Tiaronao Va?

Nivakinao soa va Tilikambo Fiambena faramparany rey? Henteo moa vasa hainao ty mamaly an’ny fanontanea retoa:

Akory ty tokony ho fanandesantsika ty ampela laha hentea ty modelin’i Jehovah?

Tsy avakavahany rozy, sady tsy eritseretiny ho ambany mandilatsy ty lahilahy. Mijanjy ty ampela Ndranahary, sady midary ty fihetseham-pon-drozy noho ty raha mampiasa loha an-drozy. Atokisany koa rozy ka anankinany andraikitsy mba hanatanteraky ty asany.​—w24.01, p. 15-16.

Mivola ty Efesianina 5:7 hoe: “Ka manao manahaky an-drozy.” Akory ty hampiharantsika an’ny raha io?

Nampitandrina antsika apostoly Paoly mba tsy hinama amin’olo manao raha mba hahavy antsika tsy hanoriky ty fitsipiki-Ndranahary. Tafilitsy amy zay ndre ty olo mifandramby amintsika mivanta na amy alalan’ny tranonkala fifandrambesa.​—w24.03, p. 22-23.

Ino iaby ty tantara tsy marina mila halavirintsika?

Mila mitandrina tsika lafa misy tantara tsy voamarina soa baka amy namantsika, na lafa tsika mahavoaramby hafatsy amy alalan’ny mail baka amin’olo tsy haintsika. Mila mitandrina koa tsika amy mpivadi-pinoa manao kisary liana amy fahamarina.​—w24.04, p. 12.

Ino ty haintsika mikasiky ty fomba hitsaràn’i Jehovah an’i Solomona Mpanjaka, ty olo nimaty ta Sodoma noho Gomora tany, noho tamy Safodrano iny, le ino ty tsy haintsika?

Tsy afaky mivola tsika hoe nengan’i Jehovah ho ripaky mandrakizay rozy. Fe haintsika hoe mahay ty raha misy iaby Jehovah sady tena hamindra fo.​—w24.05, p. 3-4.

Manome toky antsika mikasiky ino ty hoe “Vatolampy” Ndranahary? (Deot. 32:4)

Afaky mialoky amy Jehovah tsika. Azo iantehera ie satria tozoro manatanteraky ty fampitamanany avao. Tsy miovaova koa ie ka tsy miova ty toetsiny sady tsy miova ty fikasàny.​—w24.06, p. 26-28.

Laha nifindra fiangona iha, ino ty hanampy anao ho tamà amy fiangona vaovao iny?

Miantehera amy Jehovah, fa hanampy anao ie manahaky ty nanampeany ty mpanompony taloha tany. Ka ampitahà an’ny fiangona nisy anao taloha iny amy azy vaovao io. Tohano ze raha iaby atao amy fiangonanao vaovao iny, le miezaha mba hahazo nama vaovao.​—w24.07, p. 26-28.

Ino ty fianara atoro antsika amy fanohara telo amy Matio toko faha-​25 ao rey?

Hita amy fanohara mikasiky aondry noho aosy iny fa tena mila tsy mivaliky tsika. Asehon’ny fanohara mikasiky virjiny mahihitsy noho gegy rey fa tena mila mioma noho miamby tsika. Le fanohara mikasiky talenta iny manasongadina ty maha vatan-draha ty hoe mazoto miasa mafy noho tsy lenalena lafa miasa.​—w24.09, p. 20-24.

Firy metra ty haabon’ny tilikambo filira tamy tempolin’i Solomona iny?

Laha hentea ty sora-tana sisany taloha tany, le “120 hakiho” ro hita amy 2 Tantara 3:4 ao, zany hoe 53 metra ty haabon’ny tilikambo filira iny. Fe misy asa soratsy hafa azo atokisa mampiasa hoe “20 kahio”, zany hoe sivy metra. Azy farany io ro atao raha marina laha hentea ty fatevin’ny rindrin’ny tempoly iny.​—w24.10, p. 31.

Ino ty dikan’ny hoe ‘manambaly raiky’ ty mpikarakara fiangona? (1 Tim. 3:12)

Midika zay fa manambaly ampela raiky avao ie sady tsy tokony hijangajanga. Tsy tokony hanao fihetsiky hafahafa amin’ampela hafa koa ie.​—w24.11, p. 19.

Manino tsika ro afaky mivola fa tsy ty raha atao amy Sakafo Harivan’ny Tompo ro resahin’ny Jaona 6:53?

Mivola ty Jaona 6:53 fa mila mihina ty nofotsin’i Jesosy noho mino ty liony tsika. Nivola ani-reo Jesosy tamy tao 32 A.K., tamy Jiosy ta Galilia any rey satria nila nampiseho finoa azy rozy. Fe herintao tafarani-zay ty nankalazà ty Sakafo Harivan’ny Tompo, ta Jerosalema any. Azy hiaraky manjaka amy Jesosy an-danitsy any rey ro niresahany tamy fotoa io.​—w24.12, p. 10-11.