Ankasitraho Lahilahy Nitendren’i Jehovah noho Jesosy Reo

1. Ino ty raha sisany namean’i Jesosy antsika?

TSY misy olo matariky mandilatsy an’i Jesosy. Nampiasa ty heriny ie tamin’ie mbo tan-tany etoy ka nanao fahagagà mba hanampea ty olo hafa. (Lioka 9:12-17) Nanome raha farani-ze bevata ie ka nanome ty ainy ho antsika. (Jaona 15:13) Mbo nanampy olo avao Jesosy ndre tafaran’ny nameloma azy. Fa nampitamà ie hoe hangataky amy Jehovah ie mba hanome fanahy masy antsika, le fanahy io amy zay ro hampianatsy noho hampionona antsika. Le zay vatany ty nataony. (Jaona 14:16, 17, f.a.p.; 16:13) Mampiasa ty fivorian’ny fiangona koa Jesosy mba hanampea antsika hahavita hanao mpianatsy amy tany toy iaby.​—Mat. 28:18-20.

2. Ia ty anisan’ny ‘lahilahy natao fanomeza’ resahin’ny Efesianina 4:7, 8 io?

² Mbo misy raha hafa koa namean’i Jesosy antsika. Nanoratsy apostoly Paoly fa lafa niakatsy an-danitsy any Jesosy, le ‘nanome lahilahy nataony fanomeza’ ho antsika. (Vakio Efesianina 4:7, 8.) Nanazava Paoly fa nanome an’ny lahilahy reo Jesosy mba hanampy ty fiangona amy fomba sankarazany. (Efes. 1:22, 23; 4:11-13) Ia iaby ty anisan’ny ‘lahilahy natao fanomeza’ reo henanizao? Ty mpikarakara fiangona, ty anti-panahy, noho ty mpiandraikitsin’ny faritsy.a Tsy lavorary aloha lahilahy reo ka mety hanao diso. (Jak. 3:2) Fe mampiasa an-drozy Jesosy Kristy Tompontsika mba hanampea antsika. Kadô nameany antsika rozy.

3. Ino ty azontsika iaby atao mba hanohana ty asa ataon’ny ‘lahilahy natao fanomeza’ reo? Manomeza ohatsy.

³ Nitendren’i Jesosy hampahery ty fiangona ‘lahilahy natao fanomeza’ reo. (Efes. 4:12) Fe samby afaky manampy an-drozy tsika iaby mba hahavitan-drozy an’ny andraikitsy bevata zay. Amy fomba akory? Toy misy ohatsy. Ndao atao hoe manory Efitrano Fanjakà tsika. Misy amintsika zao mandramby anjara mivanta amy fanorena iny. Ty ilany manoha an’ny asa iny ka manday hany ho an’ny mpiasa rey, na mitatitsy ze raha ilà, na manampy amy fomba hafa. Manahaky ani-zay koa fa samby afaky manoha ty ezaky ataon’ny mpikarakara fiangona, ty anti-panahy, noho ty mpiandraikitsin’ny faritsy tsika, amy ty raha volanintsika noho ataontsika. Ndao hodinihintsika hoe ino ty soa azontsika baka amy ty asa mafy ataon’ny lahilahy nataon’i Jesosy fanomeza ho antsika reo, le akory ty ampisehoantsika amin-drozy noho amy Jesosy hoe ankasitrahantsika rozy.

“MANAMPY” ANTSIKA TY MPIKARAKARA FIANGONA

4. Ino ty raha sisany nataon’ny mpikarakara fiangona tamy taonjato voalohany mba hanampea ty olo hafa?

⁴ Nivoatendry ho mpikarakara fiangona ty rahalahy sisany tamy taonjato voalohany. (1 Tim. 3:8) Atao raha rozy azy nivolanin’i Paoly hoe ‘nanampy olo’ io. (1 Kor. 12:28) Midika zany zay fa ty mpikarakara fiangona ro tena nanao ty ankamaroan’ny asa tamy fiangona eo, amy zay ty anti-panahy afaky nifantoky tamy fampianara noho fikarakarà ty aondrin’i Jehovah. Mety nanampy tamy fanaova kopỳ ty Soratsy Masy, ohatsy, ty mpikarakara fiangona, na mety rozy ro nivily ani-ze fitaova nilà mba hanaova kopỳ.

5. Ino ty asa sasany ataon’ny mpikarakara fiangona henanizao mba hanampea antsika?

⁵ Diniho moa ty raha bevata sasany ataon’ny mpikarakara fiangona amy fiangonanareo eo. (1 Pet. 4:10) Mety nitendrè hikarakara konty rozy na handamy ty faritanin’ny fiangona, na hikarakara boky, sonô, hikarakara mpanatriky, na hanampy amy fikojakojà Efitrano Fanjakà. Tena mahasoa ty fiangona asa iaby reo. (1 Kor. 14:40) Ankoatsini-zay, misy koa mpikarakara fiangona manao anjara amy Fivoria amy Fiaina noho Fanompoa, noho manao lahateny ho ahi-ty maro. Mety ho voatendry hanampy ty mpiandraikitsin’ny andia-mpitory koa ty mpikarakara fiangona. Kindraiky le mety hotaomin’ny anti-panahy hanao fitsidiha aondry ty mpikarakara fiangona mahay.

6. Mivolana antony vitsivitsy mahavy antsika tokony hankasitraky ty asa mafy ataon’ny mpikarakara fiangona.

⁶ Ino ty soa azon’ny fiangona baka amy ty asa ataon’ny mpikarakara fiangona? Hoy Beberly,b ranabavy mipetraky a Bolivỳ any: “Soa avao fa eo mpikarakara fiangonanay reo. Lasa soasoa ty mivory. Vokatsin’ny asa ataon-drozy, le afaky mihira aho, manome valin-teny, mijanjy lahateny, noho miana-draha baka amy video noho sary. Ataon-drozy azo antoky hoe voaro ty mpanatriky lafa mivory sady ampean-drozy ze tsy afaky mivory mba haharaky soa ty fandahara baka an-tranony any. Saky vita koa ty fivoria, le mbo manampy amy fanadiova rozy, mikarakara konty, sady ataon-drozy azo antoky hoe mahazo ze boky ilànay zahay. Tena mankasitraky an-drozy aho!” Hoy koa Leslie, ranabavy mipetraky a Kolombỳ any sady manambaly anti-panahy: “Tena mila ty fanampean’ny mpikarakara fiangona valiko. Ho nivozaky ie nanao an’ny andraikitsy maro amy fiangona eo reo laha tsy nisy an-drozy. Mazoto miasa rozy sady parè hanampy avao. Tena mankasitraky an-drozy aho.” Azo antoky fa mankasitraky ty asa ataon’ny mpikarakara fiangona koa iha.​—1 Tim. 3:13.

7. Akory ty ampisehoantsika hoe mankasitraky ty mpikarakara fiangona tsika? (Henteo koa sary io.)

⁷ Mety mankasitraky ty mpikarakara fiangona aloha tsika anatintsika any, fe mampirisiky antsika ty Baiboly hoe: ‘Asehò fa mahay mankasitraky nareo.’ (Kol. 3:15) Miresaky ty raha ataony mba hampisehoa ty fankasitrahany Christophe, anti-panahy a Failandy any. Hoy ty asany: “Mandefa karta na mesazy misy andinin-teny raiky amy mpikarakara fiangona aho, le soratiko ao ze raha nivolaniny na nataony ka nampahery ahy. Volaniko koa ie hoe tena ankasitrahako ty asa ataony.” Mivavaky matetiky ho an’ny mpikarakara fiangona koa Pascal noho Jael, mpivaly mipetraky a Nouvelle-Calédonie any. Hoy Pascal: “Nivavaky matetiky ho an’ny mpikarakara fiangonanay reo zahay tato ho ato. Nisaotsy an’i Jehovah zahay nanome an-drozy, le nangataky azy koa zahay mba hanoha noho hanampy an-drozy avao.” Mijanjy ty vavaky manahaky ani-zay Jehovah ka lasa mandramby soa ty olo iaby amy fiangona eo.​—2 Kor. 1:11.

“MIASA MAFY” TY ANTI-PANAHY

8. Manino Paoly ro nanoratsy hoe “miasa mafy” ty anti-panahy tamy taonjato voalohany? (1 Tesalonianina 5:12, 13)

⁸ Niasa mafy ho an’ny fiangona ty anti-panahy tamy taonjato voalohany. (Vakio 1 Tesalonianina 5:12, 13; 1 Tim. 5:17) ‘Nitariky’ ty fiangona rozy, zany hoe nitariky fivoria noho nandramby fanapahan-kevitsy. ‘Nananatsy’ ty rahalahy noho anabavin-drozy koa rozy ka nanome torohevitsy amim-pitiava mba hiarova ty fiangona. (1 Tes. 2:11, 12; 2 Tim. 4:2) Azo antoky fa tsy maintsy mbo niasa mafy koa lahilahy reo mba hameloma ty fianakavian-drozy noho hanampea an-drozy hifandramby soa amy Jehovah avao.​—1 Tim. 3:2, 4; Tit. 1:6-9.

9. Ino ty andraikitsy sisany ataon’ny anti-panahy amy zao?

⁹ Be atao koa ty anti-panahy henanizao. Mpitory ty vaovao soa rozy. (2 Tim. 4:5) Manome modely soa rozy ka mazoto mitory, mandamy ty asa fitoria amy faritanin-drozy, sady mampiofana antsika mba hahay hitory noho hampianatsy. Nitendren’i Jehovah hitsara koa rozy. Mamindra fo noho tsy manavakavaky rozy lafa manao ani-zay. Lafa misy Kristiana manao fahotà bevata, le miezaky ty anti-panahy manampy azy hifandramby soa amy Jehovah ndraiky. Fe mitandrina koa rozy mba hahavy ty fiangona halio avao. (1 Kor. 5:12, 13; Gal. 6:1) Ndre eo raha iaby rezay, le mpiarakandro ro tena ahaiza ty anti-panahy. (1 Pet. 5:1-3) Manao lahateny voaoma soa miory amy Baiboly rozy, miezaky hahay soa ty olo kiraidraiky anivon’ny fiangona eo, sady manao fitsidihan’aondry. Ty anti-panahy sisany koa manampy amy fanorena noho fikojakojà Efitrano Fanjakà, mandamy fivoriambe, noho miaraky miasa amy Komity Mifandramby amy Hopitaly noho Antoko Mpamangy Marary, ankoatsin’ny andraikitsy hafa ataon-drozy. Tena miasa mafy ho antsika ty anti-panahy!

10. Mivolana antony vitsivitsy mahavy antsika tokony hankasitraky ty asa mafy ataon’ny anti-panahy.

¹⁰ Fa nivola Jehovah hoe hikarakara soa antsika mpiarakandro reo ka ‘tsy hatahotsy sasy tsika na hangitikitiky.’ (Jer. 23:4) Tena nahatsapa ani-zay mihintsy Johanna, ranabavy mipetraky a Failandy any lafa narary mafy reniny. Hoy ty asany: “Tsy zatsy miresaky ty fihetseham-poko amin’olo aho. Fe nisy anti-panahy raiky zay nanam-pahareta nijanjy ahy lafa zaho ta ho niresaky ty raha nampiasa loha ahy, ndre tsy tena haiko aza ie. Niaraky nivavaky tamiko ie, sady nanome toky ahy hoe tea ahy Jehovah. Tsy tena tiaroko aloha ty raha nivolaniny tamy zay, fe tiaroko hoe lasa tsy niasa loha sasy aho. Nino aho hoe Jehovah ro naniraky azy mba hanampy ahy amy fotoa tena nilako fanampea iny.” Ino ty raha fa nataon’ny anti-panahy amy fiangonanareo eo mba hanampea anao?

11. Akory ty ampisehoantsika hoe mankasitraky ty anti-panahy tsika? (Henteo koa sary io.)

¹¹ Tean’i Jehovah laha asehontsika hoe tena ankasitrahantsika ‘ty asa ataon’ny anti-panahy.’ (1 Tes. 5:12, 13) Hoy Henrietta, ranabavy mipetraky a Failandy any: “Parè hanampy avao ty anti-panahy, fe tsy midika zay hoe manam-potoa maro rozy sady mana hery mandilatsy ty hafa, na hoe tsy misy raha manahira an-drozy mihintsy. Kindraiky aho mivola amin-drozy hoe: ‘Vasa mba hainao ranadahy hoe mana zahay mana anao.’” Hoy koa Sara, ranabavy mipetraky a Tirkỳ any: “Mila ampaherezy ty anti-panahy mba hahafahan-drozy manao ty asan-drozy avao. Azontsika atao zany ty mba manoratsy karta ho an-drozy, manasa an-drozy hihina, na miaraky manompo amin-drozy.” Misy anti-panahy tena ankasitrahanao va satria tena miasa mafy amy fiangona eo? Milà fomba hampisehoanao hoe ankasitrahanao ie.​—1 Kor. 16:18.

MAMPAHERY TY MPIANDRAIKITSIN’NY FARITSY

12. Ino ty fandahara natao mba hampahereza ty fiangona tamy taonjato voalohany? (1 Tesalonianina 2:7, 8)

¹² Misy lahilahy sisany koa nitendren’i Jesosy Kristy mba hanampy ty fiangona amy fomba hafa. Nampiasa ty anti-panahy ta Jerosalema ao ie mba haniraky an’i Paoly, Barnabasy, noho olo hafa hitety faritsy. (Asa. 11:22) Ino ty antony? Mba hampahery ty fiangona, manahaky ty ataon’ny mpikarakara fiangona noho ty anti-panahy avao. (Asa. 15:40, 41) Nahafoy raha maro lahilahy reo mba hanaova an’ny asa io. Misy fotoa aza rozy nirisiky ty ain-drozy mihintsy mba hampianara noho hampahereza ty hafa.​—Vakio 1 Tesalonianina 2:7, 8.

13. Ino ty sisany amy andraikitsin’ny mpiandraikitsin’ny faritsy?

¹³ Tsy mipetraky an-tany raiky ty mpiandraikitsin’ny faritsy fa mandeha lava. Ty sisany aza mandeha lavitsy mba hitsidiha fiangona. Sankerinandro ty mpiandraikitsin’ny faritsy tsy maintsy manao lahateny maromaro, manao fitsidihan’aondry, mitariky fivorian’ny mpisava lala, fivorian’ny anti-panahy, noho fivoria alohan’ny fanompoa. Manoma lahateny ie sady mandamy fivoriamben’ny faritsy noho vondrom-paritsy. Mampianatsy amy sekolin’ny mpisava lala ie, mandamy fivoria manoka miaraky amy mpisava lala amy faritsy iny eo. Tsy zay avao fa mbo mikarakara raha na asa bevata noho malisa ampanaovin’ny biròn’ny sampana azy koa ie.

14. Mivolana antony vitsivitsy mahavy antsika tokony hankasitraky ty asa mafy ataon’ny mpiandraikitsin’ny faritsy.

¹⁴ Ino ty soa azon’ny fiangona baka amy ty asa ataon’ny mpiandraikitsin’ny faritsy? Hoy rahalahy raiky mipetraky a Tirkỳ any zay: “Mandrisiky ahy fitsidiha rey mba hanoka fotoa maro hanampea an’ny rahalahy noho anabaviko reo. Fa maro avao mpiandraikitsin’ny faritsy nihitako zay, fe mbo tsy nisy amin-drozy nanao ze hahavy an-tena hahatsapa hoe manabataba an-drozy tena lafa mamonjy an-drozy satria be atao rozy, na tsy ta hiresaky amin-tena.” Nisy fotoa Johanna, azy niresahintsika taloha teny iny niaraky nitory tamy mpiandraikitsin’ny faritsy, fe tsy nahatratsy olo an-trano mihintsy rozy. Hoy ty asany: “Tsy hohalinoko mihintsy andro io. Vo nifindra trano amin’io rahavaviko roe rezay, le nalahelo an-drozy aho. Tena nampahery ahy mpiandraikitsin’ny faritsy iny sady nampeany aho hahita hoe henanizao avao tsika ro mety tsy afaky mipetraky marìny ty fianakaviantsika noho ty namantsika, fa lafa tsika hiay mandrakizay amy tontolo vaovao any le ho afaky hiaraky amin-drozy avao.” Samby mana raha ahatiarovantsika an’ny mpiandraikitsin’ny faritsintsika reo tsika.​—Asa. 20:37–21:1.

15. a) Laha hentea ty 3 Jaona 5-8, akory ty ampisehoantsika hoe mankasitraky ty mpiandraikitsin’ny faritsy tsika? (Henteo koa sary io.) b) Manino tsika ro tokony hankasitraky ty valin’ny rahalahy voatendry reo, le akory ty hanaovantsika ani-zay? (Henteo ty efajoro hoe “Tiarovo Valin-drozy Rey.”)

¹⁵ Nampirisihin’ny apostoly Jaona Gaio mba hampiantrano an’ny rahalahy nitsidiky mba hampahery ty fiangona rey, sady ‘hikarakara soa an-drozy mifanaraky amy ze itiava-Ndranahary azy.’ (Vakio 3 Jaona 5-8.) Ka manao akory koa ty hanaovantsika ani-zay? Lafa mitsidiky ty mpiandraikitsin’ny faritsy, le misy fandahara mikasiky sakafo noho fanompoa amy herinandro itsidihany iny. Azontsika atao ty mandramby anjara noho manoha an’ny fandahara rey. Nisy raha hafa koa nataon’i Leslie, azy niresahintsika taloha teny iny mba hampisehoany ty fankasitrahany. Hoy ty asany: “Nivavaky aho mba hamean’i Jehovah an-drozy ze raha ilàn-drozy. Nanoratsy taratasy ho an-drozy koa zahay morovaly, le nivolaninay hoe tena nanampy anay ty fitsidiha ataon-drozy.” Tiarovo fa manahaky ty olo iaby avao ty mpiandraikitsin’ny faritsy. Misy fotoa rozy mety harary, hiasa loha, noho ho kivy mihintsy aza. Mety nivavaky tamy Jehovah rozy tamy fotoa zay le nila fanampea. Mety ho ty safà mampahery ataonao na ty kadô kelikely ameanao vasa ro fomba amalean’i Jehovah ty vavaky nataon’ny mpiandraikitsin’ny faritsinareo iny.​—Ohab. 12:25.

MILA AN’NY ‘LAHILAHY NATAO FANOMEZA’ REO TSIKA

16. Laha hentea ty Ohabolana 3:27, ino ty fanontanea mety azon’ny rahalahy dinihy?

¹⁶ Mila rahalahy maro tsika maneran-tany mba ho lasa ‘lahilahy natao fanomeza.’ Laha rahalahy vita batisa iha, “azonao atao” va “ty manampy”? (Vakio Ohabolana 3:27.) Miezaky hahafeno fepetra ho mpikarakara fiangona va iha? Laha fa mpikarakara fiangona iha, parè hikarakara ze raha ilàn’ny mpiara-manompo aminao reo va iha ka miezaky ho lasa anti-panahy?c Afaky manao fanovà va iha mba ho afaky hanatriky Sekolin’ny Mpitory Fanjakà Iny? Hampiofana noho hanampy anao sekoly io amy zay iha mba ho azon’i Jesosy ampiasà bebe kokoa. Laha tsapanao hoe mbo sarotsy aminao ty hanao an’ny raha reo, le mivavaha amy Jehovah. Angataho ty fanahiny masy mba hanampy anao hahavita hanatanteraky ani-ze fanendrea ho azonao.​—Lioka 11:13; Asa. 20:28.

17. Manaporofo ino mikasiky an’i Jesosy Kristy Mpanjakantsika ty raha ataon’ny ‘lahilahy ho fanomeza’ reo?

¹⁷ Hita amy asa mafy ataon’ny rahalahy nitendren’i Jesosy ho ‘lahilahy ho fanomeza’ rey fa mitariky antsika avao ie amy andro farany zao. (Mat. 28:20) Tsy falifaly va iha satria mana Mpanjaka be fitiava, matariky, noho midary antsika ka manome rahalahy mba hikarakara ze raha ilàntsika? Milà fomba zany mba hampisehoa hoe ankasitrahanao ty asa mafy ataon’ny lahilahy reo. Le ka halino mihintsy ty misaotsy an’i Jehovah, satria baka aminy ty “fanomeza soa iaby noho ty fanomeza tsy misy handrany iaby.”​—Jak. 1:17.