Akory ty Amaleani-Jehovah ty Vavaky Ataontsika?

1-2. Ino ty raha mety hampisalasala antsika lafa tsika mivavaky?

FA NISY fotoa va iha nieritseritsy hoe: ‘Mba mamaly ty vavaky ataoko avao va Jehovah?’ Tsy iha raiky avao ro nahatsapa ho zay. Maro ty rahalahy noho anabavy nivola hoe fa nieritseritsy manahaky ani-zay koa rozy, sirtò lafa niatriky raha sarotsy. Lafa mijaly tsika, le mety ho sarotsy amintsika koa ty hahita ty fomba amaleani-Jehovah ty vavaky ataontsika.

² Ndao moa hodinihintsika hoe manino tsika ro afaky matoky fa mamaly ty vavaky ataoni-mpanompony Jehovah. (1 Jaona 5:15) Hodinihintsika koa ty valini-fanontanea retoa: Manino ro atao raha tsy mamaly ty vavaky ataontsika Jehovah kindraiky? Manao akory iaby ty amaleani-Jehovah ty vavaky ataontsika henanizao?

METY TSY HIFANARAKY AMY TY RAHA NANGATAHINTSIKA TY VALINY AMEANI-JEHOVAH

3. Manino tsika ro teani-Jehovah hivavaky aminy?

³ Manome toky antsika ty Soratsy Masy fa tena tea antsika Jehovah sady lafovily aminy tsika. (Hag. 2:7; 1 Jaona 4:10) Zay mahavy azy manasa antsika mba hila fanampea aminy io. (1 Pet. 5:6, 7) Ta hanampy antsika ie, amy zay tsika hifandramby marìny aminy avao noho hahavita hiatriky raha sarotsy.

4. Akory ty ahaizantsika fa mamaly ty vavaky ataoni-mpanompony Jehovah? (Henteo koa sary io.)

⁴ Lafa mamaky Baiboly tsika, le matetiky mahita hoe namaly ty vavaky nataoni-mpanompony Jehovah. Ia, ohatsy, ty avy an-tsainao ao? Vasa Davida Mpanjaka. Nana fahavalo maro ta ho namono azy ie, le matetiky ie nisoloho ani-Jehovah mba hanampy azy. Nivavaky ie ndraiky zay hoe: “Nao lahy Jehovah, mba janjino ty vavaky ataoko. Janjino ty fisolohoako fanampea. Valeo aho fa azo atokisa noho manao ty rariny iha.” (Sal. 143:1) Nivaleani-Jehovah vavaky nataoni-Davida iny ka niavotsy ie. (1 Sam. 19:10, 18-20; 2 Sam. 5:17-25) Tsy nisalasala mihintsy Davida lafa nivola hoe: “Anilani-ze olo iaby mikaiky azy Jehovah.” Afaky matoky ani-zay koa tsika.​—Sal. 145:18.

5. Tsy maintsy nahazo valim-bavaky nifanaraky amy raha nangatahin-drozy avao va ty mpanomponi-Jehovah taloha tany? Manomeza ohatsy. (Henteo koa sary io.)

⁵ Mety tsy hifanaraky amy ty nieritseretantsika azy ty fomba amaleani-Jehovah ty vavakintsika. Zay mihintsy ty raha niseho tamy apostoly Paoly. Nangataky tamy Ndranahary ie mba hangalaky “fatiky amy nofotsy” taminy iny. Intelo mihintsy Paoly ro nanao vavaky manoka mikasiky ani-raha sarotsy nahazo azy io. Namaly ani-vavaky nataony reo va Jehovah? Eka, fe tsy nifanaraky amy ty nieritseretini-Paoly. Tsy nalàni-Jehovah raha sarotsy nahazo azy iny, fa nameany ze hery nilàny ie mba hahafahany tsy hivaliky fa hanompo Azy avao.​—2 Kor. 12:7-10.

6. Manino ro atao raha tsy mamaly ty vavaky ataontsika Jehovah kindraiky?

⁶ Mety tsy hifanaraky amy ty nieritseretantsika azy koa ty fomba amaleani-Jehovah ty vavaky ataontsika kindraiky. Afaky matoky tsika fa haini-Jehovah soa ty fomba hanampea antsika. Afaky “manao mandilatsy ani-ze angatahintsika na eritseretintsika” mihintsy aza ie. (Efes. 3:20) Vokatsini-zay, le lasa mety ho avy amy fotoa na amy fomba tsy nieritseretantsika azy ty valini-vavaky ataontsika.

7. Manino tsika ro mety mila manova ty raha angatahintsika? Manomeza ohatsy.

⁷ Mety mila manova ty raha angatahintsika tsika lafa haintsika soa hoe ino ty sitraponi-Jehovah. Diniho moa ty tantarani-Rahalahy Martin Poetzinger. Tafara kelikelini-mariaziny, le nigadrà tamy tobini-Nazỳ any ie. Lafa tany ie le nivavaky tamy Jehovah mba ho bototsy, amy zay hoasany ie mba afaky mikarakara ani-valiny noho manohy mitory ndraiky. Fe roe herinandro tafarani-zay, le mbo tsy nahita porofo mihintsy ie hoe namaly ani-vavaky nataony iny Jehovah satria mbo tsy nibototsy ie. Farany ie nivavaky hoe: “Mba atorò ahy moa lahy Jehovah hoe ino ty teanao hataoko.” Bakeo nanomboky nieritseritsy ty raha niaretani-rahalahy hafa amy toby ao rey ie. Tena niasa loha amy valy amin’anany ty ankamaroan-drozy. Nivavaky amy zay Rahalahy Poetzinger hoe: “Misaotsy lahy Jehovah amy fanendrea vaovao toy. Ampeo aho mba hahavita hanampy noho hampahery ani-rahalahiko reo.” Le zay mihintsy ty nataony tanatini-9 tao nijanonany tan-toby ao zay!

8. Ino ty raha bevata tokony hotiarovintsika lafa tsika mivavaky?

⁸ Tokony hotiarovintsika hoe mana fikasà Jehovah, le hanatanteraky ani-raha zay ie amy fotoa voatondrony. Anatini-fikasàny ty hanafaky tanteraky ty problemo iaby mampijaly antsika henanizao, anisani-zay ty loza arakini-natiora, ty arety, noho ty fahafatesa. Hampiasa ty Fanjakàny Jehovah mba hanatanteraha ty fikasàny. (Dan. 2:44; Apok. 21:3, 4) Fe zisiky hiaviani-fotoa zay, le mbo engàni-Jehovah handay ani-tontolo toy tse Satana.b (Jaona 12:31; Apok. 12:9) Laha alàni-Jehovah iaby problemo mahazo antsika henanizao reo, le mety hivola ty olo hoe mahay manday Satana. Tsy maintsy mandiny ty hanatanterahani-Jehovah ani-fampitamanany rey zany tsika. Fe tsy midika zay hoe engàny amy zao avao tsika le tsy ampeany. Ndao moa tsika handiniky ty raha sisany ataoni-Jehovah mba hanampea antsika.

FOMBA AMALEANI-JEHOVAH TY VAVAKY ATAONTSIKA HENANIZAO

9. Akory ty anampeani-Jehovah antsika lafa misy fanapahan-kevitsy mila ataontsika? Manomeza ohatsy.

⁹ Ameany fahendrea tsika. Mampitamà Jehovah fa hameany ty fahendrea ilàntsika tsika mba hahaizantsika manapa-kevitsy. Tena mila fahendrea baka amy Jehovah tsika lafa handramby fanapahan-kevitsy mety hanova ty fiainantsika. Mila ani-zay, ohatsy, tsika lafa hanapa-kevitsy hoe hanambaly sa tsy hanambaly. (Jak. 1:5) Eritsereto moa ty raha niainani-ranabavy raiky tsy manambaly mana anara Maria toy.c Tena niteany ty nanao mpisava lala maharitsy. Lafa nandeha ty fotoa, le nifankahita tamy rahalahy raiky zay ie. Hoy Maria: “Arakaraky ty nifandrambesanay, le vomaiky zahay nifankatea. Haiko fa nila nandramby fanapahan-kevitsy aho. Nivavaky mikasiky ani-raha iny avao aho. Nila ty fitarihani-Jehovah aho, fe haiko koa fa tsy Jehovah ro hanapa-kevitsy ho ahy.” Tsapany hoe namaly ty vavaky nataony Jehovah. Amy fomba akory? Nanao fikaroha amy boky noho gazetintsika rey ie, le nahita lahatsoratsy nanampy azy hahita ty valini-fanontaneany. Nijanjininy soa koa ty torohevitsy feno fahendrea nameani-reniny azy. Nanampy ani-Maria handiniky soa ty fihetseham-pony torohevitsy iny. Lasa nahay nanapa-kevitsy amy zay ie.

10. Ino ty hataoni-Jehovah mba hanampea ty mpanompony, laha hentea ty Filipianina 4:13? Manomeza ohatsy. (Henteo koa sary io.)

¹⁰ Ameany hery tsika mba hahavita hiaritsy. Manahaky ty nataoni-Jehovah tamy apostoly Paoly, le hameany hery ilàntsika koa tsika mba hahavitantsika hiaritsy raha sarotsy. (Vakio Filipianina 4:13.) Diniho moa ty fomba nanampeani-Jehovah ani-rahalahy kaihy hoe Benjamin zay mba hiaritsy raha sarotsy. Nipetraky tamy toby fialokalofa tan’Afriky any zay ie noho ty fianakaviany, liany nahakely azy. Hoy Benjamin: “Nivavaky tamy Jehovah avao aho, le nangataky hery taminy mba hahavitako hanao raha mampifalifaly azy. Namaly ty vavaky nataoko Jehovah ka nameany fiadanan-tsay aho. Nameany herim-po koa aho mba hahafahako hitory avao sady nameany boky noho gazety manampy ahy hifandramby soa aminy avao.” Nivola koa ie hoe: “Lafa zaho mamaky ani-tantarani-rahalahy noho anabavy tsy nivaliky rey noho ty fomba nanampeani-Jehovah an-drozy hiaritsy, le vomaiky aho tapa-kevitsy tsy hivaliky.”

11-12. Akory ty mety hampiasani-Jehovah ani-rahalahy noho anabavintsika reo mba hamalea ty vavaky ataontsika? (Henteo koa sary io.)

¹¹ Mampiasa ty mpiara-manompo ie. Tamy haliky talohani-nahafatesani-Jesosy iny, le nivavaky mafy tamy Jehovah ie. Nieritseritsy ty olo hoe nanivativa a Ndranahary ie ka tsy maintsy vonoa, farany niangavy ani-Jehovah ie mba hisaka ani-olo rey tsy hieritseritsy ani-zay noho tsy hamono azy. Fe tsy zay ty nataoni-Jehovah fa naniraky ty raiky amy rahalahini-Jesosy an-danitsy any rey ie, zany hoe anjely, mba hampahery azy. (Lioka 22:42, 43) Mety hampiasa ty raiky amy rahalahy na anabavintsika reo koa Jehovah mba hampahery antsika. Mety hikaiky antsika an-telefony ie na hitsidiky antsika mihintsy. Afaky miezaky tsika iaby mba hanao “safà mampahery” ani-mpiara-manompo amintsika reo.​—Ohab. 12:25.

¹² Diniho moa ty raha niainani-ranabavy Miriam. Nimaty valiny, le herinandro vitsivitsy tafarani-zay, ie raiky avao tan-trano ao. Nalahelo biby ie sady tena nikivy. Nitany avao ie le nila olo hiresahany. Hoy ty asany: “Tsy nivitako iaby ndre ty nikaiky olo, farany aho nivavaky tamy Jehovah. Amy zaho mitany noho mivavaky iny, le naneno telefoniko iny. Anti-panahy namanay zay nikaiky io.” Nampahery ani-Miriam anti-panahy iny noho ty valiny. Nieky Miriam hoe Jehovah ro nandrisiky ani-anti-panahy io hikaiky azy.

13. Manomeza ohatsy raiky mampiseho hoe afaky mampiasa olo tsy manompo azy Jehovah mba hamalea ty vavaky ataontsika.

¹³ Mety hampiasa olo tsy manompo azy ie. (Ohab. 21:1) Fa nisy fotoa Jehovah namaly ty vavakini-mpanompony, le nampiasa olo tsy manompo azy mba hanampea an-drozy. Nataony, ohatsy, ze hahavy ani-Artaksersesy Mpanjaka hanome lala ani-Nehemia himpoly a Jerosalema any, amy zay Nehemia afaky manampy amy fanamboara ndraiky ani-tanà iny. (Neh. 2:3-6) Ndre henanizao koa, le mbo azoni-Jehovah ampiasà avao ty olo tsy manompo azy mba hanampy antsika lafa mila fanampea tsika.

14. Manino ty tantarani-Soo Hing ro mampahery anao? (Henteo koa sary io.)

¹⁴ Tsapani-ranabavy raiky mana anara Soo Hing zay hoe ty dokoterany ro nampiasani-Jehovah hanampy azy. Nijalijaly anakilahiny zay satria nitratsini-aretin-tsay. Lafa nandeha ty fotoa, le nilavo anany io ka tena nivoa mafy. Voatery niala tamy asany rozy morovaly mba hahafahan-drozy mikarakara azy. Farany tsy nanan-drala rozy. Nivola Soo Hing hoe atao raha tsy ho nivitany zay ty niatriky ani-raha iny. Naborany tamy Jehovah ze tam-pony ao, le nangataky fanampea aminy ie. Nivola dokotera iny hoe hila fomba hanampea an-drozy ie. Lasa nahazo fanampea tamy Fanjakà rozy tafarani-zay sady nahazo trano soasoa hipetraha. Hoy Soo Hing: “Hitanay hoe nanampy anay ty tanani-Jehovah. Tena ‘Mpijanjy vavaky’ vatany ie.”​—Sal. 65:2.

MILA FINOA TSIKA LAFA MIVAVAKY AMY JEHOVAH NOHO MANEKY ZE FOMBA AMALEANY TY VAVAKY ATAONTSIKA

15. Ino ty nanampy ani-ranabavy raiky toy hahita hoe namaly ty vavaky nataony Jehovah?

¹⁵ Tsy voatery hovaleani-Jehovah amy fomba miavaky ty vavaky ataontsika. Fe tozoro manampy antsika tsy hivaliky amy Babantsika an-danitsy any iny avao ty valim-bavaky azontsika. Tokony hodinihinao soa zany hoe akory ty namaleani-Jehovah ty vavaky nataonao. Zay mihintsy ty nataoni-ranabavy mana anara Yoko zay. Nieritseritsy ie hoe tsy namaly ty vavaky nataony Jehovah. Farany nataony lista ze raha nangatahiny tamy Jehovah. Lafa nandeha ty fotoa, le nihenteany lista nataony rey ka hitany hoe nivaleani-Jehovah ty ankamaroani-vavaky nataony, ndre azy fa nihalinony rey aza. Mila dinihintsika matetitetiky zany hoe akory ty namaleani-Jehovah ty vavaky nataontsika.​—Sal. 66:19, 20.

16. Akory ty ampisehoantsika hoe manam-pinoa tsika lafa mivavaky? (Hebreo 11:6)

¹⁶ Asehontsika hoe mana finoa tsika lafa mivavaky amy Jehovah noho maneky ze fomba amaleany ty vavaky ataontsika. (Vakio Hebreo 11:6.) Diniho moa ty tantarani-Mike noho Chrissy valiny. Naniry hanompo amy Betela rozy. Nivola Mike hoe: “Niezaky nanoriky ze raha nianaranay avao zahay morovaly tanatini-tao maro sady niresahinay tamy Jehovah fanirianay iny, fe tsy nivoakaiky mihintsy zahay.” Natoky Mike noho Chrissy hoe Jehovah ro tena mahay ze fomba hampiasany an-drozy amy fanompoa azy. Niezaky avao rozy nanao ze azon-drozy natao, ka sady nanao mpisava lala maharitsy rozy no nandeha nifindra tamy pilasy mila mpitory maro. Tsy zay avao fa nandramby anjara tamy fanamboara trano ampiasani-fandamina koa rozy. Lasa manao ty asani-faritsy rozy henanizao. Nivola Mike hoe: “Tsy voatery hifanaraky amy ty ieritseretantsika azy ty hamaleani-Jehovah ty vavaky ataontsika, fa mety hovaleany amy fomba hafa sady mety ho soa mandilatsy ty nieritseretantsika azy.”

17-18. Laha hentea ty Salamo 86:6, 7, ino ty raha azontsika atokisa?

¹⁷ Vakio Salamo 86:6, 7. Natoky Davida mpanao salamo hoe nijanjy noho namaly ty vavaky nataony Jehovah. Afaky matoky ani-zay koa iha. Manome toky antsika tantara nidinihintsika tato rey hoe afaky manome hery noho fahendrea antsika Jehovah mba hahavitantsika miaritsy. Mety hampiasa ty mpiara-manompo amintsika ie na olo tsy manompo azy rey mba hanampy antsika amy fomba sankarazany.

¹⁸ Marina fa mety tsy hifanaraky amy ty ieritseretantsika azy ty hamaleani-Jehovah ty vavaky ataontsika, fe haintsika hoe hovaleany raha rey. Hanome ze raha ilàntsika ie sady ataony amy fotoa tena ilàntsika azy mihintsy. Ka mieny mivavaky avao zany, le matokisa fa hijanjy anao Jehovah. Matokisa fa hikarakara anao ie amy zao, sady lafa amy tontolo vaovao any ie le ‘hanome fahafaham-po ty faniriani-rahamananay iaby.’​—Sal. 145:16.