Nareo Rahalahy, Miezaha ho Lasa Anti-panahy!

1-2. Ino iaby ty “asa soa” ataon’ny anti-panahy?

FA ELAELA va ty naha mpikarakara fiangona anao? Laha zay ie, le fa niezaky hana toetsy takỳ amy anti-panahy iha. Ta hanao an’ny “asa soa” io va iha?​—1 Tim. 3:1.

² Ino iaby ty asa ataon’ny anti-panahy? Mitariky ty asa fitoria rozy, miezaky mafy mikarakara ty aondry, mampianatsy noho manatanjaky ty finoan’ny fiangona amy ty raha resahiny noho ataony. Mety soa laha kaihin’ny Baiboly hoe ‘lahilahy natao fanomeza’ anti-panahy miasa mafy rey.​—Efes. 4:8.

3. Ino ty tokony hataon’ny rahalahy laha ta hahafeno fepetra ho anti-panahy? (1 Timoty 3:1-7; Titosy 1:5-9)

³ Ino ty tokony hataon’ny rahalahy raiky laha maniry ho anti-panahy ie? Laha ta ho voaramby amy asa, ohatsy, ty olo raiky le tsy maintsy mana ty fahaiza ilàn’ny mpampiasa azy iny ie. Fe tsy manahaky ani-zay ty fanendrea anti-panahy. Laha maniry ho anti-panahy iha, le tsy ampy ty hoe mahay mitory noho mampianatsy avao. Mila mahafeno ty fepetra takìn’ny Soratsy Masy ho an’ny anti-panahy amy 1 Timoty 3:1-7 noho Titosy 1:5-9 ao iha. (Vakio.) Retoa ty sisany amy fepetra rezay: Miezaha hana laza soa ivelany noho anivon’ny fiangona eo, ho loham-pianakavia modely sady parè hanampy ty fiangona.

MIEZAHA HANA LAZA SOA

4. Ino ty dikan’ny hoe “tsy misy hokinokinoe”?

⁴ Laha ta ho anti-panahy iha, le tsy maintsy olo “tsy misy hokinokinoe,” zany hoe mana laza soa amy fiangona eo, amy zay tsy hisy hikinokino ty fandaisam-batanao. Fanampini-zay, le tokony ‘hana laza soa amin’olo ivelany’ eny koa iha. Mety hikinokino ty raha inoantsika ty olo tsy manompo an’i Jehovah, fe tokony halaza manao ty marina noho soa fandaisam-bata tsika. (Dan. 6:4, 5) Diniho zao: ‘Mana laza soa anivon’ny fiangona eo noho amin’olo ivelany eny va zaho?’

5. Akory ty ampisehoanao hoe “tea ty soa” iha?

⁵ Laha “tea ty soa,” ohatsy, iha le hifantoky amy toetsy soan’olo sady hidera an-drozy. Mahafaly anao koa ty manao raha soa ho an’ny hafa, mandilatsy ty tokony ho takỳ aminao mihintsy aza. (1 Tes. 2:8) Manino toetsy io ro tena ilàn’ny anti-panahy? Satria zay ro hanampy an-drozy ho falifaly lafa mampiasa ty fotoan-drozy mba hanampea ty mpiara-manompo. (1 Pet. 5:1-3) Fe ndre zay, le mahatsapa rozy hoe kelikely avao ty raha afoin-drozy laha ohary amy fifalea azony lafa manampy ty hafa.​—Asa 20:35.

6. Akory ty ampisehoanao tea “mandramby vahiny” iha? (Hebreo 13:2, 16; henteo koa sary io.)

⁶ Asehonao hoe “tea mandramby vahiny” iha laha manao raha soa ho an’ny hafa, anisani-zay ty olo tsy namanao marìny. (1 Pet. 4:9) Miresaky mikasiky ty olo tea mandramby vahiny ty boky raiky. Zao ty volaniny: “Sokafany ho an’olo tsy hainy ty tranony noho ty fony.” Diniho zao: ‘Tea mandramby vahiny va ty fahaizan’olo ahy?’ (Vakio Hebreo 13:2, 16.) Mizara ty raha ananany ty olo tea mandramby vahiny. Manao ani-zay amy mahantra noho amin’olo miasa mafy ie, ohatsy, hoe ty mpiandraikitsin’ny faritsy noho ty mpandahateny mpitsidiky.​—Gen. 18:2-8; Ohab. 3:27; Lioka 14:13, 14; Asa. 16:15; Rom. 12:13.

7. Akory ty ampisehoan’ny anti-panahy hoe “tsy tea drala” ie?

⁷ “Tsy tea drala.” Midika raha zay hoe tsy mifantoky amy drala noho hanana iha. Ty Fanjakà-Ndranahary avao ro ataonao voalohany amy fiainanao, na mahantra iha na mpanarivo. (Mat. 6:33) Ampiasao hanompoa an’i Jehovah, hikarakarà ty fianakavianao noho hanampea ty fiangona ty fotoanao noho ty herinao voho ty fanananao. (Mat. 6:24; 1 Jaona 2:15-17) Diniho zao: ‘Akory ty fahitako ty drala? Mijano va aho lafa mana ty raha tena ilàko? Sa mifantoky amy filan-drala noho fampitomboa ty hanañako aho?’​—1 Tim. 6:6, 17-19.

8. Akory ty ahità hoe ‘mahay mandanjalanja amy raha fataonao’ iha sady ‘mana fifehezam-bata’?

⁸ Laha iha ‘mahay mandanjalanja amy raha fataonao’ noho ‘mana fifehezam-bata,’ le tsy hanao raha tafahoatsy amy fiainanao. Tsy mihina na mino tafahoatsy iha sady hanao fisikìna noho pozy mety soa, voho hahay hifily fialam-boly. Tsy teanao ty manahaky ty fomba fiainan’olo tsy manompo an’i Jehovah. (Lioka 21:34; Jak. 4:4) Kalma avao koa iha ndre misy olo manao raha mampeloky anao. “Tsy mamo lava” sady tsy olo malaza ho mpino toaky iha. Diniho zao: ‘Hita amy fomba fiainako va fa mahay mandanjalanja noho mana fifehezam-bata aho?’

9. Ino ty dikan’ny hoe “mandiniky soa” noho ty hoe “tea filamina”?

⁹ “Mandiniky soa” iha laha mieritseritsy soa mikasiky ty torolalan’ny Baiboly amy raha iaby ataonao. Handramby fanapahan-hakevitsy soa iha satria mandiniky ty torohevitsin’ny Baiboly. Tsy malisa hanapa-kevitsy iha, fa miezaky mandiniky soa mikasiky an’ny fanazavà ilànao iny. (Ohab. 18:13) Lasa mahay mandanjalanja amy zay iha lafa manapa-kevitsy sady ho hita koa hoe mitovy fomba fanenty amy Jehovah. “Tea filamina” koa iha laha manao raha milamy sady manaja fotoa. Lasa olo azo atokisa noho manaraky toromariky ty ahaizan’olo anao amy zay. Hana laza soa iha laha miezaky hana an’ny toetsy iaby resahintsika reo. Ndao hohenteantsika hoe ino ty hanampy ty loham-pianakavia ho modely, satria anisan’ny fepetra takìn’ny Soratsy Masy raha zay.

MIEZAHA HO LOHAM-PIANAKAVIA MODELY

10. Akory ty ahità hoe ‘mahay manday soa ty fianakaviany ty lahilahy raiky?

¹⁰ Laha rahalahy manambaly iha ka maniry ho lasa anti-panahy, le tiarovo fa misy vokany amy fanendrea anao ty lazan’ny fianakavianao. Mila ‘mahay manday ty fianakavianao’ koa iha. Tokony ho loham-pianakavia be fitiava noho mandramby andraikitsy iha. Tafilitsy amy zay ty hoe mitariky ty valinao noho anakinao hanao fotoam-pivavaha, hanatriky fivoria noho hanao ze faran’ny herinao amy fanompoa. Manino raha zay ro tena ilà? Nivola ho zao apostoly Paoly: ‘Laha misy lahilahy tsy mahay manday ty fianakaviany, le ho hainy va ty hikarakara ty fiangona-Ndranahary?’​—1 Tim. 3:5.

11-12. Manino ro misy vokany amy fanendrea ty rahalahy raiky ty fandaisam-batan’ny fianakaviany. (Henteo koa sary io.)

¹¹ Laha mana anaky tsy ampy tao iha, le tokony ‘hanoriky safà noho hanaja anao soa’ rozy. Tokony ho be fitiava iha lafa mampianatsy noho mampiofana an-drozy. Mazava ho azy fa teanao laha sambatsy, mihisa noho homehy manahaky ty ajà iaby avao ty anakinao. Fe mila ampianarinao hanoriky safà, hanaja olo noho ho hendry rozy. Tsy maintsy manao ze azonao atao koa iha mba hanampea ty anakinao hifandramby soa amy Jehovah, hanaraky ty torolalan’ny Baiboly, noho handroso amy batisa.

¹² “Manan’anaky mpino tsy malaza ho manaram-po amy raha raty na mahery loha.” Ino ty vokany laha manao fahotà bevata ty anan’ny rahalahy raiky mbo mipetraky an-tranony ao? Laha tsy nanao soa ty andraikitsiny ie ka tsy nampiofana noho nanatsy ty anany, le azo antoky fa tsy hahafeno fepetra ho anti-panahy.​—Henteo Ty Tilikambo Fiambena 15 Oktobra 1996, p. 21, feh. 6-7.

MANAMPY TY FIANGONA

13. Akory ty ampisehoanao hoe “mpandefitsy” iha sady tsy “mpizizo amy ty hevitsinao”?

¹³ Tena ilà anivon’ny fiangona eo ty rahalahy mana toetsy soa. Mampisy filongoa, ohatsy, ty olo “mpandefitsy.” Laha teanao hoe mpandefitsy ty ahaizan’olo anao, le janjino ty hafa sady miezaha hahatakatsy ty fomba fihevitsiny. Eritsereto hoe miaraky mivory amy anti-panahy hafa iha. Parè hanoha ty fanapa-kevitsin’ny maro va iha laha tsy mifanohitsy amy torolalan’ny Baiboly raha zay? Tsy mamorosè ty hafa hanao ze teany hatao ty olo raiky “tsy mpizizo amy ty hevitsiny.” Satria hainy hoe ilà ty mijanjy ty hevitsin’ny hafa. (Gen. 13:8, 9; Ohab. 15:22) “Tsy mpila aly” na “tsy mora meloky.” Midika raha zay hoe soa fanahy noho mahay mandanjalanja iha fa tsy masiaky. Tea filongoa iha ka manao raha voalohany mba hilongoa amin’olo, ndre tsy mora aza ty manao ani-zay. (Jak. 3:17, 18) Mety ho kalma ty olo masiaky, anisani-zay ty mpanohitsy antsika, laha soa fanahy tsika lafa miresaky amin-drozy.​—Mpits. 8:1-3; Ohab. 20:3; 25:15; Mat. 5:23, 24.

14. Ino ty dikan’ny hoe “tsy vaovao amy finoa” noho ty hoe “tsy mivaliky”?

¹⁴ “Tsy vaovao amy finoa” ty rahalahy raiky mahafeno fepetra ho anti-panahy. Marina aloha fa tsy voatery ho vita batisa anatin’ny tao maro iha, fe mila fotoa ty hahavy anao ho Kristiana matotsy. Alohan’ny hanendrea anao ho anti-panahy, le tsy maintsy miambany manahaky an’i Jesosy iha sady parè handiny an’i Jehovah mba hanome andraikitsy fanampiny anao. (Mat. 20:23; Fil. 2:5-8) Asehonao hoe “tsy mivaliky” iha laha mivahatsy amy Jehovah noho ty fitsipikiny sady manoriky ty toromariky ameany amy alalan’ny fandaminany.​—1 Tim. 4:15.

15. Tsy maintsy mahay mandaha-teny marè va ty anti-panahy? Hazavao.

¹⁵ Resahin’ny Soratsy Masy mazava soa fa tsy maintsy “mahay mampianatsy” ty mpiandraikitsy. Midika va raha zay hoe tsy maintsy mahay mandaha-teny marè iha? Tsy zay mihintsy! Tsy voatery mahay mandaha-teny marè ty anti-panahy iaby. Mahay mampianatsy soa rozy lafa amy fanompoa eny noho lafa mitsidiky aondry. (Ampitovizo amy 1 Korintianina 12:28, 29 noho Efesiaina 4:11.) Fe ndre zay, le mila miezaky iha mba hanasoa ty fahaizanao mampianatsy avao. Ino ty hanampy anao hahavita ani-zay?

16. Ino ty hanampy anao hahay hampianatsy soa? (Henteo koa sary io.)

¹⁶ “Manoriky soa an’ny safà azo antoky iny.” Ho lasa mpampianatsy mahay iha, laha ataonao miory amy Safà-Ndranahary ty raha ampianarinao amason’olo maro noho ty torohevitsy ameanao. Ianaro soa ty Baiboly noho ty bokintsika. (Ohab. 15:28; 16:23.) Lafa mianatsy iha, le henteo soa hoe akory ty azonao anoriha an’ny andininy iny. Lafa mampianatsy koa iha, le miezaha mba hidosiky fon’olo. Hihasoa ty fahaizanao mampianatsy laha mangataky soso-kevitsy amy anti-panahy fa ampy traikefa iha sady orihinao raha iny. (1 Tim. 5:17) Mila ‘mahay mampahery’ ty rahalahy noho anabavy koa ty anti-panahy. Fe misy fotoa rozy tsy maintsy manoro hevitsy na ‘mananatsy’ ty mpiara-manompo mihintsy. Fe tsy maintsy soa fanahy avao ty anti-panahy lafa manao ani-zay. Ho mpampianatsy mahay iha laha soa fanahy noho be fitiava, sady ataonao miory amy Safà-Ndranahary ty fampianaranao. Hanahaky an’i Jesosy, azy Mampianatsy Bevata iny iha amy zay.​—Mat. 11:28-30; 2 Tim. 2:24.

TOHIZO AVAO TY EZAKY ATAONAO

17. a) Ino ty hanampy ty mpikarakara fiangona hiezaky avao? b) Ino ty tokony hotiarovin’ny anti-panahy lafa mandiniky rahalahy atolotsy ho anti-panahy rozy? (Henteo ty efajoro hoe “Mahaiza Mandanjalanja Lafa Mandiniky An’ny Rahalahy Reo.”)

¹⁷ Mety mieritseritsy zao ty mpikarakara fiangona sisany hoe tsy hahafeno fepetra ho anti-panahy mihintsy ie, lafa nandiniky an’ny fepetra rey. Fe tiarovo fa tsy mitamà anao hana an’ny reo amy fomba lavorary Jehovah na ty fandaminany. (1 Pet. 2:21) Hanampy anao hahafeno fepetra koa ty fanahy masin’i Jehovah. (Fil. 2:13) Misy amy fepetra reo va teanao hiezaha? Mivavaha amy Jehovah mikasiky ani-zay. Mangataha soso-kevitsy amy anti-panahy raiky hoe akory ty hanasoavanao an’ny toetsy zay.

18. Ampirisihy hanao ino ty mpikarakara fiangona iaby?

¹⁸ Enganè tsika iaby, anisani-zay azy fa anti-panahy reo mba hiezaky avao hana an’ny toetsy nidinihintsika tato rey. (Fil. 3:16) Mpikarakara fiangona va iha? Tohizo avao ty ezaky fa ataonao! Angataho Jehovah hampiofana noho hamakopako anao, amy zay iha azony ampiasà mba hanompo azy noho hanampy ty fiangona. (Isa. 64:8) Loniky lahy Jehovah hitahy ty ezaky ataonao mba ho lasa anti-panahy!