy fanombohani-fivoria iny. (Mat. 6:7)​—w22.07, p. 24-25.

Ino ty teany hovolany amy hoe “hovelomy mba hotsarà” “ze zatsy nanao raha raty”? (Jaona 5:29)

Tsy ty raha nataon-drozy talohani-nahafatesan-drozy ro hitsarà an-drozy. Hodinihy ty fandaisam-batan-drozy noho ty toe-tsain-drozy tafarani-nameloma an-drozy.​—w22.09, p. 18.

Ino ty raha nampirisihini-Joseph Rutherford tamy fivoriambe raiky, tamy Septambra 1922?

Ho zao ty nivolaniny tamy fivoriambe raiky ta Cedar Point, Ohio, an’Etazinỳ any: “Henteo fa manjaka Mpanjaka iny! Nareo ro irahiny hanambara ani-zay. Ka zao, ambarao, ambarao, ambarao Mpanjaka iny noho ty Fanjakàny!”​—w22.10, p. 3-5.

Miresaky fomba telo anampea-Ndranahary antsika hiaritsy ty Isaia toko faha-​30. Ino iaby rezay?

Hita amy toko io ao fa 1) mijanjy soa noho mamaly ty vavaky ataontsika ie, 2) mitari-dala antsika, le 3) manome fitahia antsika henanizao noho amy hoavy.​—w22.11, p. 9.

Manino tsika ro afaky mivola hoe fa nitanteraky taloha tany ty Salamo 37:10, 11, 29, sady mbo ho tanteraky koa amy hoavy?

Nampiseho ty fiaina nilamy tan’Israely any raha nivolanini-Davida reo, ohatsy hoe ty fiaina tamy androni-Solomona Mpanjaka. Niresaky mikasiky ty paradisa hoavy koa Jesosy, le nampoliny niresahy ty andininy faha-11. (Mat. 5:5; Lioka 23:43)​—w22.12, p. 8-10, 14.