Nareo Rahalahy, Miezaha ho Lasa Mpikarakara Fiangona!

1. Manao akory ty fahitan’ny apostoly Paoly ty mpikarakara fiangona?

MANA andraikitsy bevata ty mpikarakara fiangona. Nankasitraky an’ny lahilahy tsy mivaly rey ty apostoly Paoly. Lafa nanoratsy ho an’ny Kristiana ta Filipỳ any, ohatsy, ie le nataony miavaky soa ty mpikarakara fiangona.​—Fil. 1:1.

2. Ino ty tsapan’ny Rahalahy Luis mikasiky ty andraikitsin’ny mpikarakara fiangona?

² Maro biby ty rahalahy vita batisa falifaly satria mpikarakara fiangona, na tanora zay na antitsy. Nivoatendry ho mpikarakara fiangona, ohatsy, Devan tamy ie ni-18 tao. Fa Luis tamy ie ni-50 tao vo nivoantendry. Itovizan’ny mpikarakara fiangona iaby ty fihetseham-po tsapany. Hoy ty asany: “Lafa nametsivetsy ty fitiava iaby nasehon’ny fiangona tamiko aho, le vomaiky tsapako hoe tombotsoa bevata manao ty andraikitsin’ny mpikarakara fiangona zao!”

3. Ino ty hodinihintsika ato?

³ Rahalahy vita batisa va iha ka mbo tsy mpikarakara fiangona? Manino laha ataonao raha kendrè raha zay? Ino ty handrisiky anao hahatratsy ani-raha kendrè zay? Le ino ty fepetra resahin’ny Soratsy Masy mila ataonao? Ho hitantsika ato ty valiny fanontanea rezay. Fe ndao hodinihintsika tse ty andraikitsin’ny mpikarakara fiangona.

INO TY ANDRAIKITSIN’NY MPIKARAKARA FIANGONA?

4. Ino ty andraikitsin’ny mpikarakara fiangona? (Henteo koa sary io.)

⁴ Rahalahy vita batisa voatendrin’ny fanahy masy ty mpikarakara fiangona. Manampy ty anti-panahy hanao asa maro anivon’ny fiangona eo rozy. Mikarakara ty faritany hitorian’ny mpitory rozy noho ty boky noho gazety ilà amy fanompoa eny. Ty sisany manampy amy fanadiova noho fikojakojà Efitrano Fanjakà. Misy koa mikarakara mpanatriky na mikarakara fandefasa feo noho video amy fotoan’ny fivoria. Olo arakin’ny fanahy koa ty mpikarakara fiangona. Tea an’i Jehovah rozy sady miay mifanaraky amy ty tari-dalany. Tsy zay avao fa tea marè ty rahalahy noho anabavy koa rozy. (Mat. 22:37-39) Akory ty hahavy ty rahalahy vita batisa ho lasa mpikarakara fiangona?

5. Ino ty azon’ny rahalahy atao mba ho lasa mpikarakara fiangona?

⁵ Miresaky fepetra takỳ ho an’ny rahalahy maniry ho mpikarakara fiangona ty Baiboly. (1 Tim. 3:8-10, 12, 13) Afaky hahazo an’ny tombotsoa io iha laha ianaranao fepetra ara-baiboly reo sady iezahanao hanana. Fe alohani-zay, soa laha dinihinao hoe ino ty antony mandrisiky anao ta ho mpikarakara fiangona.

INO TY ANTONY MANDRISIKY ANAO TA HO MPIKARAKARA FIANGONA?

6. Ino ty tokony handrisiky anao hanampy ty rahalahy noho ranabavy? (Matio 20:28; Henteo koa sary amy fonony gazety toy.)

⁶ Modely tena soa ho antsika Jesosy. Ino ty antony? Satria ty fitiavany an’i Jehovah noho ty olo ro nandrisiky azy hanao raha. Fitiava io ro nahavy azy hiasa mafy noho hanao asa eritseretin’olo hoe ambany. (Vakio Matio 20:28; Jaona 13:5, 14, 15) Laha ty fitiava ro mandrisiky anao hanao raha, le hitahy anao Jehovah sady hanampy anao hahafeno fepetra ho mpikarakara fiangona.​—1 Kor. 16:14; 1 Pet. 5:5.

7. Manino ty rahalahy ta ho mpikarakara fiangona ro tsy tokony hirengirengy na ta halaza?

⁷ Amy tontolo toy eto, le rengerengen’olo ty olo tea misehoseho. Fe tsy manao ani-zay ty mpanompon’i Jehovah. Tsy mialy fahefà, na manjakazaka amy ty hafa, na ta hahazo pilasy anabo ty rahalahy raiky laha ty fitiava ro mandrisiky azy hanao raha, manahaky ty nataon’i Jesosy. Laha olo manambony tena ro voatendry amy fiangona eo, le mety tsy hahefa hanao asa eritseretin’olo hoe ambany ie na hikarakara ty raha ilàn’ny aondrin’i Jehovah lafovily reo. Mety hieritseritsy ie hoe manambanimbany azy ty fanaova ani-zay. (Jaona 10:12) Tsy hitahy ty raha ataon’olo manambony tena na ty olo mirengirengy Jehovah.​—1 Kor. 10:24, 33; 13:4, 5

8. Ino ty torohevitsy namean’i Jesosy an’ny apostoliny rey?

⁸ Nisy fotoa aza ndre naman’i Jesosy marìny rey ta hahazo tombotsoa manoka. Fe tsy soa ty antony nanosiky an-drozy. Anisani-zay apostoliny roe retoa: Jakoba noho Jaona. Nangataky an’i Jesosy rozy mba hameany pilasy anabo amy Fanjakàny ao, kanefa tsy nampirisiky an-drozy hanao ani-zay ie. Vomaiky aza Jesosy nivola an’ny apostoly 12 rey hoe: “Fa ze ta ho be aminareo, le tsy maintsy ho mpanomponareo. Le ze ta ho voalohany aminareo le tsy maintsy manompo ty olo iaby.” (Marka 10:35, 43, 44) Laha antony soa ro mandrisiky ty rahalahy hanao raha, zany hoe maniry hanompo ty hafa, le handramby soa ty fiangona.​—1 Tes. 2:8.

INO TY HANAMPY ANAO HANIRY HO LASA MPIKARAKARA FIANGONA?

9. Ino ty hanampy anao hampitombo ty fanirianao ho lasa mpikarakara fiangona?

⁹ Azo antoky fa tea an’i Jehovah noho maniry hanompo ty hafa iha. Fe ndre zay, le mety tsy de manam-paniria ho mpikarakara fiangona iha. Fe ino ty hanampy anao hampitombo an’ny fanirianao zay? Eritsereto ty fifalea ho azonao lafa iha manampy an’ny mpiara-manompo aminao reo. Nivola Jesosy hoe: “Mahasambatsy marè ty manome, tany ty mandramby.” (Asan’ny apostoly 20:35) Nampiharin’i Jesosy mihintsy raha zay, fa tsy hoe nivolaniny avao. Tena nahatiaro falifaly ie lafa nanampy ty hafa, le azo antoky fa hanahaky ani-zay koa iha.

10. Akory ty nampisehoan’i Jesosy fa sambatsy ie lafa nanampy ty hafa? (Marka 6:31-34)

¹⁰ Akory ty nampisehoan’i Jesosy hoe sambatsy ie lafa nanampy ty hafa? (Vakio Marka 6:31-34.) Nivozaky Jesosy noho apostoliny rey ndraiky andro zay. Nandeha amy pilasy mitoka amy zay rozy mba hitofatofa. Fe fa nisy olo maro niavy tany talohan-drozy sady nitamà hoe hampianarin’i Jesosy. Ino amy zay ty nataony? Tsy nampoliny olo rey ndre ‘tsy nanam-potoa hihina ie noho apostoliny rey.’ Tsy hoe nampianariny raha raiky na raha roe avao koa rozy bakeo nalefany nandeha. Ty fitiava ro nandrisiky azy hanao raha, ka nanomboky nampianatsy an-drozy raha maro ie. Nampianariny avao rozy zisiky ‘hahariva ty andro.” (Marka 6:35) Nanao ani-zay ie satria niferinesany rozy, fa tsy hoe nisy namorosè azy. Teany rozy, ka zay ro nandrisiky azy ta hampianatsy an-drozy. Tena nifalifaly Jesosy nanampy ty hafa.

11. Akory ty nanampean’i Jesosy ty olo nijanjy azy? (Henteo koa sary io.)

¹¹ Tsy hoe nampianatsy an’olo reo avao Jesosy, fa nanome ty raha nilàn-drozy koa. Nameany hany rozy, le nivolaniny mpianatsiny rey mba hizara an’ny hany iny tamin-drozy. (Marka 6:41) Nampianatsy an’ny mpianatsiny rey ty fomba hanampea ty hafa ie tamy zay, sady nasehony hoe tena vatan-draha raha zay. Mety hanao asa manahaky ani-zay koa ty mpikarakara fiangona. Mba eritsereto moa ty hafalean’ny apostoly rey lafa rozy niaraky niasa tamy Jesosy, ka nizara an’ny mofo rey, zisiky ‘hahavintsy ty olo iaby!’ (Marka 6:42) Tsy hoe vo tamin’io Jesosy ro nampadefitsy ze raha nilàny mba hahasoa ty hafa. Fa nanao ani-zay avao ie tamy fanompoany tan-tany etoy. (Mat. 4:23; 8:16) Afa-po noho falifaly Jesosy lafa nampianatsy ty hafa noho nanome ze raha nilàn-drozy. Azo antoky hoe ho falifaly biby koa iha lafa manampy ty hafa ka miezaky ho mpikarakara fiangona.

12. Manino tsika ro tsy tokony hieritseritsy hoe tsy afaky mahavita raha firy ho an’ny fiangona?

¹² Ka kivy laha mahatsapa iha hoe tsy mana fahaiza miavaky. Azo antoky fa mana toetsy soa azonao ampiasà mba hanampea ty fiangona iha. Mety hahasoa anao ty mivavaky noho mamaky ty raha nisoratin’i Paoly amy 1 Korintianina 12:12-30 ao. Hita baka amy safàn’i Paoly reo hoe tena ilà sady lafovily anivon’ny fiangona eo iha, manahaky ty mpanompon’i Jehovah iaby. Ka kivy mihintsy laha mbo tsy mahafeno fepetra takỳ amy mpikarakara fiangona iha. Aleo manao ze azonao atao mba hanompoa an’i Jehovah noho hanampea ty mpiara-manompo. Matokisa fa handiniky mikasiky anao ty anti-panahy, ka hanome andraikitsy tandrify anao.​—Rom. 12:4-8

13. Manao akory ty ankamaroan’ny fepetra takỳ amy rahalahy voatendry?

¹³ Diniho koa zao: Toetsy tokony hananan’ny Kristiana iaby ty ankamaroan’ny fepetra takỳ amy mpikarakara fiangona. Anisani-zay ty hoe tokony hifandramby soa amy Jehovah ty Kristiana iaby, ho falifaly lafa manome, sady hiezaky ho modely soa. Midika zay, fa anananao ty ankamaroan’ny fepetra takỳ amy mpikarakara fiangona. Ka ino marina zany ty tena takỳ amy rahalahy ta ho mpikarakara fiangona?

TY TOKONY HATAONAO MBA HO LASA MPIKARAKARA FIANGONA

14. Ino ty dikan’ny hoe “matotsay”? (1 Timoty 3:8-10, 12)

¹⁴ Ndao hodinihintsika ty fepetra sisany resahin’ny 1 Timoty 3:8-10, 12. (Vakio.) Tsy maintsy“matotsay” ty mpikarakara fiangona. Azo adika koa hoe “maeva hajà,” na “hamea voninahitsy,” na “mandramby andraikitsy” safà io. Tsy midika raha zay hoe tsy mahazo homehomehy iha na tsy manao somonga mihintsy. (Mpito. 3:1, 4) Fa ty teany hovolany le hoe tokony hataonao soa ze andraikitsy nankiny aminao. Laha manao ani-zay iha, le ho azon’ny mpiara-manompo iantehera sady hanaja anao rozy.

15. Ino ty dikan’ny hoe “tsy mivadibadi-dela” noho “tsy tea tombony azo tamy tsy marina”?

¹⁵ Midika hoe mivola ty marina noho azo atokisa ty hoe “tsy mivadibali-dela.” Mitanjaky ty safànao iha sady tsy mamitak’olo. (Ohab. 3:32) Ty hoe “tsy tea tombony azo tamy tsy marina” koa le midika hoe manao ty marina amy resaky varotsy, asa noho drala. Tsy tokony hararaotinao mba hahazoa drala ty mpiara-manompo satria hoe mifandramby soa nareo.

16. a) Ino ty dikan’ny hoe “tsy mpiboboky divay”? b) Ino ty dikan’ny hoe “mana feon’ny fieritsereta malio”?

¹⁶ Ka ino ty dikan’ny hoe “tsy mpiboboky divay”? Midika hoe tsy mino tafahoatsy na malaza ho mpino toaky raha io. Le ty hoe “mana feon’ny fieritsereta malio” amy zay, le midika hoe manoriky ty fitsipikin’i Jehovah. Ka ndre tsy lavorary iha, le milamin-tsay satria mifandramby soa amy Ndranahary.

17. Akory ty ampisehoan’ny rahalahy raiky hoe azo atokisa ie lafa “tsapà mba ho hita laha mahafeno fepetra”? (1 Timoty 3:10; Henteo koa sary io.)

¹⁷ Ty hoe “tsapà mba ho hita laha mahafeno fepetra,” le midika hoe nasehonao fa azo atokisa iha lafa amea andraikitsy. Ka lafa misy andraikitsy ankinin’ny anti-panahy aminao, le oriho soa ty toromariky amean-drozy noho ty tari-dala baka amy fandamina. Anovo azo antoky fa hainao soa hoe ino iaby ty asa tafilitsy amy raha ampanaovy anao iny, le mbia ty tokony hamitanao azy. Laha mazoto noho manao soa ty asa iaby nankiny taminao iha, le ho hitan’ny fiangona ty ezaky ataonao sady hankasitraky ani-zay rozy. Nareo anti-panahy, ampiofano ty rahalahy vita batisa. (Vakio 1 Timoty 3:10.) Misy rahalahy vita batisa 10 tao zisiky amy 14 tao na latsaky va ty amy fiangonanareo ao? Manao fianaram-bata tsy tampaky, noho manoma soa ty fivoria va rozy? Mazoto mamaly teny am-pivoria any, noho mandramby anjara tsy tampaky amy fanompoa va rozy? Ameo andraikitsy mifanaraky amy taony noho ty raha iainany rozy. Zay ty fomba ahità hoe afaky mahavita ty andraikitsy ankiny amin-drozy rahalahy tanora rey. Azo inoa fa hahafeno fepetra ho lasa mpikarakara fiangona rahalahy rey lafa mandeha ty fotoa, ndre mbo tsy ampy 20 tao aza.

18. Ino ty dikan’ny hoe “tsy asara ho manao raha raty”?

¹⁸ Ty hoe “tsy asara ho manao raha raty,” le midika hoe tsy tokony hisy antony mari-pototsy azo anasarà anao hoe nanao fahadisoa bevata iha. Mazava ho azy fa mety hasaran’olo manao raha raty ty Kristiana. Ndre Jesosy aza nasaran’olo nanao raha raty sady fa nivola ie hoe hataon’olo ani-zay koa ty mpanori-dia azy. (Jaona 15:20) Fe hana laza soa anivon’ny fiangona eo iha laha malio fandaisam-bata manahaky an’i Jesosy avao.​—Mat. 11:19.

19. Ino ty tafilitsy amy hoe “manambaly raiky”?

¹⁹ “Manambaly raiky.” Laha manambaly iha, le tsy maintsy manaraky ty fitsipikin’i Jehovah mikasiky fanambalea hoe lahilahy raiky noho ampela raiky ro mahazo mifanambaly. (Mat. 19:3-9) Tsy tokony hijangajanga mihintsy ty lahilahy Kristiana. (Heb. 13:4) Tsy zay avao, fa tsy tokony hivaliky amy valiny ie ka tsy hihaminkamy ampela hafa.​—Job 31:1.

20. Akory ty ampisehoan’ny lahilahy raiky hoe ‘mahay manday soa’ ty fianakaviany ie?

²⁰ ‘Mahay manday soa ty anany noho ty fianakaviany.’ Tsy maintsy manao soa ty andraikitsinao iha laha loham-pianakavia. Manaova fotoam-pivavahan’ny fianakavia tsy tampaky. Miaraha manompo amy valinao noho anakinao, le miaraha matetiky amin-drozy kiraidraiky laha azo atao. Ampeo hinama amy Jehovah ty anakinao. (Efes. 6:4) Asehon’ny lahilahy raiky hoe mahavita mikarakara fiangona ie laha mikarakara soa ty fianakaviany.​—Ampitovizo amy 1 Timoty 3:5.

21. Ino ty azonao atao laha mbo tsy mpikarakara fiangona iha?

²¹ Nareo rahalahy, laha mbo tsy mpikarakara fiangona iha le diniho soa ty raha niresahintsika tato sady mivavaha mikasiky ani-zay. Ianaro fepetra takỳ amy mpikarakara fiangona rey, le miezaha mafy mba hahafeno an’ny fepetra reo. Eritsereto hoe zisiky aia ty fitiavanao an’i Jehovah noho ty mpiara-manompo aminao, le ampitombò ty fanirianao hanampy an-drozy. (1 Pet. 4:8, 10) Iha mihintsy amy zay ro hahita hoe mahafaly ty manampy ty fianakavianao ara-panahy. Enganè Jehovah hitahy ty ezaky ataonao mba ho lasa mpikarakara fiangona!​—Fil. 2:13.