Tahafo ty Fomba Fihevitsin’i Jehovah noho Jesosy

1-2. Ino ty tafilitsy amy hoe tea an’i Jehovah, le akory ty nampisehoan’i Jesosy hoe tea an’i Jehovah amy ty sainy iaby ie?

“TIAVO Jehovah Ndranaharinao amy ty fonao iaby noho ty vatanao iaby noho ty herinao iaby noho ty sainao iaby.” (Lioka 10:27) Nasehon’i Jesosy mazava soa, fa io ty didy farani-ze bevata tamy lalànan’i Mosesy. Mariho fa tokony ho tea a-Ndranahary amy fo tsika, tafilitsy amy zay ty faniriantsika, ty fihetseham-pontsika, noho ty toetsintsika. Tokony ho tea azy amy ty vatantsika iaby noho ty herintsika iaby koa tsika. Fe tokony ho tea an’i Jehovah amy ty saintsika iaby koa tsika, tafilitsy amy zay ty raha eritseretintsika. Marina fa tsy ho haintsika tanteraky ty fomba fihevitsin’i Jehovah iaby. Fe hahay soa ty fomba fihevitsi-Ndranahary tsika laha miezaky hana “ty sain’i Kristy” satria mitovy tanteraky amy fomba fihevitsin’i Babany ty fomba fihevitsiny.​—1 Kor. 2:16.

² Tea an’i Jehovah tamy sainy iaby Jesosy. Hainy hoe ino ty raha tea-Ndranahary hataony, le tapa-kevitsy hanao ani-zay ie ndre hampijaly azy aza ty fanaovany ani-zay satria hainy hoe ino ty marina. Nifantoky tamy fanaova ty sitrapon’ny Babany Jesosy, ka tsy nisy raha nengàny hanelingely azy tsy hahavita ani-zay.

3. Ino ty nianaran’i Petera baka amy Jesosy, le nampirisihin’i Petera hanao ino ty Kristiana namany? (1 Petera 4:1)

³ Nana tombotsoa manoka Petera noho apostoly namany rey satria nifandramby mivanta tamy Jesosy rozy, ka afaky nianatsy ty fomba fihevitsiny. Lafa Petera nanoratsy ty taratasiny voalohany, le nampirisiky ty Kristiana ie mba hana toe-tsay manahaky ty nananan’i Kristy. (Vakio 1 Petera 4:1.) Nivola Petera hoe: “Ataovo ze hanananareo.” Nampiasa an’ny safà io ie mba hivolana maramila manday fitaova handesy mialy. Ka laha manahaky ty toe-tsain’i Jesosy zany ty Kristiana, le hana fitaovam-pialia matanjaky handesy mialy amy faniria hanao raha raty noho amy tontolon’i Satana toy.​—2 Kor. 10:3-5; Efes. 6:12.

4. Manino lahatsoratsy toy ro hanampy antsika hanoriky ty torohevitsin’i Petera?

⁴ Handiniky ty fomba fihevitsin’i Jesosy tsika, bakeo henteantsika ty fomba azontsika anahafa azy. Hianarantsika ato hoe: 1) akory ty anahafantsika ty fomba fihevitsin’i Jehovah, satria hanampy antsika hitovy hevitsy raha zay, 2) ino ty hanampy antsika hiambany, le 3) ino ty hanampy antsika handiniky soa noho hiantehitsy amy Jehovah amy vavaky.

TAHAFO TY FOMBA FIHEVITSIN’I JEHOVAH

5. Nisy fotoa Petera tsy nitovy fomba fihevitsy tamy Jehovah. Manino tsika ro mivola ani-zay?

⁵ Nisy fotoa Petera tsy nitovy fomba fihevitsy tamy Jehovah. Nivola tamy apostoliny rey Jesosy hoe tsy maintsy mandeha a Jerosalema any ie, le hosamborin’ny mpanday fivavaha lafa any, hampijalỳ, bakeo hovonoa. (Mat. 16:21) Mety tsy nino Petera hoe hengàn’i Jehovah hovonoa Jesosy, satria nitamà azy ty Israely sady ie ro Mesia nampitamàny. (Mat. 16:16) Farany nandesiny nisitaky tan-tsisiny eny Jesosy le nivolaniny hoe: “Mba diniho avao ze hahasoa anao Tompo. Tsy hahazo anao mihintsy zay.” (Mat. 16:22) Tsy nitovy hevitsy tamy Jesosy, Petera, satria tsy nana ty fomba fihevitsin’i Jehovah ie.

6. Akory ty nampisehoan’i Jesosy fa nitovy fomba fihevitsy tamy Jehovah ie?

⁶ Nitovy fomba fihevitsy amy babany an-danitsy any iny Jesosy. Nivola tamy Petera ie hoe: “Mandehana afarako any iha Satana! Vato maminga alohako eto iha, satria tsy hevitsi-Ndranahary ahinao zay, fa hevitsin’olombelo.” (Mat. 16:23) Marina fa ta hanampy an’i Jesosy, Petera, fe tsy nety taminy torohevitsiny iny. Ino ty antony? Satria hain’i Jesosy hoe tsy maintsy hijaly noho ho maty ie, mba hanaova ty sitrapon’i Jehovah. Nianaran’i Petera tamy zay hoe mila mitovy fomba fihevitsy amy Ndranahary ie. Fianara bevata ho antsika koa raha zay.

7. Akory ty nampisehoan’ny Petera tafara atoy hoe ta hitovy fomba fihevitsy amy Jehovah ie? (Henteo sary io.)

⁷ Nasehon’i Petera tafara atoy hoe ta hitovy fomba fihevitsy amy Jehovah ie. Fa tean’i Jehovah ho anisan’ny vahoakiny ty hafa firenena tamy fotoa zay. Nirahin’i Jehovah amy zay Petera mba hitory amy Kornelio, le ie ty hafa firenena voalohany lasa Kristiana. Tsy nifankahazo loatsy tamy Jiosy ty hafa firenena, ka tsy mahatseriky laha nila fanampea Petera mba hahavitany an’ny iraky nampanaovy azy io. Lafa nihain’i Petera hoe ino ty sitrapo-Ndranahary mikasiky ty hafa firenena, le nanity ty fomba fihevitsiny ie. Ka lafa nirahy ho amy Kornelio any Petera, le “tsy nandà mihintsy.” (Asa 10:28, 29) Nitory tamy Kornelio noho tamy fianakaviany ie, le natao batisa rozy.​—Asa 10:21-23, 34, 35, 44-48.

8. Akory ty ampisehoantsika hoe mitovy fomba fihevitsy amy Jehovah tsika? (1 Petera 3:8 noho fanamariha ambany pejy)

⁸ Nampirisiky ty Kristiana namany ‘hiharo raiky’ Petera tao maro tafara atoy. (Vakio 1 Petera 3:8 noho fanamariha ambany pejy.) Laha manahaky ty fomba fihevitsin’i Jehovah voaresaky amy Safàny ao tsika, le hiezaky hiharo raiky amy rahalahy noho anabavintsika reo. Nampirisiky ty mpanori-dia azy, ohatsy, Jesosy, mba hanao amy pilasy voalohany an’ny Fanjakà iny. (Mat. 6:33) Mety hanapa-kevitsy amy zay ty mpitory raiky anivon’ny fiangona eo hoe hanao mpisava lala na hanao fanompoa manontolo andro amy fomba hafa. Ino ty tokony hataontsika amy fotoa zay? Tsy tokony hanoro hevitsy azy hila ze hahasoa ty vatany tsika, fa tokony hanoha azy noho hiresaky raha mampahery mikasiky an’ny raha kendreny iny.

MIEZAHA HIAMBANY

9-10. Akory ty nampisehoan’i Jesosy hoe tena niambany ie?

⁹ Misy raha bevata nampianarin’i Jesosy an’i Petera noho apostoly hafa rey, tamy haly talohan’ny namonoa azy iny. Nampianariny hiambany rozy. Talohani-zay tse, nirahin’i Jesosy, Petera noho Jaona, mba hanoma an’ny pilasy hiarahany misakafo farany amin-drozy iny. Azo inoa fa nataon-drozy mirahalahy azo antoky tamy zay hoe misy koveta noho serveta ty tao, mba hanasà ty tombon’ny vahiny alohan’ny hihinany. Fe ia amin-drozy ty hiambany ka hanao an’ny asa zay lafa vory ao iaby rozy?

¹⁰ Nasehon’i Jesosy hoe tena niambany ie, ka ie ro nanao an’ny raha iny. Tena nitseriky apostoliny rey, satria raha fataon’ny mpanompo ro nataony. Nalan’i Jesosy ty akanjony ivelany, le nangalaky serveta ie, bakeo nasiany rano koveta iny, le nanomboky nisasàny amy zay ty tombon-drozy. (Jaona 13:4, 5) Mety ho naharitsaritsy ty nanasàny an’ny tombon’ny apostoly 12 rey, anisani-zay Jodasy, azy hamadiky azy iny. Fe niambany Jesosy, ka nisasàny iaby ty tombon-drozy. Bakeo nangalaky pilasy amy zay Jesosy, le nivola hoe: “Hainareo va ty dikan’ny raha nataoko taminareo teo iny? Nareo mikaiky ahy hoe ‘Mpampianatsy’ noho ‘Tompo’, le marina raha zay satria zay vatany aho. Ka laha zaho Tompo noho Mpampianatsy aza nanasa ty tombonareo, le tokony hifanasa tomboky koa nareo.”​—Jaona 13:12-14.

11. Akory ty nampisehoan’i Petera fa niambany ie? (1 Petera 5:5) (Henteo koa sary io.)

¹¹ Nandrambesan’i Petera fianara raha nataon’i Jesosy iny, ka niambany ie. Tafaran’ny nimpolian’i Jesosy tan-danitsy any, le nanao fahagagà Petera, ka nitaha lahilahy raiky nalemy tomboky baka an-tron-dreniny any. (Asa 1:8, 9; 3:2, 6-8) Mazava ho azy fa maro ty olo nahita an’ny fahagagà iny sady nitseriky. (Asa 3:11) Hanao akory amy zay Petera henanizay? Hirengirengy va ie satria hoe baka amy tanà tea laza noho voninahitsy? Tsy zay mihintsy fa niambany ie, ka nidera an’i Jehovah noho Jesosy, le nivola hoe: “Tamy anarany [Jesosy] noho ty finoanay ty anarany ro nampatanjaky an’ny lahilahy hitanareo noho hainareo io.” (Asa 3:12-16) Lafa nanoratsy Petera tafara atoy, le nampirisiky ty Kristiana mba hiambany. Mety hahatiarovantsika ty raha nataon’i Jesosy tamy ie nangalaky serveta noho nanasa ty tombon’ny apostoly iny fampirisihan’i Petera io​—Vakio 1 Petera 5:5.

12. Akory ty ampisehoantsika hoe miezaky miambany manahaky an’i Petera avao tsika?

¹² Afaky manahaky an’i Petera koa tsika ka miezaky hiambany avao. Tiarovo fa tsy amy raha volanintsika avao ro ahità hoe miambany tsika. Laha hentea ty safà nampiasan’i Petera hoe miambany, le mahatafilitsy ty raha ‘an-tsaintsika laliky’ any koa. Manao raha ho an’ny hafa zao tsika, satria tea an’i Jehovah noho tea olo, fa tsy hoe ta hoderà. Ndre misy mahita na tsy misy mahita koa ty raha ataontsika, le falifaly avao tsika manompo an’i Jehovah noho manao ze azontsika atao ho an’ny rahalahy noho anabavintsika reo. Hita hoe miambany tsika laha manao ani-zay.​—Mat. 6:1-4.

MIEZAHA “HANDINIKY SOA”

13. Ino iaby ty tafilitsy amy hoe ‘mandiniky soa’?

¹³ Ino ty tafilitsy amy hoe ‘mandiniky soa’? (1 Pet. 4:7) Mandiniky soa ty Kristiana raiky laha manao ze azony atao mba hifanaraky amy fomba fihevitsin’i Jehovah ty fanapahan-kevitsy rambesiny. Hainy hoe tsy misy raha bevata mandilatsy ty fifandrambesany amy Jehovah. Tsy manambon’ny tena ie, ka mieky hoe misy raha tsy hainy. Miantehitsy amy Jehovah koa ie, ka mivavaky matetiky aminy mba hahazo ty tari-dalany.a

14. Nisy fotoa Petera tsy niantehitsy tamy Jehovah. Manino tsika ro mivola ani-zay?

¹⁴ Nampitandrina an’ny mpianatsiny rey Jesosy tamy haly talohan’ny nahafatesany iny hoe: “Hanenga ahy iaby nareo androany haly.” Nieritseritsy Petera hoe tsy hanao ani-zay mihintsy ie, ka nivola taminy hoe: “Ndre hanenga anao iaby aza rozy amy raha hahazo anao zay, le tsy hanenga anao mihintsy aho!” Nampirisiky ty mpianatsiny sisany Jesosy tamy haly io hoe: “Miambena noho mivavaha avao.” (Mat. 26:31, 33, 41) Laha nanoriky an’ny torohevitsy zay Petera, le tsy ho nampatahotsy azy ty nivola hoe mpianatsin’i Jesosy ie. Fe natahotsy ie, ka nivola hoe tsy mahay an’i Jesosy. Tena naneñenan’i Petera raha nataony zay.​—Mat. 26:69-75.

15. Ino ty nanampy an’i Jesosy handiniky soa avao tamy haly talohan’ny nahafatesany iny?

¹⁵ Niantehitsy tanteraky tamy Jehovah, Jesosy. Marina fa lavorary Jesosy, fe nivavaky matetiky ie. Nanampy azy raha zay mba hana herim-po hanaova raha mifanaraky amy sitrapon’i Jehovah. (Mat. 26:39, 42, 44; Jaona 18:4, 5) Nivavaky matetiky ie tamy haly talohan’ny nahafatesany iny, le azo antoky fa tsy nihalinon’i Petera mihintsy raha zay.

16. Akory ty nampisehoan’i Petera hoe fa nahay nandiniky soa ie? (1 Petera 4:7)

¹⁶ Lasa niantehitsy marerè tamy Jehovah tamy alalan’ny vavaky Petera lafa nandeha ty fotoa. Lafa nivelomy Jesosy, le nameany toky Petera noho apostoly hafa rey hoe hahazo fanahy masy rozy mba hahavitan-drozy hitory ty vaovao soa. Fe nivolanin’i Jesosy tse rozy mba handiny a Jerosalema any zisiky hiaviani-zay. (Lioka 24:49; Asa 1:4, 5) Ino ty nataon’i Petera zisiky hiavian’ny fotoa io? “Tsy nieny nivavaky” ie noho ty Kristiana hafa namany.” (Asa 1:13, 14) Lafa Petera nanoratsy ty taratasiny voalohany tafara atoy, le nampirisiky ty Kristiana namany ie mba handiniky soa noho hiantehitsy amy Jehovah amy vavaky. (Vakio 1 Petera 4:7.) Lasa niantehitsy tamy Jehovah, Petera, sady afaky nanampy noho nampahery ty fiangona.​—Gal. 2:9.

17. Ino ty raha tokony hataontsika avao, ndre ino ndre ino ty fahaizantsika? (Henteo koa sary io.)

¹⁷ Tsy maintsy mivavaky matetiky amy Jehovah tsika mba hahavy antsika handiniky soa. Ekentsika hoe mila mivavaky amy Jehovah avao tsika ndre ino ndre ty fahaiza ananantsika. Ka lafa misy fanapahan-kevitsy bevata hataontsika zany, le mila mivavaky amy Jehovah tsika mba hahazo ty tari-dalany sady matoky hoe hainy ze tena mahasoa antsika.

18. Ino ty hanampy antsika hitovy fomba fihevitsy amy Jehovah?

¹⁸ Tena isaorantsika Jehovah satria nataony afaky manahaky ty toetsiny tsika. (Gen. 1:26) Marina fa tsy afaky manahaky tanteraky an’i Jehovah tsika. (Isa. 55:9) Fe afaky miezaky manahaky an’i Petera avao tsika mba hitovy fomba fihevitsy amy Jehovah, hiezaky hiambany, noho handiniky soa.